Manipur Express | March 7, 2008

Zogam.com Writers’ Award

Lamka, March 6: Zosuante Internet tungtawn a a kithuzakna te lak ua minthang penpen Zogam.com in Zogam.com Writers’ Award kichi telkhiakna panta uhi. Agent bangzah hiam te tung tawn in Nominees Data Sheet hawmkhiak na nei uh a, hiai Sheet tungtawn in Laigelhtu laigelh zia leh anasep apat in tel hiding hiding in kigen hi. Zogam.com Writers’ Award in Zomi teng huam kha vek a, laigelh lam chituamtuam te leng huam kha vek ding hi. Nominees Data Sheet Agent ahihleh, Lamka Net, Vengnuam Upper Lamka ah muhtheih ding hi.

MAIN HEADLINE:

Rishang Keishing,MP(Rajya Sabha) hun April 9,2008 in bei ding
March 26 in Biennial Rajya Sabha election om ding

Imphal, March-6: Parliament a Upper House kichisek Rajya Sabha member tamtak a retire ding ziakin seat 56 ading in March 26,2008 in Biennial election om ding hi. Rajya Sabha member 56 retire dingte lak ah Manipur apan Chief Minister-lui Rishang Keishing leng tel a,amah April 9, 2008 in a hun(term) bei ding hi. Election Commission in a puankholh dungzui in March 8, 2008 in election notification suak ding a, candidate dingte adingin March 15, 2008 tan nomination paper piaklut theih ding hi. March 17, 2008 in nomination paper-te etchet hiding a, kizukkik nuamte adingin March 19, 2008 in kizukkik theih ding hi. March 26, 2008 a election om ni in zinglam dak 9.00 akipan in nitaklam dak 4.00 kikal vote khiak hiding hi.

Maharashtra state apan Rajya Sabha member 7 ahun uh bei(retire) ding a, Tamil Nadu leh Andhra Pradesh akipan in 6 tuak retire ding uhi. West Bengal leh Bihar akipan in mi 5 tuak retire ding uh a, Orissa leh Gujarat state akipan in mi 4 tuak retire ding hi. Madhya Pradesh, Assam leh Rajasthan state akipan in Rajya Sabha member 3 chiat retire ding uh a, Jharkhand, Haryana leh Chhattisgarh akipan in member 2 chiat retire ding uhi. Himachal Pradesh, Manipur leh Meghalaya state akipan in April 2008 sungin mi 1 chiat retire ding a, Arunachal Pradesh akipan in May 2008 sungin mi 1 retire ding hi.

Rishang Keishing hun beini April 9, 2008 a Assam akipan a retire ding Rajya Sabha member midang 3te bel Karnendu Bhattacharjee, Dwijendra Nath Sharma leh Urkhao Gwara Brahma hi uh a, Meghalaya apan Rajya member ching April 12, 2008 a retire ding bel Robert Kharshing hi a, Arunachal apan ching a May 16, 2008 a retire ding bel Nabam Rebia hi hi. March 26, 2008 a election om zawh nitaklam dak 5.00 in vote vsim kipan ding a, election process teng March 29, 2008 a zawhsiang vek hiding in Election Commission of India in bikhiah hi.

LOCAL NEWS:
Block Level Competition kipan

Mr.Kaikhanlian Guite DI/CCpur leh a staff te saina in tuni zinglam dak 10:30 apat in Vimala Raina High School ah ‘Education for All’ chih thupi anei in Block Level Competition kipana, March 8, 2008 in zou ding uhi. Tuni in item 4 in kidemna nei ua, Essay competition ah school 9 apat in student 29 tel ua, Quiz competition ah school 5 apat in student 10 tel uhi. Drawing & painting competition a Group A, Class I & II ah student mi 12, Group B, Class III-V ah student mi 26, Group C, Class VI-VIII ah student mi 17 tel ua, Cultural dance competition ah school tuamtuam 6 te’n kidemna nei uhi. March 7, 2008 in Exhibition nei ding ua, March 8, 2008 in Lamka Public Ground ah Games & Sport kidemna nei ding ua, nitaklam dak 3 in prize hawm khiak na nei ding uhi.

