The Lamka Post | March 9, 2008

Heart Specialist in damlou en

Manipur a ding a Cardiologist (Heart Specialist) minthang mahmah Dr.Thokchom Sachin Deba, MD, DM, Cardiologist Asst. Professor, RIMS in tuni zing dak 10:00 apan in Zenhang Lamka a Dr. V. Jamthianlal tenna inn ah lungtang nantna nei mi 50 etna nei hi. Damlou khenkhat echo cardiography zang in en hi.Aman in khakhat in Lamka ah damlou etna nihvei hongnei jel ding hi.

Khuga Dam Contractors’ Assn. Meeting

Lamka, March-8: Khuga Dam Contractors’ Association (KCA) in zingchiang March 9, 2008 sunnung dak 1 in YPA Hall, Upper Lamka ah 1st meeting nei ding ua, tua hun a a kisai khakpih teng telkim chiat ding in Mr. N. Sanga, Secretary, KCA in theihsakna bawl hi.

PHED Minister in Tui nek toh kisai enkhia

Lamka, March-8: TN Haokip Minister (PHED, IPR & Tourism) in tuni zingkal dak 9:00 in Lamka hongpha a, Lamka khopi tui nek hong enkhia hi. Minister in Lamka khopi tui lakna dia kibawl Khuga Dam, tulel a Lamka khopi tui petu Lanva leh Kawite pha in sunnung dak 4:00 in Imphal ah kiknawn hi.

Kikapna mun ah misi luang khat vala

Lamka, March-8: Police apan kiza dan in zan nitak dak 9:00 apan in Saidan kho kiang ah HPC (D) leh HNA hidia gintak helpawl 2 kikap tuah in tuni zinglam dak 6:00 tan thau a vang kim a ging hi’n thutut kingah hi.
Police apan thutut kingah dan in, tuni zingkal dak 7:00 in kikapna mun ah misi luang om chih report a zak ziak un kikaptuahna mun va pha ua, tua ah Satkhohen Kipgen (50) s/o (L) Jamkhokai Kipgen of Kipgen veng kaplup sa in mukhia ua, amah zat hiding a gintak Yamaha MN-IJ/9469 khat kikaptuahna mun ah mukhia ua, tua pen police station ah kemlel ua, misi pen a pang ah thautang lutna om hi’n leng kigen hi. Doctor leh Police in post mortem bawl zawh in misi inn kuante kiang ah pekhia ua, tuni mah in vui uhi.

Cycle in phu liam

Lamka, March-8: Tuni zingkal dak 9:00 vel in Koite khua ah Cycle atai pasal khat in Lhingcha (60) W/o Genkhopau of Kawite phukha in a lu nasa in tun District Hospital Lamka ah etkol in om hi.

Kuki Nampi Taona om ding

Lamka, March-8: Kuki Nampi Taona Henglep Sub-Division, Churachandpur ah March 8- 1, 2008 sung om ding hi. Huai hun ah Kuki Nampi sung a sap tuamtuam a makai tamtak kihel ding ban uah March 30, 2008 in T. Manga Vaiphei Chairman MTDC in 38th Kuki Nampi Taona Suangphuh hong ding a, Ngamthang Ex.Minister inleng uap ding hi.

Felicitation Programme nei

Lamka, March-8: Tuni zingkal dak 11:00 apan in Upa L. Solet in N. Molhoih khua kum 2001 apan a sat nung Hausa ahihna kipapihna (Felicitation) Programme thupitak nei uhi. Huai hun ah Sial -1, bong-3 leh Vok 1 gou in mipin ankuang um uhi.

Lamka apan nasem tamtak kuan

Lamka, March 8: Lamka leh Imphal kikal a Telephone gui phum vek sawm in dept ten nasep pan ua, Tedim Road lamlian zul ah lei khuak in tun Kwakta pelta uhi. Huai a ding in Lamka apan niteng in mi 100 val bang nasem in vakuan ua, nasemte dept ten Gari 2 in kuan leh pai kha in pi uhi.

Nemzavung Delhi ah si

Lamka, March-8: Mrs. Nemzavung (67) W/o T. Kamkhotuan of Pearsonmun Cancer natna ziak in Delhi ah tuni sunnung dak 1:30 vel in si a, zingchiang in Delhi EBCC Saptuam intekna in vui ding uhi.

