The Lamka Post | March 7, 2008

CDSU in NIT bawlna ding doudal

Lamka, March-6: Churachandpur District Students Union (CDSU) in tuni a presshandout a bawl in a taklat dan in Institute of Technology (NIT) bawlna mun ding a phaltak a mipite leh gam neitute’n a piakkhiakna mun ua bawl sawmlou a, mihing teenna mun leh loubawlna mun, Langol area a government in bawl a sawmteitei pen naktak a nial ahihdan taklang hi.

Thusuak in a taklatna ah, Manipur integrity etna a Churachandpur district in central institution minthang khat a ngah ding pen angel teng a et in ngah dia kilawm mah hilou ding hiam chi’n taklang hi. Central institution minthang teng phaijang district 2 sung a koih sawmna pen thil tengteng centralized vek government in a sawm chihna leng hi’n taklang hi.

IATA in accreditation pia

Lamka, March 6: Sielmat a Trinity College and Seminary in International Association for Theological Accreditation in Bachelor of Theology tan ziltheihna ding in apaisa January 25, 2008 apan in accreditation pia a, tuni sunma dak 11:00 in IATA National Representative Rev. Dr. S. Gangte in Trinity College and Seminary a Principal Rev. Jacob Pudaite kiangah ‘Certificate of Accreditation’ piakkhiatna nei hi.

Hiai IATA bel New York khopi pansan a theological accreditation toh kisai a international agency khat hi a, India ah Malda, Kolkatta ah office nei uhi. Tulel in India ah IATA accreditation nei college 75 omta a, Mainipur a ding in Trinity College and Seminary bel IATA accreditation nei masapen ahi.

Video Conference zattheihta

Lamka, March 7: DC/CCpur office a NIC Video Conferencing (melmuh tongsaan) kithuah khatvei le zat ahihma in May 22, 2006 zan in kangsia a, kum khat val vingveng bawlhoihlouh a ompen bawlhoih hita a tuni apan in zattheihta hi.

Tuni’n Mr. Sumant Singh, IAS, DC/Cpur in hiai Video conferencing tungtawn in New Delhi a NIC Techniciante houpih in hichibang Video Conferencing District sung a Sub Division HQ te ah koihtheih dingdan om diam chih dotna dong hi. Hiai Video Conferencing bel Demand Assigned Multiple Access Phone (DAMA Phone) tungtawn a zattheih hi a, gamsung a Video Conferencing kithuahna mun khatpeuh toh melmu in tong kisaan theih hi.

DC in KVK veh, NREGS nnasep enkhia

Lamka, March 7: DC/CCpur Sumant Singh, IAS in tuni sunma dak 11:00 in Pearsonmun a ICAR nuai a Krishi Vigyan Kendra vapha hi. Hiai Kendra ah tulai in Piggery leh Fishery toh kisai training neilel uhi. Huailou in DC/CCpur in Demmang Veng leh Tuibuong Hq. lak vapha in huailak a NREGS tungtawn a nasepte etkhiatna nei a, a nasep uh lungtun huai a sak dan gen hi.

Bank a sum omlouh ziakin sum lathei lou

Lamka, March-6: United Bank of India (UBI)/CCpur branch a sum omsa a bei ziakin Govt. dept tuamtuam treasury in pay bill passed a advised a thotte un leng sum lakhe theilou uhi. State Bank of India CCpur branch inleng amount tam deuhte leng pekhe thei lou uhi.

Inn tung apan kia in liam

Lamka, March-6: Jamkhotong (60) F/o Letkhothang of Gamnomphai apaisa March 3, 2008 sunnung dak 3:00 vel in a khua uah inn bawl lai fit 10 vel ah kia in liam a District Hospital, Lamka ah etkol in om hi.

