The Lamka Post | March 5, 2008

Lamka khopi sung mun 12 ah Tanky bawl hiding

Lamka, March 4: Lamka khopi sung a tuidawnding siangthou pezoulou chih ziak a Churachandpur District Students’ U.nion (CDSU) in apaisa February 26, 2008 apan Headquarter Veng a Public Health Engineering Department Office a khaksak uh tuni’n hongsak nawnta uhi.

Himahleh hichibang a a Department in buaina atuah hun a leng enkhia ahong hohlouh ziak in EE/PHED N. Bipin Singh Room bel kalhsak lai veve uhi. Office khaksak ahihnung a tuisiangthou kaaisakna dia Department in bangchi bang a panla hiam chih dotna adawnna ah Mr. Chinkhanneng, AE in adawnna ah Reservoir ah tuite suangthuuk, bleaching leh sunu tamsem zang a naktak a treatment bawl ahihdan gen in tui nitluat ziak a filtration unit teng bing gai ahihdan gen hi. Bungmual reservoir ading tuilaakna point 2 om mahleh point khangnungzaw pen kia apan in tui zawllut ahihdan leh intake point gamla zaw pen tuisiang mahleh pipeline ginatlouh ziak in tanky tan tunglou ahihdan gen hi.

Tulel a Bungmual a tanky capacity bel 3.175 Millions Litres per Day (MLD) himahleh tulel in nikhat in 6 lakhs litres vel pekhezou lel a huai lakah Security in a kimkhat (50%) phial tawi sek uhi. Lamka khopi tuidawn ding puahphatna’ng in SPA tungtawn in Rs. 10 Crores hongpai a, huaizang in Lanva lui leh Ngallian lui kisuktuahna mun ah tuilakna’ng bawlsawm in lampi sial hilel ahihdan leng gen hi. Hiai sum mah zang in khopi sung ah 2.5 lakhs litres ngen tatna’ng tanky mun 12 ah bawl ding a, tuate bel, PHED compound, CCpur Higher Secondary compound, Lamka College compound, Thingkangphai, Tangnuam, Ebenezer compound, LRRC Bungmual, Phailian, Rengkai, Donbosco School leh Tuibuang ah mun 2 bawl hiding a, hiaite mun khenkhat ah nasep pat hita hi’n AE in gen hi.

Khuga Dam (Zone-III) apan tuidawn ding piakkhiatna dia nasep tamzaw zoh hita ahihdan leng Mr. Chinkhanneng, AE in gen hi. Khuga Dam apen settling tank 5 lakah 3 zoh khit hita a 2te leng zohsiang phial hita a, pipeline leng khunsuak khit hita a pump hong tun hunhun a zattheih hita ding ahihdan gen hi. Hiai Zone- III apan in Tedim Road khanglam teng tui piak hiding a mun 5 ah Overhead Tanky leng bawl hiding ahihdan gen hi.

Tuabangkal ah DC/CCpur in SP/CCpur kiangah tuilakna mun a suangpua truck-te toh kisai in poimoh a sakbang a action alaktheihna’ng in thuneihna pia hi. Tuni zingkal in SDPO/CCpur K. Kabib, IPS leh CDSU makaite’n Lanva nak a tuilakna mun va enkhia uhi.

Godown bawlsak ding in ngetna pia
Lamka, March 4: District sung a Sub Division bangzahhiam a Mautaam ziak a nek-le-taak haksatna lianpi omziak in District Supply Officer M. Ginzasuan in Dy. Commissioner / Chairman, DRDA/CCpur kiangah kintak a Mualnuam, Songtal, Sinjawl, Dialkhai, Singmun Lamkhai leh Suangdoh khuate ah Multi-purpose godown bawlsak ding in ngetna nei hi.

DSO/CCpur in a ngetna lehkha ah tuuktui luanma a hiai khuate a kha 4/5 quoata ding koihkhawl ding a DC/CCpur in a theihsak dungzui a hichibang ngetna bawl ahihdan taklang hi.