Zomi Namni Closing Ceremony

Lamka, March-8: The 60th Zomi Nam Ni Diamond Jubilee Celeberation Committee, 2008 saina in zingchiang March 9, 2008 sunnung dak 1.30 in SYO hall, Sim Veng ah Zomi Nam Ni Closing Ceremony programme zang ding ua, tua ankuang umkhawm ding uhi.

Multi Media Information Campaign

Lamka, March-8: District Information Office Churachandpur saina in Synod Hall IB Road ah March 13- 15, 2008 sung 3-Days Multi Media Information Campaign neih sawm uhi. Hiai hun ah media toh kisai a lunglut kuapeuh tel theih ding hi.

Sing zuakte Police te tung ah lungkimlou

Lamka, March 8: Lamka khopi sung a khawl zang a sing-aatte’n police-te’n sum tamtak a nget zel ziak ua lungkimlou mahmah uh ahihdan press ah thutut bawl uhi.
Thutut kingah dan in, gari khat ah Rs. 1300-1600 kikal la ua, sing-aatna khawl mun puaktun ahihnung nasan inleng laksak teitei uh ahihdan leng gen ua, helpawlte’n tax Rs. 300/- vel la lel ua, police te’n bel amaute sang a tamzaw tham a lak ziakun helpawlte sang a police te buaihuaizaw uh ahihdan thutut kingah hi.

March 26 in Rajya Sabha MP ding Biennial election om ding
IMPHAL MAR 8: Member of Parliament, Rajya Sabha hihna len Rishang Keishing hun March 9, 2008 a bei ding ahihtoh kiton in, ama thakheng ding teelna MLA 60 ten, Biennial election, March 26, 2008 a nei ding uh ahihdan tuni’n Chief Electoral Officer, Manipur thusuak om hi.

CEO Manipur, RR. Rashmi thusuak in a taklat dan in, Rajya Sabha MP Rishang Keishing hun March 9, 2008 a bei ding ahihman in, hichibang Council of States (Rajya Sabha) mun awng luahtu ding teelna neih hiding chih ahi. Tuni a Election Commission’s notification a thusuak in ataklat dan in, nomination bawl theihna tuni apat March 15, 2008 tan hiding a, Scrutiny of nominations March 17, 2008, Candidate te kizukkik theihna hun nanung March 19, 2008 nitaklam dak 3 tan hiding a, date of Poll March 26, 2008 9am apat 4pm tan leh election process zohsiang hun March 29, 2008 tan hiding hi.

Hichibang Rajya Sabha MP teelna ding toh kisai in, Election Commission in Returning Officer ding in, Manipur Legislative Assembly a Secretary T. Joute leng guang hi. Assembly a Joint Secretary nih in Assistant Returning Officer hihna sem ding ua, vote khiakna Assembly Secretariat a Committee Room-A mun hiding hi.

Hiai election tuhna ding nomination paper te candidate ahihkei leh amau propose tute’n Returning Officer ahihkei leh Assistant Returning Officer te kiang ah, March 8 – 15, 2008 sung 11am apat 3pm tan sungin pelut thei ding uhi.

Hiai Rajya Sabha MP teelna ding toh kisai a thutut kingah dan in, Congress ticket ngetna lai hiai anuai aten pelut uhi.
C. Doungel Ex-minister, A.K. Mirabai, MPCC Vice President, Dr. Chaltonlien Amo Ex-minister, N. Biren Ex-minister, R.K. Sarojini w/o (L) R.K. Joychandra Ex-CM, Abdul Salam Ex-minister, Dr. Maniruddin Shaikh Ex-Speaker, Ngamkhogen Kipgen hi uhi. Hichibangkal ah, Congress ticket piakna ding toh kisai in Committee khat leng bawlkhiak in om a, tua ah MPCC President Gaikhangam in Chairman hihna len hi. Member dangte bel, Chief Minister O. Ibobi Singh, Power Minister Phungzathang Tonsing, Revenue minister Th. Debendra, Rishang Keishing, Dr.T. Meinya, S. Achouba, AK. Mirabai, T. Mangibabu,
Abdul Salam, Bidyapati Senjam, Alaudin Khan, W. Leima, K. Apabi leh Angom Lokendro chihte leng ahi. Congress ticket piakna ding toh kisai March 9 ahihkei leh 10 vel a MPCC in ngaihtuahna nei ding a gen ahihban ah, tuazoh a MPCC in AICC apat phalna lading uh hidan inleng kigen hi.

