Manipur Express | March 11, 2008

Traffic Official 2 suspend in om: Police Officer te sepna heikual
Assembly ah bomb puahsak ahih ziak in Budget session khawl

Imphal, March 10: Manipur Assembly House Complex ah helpawlte’n hand grenade khat March 8 2008 a apuah zaak sak ziak un, tuni in Assembly session a budget discussion om ding lai khawlsak top in om hi. Hiai thu ziak in, Police Officer 2 suspend in om a, Police officer bangzah hiam sepna heikual in om hi.

Thusuak kingah dan in, Opposition MLA O Joy Singh in Assembly complex hilhial a bomb paihpuak te mawhpaihthu gen kawm in, State Government adia zumhuai ahihdan taklangin, Budget session neih theih louh himhim ding ahihthu gen a, member te’n leng pompih in, session khawlsak in om a, Member te’n ngaihdan genkhawmna nei uhi.

General Discussion hun ah, O Joy Singh MPP in ataklat dan in, Khawvel gam zalente lak ah, hiai bang thil a tun 3 veina hita a, a masapen in British Parliament attacked in om a, tuazawh in Indian Parliament leh a thumna ding in Manipur Assembly House ahi chi hi. Hiai hun ah, Opposition leh Rulling lam apan in, Morung Makunga, E Kunja Kishore, I Ibohalbi, Kh Ratan, N Biren, N Mangi, S Kunjakishore, V Hangkhanlian leh Radhabinod Koijam in gen ua, amau State Government leh Home Department in pan alak ngai khenkhat a gen ban uah, maingal tak a gamtang Helpawlte matkhiak ding leh mawhpaih mahmah uh ahihdan puang uhi.

Chief Minister in a thugenna ah, Manipur apan Armed Forces Special Power Act 1958 lakkhiakna ding in kiphinna tuamtuam ana om ta a, huai dungzui in Assembly segment 7 (valley area) apan lakkhiak hita a, himahleh, helpawlte zalentak a gamtang thouthou uh ahihziak in, Manipur pumpi ah AFSPA 1958 koihthak a om phut thei ahihdan gen hi. Assembly house bomb na tawh kisai in, Inspector General of Police (Intelligence) kiang ah mawhpuakna piak in om a, aman kalkhat sung ngei in report pe ding hi’n Chief Minister in gen a, hiai thu ah a kibang kha official himhim, Suspend, terminate leh voluntary retirement khat penpen piak hiding in Chief Minister O Ibobi Singh in house theisak hi. Chief Minister in Minister leh MLA te kiang ah ngetna bawl in, gari glass ki mu pailet theilou (tainted glass) himhim zanglou ding in ngen a, Police te nasepna apai hatsem theihna ding in kua hiam mat ahih chiang in, kigolh pahpah lou ding in leng ngen hi. Assembly speaker in bomb puak mawhpaihna in tuni nitaklam dak 1:15 apan zingchiang March 11 zinglam dak 11 tan session pailel khawlsak hi.

Jarnail Singh Chief Secretary in thusuah abawl dan in, Assembly Complex a bomb puah ziak mah in, L Birababu Singh MPS, DSP (traffic) leh L Deven Singh Inspector, OC, Traffic Police te ahihna ua pan suspend ahihdan puang a, thiltung te ziak in atung uah disciplinary proceeding pai ahihdan leng theihsakna bawl hi. Tuaban ah, Imphal West SP Clay Khongsai leng Thoubal ah suan in om a, Imphal East SP L Kailun in Imphal West SP lending a, Thoubal SP S Radheshyam in SP Imphal East lending hi. SP (CID-SB) P Dhanakumar in SP (CMT) lending a, Additional SP (CID-SB) Achin in SP (CID-SB) mawhpuakna la ding hi.

