The Lamka Post | March 6, 2008

Malini Bhattacharya in Lamka pha

LAMKA, March 5: Tipaimukh bial a apaisa January 16, 2006 ni a phaijang helpawlte sualluih leh khoihduhdah numei 28 te ziak a Lamka hongpha a Parbung khua ngei leng nihvei siikta National Commission for Women a Member Ms. Malini Bhattacharya in tuni zing dak 10:30 in Lamka hongpha hi. Ms. Malini bel Ms. Surender A Shishak, Dy. Director, Social Welfare leh numei khat in hon zui uhi.

Hmar Women Association makaite’n hiai mi 3te zing ann a nekpih banuah Ms. Malini kiangah Memento pia uhi. Ms. Malini in ‘Rape case toh kisai in Parbung nihvei ka vaphata a huai hunte ah mipite apan in kithuahpihna hoihtak ka ngah ziak in kipahhuai kasa mahmah hi. Himahleh tuni tan a huai case zohlouh ahih nilouh pen poi ka sa mahmah a, chikni chiang hiam a zohsiang ahih a, thudik taklat a hong-om ngei ka lam-en hi.’ chi’n gen hi. Ms. Malini bel sun dak 11 vel in Imphal ah kik nawn hi.

Secretariat a semtute’n nasemta ding

Imphal, March 5: Manipur Secretariat Service Association (MSSA) in government a demand tuamtuam a bawlte uh pichin sak diang a nohna in kal paita apan strike a neih uh tuni’n government toh kihoulemna MoU suaikai ua, tua toh kiton in zingchiang March 6 apan ngeina bang in office kaita ding uhi.

Secretariat staff-te’n strike a neih ziak un Manipur Chief Secretary in a strike sung teng uh loh piak hilou ding order suahta hi.

Suuuna:

Soizakam f/o Kamkhanpau (85) of Hebron Veng, New Lamka tuni sunnung dak 4 in a tenna inn ah si a, zingchiang in New Lamka YPA hanmual ah vui hiding hi.

Sing zuakte Police te tung ah lungkimlou

LAMKA, March 5: Lamka khopi sung a khawl zang a sing-aatte’n police-te’n sum tamtak a nget zel ziak ua lungkimlou mahmah uh ahihdan press ah thutut bawl uhi.

Thutut kingah dan in, gari khat ah Rs. 1300-1600 kikal la ua, sing-aatna khawl mun puaktun ahihnung nasan inleng laksak teitei uh ahihdan leng gen ua, helpawlte’n tax dan in Rs. 300/- vel la lel ua, police te’n bel amaute sang a tamzaw tham a lak ziakun helpawlte sang a police te lauzaw uh ahihdan leng gen uhi.

Thousileen hawm
LAMKA, March 5: National Vector Borne Disease Control Society nuai a District Vector Borne Disease Control Society, CCpur in tuni’n Leimatak Silen Power House ah huai kiim a kho tuamtuam 30 apan ASHA te kiang ah Deltamethrine damdawi a thousileen diahdan (bed net impregnation) sinsak ua, huai hun ah thousileen hawmna leng nei ngal uhi.

DDT bag 120 hongtung
LAMKA, March 5: District Malaria Office, CCpur ah tuni’n DDT bag 120 truck khat in hongtung hi. Hiai DDT te bel District quota hi a, tunung sawtlou in thoukang kaap kipanpahta ding hi.

Govt. in dawnna penailou
LAMKA, March 5: District sung a mautaam tun ziaka AID Zomi, Japan tungtawn a Osaka pansan Japan International Food for the Hungry (JIFH) in canned/packed food 40 Tonnes hon khak ding toh kisai a Government kiangah apuakman sensak ding in SSPP in DC/CCpur tungtawn in ngetna nei mahleh Government in dawnna penailou hidan in tuni’n DC/CCpur in gen hi.

