Manipur Express | March 5, 2008

Security Force te ziak in Lamka mipi’n tui khamlou; CDSU in PHED office hong nawn : SDPO leh PHED in panla ding

Lamka, March 4: Churachandpur District Students’ Union in Lamka tui neek kihhuai lua chih ziak in PHED Office, CCpur Division Feb 26 2008 in khaksak uh a, himahleh, PHED Official te’n panla ding uh ahihdan agenban uah, tui kaai leng a zia om deuh ziak leh mipite adia dawn ngam huai dinmun a a om taak ziak in, PHED Office khak a om pen tuni in CDSU in hawng thak nawn uhi.

Thusuak kingah dan in, tuni in Public Health Engineering Department (PHED) Official, Press leh CDSU palaite’n thil om dan genkhawmna nei uh a, huai hun ah PHED Official te’n theihtawp a na sem uh ahihdan gen kawm in, Lanva luidung a suangla te leh gari lut ding khamna a mau thuneihna in baan lou ahihdan leng gen uhi. Zone II Bungmual tanky tawh kisai PHED Official te’n agenna uah, tui nit luat ziak in, tui khaihsiangna filter choke leng zat theihlouh ahihdan gen ua, treatment hun ah bleaching powder leh Alumi zang zel uh ahihdan gen uhi. Bungmual tanky ahihleh, 3.178 Million litres capacity alian ahihdan gen ua, nikhat in litre lakh 6 vel ding hawmkhiak gige a om ahihdan gen ua, Security te’n 10000 Litre Rs 5 in lei ua, nikhat in 3 Lakhs litre pawkhia ahihdan uh gen uhi. Security te’n nikhat a tui tamtak a puakkhiak ziak un mipi lak ah tui kiningching zoulou ahihdan leng PHED Official te’n gen uhi.

PHED Official te’n agenbehna uah, Special Plan Assistance nuai ah Rs 10 Crore bei in Lanva lei (bridge) Tipaimukh Road lampi tung ah a tuam in Tuilaknang (intake point) ki bawldek a, a lampi leng Bull dozer in phulel ahihdan gen ua, hiai pen zawhsiang ahih chiang in, Bungmual tanky ah tui laklut hiding a, tui haksatna a zia om deuh ding ahihdan leng Official te’n gen uhi.

Department Official te’n Khuga Dam Zone III tawh kisai agenna uah, Pipe teng khunzawh hita a, Filter 5 om lak ah 3 zawhsiang hita a, 2 te leng tunung sawtlou a zawh hiding in gen uhi. Pump house nasepna zawh in om ta mah leh, pump machine pe’n Company a bawl lel ahih ziak in khawpi sung ah tui kaisak theinailou uh ahihdan gen ua, filtration component bangmah omlouh ziak in, mipi lak ah tui kaisak ding gamla lai ding ahihdan gen uhi. Khuga Dam apan tui lakna zawhsiang ahihchiang in, New Lamka, Thingkangphai, Ebenezer Academy, Donbosco School leh Rengkai te ah Reservoir 2.5 Lakh litre capacity tatna tanky bawl hiding in gen uhi.

Tu zingkal in SDPO, CDSU leh PHED Official te’n Bungmual tanky leh Lanva lui tuilakna mun etkhiakna va nei ua, huai zawh in, sundak 12 in SDPO Office chamber ah CDSU leh PHED Official te tawh kimuhkhawmna nei uhi. Lanva lui dung a gari lut sak nawnlouh na ding tungtang ah, Sub Divisional Police Officer K Kabib IPS in Dy Commissioner ana mu ding in leng genkhawmna nei ua, prohibotory order suah ding in phutna neihsawm uhi.

LOCAL NEWS:

Muanlal leh Zami kiteng ding

Thangmuanlal s/o Zenkhanpau Vualnam leh Lianzam @ Zami d/o Sangtluang Valte of Pearsonmun te zingchiang (March 5) zinglam dak 10 in Mission Compound EBC Biakinn ah Saptuam dan siangthou in kiteng ding uhi. Nitaklam dak 1 in Sangtluang tenna Inn, Pearsonmun ah Zami khakna program om ding hi.