NREGS sum 2nd phase sanction ta

Lamka, March-6: CCpur District sung a National Rural Employment Guarantees Scheme (NREGS) nuai a nasep man 2nd phase ading DC/CCpur in sanction order suahta a, Mautam kial ziakin a thuak kha diak Thanlon, Tipaimukh leh Vangai Block a ding in ni 100 a ding sanction a, Mautam kial in a suk khak zek Singngat leh Henglep Block a ding in ni 45 sanction a, Block dang teng Lamka, Tuibuang, Saikot, Sangaikot, Sammulamlane Block a ding in ni 25 thaman ding sanction hi.

Trade License renewal bawl ngai

Lamka, March- 6: Lamka khopi sung a sumbuk tuamtuam a trade license neite March 31, 2008 tan bei ding ahihziakin sum buk neiten Town Office Hill Town ah 2008- 2009 a ding Office hour sung in bawl sak theih chih CEO/ADCC in thusuah bawl hi.

SUNNA: Chiinching (94) m/o Upa Ginnok of New Lamka Dorcas’ veng teknat in tuni sunnung dak 1:00 in si a, tuni mah in New Lamka YPA hanmual ah kivui hi.

Assembly news

## K.Wungnaoshang MLA dotna Chief Minister O.Ibobi Singh in a dawnna ah, Manipur Development Society (MDS) a Deputy Project Director post khat chauh om hidan in gen hi.

## Awangbou Newmai MLA dotna Finance Minister O.Ibobi Singh in adawnna ah, State Bank of India Branch, Tamei Sub-division a om 1982 apat khak ahihtak dan gen hi. Hiai SBI branch apat 1/10/82 a sum tamtak gukmang ahihziak a Bank khak hidan inleng Finance minister in gen a, athak a honna dia govt. in SBI ngen ahihman in, tunung sawtlou a honkhiak hinawn dia lam-et huai asakdan leng gen hi.

## Dr. Ng. Bijoy MLA dotna Finance Minister in adawnna ah, Manipur govt. nuai a semtu pension dingte’n, a huntak a amuh ding uh Pension sum leh Gratuity te amuh theihna ding utoh kisai, Manipur Civil Services (Pension) Rules, 1977 a rule 56-65 leh Rule 80-A a chiangtak a kigelh om hidan inleng Finance minister in gen hi.
Aban agenna ah, Rules a provision omte ahunbang banga zatkhiakna dia govt. in a kisaipih department tenga guidelines leh instruction pekhinta hidan inleng Minister in gen hi.

## Dr. I.Ibohanbi MLA dotna Home minister leng hi, CM O. Ibobi Singh in a dawnna ah, Pangei a om Forensic Science Laboratory a, mi suai (specimen signatures ) kiguk bawlsak kum paisa kum nga, 2002-03 apat 2006-07 sunga Police, Vigilance leh mi tuamtuam a case 149 om ahihdan gen hi. Hiai hun sung mah a, verification report leh disposed kibawl zah backlog toh sim a, case 182 om hidan inleng Minister in gen hi.

## L. Nandakumar MLA dotna Home minister in a dawnna ah, April 1, 2002 apat February 15, 2008 sunga Manipur Police leh Central govt. nuai a Para military forces, Manipur a omten helpawl tuam tuam apat galvan a mat khiak uh kigawm 776 om hidan in gen hi. Aban agenna ah, hiaite lak a Police ten galvan 350 leh Security Forces ten galvan 426mankhia uh chih ahi.

Hiai galvan matte category 131 leh country 15 dan in leng khenzak in om hi. Tuaban ah confiscated to State govt. leng 4 om hidan in minister in gen hi.

## L. Nandakumar MLA dotrna mah, Home minister in adawnna ah, extremist mat a omte, amau kigolhna toh kisai a National Security Act nuai a hentang theih hidan in gen hi. Aban agenna ah, hichibang a NSA bulh leh hiai nuai a hentang theihna ding, criteria Section 3 (30) NSA, 1980 dungzui a, a kisaipih District Magistrate thuneihna piak ahihdan leng Home Minister in gen hi.