Huai lou in Mautaam ziak in District APL Quota teng kial tunna sub-division-te a zuak ding heikawi ding phalna ngetna leh Parbung leh Vangai Range a PDS anntangte Silchar apan puak ahihtheihna dia ngetna FCS ah piaklut hi a, himahleh tutan in hiaite toh kisai leng dawnna bangmah omnailou hi’n DC/CCpur in gen hi. Khateng in District in APL anntang 1805 Qtls.ngah hi. January APL anntang 900 quintals Thanlon Sub-Division a zuak ding leh 900 quintals pen Parbung leh Vangai Range ah zuak ding in heikawi in om hi. Parbung leh Vangai Range a PDS anntangte Imphal leh Lamka tawn a puak ahihchiang in apuakman sanglua a ser khat ah Rs. 2/3 bang tungzou a Silchar apan a puak hileh ser ah Re.1-1.50 khawnglel tungzou hidan in DC/CCpur in gen hi.

PHSC building 5 bawlzouta
LAMKA, March 5: National Rural Health Mission nuai ah District Health Society in Action Plan 2007-08 tungtawn a District sung a Primary Health Sub Centre building 15 bawlthak dia aguante lakah tutan in building 5 zousiangta uhi. Huailou in 2008-09 Action Plan leng bawlkhinta in proposal pelutta uhi. District sungah Primary Health Sub Centre 17 hon beh ding in ngetna leng pelutta uhi.

Numei naupang kum 9 khat mahnikithat
LAMKA, March 5: Kwakta a om Ms.Romila (9) D/o. Aton in tuzingkal dak 5:30 in a inn uah ‘Hilda’ kichi ganhing thahna (insecticide) a dawn ziakin Lamka Damdawi inn kintaka puaktung himahleh damzoulou in zing dak 7:30 in Children Ward ah si hi. Thukizadan in Romila pianna nu’n khamtheih damdawi a neksek ziak in Romila in khousek mahleh anu a khawltuanlouh ziak a amah leng tongkhong in tuzing in mahni kithah sawm in insecticide dawn hidan in a pianpih sanggamte’n gen uhi.

Lamka ah Zoram Ni zang
LAMKA, March 5: Mizo National Front in helna nasatak a neihlai,1966 kum March ni 5 a Indian Air Force in Aizawl a bomb ni theihgigena dia March 5 pen ‘Zoram Ni’ dan a zat dia Mizo Zirlai Pawl (MZP) in Assembly 2007 a thupukna bang in tuni’n leng Lamka a Mizo Peoples’ Convention, HQ Manipur Office, IB Road ah MZP Manipur HQ makaih in Zoram Ni zatna om hi.

Hiai hun ah MPC HQ Manipur, Group YMA Manipur, Ex-MNA Manipur leh MZP Manipur HQ apan in makai tamtak paikhawm in Aizawl khopi a March 5, 1966 a Jet Fighter in bomb a khiat ziak a site sunna hun zang uhi. Hiai hun ah heutu tuamtuamte apan in thugen ngaihkhiatna aneihbanuah MZP General HQ in March 5,1966 a Aizawl a thiltung ziak a India sorkar naktak a dem leh Ngaihdam ngen dia aphut uh pen thuap uh ahihdan puang uhi. Hiai Zoram Ni zat bel a khatveina hipan a, a thiltun nung kum 42 pailiamta hi. Tuni’n Khovel pumpi a MZP unit omna teng ah zat in om hi.

Singzawl in dengkha
LAMKA, March 5: Mr. Khamthuama (60) H/o. Khawli of Kawnpui tuni zing dak 10:00 vel in a inn uh bawllai inntung apan singzawl khat kia in a dek dengkha in khophawklou in puk a, bangtanhiam nung in khophawk mahleh a luak ziakin Lamka damdawi inn ah etkol in omlel hi.

Multi Media Information Campaign
LAMKA, March-5: District Information Office Churachandpur saina in Synod Hall IB Road ah March 13- 15, 2008 sung 3-Days Multi Media Information Campaign neih sawm uhi. Hiai hun ah media toh kisai a lunglut kuapeuh tel theih ding hi.