Video Conference zattheih ta
DC/CCpur office ah 2006 in Video conference zawhsa zat theih mai ding a awmsa, Electrict ziak in vanzat tamtak kaangsia a, akisia teng bawl ahih nung in kizousiang ta in, tu’n zat theih ding in awm nawn ta hi.

DC in NREGS nasepna enkhia
Mun tuamtuam ah NREGS nasepn paitou zel a, tu ni’n DC/CCpur in Demmang Veng leh Tuibuang HQ ah NREGS nasep etkhiak na vanei a, na kisemte hoihsa in lungtung mahmah hi.

Damlou vehte’n subuai uh
Lamka Damdawi inn ah asun azan in damlou veh mi tamthei mah mah hi. Doctor te’n Ward round abawl sung lel in leng Nurse te’n damlou vehtute pawtkhe ding in sawl mah le uh pawtkhe ut hetlou ua, hehthei bang om hi’n kigen hi. Nurse te’n damloute Glucose khai dek leh akap dek hun un leng ana kihem khe utlou pawl om a, ana sepding uh subuai kha mahmah hi’n kigen hi. Hiai tungtang ah damlou vehte pilvang ding in leng Nurse pawl in ngetna nei uhi.

Rev & Dr. Soson Gangte in Certificate pia
Tuni zinglam dak 11 in Rev.Dr.Soson Gangte, National representative, International Association for Theological Accredition(IATA) in Trinity College & Seminary, Sielmat vehna nei a, Principal kiang ah B Th.level tan a ding in Accredition Certificate piak na nei hi. International Association for Theological Accredition General HQ ahihleh, New York ah om a, India a National HQ ding in Kolkota zang lel uhi. IATA in India gamsung mun tuamtuam ah Bible College 75 te kiang ah Accredition Certificate pekhe ta ua, Trinity College &Seminary, Sielmat apiak uh Manipur ading in amasapen hilai hi.

Jangkhotong inn tung apat kia.
Mr.Jangkhotong(60) f/o Letkhothang of Gamnomphai March 3, 2008 nitaklam dak 3 vel in a inn tung uh (Langva) kehna bawl dek lai, kia in a tawbou in lei dengkha a, a nungjaang guh kipelh a, tuni in District Hospital kipaw lut in, etkawl in awm hi.

Singngat line electric buai
March 5, 2008 nitak apat in Electrict Singngat line Earth fall over current om ziak in sia in mit vengveng hi. Asiat na mun geih theih hinailou a, Saikot area ah Earthfall om ding in muang mawh uhi.

Siluang pawkhe ut zoklou
Mrs.Maingou(48 )w/o Kunja of Nongmaithong asuul ah cancer oma, operation ding alauh huai ziak in Doctor te’n ngamlou ua, himahleh a sungkuan te’n Dr.Paikhomba kiang ah operation sak ding a a nget ziak un Dr.Paikhomba in zan in operation bawl sak hi. Himahleh tu zing 6:30 in damzoulou in si a, asih tak in Dr. Paikhomba tung ah amawh teng khuksak sawm ua, siluang leng pawkhe ut zoklou in, sawtpi akoih nung un nitak lam in pawkhe pan uhi.

Natna hii dalna tamtak pekhia.
District Immunisation Office nuai a, National Child Survival & Safe Motherhood Programme nuai ah February 2008 kha sung in numei naupaai mi 749 te TT kaap (injection) uhi. Naupang kum 1 nuailam te kiang ah TB daalna (BCG) pasal 172, numei 181 te kaap ua, polio damdawi pasal 501, numei 484 te dawnsak uhi.Huai ban ah Khuhhiip (DPT) dalna pasal mi 501, numei mi 484 te akaap ban uah, Sensidalna(measles) daalna pasal mi 162 leh numei mi 143 te leng kaap uhi.

DLCC leh Security meeting ding
Sumant Singh IAS,DC/CCpur makaih March 7, 2008 sun dak 12:30 in DC office Mini- Secretariat ah DLCC meeting awm ding a, SDO/BDO/DLO teng tel ding uhi. Huai zawh nitaklam dak 2 in District Level Security Co-ordination Committee meeting om ding hi. Huai hun ah CCpur District sung a, Dan leh thupiak gen khawmna nei ding uhi.