## Tuni a Assembly ah Demand for Grants, 2008-09 (March 31, 2008 tan ) a ding in passed uhi. Tuate bel, Medical, Health & Family Welfare Services Rs 125,06,44,000; Municipal Administration, Housing & Urban Development Rs 65,75,28,000; Commerce and Industries & Weights & Measures department Rs 51,20,27,000; Sericulture Rs. 77,69,90,000 leh Horticulture & Soil Conservation Rs 33,79,82,00

International Women’s Day zang ding

IMPHAL MAR 6: Manipur Pradesh Mahila Congress Committee saina in, March 8, 2008 chiangin, Imphal a BT road a om Congress Bhavan ah, International Women’s Day zatna om ding hi.

Hiai hun ah khuallian in, Manipur Chief Minister O. Ibobi Singh, President in Gaikhangam MPCC President ban ah, Guest of honour dingin, Lok Sabha MP Dr. Th. Meinya leh Rajya Sabha MP Rishang Keishing te pang ding uhi.

Seminar leh Interactive discussion

IMPHAL MAR 6: Deshkal Society, New Delhi saina in, March 8, 2008 zinglam dak 10 apat nitaklam dak 5 tan Manipur University a Political Science, Lecture Hall ah, Seminar cum Interactive discussion on ‘Voice from Manipur on Peace and Development: Intervention in a Globalising World’ kichi om ding hi.

Hiai workshop honkhiakna MU a Vice Chancellor Prof. C.Amuba Singh in nei dinga, Key note address Prof. Imtiaz Ahmad, Chairperson Deshkal Society leh Former Professor JNU in in gen ding hi. Prof. Ksh, Bimola Devi Head Department of Pol. Sc. MU in hiai workshop makaih ding hi.

Petrol pump teng kikhak ding

IMPHAL FEB 6: Manipur a helpawl tuamtuamte’n, sum sinna tuamtuam a buaina a piansak uh paitou zel hi. Apaisa February 7, 2008 a Hatta a om, Tusk & Bons petrol pump a Hand grenade lotkhum ahih nung, February 16, 2008 in leng Yumnam Service Station, Wabagai leng thau a kap in om hi.

Hichibang a helpawlte gamtatna mohpaihna in, Manipur a petrol pump omte ni khat leng khak in ana om ngeita hi.

Hiaite nungin, March 3, 2008 in Khangabok a, Sorojini Filling Station ah leng helpawl ten Gand grenade zangin attack nawn uhi. Hichibang a mipi nasem Petrol pump te a meltheihlouh helpawlten demand ziaka, attack bawl veu uh mohpaihna in, March 7, 2008 in Manipur a om Petrol Pump teng kikhak ding hi.

Panchayat member tamtak in sit-in-protest nei

IMPHAL MAR 6: Helpawl tuamtuam in, Centre apat hongpai Panchayat Development Fund apat 5% a nget uh toh kisai in, Imphal East district sunga Pradhan thum te in kap in om a, Pradhan dang 6 leng helpawlten vua in khahkhe nawn uhi. Hichibanga helpawlte gamtatna toh kisai in, zan in Imphal East DC complex a Panchayat Bhavan ah, Pradhan, Up-Pradhan leh Panchayat member ten meeting nei ua, tua ah helpawlte tunga lungkimlouh etsakna dia dharna neih a thupukna dungzui in zinglam dak 10 apat nitaklam dak 4 tan Imphal East DC office gate bul ah, Panchyat member tamtakten sit-in-protest nei uhi.

Hichibang a IE Block I & II a Panchayat toh kisai a, helpawlten demand a bawl uh March 7, 2007 a genlem ahihkei leh, Pradhan, Up-Prahdan leh Panchayat member ten March 8, 2008 a Manipur Governor kianga mass resignation piak ding tanpha genkhom uh hidan in thutut kingah hi.

Hichibang kal ah, Imphal East sunga Block I & II ah, Pradhan 50, Up-Pradhan 50 leh Panchayat member 406 om uhi.