Khawnvaktui 30.2 KL hongtung
Lamka, March 4: March 2008 kha ading District quota lakah khawnvaktui 30.2 Kilolitres kia zan leh tuni’n Lamka puaktun in om hi. Tutan a hongtung khawnvaktuite bel M/S. Pudaite ah 10 KL, M/s. J.H.K, Singngat ading 10 KL leh M/s. S. Paite&Co. ah 10.2 KL ahi. Huailou in DC/CCpur in apaisa February 2, 2008 a order a suah dungzui in SK.Oil toh kisai Mrs. T. Chawngpui, BO in enkai ding hi.

National Commission for Women hong zin ding
Lamka, March-4: Malini Bhatta Charya Member National Commission for Women in zingchiang March 5,2008 zingkal dak 11:00 in Lamka hawng pha ding a, Parbung rape case tawh kisai in Rengkai Youth Hostel ah Hmar Womens Asociation(HWA) makaite toh meeting nei ding uhi. Huai zoh chiang in ICDS Workers teng toh meeting nei nawn ding uhi. Tuni a Lamka hawng phak chih himahleh, KCP Raising day bandh ziakin Imphal ah giak hi.

Ms. Malini Bhattacharya in bel tuma in Lamka nihvei hongphata in Tipaimukh bial a apaisa January 16, 2006 ni a phaijang helpawlte sualluih numei 28te hong kimuhpih ngeita hi.

Inn phel lai kia in liam
Lamka, March-4: C. Pumzathang (55) s/o (L) Khaidong of Saikul village tuni sun dak 12:00 vel a akhua uah Inn phel lai fit 10 vel a sang ah kia in anung zang leh a kong nasa in tun Dist. Hospital Lamka ah ki-enkol hi.

February sung in Rs.1,54,578/- mu khia
Lamka, March-4: District Transport Office Churachandpur in February 2008 sung in Gari tuamuam apan in Revenue in Rs.1,54,578/- vel mukhia ua, huaite Govt ah challan in submit uhi.

Lal leh Zam kiteng ding
Lamka, March-4: V. Thangmuanlal S/o V.Zenkhanpau of Mission Compound leh Miss Lianzam @ Zami D/o V. Sangtluang of Pearsonmun, zingchiang March 5, 2008 zinglam 10:30 in Mission Compound EBCC Biak inn ah saptuam dan in kiteng ding uhi. Huai hun ah kuapeuh in uap chiat ding in Mouneite’n chial uhi.

CPE-4 Exam om ding
Lamka, March-4: Churachandpur Govt. College IGNOU Centre ah CPE-4 Exam March 9, 2008 zinglam dak 10:00 in kipan ding hi. Huailou in BA-II &III yrs Re-admission/Term-End Examination form leng IGNOU Study Centre ah lak theih lel a, huaite Bank Draft Rs.1400/- pia in Imphal Regional Centre ah March 31, 2008 tan in khak theih ding hi.

Medical Board tut hun ding bikhiah
IMPHAL MAR 4: Development of Tribals and Scheduled Castes, Manipur in ST patients medical treatment adia financial assistance apiakna ding toh kisai in Medical Board, TD Director Office ah March 10, 2008 zinglam dak 10.30 apat nei ding hi. Hichibang Medical board tut hun ding district wise hiai anuai abang ahi.
March 10 & 11, Chandel district
March 12 & 13, Churachandpur district
March 14 & 15, Senapati district
March 17 & 18, Tamenglong district
March 19 & 20, Ukhrul district leh
March 24 & 25, Head Quarter/Valley chih ahi.
Hiai adingin, applicant ST candidate ten mahni ki-etsakna laipoimohte tawi ngai ding hi.

Assembly news :
# Tuni a assembly a dotna leh dawnna hun a, Awangbou Newmai MLA dotna Health & Family Welfare minister Ph. Parijat in a dawnna ah, Tamenglong District hospital a X-ray machine koih himahleh, tu lel a zattheih louh a om ahihdan gen hi. X-ray machine thak leikhit hita a, koih hipahta dingin leng gen hi. Hiai hospital ah Ultrasound machine leh Blood bank koihna ding provision bangmah omnailou ahihdan leng gen hi.