Kha 1 sung lel in TB vei 6 om zou

District TB Officer Office apan thusuak kingah dan in, khalui February khasung in OPD ah mi tuamtuam 391 test nei uh a, huai lak ah mi 6 in TB natna vei ua, damdawi zang a ki enkol thak mi 92 pha a, khaksuah etkhiakna aneihna uah, mi 227 pha uhi. Nidang a TB ana veisa mi 133 te etkolna leng pailel hi’n kigen hi. February 2008 sung in TB natna ziak a damlouhna tuak mi 92 damsiang uhi. District Tuberculosis Officer ahihleh, Dr P Nengzadou ahi hi.

K Oil saitu ding in Chawngpui guang

DC/CCpur Sumant Singh IAS in Kerosine Oil tawh kisai saitu ding in Chawngpui sep a, ama gendan in, zan in CCpur District ading in Kerosine Oil March quota tanker 3 hongtung ahihdan gen hi. Pudaite Co. ading in 10 KL hi a, JHK ading in 10 KL leh S Paite & Sons ading in 10.2 KL hidan in gen hi. Maban ah hongtung behlai ding ahihdan leng Chawngpui SDC in gen hi.

DSO in Multipurpose go down proposal pia

District Supply Officer/CCpur M Ginzasuan in March 1 2008 in DC/CCpur kiang ah NREGS fund zang a Mualnuam, Sinjawl, Dialkhai, Singmun Lamkhai leh Suangdawh khua te ah Multi purpose godown bawlding in proposal pia hi. Mautaam kialpi ziak in Government in a chuang a antang quintal 8,000 hon piaksawmte koihna ding a multi purpose godown poimawh ahihdan leng DSO in gen hi. Tuma in, Godown bawlna ding in Mualnuam, Songtal, Sinjawl leh Tuilaphai-te ah FCS Department ah proposal submit in om mah leh tuni tan Government in dawnna bangmah pe nailou ahihdan leng gen hi.

NCW member poimawh hong zinding

National Commission for Women a member poimawh mahmah hi a kigen Malini Bhattacharya tuni in West Bengal khawpi Kolkata apan Flight IC-211 in Imphal hong tung a, zingchiang in Lamka hongpha ding a, Fat James Restaurant, Teddim Road ah zinglam dak 9 in Hmar Women Association leh ICDS makaite tawh kimukhawm ding uhi. Ama’n Parbung rape case tawh kisai in a mun mahmah 2 vei va siikta a, Lamka 3 vei ahongphakna ding hita hi’n kigen hi. Lamka hongzin na ding ah, 4th IRB te’n escort hong pe ding uhi.

Hangkhanpau MLA om lel

Singngat A/C MLA T Hangkhanpau Lamka ah om lel in, tuni in DC/CCpur Sumant Singh IAS kimuhpihna nei a, huai ah thu poimawh tuamtuam genkhawm in, zingchiang in Imphal zuan in kiksuk nawn ding hi.

Electric meivak lungjinhuai

Hr Secondary(Class XII) examna Feb 29, 2008 in kipan a, HSLC(Class X) examna leng zan a kipan in exam teng kigawm 40,000 val uh a, hibang exam poimawh 2 omlai bekin student-te khualna in electric meivak regular deuh dingin tamtak kinem mahleh tutung in leng phatuamlou suak zel hi.

BSF pawlin thaukap nawn

STC BSF a training pawlin March 1,2008 zingsang akipan in Pearsonmun, Mualkoi leh Gangpimual apan gamlalou firing range ah thau & bomb kap pan nawn uh a, March 15,2008 tan sunzom ding uhi. Huai hunsung in mihing kia hilouin ganvulhte leng huai kimnai a paisaklou ding in akisaipihte theisak uhi.

SK Oil haksa: aman tam

CCpur district a SK Oil Dealer pawlin FCS apan kha tenga SK Oil a ngah uh Feb 2008 ading atamzaw hong tunlouh ziakin tulai in Lamka khawpi sung tanpha ah SK Oil kiching muh haksa petmah a, akimu sunte leng black a lei ngai in litre 1 Rs. 40 khong in kizuak hi.