LOCAL NEWS:

Brigadier General in Lamka hongpha

3rd Corps, Rangapahar Dimapur apan in tuni in Brigadier General Staff Barbil Pama in Army helicopter zang in Lamka hongpha a, Tuibuang a om 27th Sector Assam Rifles Headquarters ah, United Peoples’ Front (UPF) leh Kuki National Organisation (KNO) makaite hong kimuhpih hi. Thuchian theih hikei mah leh, Suspension of Operation (SoO) tungtang genkhawm uh hidanin thutut kingah hi.

Jeep leh cycle kiphu, mi 3 liam

Tuni nitaklam dak 4:30 vel ding in Lamka manawh a tai Passenger Jeep MN 01A-0398 in Tuibuong a cycle a tailai Tongngam Guite (50) s/o (late) Jam kho thong of Thingkangphai phukha in, a Jeep leng accident hi. Jeep a tuang passenger 2, Sutkhosei Kipgen (48) s/o (late) Khupmang of K Munpi leh a tapa Hengoulien (9) leng liam a, mi 3 te a vek un Lamka damdawi inn ah etkol in om lel uhi. Police te’n Jeep leh Cycle accident na mun apan in va la ua, Lamka Police station ah kemlel uhi.

Nazareth Bible College in affiliation ngah

Lamka Peace Lane a om Nazareth Bible College in International Association for Theological Accredition(IATA) apan in affiliation ngah hi. Tuni nitaklam dak 2:30 in accredition leh affiliation Certificate piakkhiakna Rev.Dr.Soson Gangte, National representative, International Association for Theological Accredition in Trinity College and Seminary in piakkhiakna nei hi. Hiai College in maban a Bachelor of Theology Degree tan pekhe theita ding uh chihna ahi hi.

Doctor 2 in Parbung bial zuan

District Malaria Officer Dr F Thienkhogin leh Parbung MO Dr Ginthianlal in tuni in Parbung khua zuan in zinkhia ua, amau a va taam sung un khaw tuamtuam leh veng tuamtuam ah damloute etna va nei ding uhi. Hongtung kik hun ding uh theih hilou hi.

DDT spray training na om ding

National Vector Borne Disease Control Society/CCpur saina in March 14 2008 zinglam dak 11 apan in District Malaria Office mun ah, CCpur District sung a Male Health Supervisor/Male Health Worker leh Spray men teng in, DDT Spray tawh kisai training na nei ding uhi. Hiai hun ah DMO leh Male Health Supervisor te’n sinsakna nei ding uhi.

Lenglakot school building enkhe ding

Kaikhanlian Guite DI leh Kapneithang AI/CCpur te’n zingchiang in, SSA fund nuai a Additional 3 room extension kibawlna dia sanction om, amun mahmah ah ki lam taktak hiam chih etkhiakna va nei ding uhi.

Street light 42 hongtung kimta

Lamka khawpi sung a kongzing tuamtuam a zat ding, Street light 42 Lamka hongtung kimta a, Department in mun tuamtuam ah fit na neilel ua, tuni tan in bangzah hiam zouta in, meileng vaksak hita hi. Huaiban ah, kum 1 paisa apan in CCpur District ah transformer a thak 20 ki koih beh a, himahleh, consumer kibehlap tuanlou hidanin official te apan kiza hi. CCpur District ah unauthorized/illegal electric subscriber leh fee ba om kei leh dakkal 24 sung electric pai gige ding hi’n Department official te’n gen uhi. Electricity KV Station agamlat luat ziak in haksatna khenkhat om a, town sung ah sub station om hilebel department in baihlamtak in bawlthei ding a, tua ban ah, an authorized electric subscriber a tamluat ziak in, fee regular tak a pete’n leng mei ngawl lawhsek ahihdan Department official thusuak in taklang hi.

