TULAI LAMKA – FINALE

– Lealyan Thawmte

Tukum July khatawp leh August khabul a Tulai Lamka thupi zanga – ka gam, ka mii leh saa te khosak leh tenna khua. Beh leh nam tuamtuam, Meitei gam a singtangmi kichi te ki gawm khom na khua lian pen leh pau tuam tuam zang in, lah kitheisiam vekte tenna. Paite, Hmar, Lushei, Sim, Vaiphei, Zou, Gangte, Thadou, Kuki etc., innsak innkhang a i ten khomna khua uh. Meitei ten veng a neih ua zawng, midang a ina ngaih louh uh. Pangal tamlouten Hotel a bawngsa minsa a zuak uh bang lim ina sakluat nate – Lamka- ka muh dan kahon gelh hi.

Marwari dawr te pan i niiteng poimoh uh, aantang, havaai, aloo, hanawtna, sahbon, shampoo, meh huan nadi sathau ahihkeh Frooti, Kissan theitui, bawngnawi vui, masala, chi, chinni. Ahihkeh, i taa leh naute poimoh, exercise book – ichih maite- pencil, pen, rubber te bang. Ahihkeh, mul met nadi, i meet chia ki et nadi limlang, samkolh sim te adia poimoh khollou samsih te bang – deih leh uut hunhun a muh leh leitheih na.

Ahihkeh Bihari te pan, khedap khui te, sam meet te, ahihkeh Shillong, Guwahati pan nahong paichia, na suitcase leh van puakte bus tung pan hon dom khiaksak – coolie – ichihte. Lamlian sik a chana/mix zuakte leh nippi chianga a mange barab zuakte, kawltu tuii hon hekkhiak sakte. Phalbi zan a sathau sa tak a suan ‘bora’ (pakora) leh vaimiim em minsa zuakte bang ana om sek na Lamka ahi.

Lamka in Cinema Hall nih nei sek a. Vaai film nuamtaktak te suah hisek. Beh, nam leh pau omlou. Pathianni a ‘Matinee Show’ bang HOUSEFUL deuh gige hi. Sasang Gangte bangin Christmas leh Kumthak lai in, a Cinema Hall ah Midnight Show bang hih in -nungak leh tangval ten a Hall dim in ki en sek hi. Nehru Marg/Tiddim Road junction bul a siingpi Hotel khat bang Krismas leh Kumthak sung in zaan khovaak in kihong gige hi.

Tu in, hiaihun hi Tulai LAMKA hilou in ..huai hun hi LAMKA hita mawk hi.

Tu in zaw, Meitei helpawlten – Vaai te thil chiin achih uh- ahihkeh, thil chiin di hilou a, a theih uh khaini leh kuva te- eite bang in ina chiin tei mahmah uh kha – a gam achih ua, a hon kham ua, a zuaksawn tu a atheihte uh mi khat leh nih bang a thah nung un. A kuva leh Khaini pen i khopi Lamka ah muhding in om veve hi. Aman zaw pung deuh in teh. Vaai film et nawp huai tak tak te enkha bang om non lou uh. I hinkhua masawn lou in, nungkiik didan kawkmuh in ki om. Gam iit leh kua dou leh sual? Bang dou leh sual? Bang tum a, bang lampi zuih tum? Leh mabaan di thei taktak le om lou. Singtang khuate pan lehkhasiam lou, pil leh theihna neilou te bang in .38, AK-47, M-16 te tung tawn bang in Lamka kialou, i nam pumpii hon hentaang mawk uh. Thautang kihtaak na ziak – a pil leh thei, leh a gel thei te kam bang humbit a omta. Sum neiten kitatna a zangin, a neiloute ki thuak. Sih hi thil lauh huai ahi chi a thei kisa kitam lawlai. A galvaan tawiten thei lou uh. A theih uh chu thuneih na piak a om ahi uh chih hi zaw. Thautang in sihna pe thei. Atam zawte thautang a si uh. Thautang in thutak khem theilou. Kuamah a thei uut omlou. A thei ngam le ki omlou. Thau leh galvaan ah muanna om kichi vek. Hikha ding. A dawilawkte a din. Ajiak i neih phot ngai ahihkeh – a bawltawm tu i om ngai. Sih lau leh sum iit ki tamlua. Ka sih chiang, ka taksa lel leinuai feet 6/7 a kiphum di leh, ka neih leh lam tawi lou ding kahi – chih theinapi in lah thei uut lou ngen kihita. Hiai hi, i TULAI LAMKA hong himawk ta hi. Bangchik chiang TUBAN LAMKA thu i geel ding ua? Kindong ni.