Trade licence renew din theisak
Lamka, March-6: Lamka khawpi sunga dukan, hotel leh business mun -commercial establishment tuamtuamte adia District Council/CCpur office in trade licence a piakte March 31, 2008 in ahun(validity) bei ding a, huaiziakin trade licence nei teng in kum 2008-09 sung daih dingin Town office ah trade licence renew sak chiat ding in Chief Exe Officer/Autonomous District Couincil,Ccpur in theisak hi.

Langol-Lamphel area NIT bawl lemsalou
Lamka, March-6: CCpur Dist Students’ Union(CDSU) in thusuah bawlin state govt in Langol-Lamphel area a mihing tenna kia hilou lou neihna mun tanpha hihsia a NIT bawl a sawm pom theihlouh thu taklang kawm in mundanga gam piak kimansa a omte nawlkhin ahih theihsiam haksa sakthu leng taklang uhi. Govt in state kipumkhatna ngai poimawh hileh CCpur district leng central institute poimawh khat bek apiak thil kilawm hi a, thilteng phaijang bial district 2 kia a govt in a alom atang a sekkhawm kinelhsiahna ahihdan leng taklang uhi.

KKL Gen HQ in election tungtang thusuah
Lamka, March-6: KIM(Kuki Innpi Manipur) in Kuki Khanglai Lawmpi(KKL) Gen HQ election ding thusuah a bawl KKL Gen HQ in ngaisiamlou in KKL pen autonomous body, philanthropic orgn ahihban ah dan(constitution) nei a kivaipuak uh ahihdan taklang uhi. KIM in March 7, 2008 a election ding a chih KKL Gen HQ in thei phalou hi a taklang in KKL member kuamah huai election kichi a hawhlou ding in theisak uh a, KKL in constitution paipih touzel ding leh election leng KKL Gen HQ mah in conduct ding ahihdan puang uh a, KKL thila orgn dang kigolh pen KKL paidan tawh kituaklou chi’n leng Press ah thutun uhi.

KSO/Sangaikot Block lungkimlou
Lamka, March-6: Kuki Students Orgn/Sangaikot Block in development thil ah SPF govt in nelhsiah hi’n puang uh a, CCpur-Sugnu PWD road leng state highway a puan himahleh bangmah sep hilou chih taklang in govt in lamlian bawl pankin ding in nawh uhi.CM in kim 2006 a sanction a puan Sangaikot-T. Khongkhai Road leng tutan bawl hituanlou a, Sangaikot a block office building kum 2006 a zawh hinapi tutan Block office staff-te Zoveng,Lamka a innluah a na asep uh lungkimlouh thu leng taklang uhi. State govt in March 2008 sung apanlak a kipat kei leh April 2008 kal masa sungin state-wide bandh pan ding uh chi’n puang uhi.

KNF(Z) in mawhpuakna lemthak
Lamka, March-6: Gedion Kuki, Secretary(Pub & Info)/KNF(Z) in thusuah a bawl dungzui in Thanglet Hangmi @ TL Kuki in Fin Secy/CCpur Divn-I len ding a, Khaitinlal Lhungdim @ Stallon in SDC, CCpur Divn-I len ding hi. TT Lupheng @ LS Sailo in SDC, Imphal Divn Wing-I len ding a, Letkhogin Haokip @ Sanga in SDC, Imphal Divn Wing-II len ding chih thusuah hi.

SUUNNA

Chiinching(94) m/o Upa.Ginnok of Dorcas Veng, New Lamka tuni nitak lam dak 1 in teeknat in sia, tuni mah in YPA haanmual ah kivui hi.