Inn apan pot inn tung kik lou
LAMKA, March-5: David Gangte(33) S/o (L) Pauzamang of New Lambulane Imphal apaisa March 2, 2008 a inn apan pot khia inn tung kiklou a, a inn kuanten mun tuamtuam zong mahle hiai thu gelh ahihtan in mulou ua, a mukhate’n mobile no.9856265168/9856343398 tungtawn in theisak ding in a inkuanpihte’n ngen uhi. Mr. David bel lungsim veng chiahlou hi’n leng gen uhi.

Laithon neitu in la din ngen
LAMKA, March-5: Mr. K. Siamgoulian, V. Sangngai leh T. Khumlian c/o Tongluang Post box a Laithon poimohtak a neitu’n tuni tan a lak nailouh ziakin March 8, sunnung dak 1 tan a la ding in proprietor, Tongluang Enterprise in theisak hi.

EPIC lak kipan lellel
LAMKA, March-5: 58th Churachandpur Assembly Constituency sung a Polling station tuamtuam ah Elector photo Identi Card (EPIC) lakna zan in kipan a, Pass port kila louten ngaihven theih laitaka ahi. Tulai a EPIC team in Digital Camera a zatte uh khen khat battery bei pahpah leh Screen baih lam taktak a kihong thei lou chih complaint hunkhop om in gen uhi.

Final Exam 3 om lel
LAMKA, March-5: Council of Higher Secondary Education nuai ah Class-XII (Arts/Sc) exam Feb.29, 2008 in Churachandpur College leh Lamka College ah kipan a, Board of Secondary Education Manipur (BSEM) nuai ah Class-X exam Churandpur private centre Rayburn High School ah March 3, 2008 in kipan a, Centre Board of Secondary Education (CBSE) nuai ah Class X exam JNV/Tuinom Churachandpur ah March 1, 2008 in kipanta hi. CBSE nuai a class X exam na ah ST Paul Institute leh STC/BSF huang sung a Centre
School apan Class X students’ te exam ah tel uhi.

CMO in voluntary pension ngen
LAMKA, March-5: Dr. Goulam Chief Medical Officer (CMO)/Churachandpur in Govt. nasep Feb. 29, 2009 a pension ding hihmah leh taksa upat ban ah a chimtakluat ziakin April 30, 2008 apan Voluntary pension pe ding in Director Health ah Jan.15, 2008 in ngetna pelut khinta hi.

VPC vaipaw thakte
LAMKA, March-5: Vaiphei Peoples Council (VPC) in tuni’n VPC office ah Presidential election nei ua, tua ah P. Kamkholal president ding a telching in om a, vice president dingin Khatkhotong Baite telching a om hi’n thusuak in taklang hi.

KKL in KIM kigolh saulua hi’n ngoh
LAMKA, March-5: Kuki Khanglai Lawmpi (KKL) in Vice president, Kuki inpi Manipur kiang a lai a piak press a kimu in a taklat dan in, KKL kichipen government a register body hoihtak leh voluntary organization ahihziakin election ding thu a pawl dang kuamah kigolh lou ding in theisak hi.

Thutut kingah dan in, local paper khenkhat a KKL election March 7 a neih ding a thusuah kibawlpen KKL GHQ in theihpihlou a, hiai a KKL member kuamah tellou ding inleng theisak uhi. Hiai hun a KKL member tel a om leh dan toh kituaklou a lak hi di’n leng thutut kingah hi.

Assembly News
## Ngursanglur MLA dotna Education Minister in a dawnna ah, Tipaimukh Sub-Division sunga High School leh Junior High school a teaching staff leh non-teaching staff om ding zah toh kisai guideline kichiantak omlou ahihdan gen hi. Hichibang guideline bawlna ding cabinet in genkhomta uh hidan in leng minister in gen hi.