Tu kum a Meitei gam a Naga om ten Christmas lawpna tawh kisai a, a khuate ua phalbi zan dak 10 tan dawr hong ding achih bang uh – mipi deihna taklang un, kithutuah na ensak uh hi. Lamka in, Manipur a kholian pen 2 na hi len chenchan mahleh, hichibang a kithutuah na leh kum khat a, i ginna tawh kisai a, lawp leh kipahni hun te ah, beh leh nam tuam tuam omte kituak thei nailou uuh. I ginnna bel kibang vek mahleh.

Bangchik chianga, Lamka leh a sehvel a, Zo suan ten i unau hihnate uh thei ding i hiam chih ka theih kei. Hilele, tu kum bul a Lamka ka hong phak in Kathmandu, Nepal ah a mi khat kaki muhpih in, nam leh sahkhua, gam leh tenna hilouin – iitna leh hoihna, ginna leh kipiakzawhna thupi daan hon theisak hi. Nepalese te hi a Vaai a vaai di ua ka gintak lai in, ana huchi teuh kei ua. Kathmandu a ni 4 sung ka omlai in, lehkhazial tep, kuva haai, zukham hi ka mu kei a- Hindu sahkhua zui hilou uh amaw?

Te (t) rai(p) leh a suahlam gamte ua thautui a om ziak leh Maoist pawl ten Kumpi ( Monarchy) a deihlouh ziakun buaina om sim gige mahleh. Himahleh, hiai buaina te bel a gam tum lam uah hi deuh hi. Kathmandu ka tun ni in zaan/zingkaar daak 1.00 bang hita in. Denmark tawh hun kibang lou himahleh, ka sungte phone in damtak in Kathmandu ka tung chih ka hilh hi.

Lamka a kar 5 bang ka om nung in – Denmark ka kiik a hong hun a. Nepal ka tawn nawn hi. Ka lamet hetlouh in, Bhadrapur Airport apan, Kathmandu a Paite te khat in ahon vaaitun uut thu hi phone in a hon hilh hi. Ken kathmandu a Hotel ka book sa om ahi kachih zong in, Kathmandu Airport ah kahong tuak di chi leh ‘ei ki omzen a hotel na tung ngailou’ chi in. A tawp in kenle, eimi hon ngaina omnana ahih inchu chu kachi hi.

Amah hi Pastor Kam ahi.

Pastor Kam hi mi tagaah, Mission Compound a piang leh haksaatna chiteng ana thuak, sual na chiteng a ana kibual. Hilele, Pathian huntak a mu in leh tu a, Nepali tagaah naupang 53 enkawl leh Nepal a Pathian na sem ahi. A tangthu, gelh tum lel kahih ziakin kahon gelh sau keidi. Hilele, Pastor Kam sual dan leh hinkhua te hi thil danglam hilou hi. A Nu sihsan, Nuthak pan thil a tuahte. A naupan lai gentheihna tuahte. A khanglet lai a sual dan ahihkeh, sual hi a aki ngaihdan hi ..Bible thu zuui di hile – MEIDIL adia candidate no.1 ahi. 1970’s leh a khantouh lai a Tribal Colony a school khat a asual daan. Imphal Cinema Hall te a ticket ‘black’ a, a zuak dante, ticket kituh nadia ‘blade’ – mul metna tawh bang a ki tawm luut dan te, ‘Meitei Gang’ te tawh Usha, Friends, Asha (Cinema Hall min) a akisual dan te uh. A ngaih zawng Nu’n, a lawmpa a neihsan daante. Burma lam pan ‘Black Magic’ leh ‘martial arts’ ana sin daante leh 1980’s nung a, sum leh hauhsakna deih ziaka No.4 ( Heroin) ana zuakdante bang hon kum hi.

Sports a lungluut daante leh tuni tan a, zingkar dak 6.00 a thou a badminton akimawl daante bang tampi hon kum hi. Miit in le ka va mu ngei hi. Zingkaar, ka omna dia hon piak, inn sawngnih na pan in a tagaah khoi schoool kuan diiten. a uniform uh a aa uh hiam, a khutchin te uh a siang hiam, a necktie awh te uh dik hiam chi a a inn compound gate ua ‘security guard’ bang mai a dinga, a et chet chet ka muh chiah.. Pawlsawm nih vei ‘fail’. BSF dia inch 1 a niam..football siam mahleh chinglou. Hilele..Imphal pan Rajasthan a Bible College tung thei..heutute deihsakna mu leh.. Nepal leh Tibet gamgi tan tung a, amah bang tagaah naupang te etkawl a uut ziaka a – pil leh siamna sang nei hetlou hinapi in, a thil tup a tang tun hi.. …Pastor Kam hi, kei adia ka TULAI LAMKA mi kachih kialou in, i hinkhua ah bangchiteng a sual leh huham ina hih zong… HERO hithei lai ih etsaknalianpen ahi.

Thats TULAI LAMKA!!

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s