Multi-Media Information Campaign

Lamka, March-4: Dist Information Officer/CCpur saina in March 13-15, 2008 sung IB road a Synod Hall ah Multi-Media Information Campaign om ding a, huai ah Reconstruction Plan for Manipur, SEGP, NREGS, National Rural Health Mission, SSA, NEC schemes, Mi-day meal programme, ICDS, Tribal Welfare,Right to Information, developmental leh social subject tuamtuam mipi vangtang in a theihsiam theihna ding in hilhchetna hun leng zang ding uhi. March 7,2008 a DLCC meeting zawh in District Level Officer tengin Multi-Media Information campaign tungtang genkhawm ding uhi.

IMPHAL NEWS:

Assembly ah Demand 4 pass uh

Imphal, March-4: Tuni’n Manipur Assembly Budget Session ah Department 4 in March 31, 2009 tana a zat ding uh Demand tuamtuam 4 kigawm in Rs. 2,52,17,32,000 pass uhi. Huaite bel

Demand No. 5: Finance – Rs. 2,38,83,34,000
Demand No. 9: Information and Publicity – Rs. 3,45,93,000
Demand No. 28: State Excise – Rs. 8,12,01,000
Demand No. 29: Sale Tax, Other taxes/
Duties on Commodities And Services – Rs. 1,76,04,000

March 5 in Flight No. IC/211 omlou ding

Imphal, March-4: Indian Airlines flight No. IC/211: Calcutta-Imphal-Calcutta & Aizawl-Imphal flight tungtang operational reason ziakin March 5, 2008(Nilaini) in flight omlou ding chi’n PN Singh, Area Marketing Manager, Indian Airlines/Imphal in thupuan bawl hi.

Moreh ah ni 4 sung PIC om ding

Imphal, March-4: Chandel dstrict sung Moreh a Kongdong Leirembi Ima Haraobung mun ah March 5-8, 2008 sung Public Information Campaign(PIC) om ding hi. March 5, 2008 zinglam dak 11.00 in PIC honna om ding a, N. Ashok Kumar ,IAS, DC/Chandel khuallian apang in hong ding hi. Huai ah Functional President in TH Chothe,MCS, ADC/Moreh pang ding a, Guests of Honour in L. Imoba, President, Meitei Council,Moreh leh Jamang Haokip, President, Hill Tribal Council,Moreh pang ding hi. PIC om sungin Central govt nuaia scheme tuamtuam taklatna leh mipi in a theihsiam dinga hilhchetna om ding hi.

Medical Board sitting hun ding bikhiah

Imphal, March-4: Directorate for development of Tribals & Scheduled Castes in damlou tamtak apan ki-etkolna ding a panpihna(financial assistance) ngente selection bawl ding in March 10, 2008 zinglam dak 10.30 in directorate ah Medical Board sitting nei ding uhi. March 10 & 11 in Chandel district apan ngetna pia(applicant)te adingin Medical board sitting om ding a, March 12 & 13 in CCpur district adin om ding hi. March 14 & 15 in Senapati district adin om ding a, March 17 & 18 in Tamenglong district ading in om ding hi. March 19 & 20 in Ukhrul district apan applicant-te adin om ding a, March 24 & 25 in HQ/phaijang bial a applicant-te ading in om ding hi.

HSLC examlai mi 1 kihawlkhia

Imphal, March-4: Board of Secondary Education Manipur(BSEM) saina a High School Leaving Certificate Examination(HSLC) zan in kipan a, tuni in Komlathabi Centre a examte laka tel Roll No. 13802 in chindan diklou a zat ziakin examna akipan hawlkhiak(expelled) a om hi’n BSEM thusuak om hi.

State Level Tribals Consultation om

Imphal, March-4: All Tribal Lawyers Association,Manip[ur leh Naga Peoples’ Movement for Human Rights saina in Feb 28-29,2008 sung Chingmeirong a Tribal Research Institute ah “2-days State Level Tribals Consultation on Land, Forests and Natural Resources” zang uh a, huai ah pawl tuamtuam apan mi poimawh tamtak paikhawmte’n thupukna poimawh hunkhoptak bawl uhi. Singtangmite’n mahni gam tunga thuneihna a neihte tanpha uh palzut a om thu leh developmental project tuamtuam suanlam in society leh ecology tanpha buaisak thil tuamtuam singtangmite gama phutluih a koih leh koihsawm tungtang banah singtanggam leh singtangmite adia siatna tunzaw ding thil tuamtuam govt in a piansakte puaknat thu leh lungkimlouh thu joint statement saukuamtak suah uhi.