Helpawl te ziakin Singjamei bazaar kikhak

IMPHAL MAR 6: Helpawlte’n Singjamei bazaar a dawr bukte apat sum tamtak demand abawl ziakun, tuni’n Singjamei bazaar khak in om hi. Manipur a helpawl tuamtuamte ziakin, hun paisa ah, Inter state Tourist bus leng kal khat vel tailou in omta hi.

NREGS toh kisai in Legal notice pia

IMPHAL MAR 6: Chandel district sunga National Rural Employment Guarantee Scheme, 2006(Job card nasepna) chia a leng kithei, ginatak a sepsuah louh ziakin, R.T.Rebirthson Anal, Advocate leh Legal Advisor District Chiefs and Public Grievances Forum, Chandel District in, tunin Govt. of Manipur nuai a, Commissioner RD & PR, District Programme Coordinator, NREGS, Chandel leh Programme Officers (NREGS) Chandel, Chakpikarong, Machi, Khengjoy leh Moreh, Chandel District te kiang ah, ni 15 sunga sepsuah dingin Legal notice pia hi.

Hiai legal notice a R.T. Rebirthson in ataklat dan in, hiai laipen Chandel district a general public interest leh Job Card tawiten ama kianga complaint abawl ziak uh hidan in taklang hi.

Thusuak dan in, NREGS nuai a nasem dia telkhiak Job Card ngahte’n ni 100 sung sepna a neih ding uh chih ahi. Hiai dungzui in ni khat thaman Rs 81.40 ahi. Hiai sum te pen nasemtu Job Card tawite kiang a, nasep zohna sate kalkhat zoh zel ahihkei leh forthnight sanga zekai zawlou a piak ding chih leng ahi.

Hiai thusuak a Advocate clients in November 26, 2007 apat nasem pan a, himahleh thuneituten thaman ni 8 a lel pepan uhi. Hiai nungin, ni 20 leng sep dia piak ahihna ah, nasemzou mahleh, December 3, 2007 apat thaman bangmah ngah nawnlou hidan inleng thusuak in taklang hi.

Ni 100 sunga ni 72 sep ding piaklouh ahihziakun, hiai sumte leng Job Card tawitute’n, provisions of the payment of the wages Act, 1936 dungzui a allowance leh compensation dan a angah ding uh ahi.

Nagaland a party-te lametna liantak toh om

KOHIMA, March 6 NNN: 11th Nagaland Legislative Assembly election Nilaini a zoh ahihtoh kiton in party tuamtuam in seat a muh zah ding tuat ua, lametna liantak toh omlel uh hidan in thusuak in taklang hi.

Nagaland Pradesh Congress Committee (NPCC) President, Hokheto Sumi in a genna ah, absolute majority a ngahlouhtawp ua leng single majority bel ngah ding a kimuang mahmah ahihdan uh gen a, seat 25-26 lel a ngah ua leh leng party tuamtuam leh Independent candidate-te toh sorkar din ding ahihdan uh gen hi. Mun khenkhat a booth capture leh voter-te vaulau a a om ziak ua election neihdan lungtunhuailou a sak dan leh Zunheboto district a polling station 14 tak a polling officer ding Returning Officer in a sawl theihlouh lamdang a sak thu Hokheto Sumi in gen hi’n thusuak in taklang hi.

Election siangthoutak a neih ding chih himahleh, Congress in mun khenkhat a sepaihte zang hidan leh sorkar in election siangthou chiam mahleh a bohsetu a pang hidan in Nagaland People’s Front (NPF), Secretary General, Chubatemjen Ao khasiat pau a, majority ngah ding a kigingtalou sim in party tuamtuam toh pangkhawm a sorkar bel din ding uh hi’n kigen hi.

Nagaland a BJP Spokesperson, Avinash Kohli in a genna ah Neiphiu Rio makaih a Democratic Alliance of Nagaland (NPF, BJP, JD(U) leh NCP) in sorkar din ngeingei ding uh ahihdan leh a diak a President’s Rule a om ziak a mipite’n Congress party kipahpihlou uh hi’n gen hi.