Kum 24 sung lel in khua 200 val in kibehlap

Autonomous District Council nuai ah MDC election na nung pen 1984 kum in neih in om a, huai hun in Churachandpur district sung ah khua 412 om a, himahleh, tu in MDC election neihthak ding hileh, khua 600 val phata hi’n kigen a, kum 24 sung lel in District sung ah khua 200 val kibehlap chihna suak hi. Vote tamna pe’n Lamka Constituency ah voter 30,000 val om a, a tawmna pen Ngazam Consituency ah voter 3,000 vel om hi. District sung a ADC nuai a MDC Constituency om te ahihleh, Vangai range, Senvon, Tinsuong, Ngazam, Thanlon, Tuivai, Lungthul, Singngat, Haopi range, Tuinung, Lanva, Lamka, Khuga, Sagang, Torbung, Khousabung, Henglep leh Leimatak hi’n kigen hi. A theih ut huai mahmah bel, 1984 MDC Election hun in, New Lamka om kha lou a, tutung in election neihbang hita leh, Lanva area ahihkei leh, Lamka Constituency ah om ding hiam chih theih hilou a, State Cabinet in hiai tawh kisai thutanna abawlma bangmah theihtheih louh in om hi. New Lamka huamsung chauh ah voter 10,000 val om hi’n kigen hi.

Siamsin Thaikawi hongtung ta

BoSEM nuai a pawl IX leh X te’ sinlai Siamsin Thaikawi (revised edition) Lamka hongtungta a, Book room te ah muhtheih ding in om ta hi. Hiai laibu ahihleh, NCERT prescribe dungzui a bawlkhiak a om ahi hi.

Mi 2 sihna ah KNO in thusuah bawl

Lamka, March 10: Kuki National Organisation a Under Secy (Inf & Pub) T Stephen Kuki in thusuah abawl Press a kimu in ataklatdan in, March 7 2008 in Manipur Police Commando te’n KNA promoter leh van driver khat Thoubal District ah that uh ahihdan gen hi. Aman agenbehna ah, Manipur Police commando te’ thugen diklou ahihdan taklang kawm in, KNO Promotor Seikholun Haokip in galvan bangmah pawlou ahihdan taklang ua, tuaban ah, Van hektu Devan Meitei in KNA tawh kizopna bangmah neilou in, Imphal leh Moreh kal a van service ahihdan taklang hi. Manipur Police te gamtatdan haihuai mahmah ahi chi’n KNO thusuak in taklang hi.

Lanva dung ah suangpua om thei nawnlou ding

Lamka, March 10: CCpur District Magistrate Sumant Singh in tuni a thusuah abawlna ah, SP/CCpur leh EE/PHED in report abawl dungzui un, Lamka khawpi tuineek suangpua gari te ziak in, niin gige a, tuni March 10 2008 apan hunchiam omlou, Lanva dung ah gari taithei nawnlou himhim ding ahihdan gen hi. Tuaban ah, District mipite apan Lanva lui tungtawn a tuineek kihhuai dan complaint mu tam mahmah a, 133 (10)(A) Criminal Procedure 1973 leh 133 (1) (a) code of criminal procedure 1973 dungzui in lanva lui dung a gari lut ding kham bikbek ahihdan puang in, Churachandpur town apan Km 4-6 kikal sung ah suangpua gari taithei nawnlou ding ahi chi hi. Hiai thu tawh kisai objection bawl ut gari neitute/driver leh a tuamtuam in March 12 2008 sunnung dak 12 apan nitaklam dak 3 tan ama office chamber ah va kimuhpih thei ding ahihdan District Magistrate in gen hi.

Sunna:

Mr Khukholam Singson (82) f/o (late) Pastor Lamkhokam of Tollen tuni in teknat in si a, zingchiang March 11 in tollen hanmual ah ki vuiding hi.

Mrs Chinkholhing (66) w/o Siehkhogin Kipgen of Bethel tuni in sinna in si a, zingchiang March 11 in Bethel Hanmual ah ki vuiding hi.

IMPHAL NEWS:

BSEM in mi 3 nawhkhia

Imphal, March 10: Board of Secondary Education, Manipur nuai a pawl X exam pailel ah tuni in centre tuamtuam apan in candidate 3 nawhkhia uhi. Nawhkhiak a omte ahihleh, Thanga centre apan in Roll no 2485, Moreh Centre apan in Roll no 18452 leh 18495 hi’n thusuak kingah hi.