IMPHAL NEWS:

Assembly in Demand tuamtum 5 pass
Imphal, March-6: Manipur Assembly Budget Session ah Department 5 in March 31, 2009 tana a zat ding uh tuni’n Demand tuamtuam 5 kigawm Rs. 3,53,51,71,000 pass uhi. Huaite bel

Demand No. 11: Medical, Health and
Family Welfare Dept – Rs. 125,06,44,000

Demand No. 12: Municipal Administration,
Housing and Urban
Development – Rs. 65,75,28,000
Demand No. 21: Commerce & Industries and
Weights & Measures
Department – Rs. 51,20,27,000
Demand No. 39: Sericulture – Rs. 77,69,90,000

Demand No. 43: Horticulture & Soil
Conservation – Rs. 33,79,82,000

Police & security in galvan 776 mukhia
Imphal, March-6: L. Nandakumar Singh,MLA in tuni’n Assembly Session ah Police leh Security force in galvan a muhkhiak zah uh thil omdan dotna a bawl Chief Minister in a dawnna ah April 1, 2002 akipan Feb 15,2008 kikal in police in galvan 350 mukhia (seized) in security force te’n a muhkhiak uh 426 kigawm 776 pha a, huaite chi tuamtuam 131 pha a, gam tuamtuam 15 a kibawl hi’n Chief Minister in dawnna pia hi.

Seminar-cum-Interactive Discussion
Imphal, March-6: New Delhi a Deshkal Society saina in March 8, 2008 zinglam dak 10.00 akipan nitaklam dak 5.00 tan Manipur University a Deptt pf Pol Sc a Lecture Hall ah “Voices from Manipur on peade and development: Intervention in a Globalising World” chih thupi zang in Seminar-cum-Interactive Discussion om ding hi. Prof. C. Amuba Singh, Vice Chancellor, Manipur University khuallian a pang in seminar hong ding hi. Huai ah Professor, politician leh mi poimawh tuamtuam in topic dangdang zang in Resource person in pang ding uhi.

Manipur a RJD Women Front makai din sep
Imphal, March-6: RJD National Women Front a President Ms Soroj Dube,ex-MP in Manipur Unit RJD Women Front a President Ms Ch. Renubala in RJD National Women Front Committee a General Secretary len ding in sep a, huai tungtang ah Manipur Unit RJD Women Front Committee pawlin kipahthu puang uhi. Huailou in RJD Manipur a President N. Nipamacha,ex-CM in 57-Henglep A/C a RJD Women Front President len ding in Ms Neikim Haokip guang a, Secretary ding in Ms Nenem Haokip guang chi’n Manipur Unit RJD Women Fromt a General Secretary Ng Sundari Devi in thusuah hi.

MVHA pawlin ni 1 sung function nei ding
Imphal, March-6: Manipur Voluntary Health Association(MVHA) pawlin Wangkhei Ningthem Pukhri Mapal a Manipur Voluntary Health Assn Conference Hall ah March 8, 2008 zinglam dak 9.30 akipan in ni 1 sung daih ding cancer natna genkhawmna leh kithuhilhna hun zangkhawm ding uhi. Huai ah Chief Guest in Health Minister Ph Parijat pang ding a, Functional President in Dr H. Borajao Singh,MLA pang ding a, Guest of Honour in ADdl Director of Health Dr G. Mahendra Sharma pang ding hi.

KYKL member 2 apan galvan mankhia
Imphal, March 6: Imphal East Police Commando te’n zan zinglam dak 11 in Mantipukhri a Central Reserve Police Force te gate post mai ah lampi paite leh gari a taite body frisking nei uh a, huai ah KYKL member poimawh mahmah nih, S Santosh @ Rishi (34) of Moirangkhom Sougaijam Leikai leh L Sunil @ Amujao (27) of Pishum Huidrom Leikai mankhia uhi. Mr Santosh apan in M 20 pistol khat leh magazine ban ah, 9 mm tang thum mukhia ua, AK 47 tang leng 6 mankhia uh hi’n kigen hi. Tuaban ah, Sunil apan in .32 Pistol, Magazine 1 leh tang 2 mankhia uhi. Imphal Police Commando tem ah in, Hapta Golapati ah zan tu nitak dak 6 vel in Frisking nei ua, huai ah PULF cadre 1 Md Nazir Ahamad @ Pethem (35) of Yairipok, Ningthounai mankhia uhi.

Electricity SE in thusuah khauhtak bawl
Imphal, March 6: Electricity Department nuai a Superintendent Engineering Circle – I Kh Khamba Singh in February 20 2008 in public notice khauhtak suah in, phalna bei a electric la tengteng disconnect sak ding ahihdan taklang a, huai dungzui in Electricity Department in pan naktak in la in, Inn 12 a disconnect bawl uhi. Khamba in tuni a ataklatna ah, Feb 20 apan in Department in panla ngal a, Police te tawh kizui in, Electrical Act 2003, section 126 (5), 135 (II) dungzui in, mi 12 te tung ah case bulh uh ahihdan taklang a, Langgol housing complex apan mi 5 leh veng tuamtuam apan mi 7 te tung ah case chiamteh a om lel ahihdan gen hi.