Minister in aban agenna ah, Tipaimukh Sub-division sung ah High School 4 om a, tuate ah a kigawm in, teaching staff 20 leh Non-teaching staff 11 om hi. Hiai sub-division sung mah ah, Junior High school 14 om a, tuate ah, teaching staff 90 leh non-teaching staff 12 om hidan in minister in gen hi. Hiaite lak ah, Hmungjungkai Jr. H/S Kangreng Jr. H/S P. Munlian Jr. H/S, Rovakot Jr. H/S leh Thingpuikual Jr. H/S te ah, Non teaching staff khat leng omlou hi.

## K. Raina MLA dotna Works Minister K. Ranjit in a dawnna ah, Tadubi A/C sunga I.T. lampi bawlna Special Plan Assistance 2006-07 nuai a ompen zoh hinailou in gen hi. Works minister in aban agenna ah, hiai lampi bawlna dia tunitan a sum sen zah Rs 637.51 lacs ahihban ah, Contractor tuamtuam 12 in nasem uh hidan in gen hi.

Hiai lampi bawlzohna ding 12.11 Km lel in samta a, nasep ding omlaite March 31, 2008 tan zoh ahihkei leh a kisaipih Contractor te tunga action lak hiding inleng minister in gen hi. Minister in hiai lampi bawlna a va etkaina ah, contractor 12 lak a, 7ten nasem lou a sum lakhia hidan ua vatheikhia ahihdan leng gen hi.

Hiai tungtanga EE khat leh SO khat leng suspend hita dan in gen hi. Amau tunga chargesheet bulh in enquiry leng zoh phial hita dan in minister in genbeh hi.

## Dr. Khasim Ruivah MLA dotna Science & Technology and I.T. minister in adawnna ah, National e-Governance Plan nuai a State Wide Area Network (SWAN) progress February, 2008 tan a hichibang in taklang hi.

Minister in agenna ah, SWAN node location ding State, District leh Sub-divisional/Block HQs teng a zoh hita chi hi. SWAN toh kizom ding Departmental office tuamtuam te progress toujel chih ahi. Site a nasepna ding fund hongpai hunhun a pat hiding in minister in gen hi.
Site preparation zoh ahihchiangin NIC in networking vanzat dingte leipan ding hi. Hiai SWAN project toh kisai in, BSNL in Optical Fibre Cable khungpanta, hiai toh kisai a Manipur State govt. toh Memorundum of Understanding leng zoh hita chi’n dawng hi.

District Head Quarters tuamtuam a, Common Serivice Centers ding toh kisai a NIC leh BSNL programme dinmun February, 2008 tan a hichibang hidan in leng minister in taklang hi. Common Service Centers (CSC) project adia Tender leng suah hi a, hiai leng under finalization chih ahi. CSC project ah NIC leh BSNL direct in kihellou khalou uh chih leng ahi.

State Energy source hoihsemna dia State govt. in Programme tuamtuam MNES nuai a aneih te bel, Govt. of India nuai a MNES kichi tua bel, MNRE chih hita, MANIREDA etkawlna nuai ah sepsuah hiding. Hichibang MANIREDA tungtawn in, sources tuamtuam apat renewable energy, small hydro, wind, biomass, solar, biofuels, hybrid projects, urban & Industrial wastes chihte om hi.

## Dr. Ng. Bijoy MLA dotna Power minister in a dawnna ah, DDK Imphal adia
power supply transmission dedicated line ana om himahleh, tua bel omnawn lou hidan in gen hi. AIR ah leng hichibang dedicated power supply line omkei mahleh, Un-interrupted leh reliable power supply bel om hidan in minister in gen hi. AIR Mayang Imphal ah bel, dedicated power supply line om hi.

Hichibang a DDK Imphal leh AIR Imphal adia dedicated line power supply om theihna dingin, a kisaipihten a sum ding deposit a bawl zoh chiang ua nasep pat hitheipan ding inleng Power minister in gen hi.