Tuabangkal ah, Nagaland election nouneltak a ana sut pawl te’n a tuatna uah Congress in seat 22, NPF in 19, BJP in 2 leh RJD in seat 2 ngah ding in tuat ua, Independent leh party neunounoute poimoh mahmah ding a gingta uh hi’n thusuak in taklang hi.

ACTSOM leh ATSUM in SUPC gum

IMPHAL, March 6 NNN: Ukhrul district a Students Union of Pettigrew College (SUPC) in ngetna a neihte state government in a ngaihsaklouh lamdangsa kawm in Ningani’n All Colleges Tribal Students’ Organization, Manipur (ACTSOM) in SUPC’ ngetnate gum ahihdan uh leh kintak a Manipur government in student union’ ngetna subuching dia ngetna bawl hidan in thusuak in taklang hi.

Ann-ngawl a kiphinna nei mi 11 khophawklou a a puksiat nung ua leng Manipur govt. in SUPC’ ngetna a ngeingaihlouh pen poi mahmah ahihdan taklang kawm in ACTSOM in hiai thu pilvangtak a saifel di’n sorkar kiang ah ngen hi. SUPC’ ngetnate dik mah ahihdan leh a kisaipih thuneitute leh state govt. sang a leng student body te’n siamsinna a manphatdan a theihzawk uh zumhuailua ahihdan ACTSOM in gen hi’n thusuak in taklang hi.

SUPC in a college ua heutu kiching leh infrastructure a poimoh teng ngen in February 23 in kiphinna ana pan ua, a phattuam ngellouh ziak in February 28 in, a ngetna uh sukbuchin ahihmatan ann nelou ding in ann-ngawl a kiphinna ana pan uhi. ACTSOM banah All Tribal Students’ Union Manipur (ATSUM) in leng SUPC’ ngetnate dik mah hidan a pompih in a gup thu uh puangta uhi.

Ceasefire extension thu ah CM leh CM lui kinail

GUWAHATI, March 6 NNN: Indo-Naga ceasefire pailel pen Assam gamsung a leng zatna ding thu toh kisai in Ningani’n Assam Budget Session ah Assam Chief Minister lui leh tulel a Asom Gana Parishad (Pragatisheel) heutu Prafulla Kumar Mahanta leh Assam Chief Minister, Tarun Gogoi naktak a kisel uh hidan in thusuak in taklang hi.

Asom Gana Parishad (AGP) in vaihawmna a letlai ua Naga helpawl NSCN-IM toh India sorkar in hiamkham thukhun a neih uh Assam gamsung a leng zatna dia gum uh hidan in Gogoi in ngohna bawl nilouh a, sawtkuamtak daidide a a om nung in ngohna bang a AGP sorkar in pan a lakna uh chetna pe dia Mahanta in dawng kawm in Assam gamsung a Indo-Naga ceasefire zat ding thu centre in state kiang a ngetna a bawllai a Assam in phallou ahihdan gen hi. Hiai tungtang a AGP sorkar in centre a nialna uh leh ngohna pen nialna newspaper a bangmah suaklou hidan in Gogoi in Mahanta ngoh thouthou hi.

Mahanta in Innpi pawlam a a genna ah, Assam leh Manipur a Indo-Naga ceasefire extension toh kisai a centre in Assam leh Manipur ngaihdan a lakkhawm lai a Assam leh Manipur in nial a doudal ahihdan gen hi. Mahanta in a genzelna ah, Assam a Indo-Naga ceasefire a kizatlouh ziak a Assam police te’n Naga helte bangzah hiam, Golaghat district apat mankhia uh ahihdan gen hi. Nagaland leh Assam in gamgi thu a buaina a neih uh leng Supreme Court tut a om ahihdan gen in SC in a bawlkhiak boundary commission khut a thupukna kinga ahihdan gen hi.

Huai banah, Nagaland state unit Congress in election manifesto a 16-Point Agreement sepsuah ahihna dia panlak ding a sawm uh toh kisai Manipur state unit Congress dal mahleh Assam state unit Congress in tutan a kampau neilou ahihdan gen kawm in hiai thu (ceasefire extension) pen politics a mavanna ding gelna a Gogoi in a vangkim a pholhsuah maimai hidan in Mahanta in gen hi.