Govt in hawn that maive ua…: Sharmila
Imphal, March 6: Kum 7 val bang Armed Forces Special Power Act Manipur apan lakkhiak ding ana sual Irom Sharmila in tuni in etkol a a om na mun JN Hospital, Judicial Custody ah Press conference sam a, AFSPA kum 7 bang om khinta ahihdan gen in, huai ah mipite thuakna tuamtuam te taklang hi. Sharmila ahihleh, damdawi inn apan pawtkhiak sak ahih nung in, India Capital Delhi tanpha March 2007 in va tung a, huai nung kum khat hial chingta mah leh, Government in demand abawlte ngaihsak mahmah lou ahih ziak in, amah leng Government in that suk mai ding in ngetna nei hi. State tamtak in education budget thupi theipen a abawl lai un, Manipur Government in police modernization chauh buaipih ua,huai leng Security Force te adia chance piakna thupitak ahihdan taklang kawm in, Manipur budget paidan pe’n thil lamdang tak ahi chi’n Sharmila in gen hi.

Helpawlte ziak in Singjamei khak hinawn
Imphal, March 6: Tulai in Manipur phaizang helpawlte che mahmah in Leikai tuamtuam a sum buukte ah demand letter piak thangsak mahmah ua, Singjamei Area a sumbuuk (dawr omte) apan tax laksawm ahihziak in, tuni apan in hunchiam omlou in Singjamei area teng dawr khak in om hi. Singjamei ahihleh, mun poimawh tak hi a, Super Market ngial kum tamtak paisa apan luun mahmah hi’n kigen hi. Helpawlte demand ziak in, tuma deuh apan Lilong Bazzra, BT Road leh mun tuamtuam ah dawr leh dukan te khak in ana om ta a, mun tamtak tuni dong khak in om lai hi.

Teklei bawlna farm ah bomb pailut
Imphal, March 6: Waikhong Police station huamsung a om, Langmeidong Lamjao mun a Tezpur brick field bawlna munpi ah tu zan nitak dak 7 vel ding in mi 5/ 6 va hawh in Manager houpih ut uh ahihdan va gen ua, tua zawh in hand grenade khat va nusia uhi. Tu zingkal dak 9 vel ding in Police bomb expert te’n puak manlou in va lakhia uhi. Tuabangkalah, Singjamei Municipality ward No 17 a member O Roshan (46) s/o (late) Chali of Singjamei Oijam Thingel Leikai compound sung ah zan nitak in hand grenade khat paihlut in om a, tu zingkal baih tak in a zi in mukhia a, zinglam dak 8:30 vel ding in Police te’n va lakhia uhi.

EDITORIAL:

Tulaia student-te leh i gam dinmun

“Tulai a student-te tununga i gam nu leh pa ding hi uh” chih i gen thang khempeuh mahlehang ataktak a zuih hinawnlou hi. Ahi, i gam dinmun tunung chiang in tulai a naupangte khut a hong kinga ding mah hi. Huchi ahihleh tuhun a student-te bangchidana hichi nelhsiah a om hi uhiam chih ngaihsut tham ching hilou hiam…

Corruption: Tulai in vaihawm govt in deptt khenkhat a sem ding a lak phot leh educational qualification taklang in Graduate/Matriculate/Class VIII pass chih hiamin banghiam sepna khat peuh ading in leng laisiamna tan bikhiah sek hi.Hinapi in appointment taktak ding thil ah bel laisiamna hinawnlou in sum bikhiahzah pezouzou a ching himawk uhi. Hibang chindan thanghuai corruption kichi hi a, laisiam tamtak sepna neilou, sepna deih hile uleng sum-le-pai piak ding neihlouh ziaka kingaihtuah sia bang, lai simsim le uleng sepna leina ding sum neilou chih ziaka lungkia a hinkhua kisia, khamtheih hih, guta lata keh gakvantawi pawl khat peuh zom maimah leng ahunkhop om ding in kilang hi. Huaiziak mah ahi ding-“Corruption is the breeding ground of insurgency” kichi mawltak in gen lehang nekguk takgukna ziaka helpawl tuamtuam hong omkhia chihna h.