## Voting on Demand for Grants, 2008-09 March 31, 2009 tan a zat ding tuni a Innpi a genkhomna om in, tua ah, a nuai ate kituaktak in passed uhi.
Food and Civil Supplies Rs. 7,97,82,000,
Co-operation Rs 10,30,08,000,
Environment and Forest Rs. 45,15,79,000,
Sc & Tech. and Information Tech. Rs. 11,39,00,000 ahi.

MU keklet ding dal in main gate khak
IMPHAL, March 5: Manipur University Central University dinmun a dopsang ahihtoh kiton a, tua MU campus omsa apat kekletna ding govt. in plan a neih deihlouh ziakin, hichibang gam kekletna dingin a sukkhak ding Phumlou Konjin Loukol leh Heibok ching apat mipi zakhat vel dingten, tuni zinglam dak 11 vel apat MU main gate bul a protest dharna nei in, MU main gate khak uhi.

Nitaklam dak 2 vel in, Police ten dharna bawlte hawlkhia in, MU main gate hong ua, hiai mun a dharna bawlten, banner ah ‘ka agricultural gam uh honlak sak kei un, MU in gam kekna dingin ka gawl uh hon bohtan sak kei un, chih leh, ‘MU kekletna dingin a tuam in Hill campus chi in keklianzaw un’ chihte taklang uhi.

Mass Casual leave lak sawm
IMPHAL, March 5: RIMS in tutung a Staff Nurse lak a sawm deihlouh ziakin, tulel a RIMS a contract basis a Staff nurse sem Trained Nurses Association of India (TNAI) ten zan apat, lungkim louh etsakna dingin, badge vom belh kawm in nasem uhi.

Hiai pawlte’n hongtung March 7, 2008 a Mass Casual leave laksawm uh hidan inleng thutut kingah hi.

Hichibangkal ah, RIMS in Staff Nurse regular post 55 vel lakna dia Interview March 8 – 10, 2008 sungin RIMS Director office ah nei ding ua, alehlam ah, tulel a Contract Nurse sem 153 vel om uh chih leng ahi. RIMS thuneituten Contract nurse te bangzah zah hiam a regularization bawl sawm hidan in kigen mahleh, tua contract semten bel, amau teng khatvei thu a regulalrisation piak ngen uh hidan in leng kigen hi.

Ni 4 sung daihding Bharat Nirman Campaign
IMPHAL, March 5: Press Information Bureau, Imphal saina in, Central sponsored scheme tuamtuam a Public awareness campaign dan in, ni 4 sung daih ding, Bharat Nirman Campaign tuni apat Chandel district sung Moreh a, Kondong Lairembi Ima Haraobung ah patkhiak in om hi. Hiai hun honkhiakna hun ah, khuallian in Chandel DC Ashok Kumar IAS pang hi.

Nagaland ah vote 83.5% kikhia
KOHIMA, March 5 NNN
11th Nagaland Legislative Assembly a member ding candidate 218 lak apat mi 60 telkhiakna Nilaini’n Electoral District 12 a kihawmzak polling station 1766 ah neih in om a, Commissioner’ Office, Kohima a tunitaklam a Nagaland Chief Electoral Officer, C. J. Ponraj, IAS in thuthaksaite kiang a a genna ah, Zunheboto district simlouh in, a dang teng a vote kikhia 83.5% ching ahihdan gen hi’n thusuak in taklang hi.

Hiai election ah buaina nasalua omkei mahleh, Dimapur-I Assembly Constituency ah party tuamtuamte gari 7 suksiat in om a, Nagaland pumpi ah Electronic Voting Machines (EVMs) 9 suksiat a a om banah bomb mun 2 a puak hi. Huai banah, Wokha a leng mi 2 mat a om uh hidan in thusuak in taklang hi.

Nagaland pumpi a di’n Peren ah vote kikhe hoihpen a, 95% kikhia hi. Kohima khopi a niampen in pang mahleh vote 77 % kikhe veve hi. Khua se mahleh mipi’n a mohpuakna uh ngaipoimohtak a zu-le-ham thuak a vote khia uh hidan in thusuak in taklang hi.