Sharmila in ann-ngawl sutzop sawm

IMPHAL, March 6 NNN: Manipur a Armed Forces Special Powers Act (AFSPA) kizang lakkhiak ding ngiatna a sihtanpha a ann-ngawl dia November 2000 apat kiphin Irom Sharmila Chanu in Ningani’n a kiphinna sutzop sawmlai ahihdan Jawaharlal Nehru Hospital a a lupna tung pansan a thuthaksaite kiang a gen hi’n thusuak in taklang hi.

Dan dungzui in court ah Sharmila kum teng in dinsak ngai a, tukum a ding in March 7 in a din ngai hi. Kum 7 vel ann-ngawl kiphinna Sharmila in a neih apat a nak tungtawn in, utleh-utlou in ann piak in om a, damdawi inn ah lupna ngak a kep in om hi.

Manipur in Medical College thak tukum sung in nei ding

IMPHAL, March 6 NNN: State Health Minister Ph Parijat in Ningani a Innpi a theihsakna ah JN Hospital pen Medical College dia dopsang ahihna dia Manipur sorkar in gam acre 34 leita ahihdan leh tukum July-August sung a student 50 vel lakna kipan ding ahihdan gen hi’n thusuak in taklang hi.

Opposition MLA te’n cut motion a puaklutna uah institute bawlkhiakna dia state government in ‘no objection certificate’ suahta ahihdan leh medical college piching neihtheihna dia India govt. apat phalna lakding teng leng man vekta ahihdan gen hi. Hiai medical college bawlna dia Budget a National Health Rural Mission (NRHM) nuai a sum crore 40 guan a omta ahihdan leh mobile dispensary unit te’n leng nasep panta uh ahihdan gen hi. Huai banah, medical stock leina dia sum crore 2 leng release a om ding ahihdan Parijat in gen hi. Tulel a 300 bed JN Hospital leng 400-bedded hospital dia sorkar in bawl sawm ahihdan leh a vanzat tuamtuam leh a infrastructure leina ding fund leng a kintheipen a piakkhiak a om ding ahihdan gen hi. Health Minister in a genzelna ah, NHRM nuai a MBBS 48, Ayush Doctor 74, ANM 420, leh AHN 14 leng appointment piak a omta uh ahihdan leh specialist doctor dinmun awng 70 leng hukdimna dia recruitment bawl hidi’n gen hi.

District teng a hospital leng 50 bedded hospital dia Non-Lapsable Central Pool of Resources (NLCPR) nuai a upgrade bawl a om ding ahihdan leh Community Health Centres (CHC), Primary Health Centers (PHC) leh sub-center teng tel a, a bawlna ding mun toh sum crore 40 sehkhiak a omta ahihdan Health Minister in gen hi.

State Medical Council implement-na ding toh kisai ahihleh maban a cabinet meeting a genkhawm a om ding ahihdan leh central lemsakpihna poimoh ahihziak a hun la lai ding hi’n Parijat in gen a, State Nursing Council toh kisai ahihleh a nna teng zoh ahihtak man in, nasep panpahta ding ahihdan Health Minister in gen hi’n thusuak in taklang hi.

Direct talks nei di’n ULFA chial

Guwahati, Mar 6 NNN: Assam CM Tarun Gogoi in tua pai lellel Budget Session a Governor in athugen thu a kiselbuaina tungtang a dawnna apiakna a agenna ah, India a helpawl, govt. toh kihouna nei himhim etsakna ding a, Mizo helpawlte’ leader Laldenga leh NSCN-IM leaderte, Isaac Muivah te toh govt. direct a kihou uh ahihdan kawkmuhkawm in, amau tang a pau dia People’s Consultative Group kichi khat abawlkhiak sang a direct a govt. toh kihouna nei ding in ULFA helpawlte chialna nei hi’n thusuak in taklang hi.