Hiai district hospital ah, tu lel in Specialists Doctors 3 leh Medical officers 6 posting om ua, hiaite lak ah Dental Surgeon khat leng tel hi. Tamenglong CMO in Medical Superintendent hihna lenkhom hidan in leng minister in Inpi ah gen hi. Manipur Health Services nuai a, Specialist doctors leh Medical officers kidaihlouh ziaka district tenga apoimoh zah staff koih zoh hilou hidan in leng gen hi.

Tamenglong district hospital a dia OPD building tuam omnailou himahleh, Laboratory room bel om a, Video conferencing room a ding vanzat leng koih pat hi lel dan in gen beh hi. Tamenglong district hospital ding mun thak a building a thak a bawl hiding inleng Health minister in gen hi.

# Dr. Ng. Bijoy MLA dotna IFCD minister N. Biren a dawnna ah, Churachandpur district a Khuga Dam tukha March, 2008 a zoh hidingin gen hi. Hiai Dam bawl a tung apan tunitan kum 24 bang chingta hidan in leng minister in gen hi. Hiai Dam bawlkhiakna dia, total original project cost Rs 21.67 crores himahleh, escalated project cost Rs 335.11 crores hidan inleng minister in gen hi. Hiai Dam mun a, a kisaipih minister leh official te lut ding dalna bangmah omlou hidan inleng IFCD minister in hilhchian hi.

# Dr. I. Ibohanbi Singh MLA dotna Veterinary minister Md. Alaudin Khan in a dawnna ah, Saitu A/C sung Tingkai Khunou a Pony Farm kum bangzah hiam paisa apat hoihtak a function lou ahihdan gen hi. Hiai toh kisai minister in hilhchetna a bawlna ah, tangbul a om ahihna ah, amun a louhing gantate nek ding kidaihlou leh, a omna mun tang om ahihna ah, pawl tuamtuam apat sukbuaina omsek hidan inleng gen hi.

# Dr. Khasim Ruivah MLA dotna RD & PR minister Md.Alaudin Khan in a dawnna
ah, Director RD & PR in Ex-officio dan a Joint Secretary RD & PR ban ah, 2002 apat SIRD Director hihna leng enkai ahihdan gen hi. Aban agenna ah, Director RD & PR transfer/posting tungtang Department of Personel (DP) mohpuak ahihdan leng gen hi. SIRD a dia faculty members nga kum khat contract a dia Govt. of India guidelines dungzui a lak ahihdan leng RD & PR minister in gen hi.

# Tuni a Assembly ah, March 31, 2009 tan a zat ding Demand for Grants, 2008-09 ding tuamtuam, Finance Rs 238,83,34,000, Information & Publicity Rs 3,45,93,000, State Excise Rs 8,12,01,000, Sales Tax other taxes/duties on commodities & services Rs 1,76,04,000 genkhomna Inpi a neihna ah, cut motion tuamtuam genna hun zat in om hi. Sunnung sitting ah Inpi ah kituaktak in hiai demand for grants 4te passed uhi.

KCP(MC) Black day ziakin hindan ngeina buai
IMPHAL MAR 4: Phaijang helpawl KCP (MC) ten tuni a Black Day apuan ziakun, Inter state leh district komtuah passenger service te a tai omlou hi. Imphal khopi sung ah leng dawr teng kikhak a, rickshaw tanpha atai muh ding omlou hi. Class X leh XII exam te chihlou siamsinna school teng leng kikhak vek hi. Passenger service gari a omlouh ziakin, mipi paituahte a dingin buaina naktak in tun hi. Imphal khopi sunga office te leng a kai muh ding tawm mahmah hi. Hichibangkal ah, tuni a Black day ziakin, buaina piang chih bel thutut kingah lou.