Co-operative Official 5 om na kitheilou

Imphal, March 10: Manipur State Co-operative Union Chairman K Borkishore Singh, P Kula Chandra Sharma Chief Executive Officer tel in Official 5 zan zingkal in meltheih louh helpawl khat in kihou ding in pikhia uh a, tuni tan a om na uh theih hilou hi. Manipur State Co-operative Union tuni adia sehsa himahleh, hiai thil tun ziak in, hunchiam omlou in suan gamlat in om hi.

KSO in mawhpaih thu puang

Imphal, March 10: Kuki Students Organisation General Headquarters in Press Release abawl kimu dan in, March 8 2008 in Wakonphai area ah Kuki helpawl nih kikaptuah ua, Pawl X leh XII exam lai a hiai bang thawm om pen theisiam lou uh ahihdan taklang in, thil tung naktak in mawhpaih uhi. Tuaban ah, Sadar Hills bialsung ah Quality education sepsuah na ding in KSO in pan naktak in la a, BoSEM apan official te’n a mit in hong enle uh lungtun huai sa mahmah ding uh ahihdan KSO General Headquarter thusuak in taklang hi.

Toll tax collector kapliam in om

Imphal, March 10: Zan nitaklam dak 1 vel in Wangjing Bazar ah meltheihlouh pawl khat in Lilong toll tax collector L Sarat (52) s/o L Mangi of Wanging Bazar pikhia uh a, zan nitak mah dak 6:30 apan dak 7 kikal in Chothe khua ah a veilam pheipi kapsak uhi. Mr Sarat in agenna ah, meltheihlouh helpawlte’n maban ah pilvang dingin theisak ua, tua ban ah toll tax collector ahihna leng khawlsak ding in theisak uh chi hi. Amah ahihleh, Thoubal District Hospital ah etkol in om lel hi.

JAC in CM lem halsia

Imphal, March 10: Manipur University in Central University status a ngah dungzui in, a campus leng suklet ding in lemsakna om ta a, huai dungzui in state leh central Government pangkhawm in, University suklet sawm uhi. Himahleh, huai kiim nai a teng inn leh lou mun neite’n deihlouh thu taklang in, JAC Against Phumlou Konjil Loukon and Heibokcing, Manipur University land expansion kichi te’n tuni in University kiim lak ah nuakna leh kiphinna nei in, Chief Minister O Ibobi lem halsiatna nei uhi. Tua zawh in JAC makaite leh MU Vice Chancellor in kihouna nei in, JAC in maban ah pan naksem a la ding uh ahihdan genkhum in, VC kiang ah JAC ngetna bawhzui pih ding in ngen uhi.

Thoubal Demand Commtt in kiphinna neiding

Imphal, March 10: Thoubal District Development Demand Committee te’n March 26 a Rajya Sabha election om ding ah, Thoubal District mi ahihkei leh, Jiribam Sub Division mi khat teitei RS Member candidate ding a guang ding in Government ah ngetna pelut uhi. Manipur SPF Government in March 15 2008 tan a dawna bangmah a piak kei leh, March 18 apan in Thoubal leh Jiribam sub Division sung ah General Strike pan ding uh ahihdan puang uhi. State Government in huai tanpha ah bangmah a limsak tuan kei leh, March 26 apan in state wide Bandh pan ding ua, maban panlak ding dan ngaihtuah tawm zel ding uh ahihdan puang uhi.

Outer Manipur Constituency (hill District) ah Thoubal leh Jiribam Sub Division apan voter tamtak tel uh a, amaute ading in constituency tuam piak ding in kum tamtak paita apan phuut in omta a, Thoubal District Development Committee leh Jiribam District demand committee tanpha phuan in om ta hi.