Khuga Dam ah Rs 335.11 Crore beita

Imphal, March 4: Manipur State Assembly leh budget session pailel ah, dotna leh dawnna hun neih in om a, huai ah MPP MLA Dr Ng Bijoy in dotna abawl, IFCD Minister in adawnna ah, Churachandpur South a om Khuga Dam March 2008 tan a zawhsiang ding aihhdan gen a, tuni tan in hiai Dam bawlna ding ah kum 24 lut ta ahihdan gen hi. Tuaban ah, a bultung in project cost ading in Rs 21.67 Crore bikhiah hita mahleh, escalated cost Rs 335.11 Crore tungban ta ahihdan gen a, Diversion Km 10 ban ah sepdia ngiimlouh tamtak sep ahihziak a sum tamtak bei ahihdan Minister in Innpi theisak hi.

MDC Election May kha a om ding in kigen

Imphal, March 4: Muanhuaitak apan thu kizadan in, Manipur singtanggam a Autonomous District Council member (MDC) kitelna khanawn April a om ding chih himahleh, singtang khua khenkhat heikolhna om ziak in, thu buai huai neuhneuh om a, himahleh, May 3 ahih kei leh, ni 7, 2008 vel a neih hi zaw ding dan in kigen hi. Tribal Devlopment Minister DD Thaisii in leng hiai ngaihdan pompih in, Election ah Rs 3 Crore vel bei ding in tuat ua, Finance Department ah ngetna piaklut sawm uh chih thu leng om hi. Bangteng hileh, Cabinet Meeting in thupukna a lak uh poimawh ding hi’n kigen hi.

Newmai in a lungkimlouh thugen

Imphal, March 4: Tuni Assembly Zero Hours hun ah, Awangbow Newmai MLA in a lungkimlouh thugen in, bangziak a, Naoremthong mun ah Commando te’n a thuneihna uh zangkheng val uhiam chi hi. Newmai in agenna ah, zan nitaklam dak 2:30 apan dak 3 kikal in, Naoremthong a Police Commando Unit duty Gypsy MNA- I/8070 te’n Tamenglong District apan hong pai passenger gari te subuai in, sum Rs 5000 laksak uh ahihdan gen a, amau MANIREDA a data submit dia hong pai uh ahihdan gen hi. Hiai hun ah Awangbow Personal Security Officer leng telkha a, aman Identity Card tanpha lak mah leh kanna lou hi’n kigen a, MLA Letter head leng zahna neilou uh ahihman in Home Minister in thil omdan a etkai poimawh ahi chi hi.

Tamenglong Hospital tawh kisai dotna om

Imphal, March 4: Tuni in Assembly a dotna leh dawnna hun ah, MLA Awangbow Newmai in dotna abawl, Health and Family welfare Minister in adawnna ah, Tamenglong District Hospital ah X Ray, Ultra sound leh blood bank te koih a om mah ahihdan gen a, himahleh, tuni chiang in khat mah leng zat theih omlou ahihthu gen hi. Maban ah hiai facility te district mipi’n a hamphat pih theihdia hoihtak a puahthak hiding in leng Health Minister in gen hi. Tulel in Medical Superintendent tel in Tamenglong District Hospital ah Specialist Doctor 3, Surgeon 1, Dental Surgeon 1 leh Medical Officer 6 om ahihdan Minister in Inn pi theisak a, maban ah OPD building leh Video Conferecing hoihtak tunkhiak hiding in leng gen hi.