Indo-ULFA buaina political level a sukveng a ut ziak in govt. in 2006 in ULFA toh cease-fire nei mahleh, hiai hunsung a, galvan laikhawm leh mithah chihte hahbawllua ahih dan Gogoi in a gen a, NDFB toh leng govt. in cease-fire nei mahleh, tutan helpawlte’n charter of demands govt. kiang a pekhe nailou uh ahih dan agen banah, helpawlte’ziak in Assam akhantouh ding bang in khangtou lou in om mahleh, Tata Consultancy Services (TCS) leh investment bawlte’n Assam taihsan tuanlou uh ahih dan leh, state govt. in biotechnology park, science and technology’a dia university khat govt. in pat sawm ahihdan leng Gogoi in gen hi’n thusuak in taklang hi.

Tuabangkal ah, State Panchayat election om zoh apat niteng poimoh vanman khanglua pen suktawpna ding a pan alakna toh kisai in, Innpi a tutkhawm ahihlai in Opposition member-te avek un pawtkhia ua, tutkhawmna minute 15 sung bang khawlsak in om hi’n thusuak in taklang hi.

Editorial:

Tuni Thupi: Diktatna in nam a tawisang a; himahleh khelhnami kuapeuh a ding in zahlakna ahi. Paunakte 14:34

Electric hoihna ding in i duty chiat uh semkhe ni!

North East pumpi in khanmohbawk a a neih tuinek kiningching, lamlian hoih leh electric ahi a, North East sung sapsap ahleng Manipur in hiaite neih ginatlouh ziak in haksatna tuak kholdiak hi. Electric toh kisai ahihleh tamveitak gen in ana omta a, hah gen ziak a sih ding bang hileh electric department a sem teng a hinglai om nawnlou ding un gintakhuai hi. Hah gen ziak a hoih ding hileh bel hoihta ding in gintakhuai a, himahleh a gentu a omlouh chiang a leng hoih ahih tuanlouh ziakin, lametna lianpi toh gengen phot peuhmah leng chih ut i hi.

Koi mun peuh a di’n dik thou mahleh, a diak in Churachandpur district ah electric hoih hitaleh bangchituk in i khangtou ding ua? Tuchiang in nna khat peuhpeuh electric zang a khawl toh kisemta ahihman in zan mial tanvaktu ding kia hinawnlou in a poimohna nidang toh teh in lian petmah hi. Etsakna di’n, misterite nangawn inleng khawl hah zat mahmahta ua, electric hoih hileh tua a sepkhiak zah uh leh bangzah hiam a tamzaw semkhezou ding ua, amau kia hilou in a sepnate uh leng met ding ua, a tawp in tuh khotang in khosakna hoihzaw neihloh ding hi. Sing-aatte bang leng, nileng in sing-aat thei le uh a sing neite leh amau mahmah met ding ua, a tawp in khotang in khosakna hoihzaw neihloh ding hi. Electric hoihlouh ziak in electric van zuakte’n a khot ding tuk in khonglou ua, sum kipei ding naktak in dal hi. Damdawi Inn bang leng mei ginatlouh ziakin a hoih ding tuk in hoih theilou a, kithuzakna mobile leh landline, tui kai leh a dang tamtak leng electric hoihlouh ziak in a hoih ding tuk un hoih theilou uhi. Huai mah bang in, computer leh khawl tuamtuam, electric zang a nasepna khawl khempeuh electric a hoihlouh ziak in a manphatna bang un kizang theilou hi.

Electric toh kisai i gen chiang in Manipur sorkar inleng a hihtheih tawm mahmah ahi ngei ding a, lianpi leng ngim vetlou a, ei district sung bek hoihtak a a paitheih ding dan ngaihtuah poimoh hi. Minister Pu T. Phungzathang panlakna ziak in tuma deuh in electric hong hoih deuh mahmah a, tuni chiang in a ngei a hong tun nawn ziak bang hi hiam? chih Lamka Post palai in a kanchetna ah, Churachandpur Electricity Department a Executive Engineer, Mr. Benjamin Saiate in ana hilhchian hi.