Commando ten mobile leh sum laksak
IMPHAL MAR 3: Tuni’n Assembly a dotna leh dawnna zoh a, zero hour hun ah, Tamei MLA Awangbou Newmai in, MANIREDA a SEGP toh kisai a lai poimoh pelut dia hoh, Tamenglong apat Village Chairman leh workers te apat, zan sunnung dak 2.30 vel dingin Naoremthong a mun a duty Police commando ten mobile leh sum laksak ahihdan uh gen hi. Hiai hun a, amah (MLA) pa PS leng tel ahihdan gen hi. Aban agenna ah, hiai mun a Police commando ten Rs 2 lakh pedia ngen masa hidan un leng gen hi. Hentang a omten Rs 5000 pedia a nget uh leh Police ten vau zomah uh hidan in leng MLA in gen hi.

Hiai tungtang a, minautangte bawl genthei police personel te tunga action la dingin, Home minister leng hi CM kiang ah ngetna nei hi. Hichibang security discipline neiloute bawldik tuak a sak dan leng gen hi. Zan a assembly a demand for grants toh kisai a, Home department tungtang genna ah, Morung Makunga MLA in, sum tampi pokawm a kholak vak ngam hinawn lou ahihdan leh, nitak dak 8 nunga vakkhiak ding, mi gilou sanga security te lauhuai zota ahihdan leng genta hi.

Hiai tungtang ah, Police te sum leh mobile laksak a omten, tuni sunnung dak 2 in Assembly a HAC Chairman office ah, thuthak saimite kimuhpihna leng nei uhi.

RTI nuai ah Social Welfare Deptt. in Rs. 25,000/- liau ding
Thingbaijam Dhamen
IMPHAL, Mar 4: Right To Information (RIT) zah louh ziakin Social Welfare Department, Manipur, Rs. 25,000/- liau sak a om hi’n Manipur Information Commission thusuak in taklang hi.

Thusuak in a taklatna ah, Social Welfare Department nuai a thil paidan theih nop ziakin Bidyabati Devi of Wangkhei Palace Compound, Imphal in RTI tungtawn in SPIO Social Welfare Deptt. kiang ah RTI tungtawn in February 12, 2008 in ngetna pelut a, ngetna piaklut apan ni 15 sung a dawnna piak ding chih himahleh hunchiam bei nung nangawn a dawnna bangmah a muhlouh ziakin Chief Information Commission in Rs. 25, 000/- liau ding a thutan khum hi’n thusuak in taklang hi.

Right To Information (RIT) bel Manipur ah zat theih ding in July 12, 2005 in Manipur gazette ah suahkhiak in omta hi.

Sonia Gandhi thugen in NSCN-IM thangpai sak
Dimapur, March 4: All India Congress Committee (AICC) president Sonia Gandhi in Nagaland khopi 2na Dimapur a zan a election campaign public rally a thu agen lai a, Naga-te’ thilnget Indian Constitution nuai a sukveng theih ding ahihdan a agen ziakin NSCM-IM in lungkimlouh thu tuni’n taklang hi.

Sonia Gandhi in Nagaland a campaign a neih dan leh Indo-Naga thubuai a gendan in Naga-te selphou mahmah a, Naga-te’ a dia kha mahmah ahihban ah, hichibang kampau a omlai a, state Congress member te a daih dide uh lamdang a sak thu NSCN-IM in taklang a, National Security Advisor (NSA) MK. Narayanan in Feb. 16 a Kohima aveh lai a a thil gen behlapna ahihdan leng tuni’n NSCN-IM in taklang hi.

NSCN-IM in aban a taklatzelna ah, historical reality zahlou leh kalh in Congress in kalsuan a, a lepchiahna kilang deuhdeuh ahihdan leh, hichibang kampau khawng a Indo-Naga buaina sukveng sawm hiam a chih banah, Sonia kampau in politics-a a pichinlouhna langsak a, kum 10 paita a India leh Naga te’n kihouna 60 vei aneih uh leng hichibang kampau in bohsia ahihdan leng NSCN-IM thusuak in taklang hi.