Mautaam panpihna ding in pan naktak in kila: CM

Imphal, March 10: Tuni Assembly dotna leh dawnna hun ah, V Hangkhanlian MLA in dotna a bawl Chief Minister in adawnna ah, Mautaam kialpi panpihna ding in State Government in pan naktak in la a, Centre Government ah proposal list khak khin ahihdan gen in, additional monthly allocation 8015 Qtls BPL/APL rate a nget ahihdan genkawm in, NREGS tungtawn a antang kaihlut dingdan ngaihtuah hilel chi hi. Tuktui luanma ngei a, PDS infrastructure puah hoih hiding in leng Chief Minister in V Hangkhanlian dotna dawng a, tua ban ah antang a thawn liauliau a hawm theih louh himhim ahihdan gen in, Centre Government apan dawnna muh ahih chiang in, relief tawh kisai ngaihtuah thak hiding in gen hi.

Catholic school teng kikhak

Imphal, March 10: Rev Fr Peter Bianchi SDB (86) in Kiginni March 8 a sihna atuah phut ziak in, amah sunna in tuni in Manipur a Catholic School leh College om teng khak in om hi. Rev Fr Peter sunna Imphal, Shajouba, Mao leh Dimapur ah neih in om a, aluang St Mary’s Church campus, Punanamei Mao ah vuil in om hi.

EDITORIAL:

Tuni Thupi: “Na pil leh, nangmah adia pil na hi. Huan mi na muhsit leh, nang kian na paw ding hi.” Paunakte 9:12

Assembly Complex bomb puak in Manipur hihna taklang

Manipur Assembly Complex Gate No 1 (VIP) gate ah apaisa March 8 2008 zinglam dak 11:45 vel ding in helpawl te’n hangsantak leh zalentak in bomb va paihpuak uhi. Manipur Innpi a tuabang thil a tun theih pen lamdang mahmah chi’n ngaihsun le hang, lamdang law ngut ding a, himahleh, hou maimai, chi in ngeina seh zawng in paile lah, ana hou law ngut ding in gintak huai hi.

Mi tamtak te’n Manipur State chih ding leng lin mahmah in, min khem khawng phuahsak in, Moneypur, Moneypoor peuh chi ua, a nou tawi mahmah te’n Sana leibak chi hial in, Phamsa Pandit Jawaharal Nehru bang in nou tawi law mahmah in, Jewels of the east chi hial hi. Nehru thugen apan Sana leibak min piak himahleh, Manipur tulel dinmun et in sana ahihna suang meihol mah bang ta hi.

Manipur Assembly Complex ah bomb puak i chih chiang in, State Government ading in bangzahta in a zahlak huai dia, bangzahta in a zum huai dia, President Rule koihna tham ching ahi hi. Security zone ahih ban ah, Government in hoih tak a a venbitna ding mun ahi hi. Manipur khangthu ah Assembly complex nihvei hial khoih in om ta a, NSCN IM leh Centre Government in ‘Ceasefire without territorial limits’ chih thupukna alak lai un, Manipur leng ana kuang zaak in, Assembly hall hal in ana om hi. Huai hun in Assembly hall tung a India Flag ki taak tanpha halsiat a om hi’n kigen hi. India puanlap halsiatna kichi crime liantak hi’n leng kigen hi.

Manipur Assembly hall sung leh pua ah thil mak taktak atung. Nidang hun in, Speaker lui I Tompok in leng Speaker tutna a zun ana peek ngeita hi. Huai thu thutuam hita leh, thangpaihna leh hehna om chiang a, bangziak a Assembly complex sung khoih tupna om naak ahi dia? chih state Government adia ngaihtuah tham ching ahi hi.