District sung a meivak kiningching omtheihna’ng a sub-station-te upgrade theihlouh ding hiam? chih dotna a dawnna ah Exe. Engineer in tulel a Khengjang Power Sub-station a 5MVA Transformer 3 omte phalna nei a electric late a dia hun mahmah ahihdan gen hi. EE in a hilhchet dan in, tulai a district in electric a ngah zah kiamtuanlou a himahleh electric zangtu a tamluat ziak a khawl in zoulou in trip (overload) pahpah hi. Singngat feeder in 300 amps tan pethei a meivak ni chiang a ON/vaksak ahihtung in 298amps tung mahleh meivak nung sawtlou in 305 amps bang tungtou in mit zel hi. Tulai a electric a ginatlouh ziak taktak EE’ gendan in bel, district pumpi sung a phalna nei a electric la 12560 chauh a omna lak a 9000-te’ kiang chauh a bat siktheih hi. District in 27 Million unit a zatbei lak ah 7 Million unit khong lel bill theih a, a dang teng phalna neiloute’n a thawn a a zatbei uh ahi. A omdan tak bel, phalna nei a electric la inn 3560-te kiang a department in bat sikna ngaihna leng theilou uhi. Permit nei mi 9000 te lak ah 50% in fee hoihtak in a pe diam? chih hisawn lai hi. Phalna neilou a electric la mi tam mahmah napi a, ei district in power supply i muh zah pung tuanlou ahihna ah, Power Minister in transformer 20 a hon piaksa banah hon piak beh lai lehleng hoih tuanlou ding a, i khawl i neihsa teng nangawn un siat beh ding hi.

Phalna neilou a electric late leh electric fee peloute’ hihna kibang geih ahi. Ei district in power supply i muh uh phalna neite a dia kiching ahihleh phalna neiloute leh bat peloute’ electric lakkhiaksak hileh bel veng mai ding hi. Himahleh, a thuak ding eimite mah i hihziak un thil uthuai leh deihhuailou ahih kia hilou in hoihpenlou hi. Huaiziak in “Diktatna in nam a tawi sang” chih kam a genthoh hinawnlou in, i niteng khosakdan ah kilangsakzaw in, mi teng in i bat hoihtak in din leng phatuam ding hi. Phalna neilou a electric late’n leng phalna neihna dia sum sun ding i ngah zohkei hial a leh leng tamloulou a piak theih dan department in bawl tham ahi. Ditattak leh hoihtak a i bat teng i piak khit nung ua leng electric a hong hoih ngal kinephuai tuanlou hi. Himahleh, huai hun chiang in bel hangsantak in ‘kaki daihkei uh, hon piak beh un’ chihtheih ding hi. Tua bel eilam leng dik khinlou i hihna uah kuamah hangsantak in pau ngamlou hi.

Himahleh, Pawl-XII leh Pawl-X te’n tulai in exam san lel ua, tu-le-tu a meivak hoih poimoh i hihna uah, EE’ gendan leh ngetna dungzui in, veng tuamtuam a heutute’n heater zat khong a kham uh phatuam mahmah ahihna ah, mipite’n meivak chilsiamtak a zang a a poimohlouhna munte mekmit zel mai leng Pawl-XII leh Pawl-X te’n exam a neih sung bek uh meivak hong hoih deuh ding hi. Siamsin naupangte i panpih chiat theihna uh ahiding a, maban a gam-le-nam’ nu-le-pate hong hiding ahihna uah poimoh ngaih chiat ni.

Electric hoihlouh ziak kuate ziak a hia chi’n ngoh ding zong le, mipite’n official i ngoh ding ua, official ten mipite fee piakhoihlou a hon ngoh nawn ding ua, a nih in a diktuaktuak mai thei. Temtatpu leh Kaikuang tangthu kigen mah bang ding hi. Kingohtuah sang in Official ten a hih ding uh hih uh henla’n, mipite’n i duty uh buching sak le hoihzaw ding hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s