Kum 60 valta Indo-Naga buaina, politics tungtawn a sukvengna dia Congress chitaklou ahihdan leh thilkhat gen in thildang hih zel a ngoh in kum 60 val Naga-te’n thuakzoutak a khitui leh sisan toh haksatna a thuak uh Indian Constitution nuai a om ut ziak hilou ahihdan leh, India Constitution nuai a Naga-te omsak sawm chih pen Naga-te’ dia siatna tawpkhawk ahihdan leng NSCN-IM thusuak in taklang hi.

Ex. Minister leh NCP candidate mat in om
Shillong, Mar 4: Meghalaya election zan a zoh toh kiton in zan nitak in Ex. Minister leh tulel a NCP candidate Adolf Lu Hitler R. Marak, representation of People’s Act 1951 bohsia chih ziakin Police in man hi.

Thusuakin a taklatna ah, Mr. Marak in zan nitak in Garobada police outpost a police omte paukam kilawmloutak zang in a gari mat a om va lakhiak ziak a mat a om hi’n Supdt. of Police in tuni’n thuthaksaite mai ah gen hi.

Marak gari bel regester No. omlouh ziak leh election toh kisai a lai poimoh bangmah a neihlouh ziak a mat a om hi’n leng thusuak in taklang hi.

Tuabangkal ah, zan a Meghalay election ah 89.05% vote khiak in om a, Meghalaya state hood ahihnung kum 36 pata sung a dia vote percentage hoih kum pen hi’n chiamteh tham ching hi’n thusuak in taklang hi.

TSR te’n NLFT-te ambush
AGARTALA, March 4 NNN: West Tripura district a Mungiakami police station huamsung a Tuikurma Cherra ah Sepnawnni zingkal in Tripura State Rifles (TSR) personnel te’n helpawlte a lamtanna uah National Liberation Force of Tripura(NLFT) cadre khat, Ranjan Deb Barma kaplum ua, Chinese grenade khat musuah uh hidan in thusuak in taklang hi.

Thusuak in a taklat dan in, security force personnel te’n khawl dia a signal ua leh helpawlte’n kap ngal ua, kikaptuahna piang ah Barma kaplum uhi.

Zawngling khua ah ‘Bin Laden’ kiman
AIZAWL, March 4 NNN: Zawngling khua ah Tuipang police te’n apaisa February 27 in Inner Line Permit (ILP) neihlouh ziak in Mohammad Anwar Khan (45) man ua, Saiha District Court a dinsak ahihzoh in, helpawl a tel hidia muanmohna a neih ziak un Saiha district police te’n Srinagar Police kintak in thuzak mahle uh tunitan a dawnna munailou uh hidan in thusuak in taklang hi.

Srinagar a Dalgate kholianlou a Nur Mohammad Khan’ tapa hidan in Mohammad Anwar Khan kigen a, himahleh kibatluatna a neih ziak un mi tamtak in Osama Bin Laden ding sa uh hidan in thusuak in taklang hi.

Khan kigendan in, pioneer driver nna awng zong hi a, a thu gen taktak hileh bel singtang dawn a vialvaklou a Aizawl a BRTF headquarters ahihkeileh 71 BRTF Camp a apply ding ahi chihna ziak in police te’n muangmohpah uhi. Police te’n thudotna a neih un Mohammad Anwar Khan in valid driving license nei ahihdan leh Mecca a hoh sawm hidan in kigen hi. Sungkuan kuamah neilou ahihdan leh passport leng photocopy chauh nei ahihdan a gen ziak in police te’n Al-Qaeda member hiding in muangmoh uhi. Khan in a taksa tung a muanmoh theih ding thil van bangmah puak neikei mahleh Muslim apat Hindu sahkhua a a kipiakna affidavit bel nei hidan in thusuak in taklang hi.

Lenna in Aizawl a bomb ni Zoram Ni
AIZAWL, March 4 NNN: Mizo National Front in helna nasatak a neihlai,1966 kum March ni 5 a Indian Air Force in Aizawl a bomb ni theih gigena dia March 5 pen Zoram Ni dan a zat dia Mizo Zirlai Pawl (MZP) leh Zoram Ni Organizing Committee in thupuk uh hidan in thusuak in taklang hi.