Manipur ah vaihawmtu leh vaihawm a om te kal ah gap lianpi om adiam chih hon ngaihtuah sak thei a, banghang hiam i chih leh, 1990s vel apan in helpawlte ki san mahmah ua, MLA/Minister te Inn tam veitak buluh (attacked) hita hi. Naga ceasefire tungtang ah leng Security te’n MLA/Minister te quarter nasan venbitna pezou lou in, tamtak halsiat in ana om a, Dan leh thupiak ana chau mahmah hi. Tu’n leng Dan leh thupiak a chauhdan gen ngai lou a i theihsa hi a, huai kawmkawm in thuneihna leh lalna deihna ziak in, MLA/Minister tamtak Imphal ah ki camp uh a, huai lai leh huai nung sawtlou in, MLA/Minister te tenna Inn ah bomb sukpuak chih leh, thau in va kaap uh chih news item hiden hi. Huai teng chauh hilouh in, Departmental official te tenna Inn bangzah vei khoih in a om a, tunai chin in leng, RIMS Director tenna Inn tel in official tuamtuam in ah Hand grenade muhkhiak in a om hi.

State Government leh Security lam in pan ginatak in lalou ua, huai mah helpawlte adia hun lemchang tak ahi hi. Kallui in Manipur phaizang helpawl khat in Newspaper tungtawn in MLA/Minister te vauna bawl in, Babupara leh MLA te tenna bial ban ah, Assembly house kiim naih ah kuamah zalentak a pawtlou ding in theihsakna bawl ua, banghiam thil a tun leh a thuakkha te’n mawh kipuak ding uh hi’n taklang uhi. Huai nung ni tam pai nailou in, Assembly house khoih in hong om ngal a, tuate i ngaihsut chiang in, Security te leng muangchang om law deuh uh adiam chih theih in om hi. Assembly complex a bomb puahziak in Government in kintak in Imphal West SP Clay Khongsai bang Thoubal ah suankhia ua, SP/CID Dinakumar leng a mawhpuakna lakkhiak sak uhi. State Government in a zahlakna uh security te tung ah bungkhe maimah adi uam chih ngaihdan leng om thei hi.

Manipur ah Dan leh thupiak a siat hulhul pe’n ngaihkhawk huai mahmah hi. MLA/Minister te Inn Police commando pawl in a buluh na uah, helpawl tamtak matkhiak in ana om ngeita a, huai in Manipur a hihna mah taklang in, tutung Assembly complex hial bomb khum ahihna ah, mipite ading in State Government muan huai hun tawk mah hia chih ngaihsutna hon pethei mawk hi. Tudan zel a i pai touh ua ahihleh, State Government hong ki leh but khak ding lau huai mahmah hi. Bandh/blockade/strike/ dharna leh buaina tuamtuam niteng hun teng in zaak ding om gige hi. Mipi palaite lak a a tamzawte neekguk taak gukna ah a ki hah bual luat ziak ua, helpawl teng in leng ngap thawh vek adiam chih ngaihdan piang thei hi.

Manipur i chih gam neuchik hi a, Police/IRB/BSF/MR/Army leh security agency tuamtuam te a dim in om ua, singtanggam sang mah in leng Phaizang gam neu zaw ahih na tawh security te’n bangziak a enkai zoulou uh a diam? Nidang in buaina thawm i zaak chiang in, Singtang bial ngen hi a, tuni chiang in ki leh bulh mahmah ta in, buaina thawm i zaak te lak ah a tamzaw phaizang bial ngen hita mawk hi. Manipur ah mipi nautang te khualna tawh Dan leh thupiak hoihtak a et thak ahih kei leh, khawlai vakvel te’n sih le man va tuah theih gige mawk hi.

MAIN ARTICLE:

RETROSPECTION OF ELECTION IN NORTH-EAST

(India North-East bial a mipi deihteelna (Election) etkiikna)

: Mr. Vungzagin Valte

State
No of

Seats
No. of

Candidate
Past Ministry led by (Party)
State Major Religion

Meghalaya 60
331
Congress
Christianity

Nagaland
60
218
DAN
Christianity

Tripura
60
313
CPM
Hindu

State-wise Election Main Issue / Election Manifesto:-
State & Major Parties
Main Issue / Election Manifesto