Kum dang election a vote khiakni toh teh in tutung election ah liam-le-baina tuak kuamah omlou a, buaina thupilua omkei mahleh, Dimapur-III A/C leh Phek Town A/C ah bel bomb puak hi. Polling sukbuai sawm ziak in 37-Tyui A/C, Wokha ah mi 2 mat in om ua, 37 Tyui A/C – 5, 16 Pfutsero A/C – 1 leh Tuensang Sadar-I A/C – 3 ah EVM 9 suksiat in om hi. Huai banah, polling station 8 apat Commission in re-poll ngetna complaint letter 8, BJP-2, NPF-2, RJD -2 banah Congress leh JD(U) apat khat tuak mu hidan in thusuak in taklang hi.

Election buaina lianlua omlou a zoh bang mahleh, gari a kidaihlouh ziak in Zunheboto district a Returning Officer leh Deputy Commissioner in polling personnel-te a booth ding uah sawl theilou ua, polling station 14 ah election neihtheihlouh in om hi. Himahleh, hiai polling station 14-te ah March 7 chiang in zinglam dak 7 apat nitaklam dak 4 sung a election neih a om ding ahihdan thusuak in taklang hi.

Huai banah, Assembly Constituency 60 a vote simna district headquarter chiat a a kiton in neih hiding a, re-poll neih ding tengteng March 7 a neih ahihzoh chiang a March ni 8 a vote sim kipan ding ahihdan Nagaland CEO in gen hi’n thusuak in taklang hi.

Seri Director in kikap
IMPHAL, March 5 NNN
Imphal East district a Khongman Part II a Manipur Sericulture Department a Director Salakpam Devabarta Sharma tenna inn a nihveina dia March 3 zankim vel a meltheihlouh te’n bomb a deng uh hidan in thusuak in taklang hi.

Hiai thiltunlai in Salakpam leng inn ah omlou a, a sungkuante’n hiai thu theikhakei mahle uh a innvengte un bel March 3 zan a thau ging leh tukverh limlang kek ging khong za uh ahihdan hilh uhi. Salakpam’ sungkuante’n Nilaini zingkal dak 8 ding vel in van a koihkhawmna room ua tukverh limlang teng kek ahihdan theikhia ua, a khonung a huai room sung apat lethode tang hawm mukhia uh hidan in thusuak in taklang hi.

Sericulture Department a Director Salakpam Devabarta Sharma’ tenna inn ahihleh meltheihlouhte’n nikum December khabul in leng ana kap ngeita ua, himahleh liam-le-bai tuahloh bel kuamah omlou uh hidan in thusuak in taklang hi.

Helpawlte ziak in kiphin
IMPHAL, March 5 NNN
Panchayat Development Fund apat helpawlte’n percent a nget ziak un Nilaini’n Imphal East DC Complex ah Imphal East Panchayat Development Association, (Block 1&2) saina in Gram Panchayat palai mi 500 vel kiphinna pan uh hidan in thusuak in taklang hi.

Imphal East DC complex a kiphinte gendan in, PDF apat percent ngetna ziak kia hilou a, tuma zek a panchayat member-te tung a helpawlte gamtatna mohpaihna dan leng hidan in gen uhi. Hiai hun a panchayat member paikhawmte’n niteng a zing dak 10 apat nitaklam dak 4 sung March 7 tan ‘sit-in-protest’ kiphinna neih gige ding in thupuk ua, huai hun sung a helpawlte’n a ngetna uh a zukkik kei ua leh March 8 chiang a Imphal East Block 1 & 2 a panchayat palaite’n Manipur Governor mai a a lom ua kitawpna pelut ding uh hi’n thusuak in taklang hi.