5th MR te sum neek tungtang genkhawm

Imphal, March 4: Tipaimukh A/C MLA Ngursanglur in tuni in Assembly Zero Hrs hun ah, Tipaimukh leh Silchar kal a tuiluang Barak lui tung a 5th Manipur Rifles te sum neek tungtang genna nei hi. Ngursanglur MLA in agenna ah, Barak lui tung ah mi tamtak in sum dawnna nei uh a, long te service in, passenger tamtak om sek ahihthu gen a, himahleh, 5th MR duty te’n fee/tax dan in Rs 600 long khat ah la zel uh ahihdan Innpi theisak hi. Thil omdan DGP ah theihsakna pe mahleh, IGP (Opn) in dawnna nei in, hibang a sumla kuamah omlou ahihdan gen leuleu chi uhi.

RIMS a nurse lakthak ding deihlou

Imphal, March 4: Imphal, Lamphelpat a om Regional Institute of Medical Sciences (RIMS) a trained Nurses Association pawl in Nurse lakthak ding deihlouh taklatna in tuni apan in Badge vom belh chiat uh a, March 7 in casual leave la vek ding uh hi’n kigen hi. RIMS Teaching Staff Association in leng January khalawh tuni tan a a muh louh ziak un tuni in OPD leh Casualty khak uhi.

RIMS adia interview bikhiah

Regional Institute of Medical Sciences(RIMS) a Staff Nurse(regular) lakna ding in March 8 apan 12, 2008 kikal zinglam dak 10.00 tengin RIMS Jubilee Hall ah interview om ding a, candidate-te interview ni ding anuai abang hiding hi.

Date Sl No.
March 8,2008 1 – 400
March 9, 2008 401-800
March 10,2008 801-1200
March 11,2008 1201-1600
March 12,2008 1601-upto last Sl No.
Huailou in RIMS a Attendant, Chowkidar, Sweeper,Cook leh Mali semding lakna ding in Feb 28 apan interview om a, maban a omlaite anuai abang hi..
Attendant:
Date Sl No. Time Place
05-3-08 5001-upto 10.00 Jubilee Hall
last Sl No
Chowkidar:
06-3-08 All candidates 10.00 -do-
Sweeper:
06-3-08 All candidates 10.00 -do
Cook:
07-3-08 All candidates 10.00 -do
Mali:
07-3-08 All candidates 10.00 -do

EDITORIAL:

Tuni Thupi: “Keilam hongnga inla, hon hehpih in; chim leh haksatak in ka om ngal a. Sam 25:16

Bangziak a NE mite minse veu ihia?

Leitung a Hindu kingdom om sun Nepal chauh himahleh, India leng sahkhua vai ah Hindu state chih theih a, Hindu milip tam law mahmah in, a zawng pen apan ahau pen tan leh, a se pen apan a hoihpen tan om vek un muh theih in om hi. India gamsung state tuamtuam in kikhen a, state teng lak ah crime nasatna pe’n India Capital Delhi hi’n kigen hi.

Delhi original taktak mi a tam kei hial ding chih theihsa ahi. Haryana, Punjab, Uttar Pradesh, Rajasthan leh North India state khenkhat apan mite peem khawm in, West Bengal leh South India lam apan tamtak te leng a na tenglut sam uhi. Hun te hong paitou zel in 1960s kum te in North East India apan mi tamlou ana lut in, awl awl in i tam tou hiaihiai ta ua, tuni chiang in ahih leh, tam petmah in i tam ta uhi. North East mite lak ah Assamese te tampen ding in i ngaihsun a, tua ban ah, Naga, Meitei leh Zosuante hiding in i gingta hi. North East apan Nam chih teng i lut vek ta ua, North East min forum a zang in pawlpi tuamtuam sim seenglouh phial i dinkheta uhi.

Hiai te i ngaihtuah chiang in, ngaihsut theih ding a tam mahmah hi. North East mite mel le puam i chi tuam ua, Korea/Japan/Thailand/China leh South East Asia gam tuamtuam te bang hon sa mawk uhi. Mi khenkhat in lah, nang koi state apan hong kipan a chih chiang un, Manipur a chih ua leh,Manipur i chih koilai a om hi hiam? Japan maw khawng chi maimah uhi. Vaite teng ana hausa leh pil hituanlou uh ahi chihna ahi mai hi.

Vaigam i chih sang mah in leng Delhi tawh kisai houlim leng ut huai mahmah a, a ziakbel, state dangte ah North East mite’n buaina ki tuak vang mahmah a, himahleh, Delhi ah avang kim in buaina i tuak mun mahmah ta uhi.

