History revisited | SINGTOM Z.S.P GENERAL CONFERENCE 1984

1984 KUM DOUPI HLA NI 15-18 SUNGA SINGTOM ZSP CONFERENCE THUTE

1984 kum Doupi hla nimit 15th apat in 18th kikâlin Zomi Sangnaupang Pawlpi General Conference a 30 veina ka pienna khuo Singtom vângkhuo ah thupitahin na kizang hi.
Kei díngin ZSP General Conference ka tel masahna pen ahi.

Tuami Khawmpi sunga vâisaitu ahileh; ZSP,Chandel Block ahi. Tua lâiin Chandel Block President Pu.Jacob Tutkhanthang a na hi a,Pu.Joseph Khenkhanmang Secretary na hi hi. Khum hun lâi a,ZSP hqtrs General President pen Pu.Michael Ginzasuon ahihi. Pu.Francis Zamkhanthang in General Secretary Hqtrs a na pang hi. ZSP General Hqtrs makâite zintunna díngin Special inn khat a kisepdoh hi.

Kei pen Gujarat a B.E(Civil Engineering) ka zil lâitah ahia,ka suty pei toh na kituoh kha ahiziehin ZSP General Conference panpina in chiin pawlpi’a dínga poimaw pen SUM sûi in ZSP Canteen Manager in ka na pang luòng hi. Tu-a a phamsa, ka u Lucy Lamching in nâhpitahin ei na kithuopi hi. Canteen sai in ann ne ngimlou,tui dawn ngimlou leh tou ngimlou khopin vanzua in ka na pumbuoi hi. Nungâh-tangvâlte kuva hlâi a na sua mama uhhi. Kuva na kikhilai mun pen uh nehthei khat na hihi. Kuva ahileh zawlhêlna vanzah hoipen khat na hihi chi’n ka lungsim sungah ka na kuo hi. Ei mite nehthei leite ahileh; zatep, khaini, kuva, mithai chite ahihi.

Tuami hun a, Zinlien Pu.Satkholal,MOS(IFCD) na hihi. Churachandpur district; Gûngâl lam patsa in, Zogam ngâina mama UZO(United Zomi Organisation),Manipur state Phamsa Pu.Thangkhanlal, Dr. Lachinkhai, Pu.T.C Tungnung, Pu.Kamdou, Pu.T.Semkholun, Pu.Barry Thangchinmang Zomi, Pu. Lamkhothawng Taithul, Pu. Haumang, Dr. Lampu Taithul, Pu. Dominic Khammeng, Phamsa Dr. Tongkai Tungnung, Pi. Vungzamawi(Colonelpi Mawmawi),Pi. Chingkhokim leh adangdangte’n na zou uhhi.

Chandel district sunga gûngâl patin Pu.Khupchinmang MDC,Pu.Leo Kamchinthang MDC,Pu.Subedar Peter Thangkhokam,Pu Subedar Lawrence Langpum, Pu. Lienzathang Chief of Singtom,Pu. Zâmmâng Chief of Sugnu Lamhang, Pu.Thangkhogin Chief of Sachih,Pu. Suonchinthang Chief of Kathuong leh mi tampite’n na uop uhhi. Phâipi leh Moreh(Tamu) panin zong mipi tampi in tam ZSP Khawmpi Lien a na uop uhhi.

ZOKAM A THUGÊN KIDEMNA

Nimit 16th Doupi hla ni in Extempore Speech kidemna Zokam leh Mangkam in na om hi. Mi tampi na tel uhhi. Kei zong ka na tel a,topic(thupi) ka sâwkhâh ahileh ‘Mizawng’ leh ‘Love’ ahi.

MISS LEH MR ZSP KITÊLNA

ZSP Miss leh Mr kitêlna a na om kia a, tuami hun ah,Miss Nienghauchîn in Miss ZSP a na la hi. Tualeh, Mr. Joseph Khenkhanmang in Mr.ZSP na la hi.