MTPRM in ADC a di’n ‘total autonomy’ ngen
IMPHAL, March 5 NNN
Dan thak bawlkhiak ahihmatan Autonomous District Council (MDC) election neih hun ding Manipur govt. in a suan toh kisai kipahpih mahmah kawm in Movement for Tribal People’s Rights, Manipur (MTPRM) in Nilaini’n state government kiang ah Dan kibawl thak ding pen Indian Constitution toh kizul a ‘total autonomy’ pansan a, Manipur singtang bial a khantouhna poimoh kin ahihdan phawk kawm a bawl dia ngen uh hidan in thusuak in taklang hi.

Singtangmite’n 1989 kum apat ana deihlouh uh, Manipur Hills District Council Act, 1971 pen a doudalna ziak ua ADC election neih hun ding suan a om ahihdan MTPRM president S. Ramhaoleng in press release ah suah a, tribal MLA te’n leng hiai thu gel vengveng kawm a, mipite lametna bang a singtang gam a khanthouhna a om theihna dia panla ding in ngen hi. Assembly a hiai thu genkhawm ahih chiang a nouneltak a sut ding a ngetna a bawl kawm in singtangmite a dia hoihlou Dan puaklut a a om leh thil hoihlou tungzaw ding ahihdan gen hi’n thusuak in taklang hi.

Huai banah, khentuamna leh nelhsiahna om hidan a ngaihdan ompen a beitheihna dia kintak a ADC election neih poimoh ahihdan genkawm in state government in leng a kintheipen a a poimoh bangbang a panla dia ngen hidan in thusuak in taklang hi.

House in demand for grant tuamtuam pass
IMPHAL, March 5 NNN: Ni bangzah hiam paita a FCS godown apat BPL/AAY anntang bag 4240 kigukhia toh kisai FCS dept. in suikhe khin ahih dan FCS minister Y. Erabot in Nilaini in Innpi ah gen hi’n thusuak in taklang hi.

Tamenglong a om Nungba dist. a ding Oct. 2007 a FCS anntang 290 quintal gukkhiak kisawm lai mat ahih danleh, state a SK oil mansak a omlou ahih dan leng opposition MLA te’n cut motion abawlna uah FCS minister in dawng hi. SK oil kiningchinglou toh kisai a, department in oil pump-te etchetna aneihna ua petrol leh diesel toh SK oil ki-mix amuh ziak un explanation bawl di’n petrol pump neite March 1 a sap in om uhi.

Edible oil sample Guwahati a test kibawl report-te health dept.kiang a piak khiak hi a, state a LPG gukzuaktute pilvangtak a FCS dept. in enkhe gige ahih dan leh, dist. teng a consumer court bawlna dia gam poimoh leina ding Rs. 47 lakhs aki-sanction ban ah govt in cooperative movement dopkang na dia panla in mela chituamtuam sai ahih dan leng Erabot gen hi.
Forest minister Debendra cut in motion adaawnna a agenna ah Iroisemba Imphal a state zoological garden a om ganhingte’nek dia kum teng a state in Rs.37 lakh seng gige ahihdan agen banah, zoo ending mi omlouh ziak in zoo in sum mulou ahih dan leng gen hi.

Tuabangkal ah, dan leh thupiak lam a buaina aom ziak a singtanggamte a solar lamp hawmna buaina om hi’n IT minister T.Phungzathang in gen a, Imphal East Mantripukhri a govt in 9.60 crore seng a IT bawln asawm ahih banah, hiai dia gam 27 acres-a lian leipah kisawm ahihdan leh, gamneite piak dia Rs. 42 lakhs kisepkhia ahihdan leng Science and Technology and Information Technology minister Phungzathang Tonsing in innpi ah gen hi.

Hiai tutkhawmna ah, FCS-Rs. 74, 82, 69, 000, Cooperative-Rs. 10, 300, 800, Forest and Environment-Rs. 45,15, 79, 000, leh Science and Technology leh IT-Rs. 11, 39,00, 000 tel in kum 2009-09 a demands for grants a di’n house in Rs. 74, 82, 69, 000 passed hi.

lamkapost@yahoo.com
zogam

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s