Manipur Assembly huangsung ah bomb puak; Cobra Task Force kipuang
IMPHAL MAR 8: Manipur Legislative Assembly Secretariat huangsung ah, tuni zinglam dak 11.45 vel dingin bomb khat puakzak a, himahleh a liam bel omlou hi. Thutut kingah dan in, tuni zinglam dak 11.45 vel dingin akipatna theihlouh Hand grenade local made khat, Assembly konglam main road a MSF office lam apat VIP gate no. 1 sunglam lotlut nunga puakzak hidia gintak hi a, hiai bomb puak ah a liam omkei mahleh, VIP gate tunga tube light bel kisia hi.
Manipur Assembly bel, 1st Indian Reserve Battalion personel 13 in a ven uh ahihban ah, guard commander N. Manglem hidan in kigen hi. Assembly kong mahmah, Tombisana High School campus ah leng 8th Bn CRPF te om mahle uh bomb puah ging zamahle uh thiltung toh kisai in bangmah theih neilou uh hidan in kigen hi. Assembly a bomb puak chih thu a zakphet in, Speaker Dr. S. Budhichandra Singh, MLA tuamtuam O. Joy, Dr. I.Ibohanbi,
Bijoy Koijam ban ah, Manipur DGP Y. Joykumar, SP Imphal West Clay Khongsai ten a mun kidelh huan in, thil omdan va en chian uhi. Speaker Dr. S.Budhichandra Singh in, hichibang thil hihdia kilawm hetlou ahihdan leh bangziak hiam chih dotna bawl a, MPP MLA O. Joy inleng hichibang thiltung naktak a mohpaih ahihdan gen hi. Tuni Assembly sitting omlouh ziakin, Assembly road leng mipi zuih theih dingin hon in om hi. Hiai thiltun nungin, Assembly road khak in om a, GM hall gei a parking a gari teng leng hawlkhiak in om ngal hi. Hiai thil tung toh kisai in, tunitak in Cobra Task Force a Commander, Gopi Mangang kichi in thusuah bawl in hiai thiltung amau khutnung hi’n taklang uhi. Thusuakin a taklatna ah, Assembly pailel lai a Manipur Chief Minister O. Ibobi Singh in helpawlte doudalna a thugen a neih ziak hi’n taklang uhi.

Imphal Airport ni thum sung khak sawm
IMPHAL MAR 8: Imphal a om Tulihal Airport, International Airport leh night landing tanpha omsak theihna dia tua gam letdan ban a, gam 512 acres govt. in lakbeh a sawm toh kisai a, deihlou leh lungkimlou in Joint Action Committee against the Acquisition of Land for Expansion & Extension of Imphal Airport kichi bawlkhiak in om hi.Hiai JAC ten govt. a tenna Inmun gamte lakhek saklou dia tamveitak ngetna ana neih h ngaihsak ahihlouh ziakin, helna nasazaw sem patsawm ua, a masapen dingin, Imphal Airport March 12-14, 2008 nithum sung khak sawm uhi. Hiai ding toh kisai in, JAC ten govt. leh private travel agency ten, ticket hiai ni dingte toh kituak a zuaklou ding leh, hiai hun sunga Airport a semtute leh gari himhim leng lutsak lou dingin ngen uhi.

Alehlam ah, Imphal Airport a Night Landing omsakna ding toh kisai, zan zinglam in Chief Minister makaih in genkhomna om hi. iai meeting ah, Airport Authority of India apat palaite, Chief Secretary Jarnail Singh, DGP, Principal Secretary Home leh Commissioner Transport chihte kihel uhi. Night Landing omtheihna dia vanzat poimoh, Solar Powered Obstruction Light (SPOL) koihna ding tower leng Maibam Lokpa hill, Nongmaiching hill, Langing leh Cheiraoching munte a koih hidingin leng kigen hi.