1. Tripura (CPM)
Khantouhna, Insurgency thu tellou

2. Tripura (Cong)
Central Fund atun ding banga tunglou

3. Meghalaya (Cong)
Govt. detdou leh Khantouhna

4. Meghalaya (NCP)
Gamgua sangin In gua hah/kep ahoih

5. Meghalaya (UDP)
Imguklouh (Transparency)

6. Nagaland (DAN)
Insurgency kia genlouh in, sepaihte thuneihna President’s Rule hoihlou ahi

7. Nagaland (Cong)
Congress ngallou Naga problem enkai ding omlou

Election Result:

MEGHALAYA
NAGALAND
TRIPURA

Declared
59
Declared
57
Declared
60

Party
Secured
Party
Secured
Party
Secured

(1) Cong
25
(1) DAN
25
(1) CPM
46

(2) NCP
14
(2) NCP
2
(2) RSP
2

(3) UDP
11
(3) BJP
2
(3) CPI
1

(4) HSPDP
2
(4) Cong
22
(4) Cong
10

(5) BJP
1
(5) IND.
6
(5) INPT
1

(6) KHNAM
1

0

0

(7) IND.
5

0

0

Total:
59

57

60

Meghalaya ah election campaign lai in, Neek-guk taak-guk, sum-le-paai zang a Vote zong a kingawhtuahna anase mahmah a, Congress heutute zintunna tanpha luhsuah a om in, sumtang (Cash) in Rs. 23.00 Lakhs val bang matkhiak in hawng om a, News Report dungjui in, Candidates kiang a ahawm baang uh ahi chih hi zawmah lai, Newspapers ah muh theih in ahawng om hial hi. Hiai toh kitawn in, Meghalaya State a Congress Minister/MLA hisa leh athak a candidate mi 27 hialte aneih-le-lam kipulakna ah crorepati (India a theihtham mihausa) a hawng telkha hi. Dr. D.D.Lapang (Doctorate Degree in Theology) in a campaign ah Fund ahawng pai tengteng atunna ding hoihtak a hon tungsakna ding ka hi, ke’n neih-le-lam kining chingtak toh ka khawsata a, chi hilhial veh aw. P.A. Sangma tamvei tak khutzung daihlouh phial MP ana kaita leh Lok Sabha Speaker tanpha tanvou ana len ngeipa leng phaphet lou in, campaign chiang in, ahun mualliamsate pammaih ahihdan, inn-gua hahlou a gam-gua ana hah nilouh ahihdan gentou ziauziau lel hi.

Nagaland State ah neekguk leh taakguk thu ah Ministry ding lai ngohna anase mah mah a, Ministry dinglai Election huzap di kuan in sawnpaih in President’s Rule koihkhum in ahong om hi. Democratic Alliance of Nagaland heutupa Neiphiu Rio leh akaihzatamte kisiamtan in, Central Government in hon nelhsiah a, Insurgency problem ahaksatna kal ah, India Sepaih Uniformte thuneih khum ihi chih pan san in, Nagaland adung leh vai a palsuah in campaign abawl nawn leu leu uhi. Alangkhat ah, Congress Heutupa Hokheto Sumi leh Congress Legislature Party Leader I Imkong ten Naga problem Congress party ngallou hawn sukvaiven pih taktak ding a om kei chi in khuang beng nawn leuleu uhi. Pi Sonia Gandhi takngial in leng North East bial ading liauliau in Rs. 5000.00 Crores sehkhiak ahi chi in Bible chang gen bang mai in puang zau zau nawn hi.