Lehkha sim ding, Sepna zongding, sepna neih ziak leh damlouhna ziak in Delhi ah tamtak i om khawm khiukheu ta uhi. North east state te apan paikhawmte’n Biakna Inn leh mun kineih tuam chiat in om a, student organization leng tamtak om hi. Zosuan context in gen le hang, saptuam vai ah, EBC / ZCF / CoC / EOC(P) / EOC(ECCI) / Mizo Fellowship leh adang tampi i om ua, Society sung ah, Paite Indongta, YPA, YVA, HYA leh adang dang om in, Siamsin kipawlkhawmna ah leng, SSPP / KZP / ZILLAI / ZSP leh adangdang om in, ZSF tanpha i din khe ta uhi. Hiai bang tan i tuntheihna ziak Christian i hihna ziak ua Pathian vualzawlna hiding in i gingta hi.

Tuni chiang in, North East Students Forum tanpha piang in, North East Information chih te phuhkhiak in om hi. Bangziak a hiai te phuhkhiak a om ahia chih i ngaihtuah uh poimawh hi. Buaina i tuah mun luatziak ua hiai bang pawlpi te hong piang hidingin i ngaihsun hi. Pawlpi om te’n phattuamna liantak nei in, a biiktak in siatni/phatni leh University admission hunte ah phatuam diak uh hi’n muhtheih in om hi.

Delhi tualpi ah North East mi tamtak in thuakkha ta a, Meitei/Naga/Kuki/Zomi chih khen lou in, i mel le puam kibang vek ahih chiang in, hon ngapthawh dan uleng ki bang vek hi. Vaite tawh i mel le puam ki naih mahmah lou ahih ziak in, khentuam nop ding mah ahi. Sualluih, thawh, ang sawksak vua chih leh thu hoihlou tuamtuam zaak ding tam thei mahmah hi. Delhi Police nasan in leng Dress code hon impose khum tel uhi.

Sawm lak a zunteh a om leh a vek ua teh uh chih dan deuh in, Delhi a North East mite khat leh nih a minsiat leh NE teng minse mawk uhi. Journalist tuamtuam in leng NE te simmawh tak in ana gelh sek mah uhi. Bangziak hiding hiam? NE numeite a hoihvek uh leng i chi kei a, ahoih kei vek uleng i chi kei hi. Hiai kawm kal ah, I mi Nam leh hihna hon su minse theiding numei om te ( ahoihlou diakte) heutute’n Inn lam ah hon sawl pai uleng a hoih zaw mai diam chih theih in om hi.

Mi tamtak te a sepna ua buai, lehkha sim a buai ahihkei leh sepna zonna a buai a a om lai un, numei khenkhat te, bus stand khawng a chimul thou thei zeen dia ki pose leh dress bang om thei zel hi. I tam ta a, ki thunun bel ahaksa di chih theihsa ahi hi. Lamka nusia a khawpi i zotchiang in, zalen kisakna a om baih mahmah hi. I zalenna pe’n siat lawh sek i lak ah i tam mahmah a, poi petmah hi. Delhi bar ah i numeite uh a va laam thei bang om a, vaite tawh kizui in, zu dawnkhawm leh party neikhawm bangleng om tham hi. Huchibang a om te heutute’n suikhia a remark a piak uh deih huai mahmah hi.

Chinky melpu, Bahadur chih in sap in i om a, huaite leng zak thadah huai mahmah ta hi. Huchi kawm kal ah, newspaper te ah North East mite hih mualphouna a tam mahmah ta. Hiai tungtang ah mi tuamtuam in a hun bangzel a clarification leh dawnna ana piak theih zel ziak un, huchibang mite kipahpih huai mahmah hi. Mite’ gengen a i om louhna ding in ei lam ah leng panlak nang om maithei hi. Bangteng hileh, mite gen ding in kuamah om sawm kei le hang ahoih pen ahi maidiam? North East mite simmawh a i om leh, North East miteng pankhawp dan leng siam le hang chih huai mahmah hi.

http://www.manipurexpress.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s