Panchayat te mass resignation piaksawm
IMPHAL MAR 8: Imphal East district sung a Block I & II nuai a Pradhan, Upa-Pradhan leh Gram Pradhan member te apat helpawlten Central apat Panchayat Development fund hongpai sumte 5% ngen uhi.
Hiai toh kisai mah in, helpawlten Pradhan bangzah hiam inn thau in kapta ua, Pradhan 6 vel leng voliam ta uhi. Hichibang a helpawlte gamtatna mohpaihna in, pradhan te kigawmna, Imphal East Panchyat Development Association ten, apaisa March 5, 2008 apat Porompat a DC/ IE gate bul ah sit-in-protest nei ua, tuni a mass resignation pelut ding a chih uh himahleh, second Saturday ahihziakin, March 10, 2208 zinglam dak 11 a DC Imphal East kianga a honpi a kitawpna piaklut sawm uh hidan un kigen hi. IE district sung ah Pradhan 50, Up-Pradhan 50 leh GP member 405 bang om hi.

Multi Media Artists workshop
IMPHAL MAR 8: Arts Society Manipur te saina in, ni 5 sung daih ding Multi Media Artists workshop tuni sunnung in, Manipur State Museum complex ah patkhiak in om hi. Hiai workshop honkhiakna hun a khuallian P.Bhorot Commissioner Art & Culture in agenna ah, Literature leh Fine Arts kichi a paikhom ding, laigelhte a lem a gelhkhiak chih leh alem a omte a thu a gelhkhiak chihte kikhen theilou leh tonkhom ding ahihdan gen hi.
Manipur a Artists Traditional leh Contemporary omte naktak a phungvuh leh tosawn tuak ahihdan uh leng gen hi. Imphal Art College leng SPA nuai a Rs 3 crores lut a puahthak hiding in gen a, tua ah administrative building ban ah numei leh pasal hostel leng koih hiding in gen hi. Hiai Imphal Art college bawlzoh ahihchiangin North East a Art college hoihpen khat hiding inleng Commissioner in gen hi.
Tuni a hiai hun zatna ah, President in Arts Society Manipur a President L. Shamu Singh panga, Sahitya Akademi Awardee thum apat lavui ngaihkhiakna leng om hi.

Meghalaya ah Congress leh MPA vaihawmna kituh
Shillong, Mar 8: Meghalaya election vote counting zohsiang ahih toh kiton in congress vaihawmna khekkhiak sawm in United Democratic Party (UDP), Hill State Peoples Democratic Party (HSPDP), Khun Hynniewtrep National Awakening Movement (KHNAM), Nationalist Congress Party (NCP), BJP leh Independents 2 telching a omte’n tuni’n Meghalaya Progressive Allience (MPA) kichi UDP president Dr. Donkupar Roy makaih in phutkhia uhi.
Tututng Meghalaya election ah congress in seats 60 om lak ah seat 25 ngah in single majority hi a, MPA a kigawmte’n seat 31 ngah a, government bawl thei ka hi uh chih lahna ding in tuni’n Governor mai ah va kilak uh hi’n thusuak in taklang hi.
Tuabangkal ah, Meghalaya Congress Legislature Paryty (CLP) in tuni’n amau lak a makai ding in term lui a Chief minister hihna len D.D. Lapang telching ua, tua toh kiton in tuni’n governor kiang ah single majority ahihna toh government form theihna hun lemchang pe ding in ngen, tua hun ah Union Tribal Minister P.R. Kyndiah, AICC Secretary in charge of Meghalaya Major (retd) Ved Prakash leh MPCC president O.L. Nongtdu te’n kithuahpih uhi.
Thuthaksaimite kiang a, Lapang in a genna ah, single largest party hihna ngahte a tangpi’n government bawl ding a chial hizel ua, independents 2 telching a omte’n leng congress gum ding ahih dan uh gen a, hiai toh kisai a independents candidate te thuthaksaimte’n a dotna uah, innpi ah a prove na a om mai ding chi’n dawng uhi.
Alehlam ah, MPA makaite’n leng governor in government form dia chial ngeingei ding ahihdan kimuangtak in gen ua, amaute’n government a bawl uh leh kum 5 sung hoihtak leh ginomtak a paisuak ding ahihdan uh leng gen uhi.