Tripura milimbia state chi a ingaihnep mahmah en nawn lehang, India in Election aneih masapen 1952 kum apan tukum Tripura a vote khia hoihpen a India khangthubu a record hilai hi. (Right from the year 1952 when India had first Election this is the highest percent votes cast with 92 percent voters exercising their franchise. Earlier Sikkim held the record of 87 percent votes cast in 2002 election. Moreover, the voting ended on 23-02-2008 without the reports of violence or bloodshed)

Tripura Election: Voter omzah: 20,35,877 : Total Seats: 60

Party-wise Performance:

Name of Party
Seats

Tuhzah
Seats

Muhzah
% to Total Seats
Chiamteh tuak

1. CPM
57
46
76.66%
Party – CPM, RSP & CPI election neihma apat kipawlkhawmte ahi.

2. RSP
2
2
3.33 %

3. CPI
1
1
1.66 %

Sub-Total:
60
49
81.66%

1. Cong
46
10
16.66%
Party Congress leh INPT election neih ma apat kipawlte

2. INPT
11
1
1.66 %

Sub-Total:
57
11
18.33%

Tripura Election ah leng Congress candidate 7 Crorepati telte lak a 4 lohching a, adang 3 mah vual lel veve suak hi. Tua Tripura Election ah, CPM lawhchinna pen menchim luangkhawm (landslide) toh kibang hial hi. Bang hang a Tripura a CPM Party in 81.66 % seats tangzou a, huchi lawmlawm a hong lawhching a, India Khangthu a Election a Lawhchinna dia chiamteh tham pha hi ding hiam? Pi Indra Gandhi leh Pu Rajiv te luangman galna leh Kawsah huzap a election a omte a Congress Party lohchin sang thamin, Lohchinna sangzaw a hawn nei thei mawk uhi. Pu Manik Sarkar gin-omna leh party discipline lou aziak ding theih in a om kei hi. Sarkar Money kichi pen Bank Account ah Rs. 13,920/- leh asum tang in Rs. 3,000/- ahi. Tripura Chief Minister kum 10 (10 years) a kizawm alentou, Manik Sarkar (kum 58) ahi a, private gari leh inn-le-lou neizou nailou, asum neihzah hiai Sarkar money ahi. Kum 10 Chief Minister aletnung a leng, amahmah in a silh-le-teen kihahsiangthou a, zu-le-teptheih (drinks & smokes) a kisu bawtlawh lou mithupi Manik Sarkar ahi. Khawlai vak chianga rickshaw zang a, a pasal official car zangthang nuam lou tuh Manik Sarkar’ ji Mrs. Panchalli ahi. (Reference The Times of India 7th February, 2008 issue) Lawm aw…. Thil hi thei ding in na koih hiam? Ging in ging kei leng, Tripura khua-le-tui kichi phot hiai ginglou tawm mahmah ban’h, a ki-khinpih pen Congress party in kalh ngaihna atheih louh uh ahi.

Politics ka khaw–hei ngeina leng ahi kei, huan, party guptuam leh paihtuam leng ka nei kei. Himahleh, North East bial a Christian dominated state nih leh Hindu / Milimbia sahkhua nei state khat a mipi deihteelna hong om in lungsim tampi ahonkam / sukha a om a, hiai pansan a zilding bangzah hiam ahongpian khiak lam en in, ngaihdan ka hon gelh ve mai ahi. Ei Christian Statete ah sum-le-pai a vote zon, ahi thei tan a kikhem thawh leh kivaulauh thohte in mun lian luah lua ahi kha ding. Christian hihna pen puan-ak silh a kilawmna ding leh political advantage dia zang nuam lel ihi zaw kha diam? Chief Minister D.D. Lapang leh Neiphiu Rio te leng Theologian leh makai lel hilou in Jesu mel-banna Christian ahih uh leh election bang leng Chief Minister Manik Sarkar bangin haksa lawmlawm kei leh kilawm maw? Christiante lak ah Crorepati politiciante / Contractor hausa gam leh nam itna taktak leng nei ngel loute chethei zaw bang lai veh aw maw? Tua politician igen khak sunte ahoih kei chihna pumlum hipah lou in, politiciante’n Chief Minister Manik Sarkar enton in, Crorepati phut butlouh Tripura mipite ei christiante’n leng en ton le I Zogam hong paal lun ding hi. Politics anin leh sianglou himok lou in, asai dan adiklouh chia – paunak a politics nin (dirty politics) chi hi kha hi zaw di hi hang.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s