Nimit 17th Doupi hla niin,ZSP Bumper Lottery draw a na kinei hi. Kidemna tuomtuomte a na om a,lasahna leh lâmkaina na om hi. Nitâhin mipi lênkhawmna na om a,nungâh tangvâlte lâmton in nun bang nuom tuolnuom na mang uhhi. Tuami nitâh lênkhawmna ah,Miss Chinglunnieng in ‘Mîm bang I pienna Zolei gam nuom ah’ chi la ngaitah khu a aw ngaiteng toh Singtom leh a kîmvêl a om khuo dangte thawn zawzên in a na sa hi.

Doupi hla 18th niin,Zinlien Pu.Satkholal a’ng na vâigei tâh ziehin sawtpi a na zilsa uh Zo lâm lahna toh kivâidot díng chipen a kilah nawnta sih hi. Hunzahna a na kinei a, zinlien thugenna,UZO President thugenna,ZSP President thugenna leh thugenna dangdang a na om hi. Tua zouin,letsong hawmna a na om hi.

MIPI ZÂNGTA LÂMKAINA

Nitâhin,zutung nekawm leh dawnkawm in Zo lâmtuol kaina in na zui paita hi. Pu. Thangkhanlal MLApu in a .38mm pistol satkhie in,Zo laphuosiemte,Zo lâm siemte leh Pu.Huotpau theizingna leh zâna in a thâunêu tang li(4) tahpi vântung lang dawikawm in, a na kâptou hi.

Atawpna lamah,ZSP lasah siemte: Pu. Dominic Khammeng,Pu.Haumang,Pu. Francis Ringo leh ngâhnu tampite’n la ngaingai tampi a na sa uhhi.

ZOVAKHU KOP BANG PIENNA

Tu-a a kinuathei dânin Pu.Haumang in Singtom ZSP Conference hun sungin,ngâhnu mêlhoi mama khat a na ngâi hi. Tua ngâhnunu a na ît séngséng man in, mitphiel kâl in, “Zovakhu kop bangin= Singtom vângkhuo pan” (‘Tunia mêl a ka mu ngai Zozâm aw) kichi tu chienga la minthang pen khat a na phuodoh a,tuachiin Conference vâisai hun sungin mipite mâitang ah ngaitahin kihot zên in a na sa khie hi. Mipite’n zong ngai a na sa séngséng un, pâkhi leh sum tampi na awsah uhhi. Hinanleh,tua ngâhnunu pen a ninu in zu-um a tunlusa ahimanin, a kingâina gêl na guitung zouta sih hi.

Tua bânin,Pu.Haumang in zong zawlla zâtzât a na phuokhie hi. A laphuo pawlkhatte ahileh; Tulsing lêl a Saheipa bang,Sawm leh nga veipi, Kei Ngai heisa,Kei ka heina gam pan,Tulsing lêl a Saheipa bang, Solha hing tâng ngai aw leh a dangdangte ahihi.

ZOGAL LIMLAHNA

Tuami ni nitâh in,Mawngkên(Mongken) khomite’n Zogal(1917-1919) limlahna(drama) a na nei uhhi. Tuami limlahna ka ngaituo chiengin I pu I pate namtatna thupi ka sa mama hi. Tuni dongin zong ka mangngilthei sih hi. Tuami limlahna pen mipite’n a en nuom mama uhhi. Tuami zou in,mipi lênkhawmna zânlâi nai 12.00 tan in na om hi. Lênkhawmna a nop mama mai hi.

Tu vângin(tu chiengin) pâpi ka hita a,hinanleh tua hunlâia ZSP General Conference nunnop guollâi ka mangngilthei sih hi. Bangchia mangtheikia díng ka hi diei? chi’n sumsiel bang lung ka sielsiel zêlta hi. Tua banga nunnuom zaidei awina,lie leh tângte lâmtâng kaina nuom ma e! aw nuom sâm e!.

Khum hunlâi a,lênlâi pe bang zilkia thei díng hileng nuóm sâm va’ng!
Tua bang nunnop tuong hing tungthei kia leh chi’n hâi bang ngâh na lâi sâm va’ng e,
Seinouguolte aw.

Philip Thanglienmâng

Source: My Personal Diary of 1984 A.D

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

One Response to History revisited | SINGTOM Z.S.P GENERAL CONFERENCE 1984

  1. kailianthang says:

    Thank you very much for reminding the 30th ZSP annual conference.

    Like

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s