‘Love walk’ rally neih in om
Imphal, Mar 8 NNN:
Manipur-a muanna, lohchinna, namkal kihoutheihna leh lungmuangtak a tenkhawmna omtheihna ding a Manipur-a Christian kipunkhawm te’n apatkhiak uh ‘movement’ khat, ‘Love Manipur’ kichi makaihna a Kiginni a ‘Love walk’ rally, Imphal sung leh kiima neih in om hi. Hiai rally ahihleh Justice W. A. Shishak, Chairman, Manipur Human Rights Commission (MHRC) in honkhiakna aneihzoh in hiaimun mah apat direction 2 a kikhen in rally nei ua, Hafta Kangjeibung ah kisukhawm nawn uh hi’n thusuak in taklang hi.

Nagaland ah NPF hatpen tadih, DAN in sorkar din sawm
KOHIMA, March 8 NNN
Nagaland Assembly election vote simna kipanta a, assembly constituency 60 lak ah Kiginni in constituency 57 simkhit in om a, huai lak ah Nagaland People Front (NPF) in seat 25 ngah in single largest party hihna la hi.
NPF in seat 25 a ngah toh kiton in a Democratic Alliance of Nagaland (DAN) coalition partner uh BJP leh NCP in seat 2 tuak a ngah ziak un a kigawm un seat 29 nei uh chihna suak a, nuamtak a sorkar a din theihna ding un seat 2 poimoh beh uhi. Constituency tengteng ah Congress party in candidate guang mahleh Kiginni a puankhiak a om teng lak ah seat 22 ngah a, himahleh 2003 Assembly election a seat a ngah teng sang un khat in tamzaw hi.
Zunheboto district sung a constituency 3 a vote simna ahihleh Pathianni in pat hiding a, independent candidate-te toh pangkhawm a DAN in sorkar a dinkhiak gintakhuai hi. Seat 30 sang a tamzaw ngah dia kimuang Congress in ahihleh a tunglam in hihhoih mahmah ua, a khonung in NPF in delhpel hi. Huai khit in kisikim mahmah nawn ua, independent candidate te’n seat 6 a luah ziak un nitaklam in Congress a di’n lametna bei hi. Congress’ national alliance partner RJD in candidate 25 nei mahleh Kiginni a result kipuang teng lak ah seat khat leng ngahlou uhi.
Tuabangmah in, NPF in hihhoih mahmah mahleh, DAN nuai a a partner uh BJP leh JD(U) in hihse mahmah uhi. 2003 election ah BJP in seat 7 ana ngah mahleh tutung in seat 2 chauh ngah ua, JD (U) ngial in khat lel leng ngahlou uhi. JD (U) in seat khat lel leng a ngahlouh hang in, Nagaland a dia a khat veina ding in NCP in seat nih ngah uhi.
NPF in hihhoihlua hinapi in, Home Minister lui Thenucho banah minister lui tuak Noke leh Khekiho tel in a sitting MLA uh 6 khahsuah uhi. Congress in Dimapur a seat 5 lak ah seat 4 ngah a, a khat pen independent candidate in tang hi. NPF in leng Kohima a seat 7 lak ah seat 6 tang a, a khat pen, 15 Southern Angami-II A/C ahihleh Congress candidate, K V Pusa in tang hi.
Nagaland Pradesh Congress Committee (NPCC) chief I. Imkong, SC Jamir’ tapa C. Apok Jamir, Chief Minister lui KL Chisi banah SI Jamir (SC Jamir’ sanggampa) tel ching in om nawn mahle uh Congress a di’n phatuam zoulou a, Wokha district ngial ah, seat 4 lak ah khat lel leng tanglou uhi.
NPF’ dinmun Congress a toh teh in hoihzaw mahleh, Congress in independent candidate 6-te a kaihkhawm zoh a leh NPF dou thei ding a a kilat ziak in NPF leh Congress mahmah in leng tua independent candidate 6-te mitsuan mahmah ua, tulel a Nagaland politic dinmun a gen neilian mahmah uhi.
NPF’ makaih Democratic Alliance of Nagaland (DAN) in maban a Nagaland sorkar thak a din zoh ding ua leh, makai ding toh kisai a buaina bangmah neilou ahihdan uh leh Neiphiu Rio mah heutu dinmun letsak sawm uh ahihdan thusuak in taklang hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s