Govt in nelhsiah: Gamsung khantouhna dinga poimawh sum-le-pai kia hilouin laisiamna(education) ahi hi. Huaimai hilouin state govt in kum 1 sum zat ding a bikhiah(Budget) lak ah student laizilna ding(education) lam a sum zat ding a tampen khat hisek hi. Himahleh teaching kitasam, school building omlou leh zat taklou, vanzat poimawh(infrastructure) omlou, teacher/staff-te omna ding omlou chih hitouden lai hi. Hileleng a lehlam ah fake appointment, a neitu in thei banlou a GP fund kilaksak chihte pumdim in education lam himhim ahiding banga pailou in summet bawlna a zang tampi om hi. Hiai leng govt in sinlai naupangte a nelhsiah chihna suak hi.

Student pawl tuamtuam: Manipur ah student min kizang pawl tuamtuam- students’ union/association tampi om hi. State dang banga thil a paidan ding banga pai hileh hibang students union/association pawl tuamtuam in student-te laizilna tawh kisai hiam academic thil leh welfare tawh kisai in panlak ding a thupi uh hiding hi. Himahleh tuni chiangin student tawh kisai – text book, uniform, admission, tuition fee leh academic thil tawh kisai student-te adia poimawh leh sepzui tuak tamtak a enzui leh panlatu ding omlou in student pawlpi tuamtuam in public function, rally, dharna leh mihing tam lahna dinga vanzat in student neisek uh a, student min zang hinapi in politics leh thil tuamtuam saina in zan maimah uhi. Huaiziakin i khawtang thil ah leng student min diklou taka zang pumdim sek hi.

Bandh leh strike: Tuni chiangin student-te awlmawhna leh makhualna dau hiaihiai a, Class X/Class XII/Degree exam hun lai tawh kituak a bandh leh general strike kichi om mengmenglou hinapi tulai in exam hun laitak hileleng bandh leh general strike ut hunhun a puankhum om sek hi. A khasiat huai mahmah khat bel Matric exam pailai hileleng huai hun hihbuai poisa hetlou a bandh puankhum zialzial pawl bang leng om thithe hi. Adiakin students’ union pawl mah in leng hibang exam hun poimawh laitak a bandh a puan maimah hun uh om sek hi. Exam hunlai a bandh puang pawlin examna a tel student-te bandh apan khahkol hidan in puang khempeuh mahle uh exam laitaka bandh & general strike husa hong kigen khak chiang in Bus leh taithei engine tuamtuam tai ngamlou uh a, student khenkhat Town Bus/Gari leh engine nei tuamtuam zanga amau inn hiam tenna khua apan mundang a exam a kuan ngaite gen vuallouh haksatna leh nawngkaina tun uhi. Huaiziakin exam hun tawh kituak a bandh leh general strike i chihte zaw naupang/student-te thahna chikhat suak hi.

Electric meivak: Board, Council leh University nuaia examna-te poimawh tungtuan chiat a, tulai takin leng BSEM saina nuaia Class X(HSLC) examna leh CHSEM saina in Class XII(Hr Secondary) examna pailel a, huai ah student 40,000 exam uhi. Huaite ading in tuhun in laisimna din electric meivak poimawhdan gensau ngailou in leng theihchiatsa hi. Himahleh electric meivak regular tuanlou in a paini(vakni)te ah leng 3/ 4 vei mit veve a, huaikia hilou in ni 1 hal in load shedding mah hitou lailai veve in bangmah kilamdanna om tuanlou hi.

Hiai a tunga i gente tulai hun a student-te thiltuah tangpi leh thil omdan ahi a, govt leh pawl tuamtuam in leng student-te academic career awlmawh tak kawma panlak thak taktak ahih masiah tunung a i gam nu-leh-pa ding student-te dinmun haksa leh hehpihhuai taka koih gige suak lailai ding i bang uhi.

http://www.manipurexpress.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s