Zoram Ni organizing committee Chairman JV Hluna in thuthaksaite kiang a a gendan in, India sorkar in lenna zang a Aizawl khopi a bomb ni pen Mizoram a thiltung tengteng lak a mulkimhuaipen, panpihtu ding neilou a kisakni pen uh, Mizo tengteng in Pathian a sap ni uh ahihdan gen hi. March 5 Zoram Ni dan a zat ding thu toh kisai Hluna in a gendan in, India sorkar tung a helna dan hilou a, minautang poikhoihloute tung a India gamtatna deihlouh dan leh Central government in hiai thu mi lungsim apat thaimang a sawm ziak leh India sorkar apat ngaihdam ngetna ngiatna dan a zat hidi’n gen hi.

Hluna in a genzelna ah, state government in MHIP Day, YMA Day leh MUP Day leng khawlni dan a ana puantak dungzui a “Zoram Ni” leng, lenna in minautang bomb a khiakkhum lai a sihna tuak leh inn-le-lou ana mansuah a haksa ana tuakte zahna a khawlni dan a a puan uh lamet thu gen hi. March 5 a Zoram Ni function Vanapa Hall a zatna a Chief Minister Zoramthanga a tel ding leng organizing committee chairman Hluna in ngiat ahihdan leh huai ni chiang a, nam-le-gam a dia hinna ana pete theihgigena leh zahna a govt. office teng a flag vom khaikhiak chiat a om ding ahihdan gen hi’n thusuak in taklang hi.

Tuabangkal ah, zan a MNF main office a MNF member thak 224 laklutna hun a a thugenna ah, Chief Minister Zoramthanga in Mizoram buailai a Mizo National Front (MNF) ana zop ziak leng 1966 kum a lenna in Aizawl khopi naktak a a bomb ziak hidan a gen hi’n thusuak in taklang hi.

AMWJU a di’n sum lakh 2: TN Haokip
IMPHAL, March 4 NNN: Information and Public Relations (IPR) Minister TN Haokip in Sepnawnni a Innpi mai a a genna ah, Manipur govt. in kum teng a All Manipur Working Journalist U.nion (AMWJU) kiang a grant sum lakh 1 ana piak sek pen tua lakh 2 a punsak sawm ahihdan gen hi’n thusuak in taklang hi.

TN Haokip in a genzelna ah government in Manipur a journalist-te a dia pension scheme bawl sawm thu leh Manipur a journalist 4 kiang a kum teng a award piakkhiak sawm ahihdan gen hi.Thuchiam bel hilou in, state legislative assembly live telecast bawl ding toh kisai in sorkar in a hihtheih dan lampi a om hiam chih hon en ding ahihdan IPR minister in gen hi.

Tuabangkal ah, Chief Minister Ibobi Singh in Innpi kiang ah Manipur in electric leina dia kha teng a sum crore 9 seng gige ahihdan leh, electric gukna nasatak mai om douna dia Prime Minister in leng lemsakpihna a piak dungzui a electric gui teng leinuai a phumna dia government in panla ahihdan gen hi. Huai banah, pensioner-te limlak computerized ahihzoh apat Manipur in sum tamtak save ban ahihdan leng CM in gen hi’n thusuak in taklang hi.

Tripura Assembly dissolve hita
AGARTALA, March 4 NNN: Chief Minister Manik Sarkar makaih Cabinet in Seppatni a recommendation a bawl dungzui un Sepnawnni ;in Tripura Governor DN Sahaya in notice suah a 9th Tripura Legislative Assembly dissolve hidan in thusuak in taklang hi.

Tripura ah February 23 in Assembly election neih in ana om a, vote simna ahihleh March 7 in kipan ding a, March 19 chiang a Ministry dinkhiak ahihma tulel a Chief Minister hihna len Manik Sarkar in interim governance potou tadih lai ding hidan in thusuak in taklang hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s