Manipur Express | March 13, 2008

MHJU in Mizoram CM leh Governor mu ding

Aizawl, March 12: Manipur Hills Journalist Union (MHJU) President leh Manipur Express Editor L Chinkhanlian makaih in MHJU member 11 in Mizoram veh ding in zan (March 11) in Lamka nusia in kipankhia ua, tuni zinglam 0dak 11 vel in Mizoram khawpi Aizawl tung uhi. Amau’ tuni mah nitaklam dak 3 in Mizoram Information and Public Relation Director L R Sailo kimuhpih ua, Director in program a bawl pih dungzui in, zingchiang March 13 in Mizoram Governor L M Lakher muding ua, sunnung dak 1 in Information and Public Relation Minister R Varthangliana tawh houlimna nei ding uhi.

Program bawlsa dungzui in nitaklam dak 3:30 in Chief Minister Zoramthanga tawh kimu in houlimna neiding uhi. MHJU team member 11 te’n zingchiang dak 11 in Mizoram Assembly budget session pailel leng, Special Press team dan in va uap ding uhi. MHJU team leh Chief Secretary Haukhum Haujel IAS hun lem masapen ah ki mu ding uhi.

Civil pensioner te’n lawh la theiding
Lamka, March 12: State Bank of India, Churachandpur Branch tungtawn a Civil pensioner lawh la sekte’n zingchiang apan in laktheih nawnta ding hidanin muanhuaitak apan thutut kingah hi.

Line Bus khat in mehzuakna phu
Tuni zinglam dak 8:30 vel in New Bazar Bus Parking apat tai khia line Bus No.MN-05C-0003 in Thangzam Road a YMA/Lamka Branch Waiting Shed phu phei a, huai kiim a, Mehzuak, Thei zuak, Aktui zuak leh Dukan lak phu phei hi. Huai ah mi 4 liam ua, kintak in District Hospital Casualty puak tung in om ngal uhi. Liamna tuakte ahihleh, Mrs.Ngailam (30) w/o Letmang of Tangmual, Mrs.Paukhannem (43) w/o Khaitinzam of Tangmual, Mr.Md.Hekim (37) s/o (late) Junap Ali of Kwakta Bazar leh Rameshor Shah (50) s/o Shibnam Shah of New Bazar te hi uhi. Nu mei te gel a gimsim ziak un Doctor te’n District Hospital ah admit ua, etkol in om lel uhi.

Pasal nih te bel dressing bawl zawh in a inn lam tuak uah pai sak in om uhi. Police te’n Bus la in CCpur Police Station ah keem lel ua, Bus handyman Mr.Nehkholal Haokip (23) s/o Nehlun Haokip in Bus ava heek mawk hi’n thutut kingah hi. Lamka mipite’ hoihdan ahihleh, bus tung ah bangmah tatsiatna neilou in, kuaman bangmah chih lou hi.

BRTF te gari apat in mi 2 kia
Apaisa March 10, 2008 nitak dak 8 vel in Chongkhozou Chiangpi gamsung ah BRTF gari leh gari dang khat aki pelh tuah lai in BRTF gari tung a tuang Mr.Haulal (23) s/o Thiankhogin of Chongkhozou Chiangpi leh Lianthang (45) s/o Tualzagin te kia uhi. Anih un gimse lua omlou ua, tu’n District Hospital ah etkol in om uhi.

Inn bawllai kia
Mr.Tinlam (48) s/o Bulkhomang of Kangvai tulel a Terakhong muna Security guard asem lel March 11, 2008 nitaklam dak 4:30 vel in inn bawllai kia a, akongguh nasa in District Hospital ah etkol in om hi.

Life Word Seminar min khum hun behlap
Bungmual EBC Inntekna a March 25-28 2008 sung EBC Bungmual Biakinn a Life Word Seminar om ding ah, tuni tan in min khum tamtak om ta a, mipite’ khualna ziak in March 20 tan minkhum theihna hun behlap in om hi. Seminar hun ah nitak lam teng in participant te’n amun mah ah ann ne ding ua, nek man teng Life Word Ministry in sengvek ding a, khual gamla apan hong kipan teng nitak program zawh in bus in khak hi zel ding un kigen hi.

DC Office ah joint meeting om
CCpur Deputy Commissioner Office chamber ah tu nitaklam dak 1:30 in CDSU, ZEPADA leh DC in joint meeting nei ua, huai ah mautaam kialpi tawh kisai genkhawmna nei uhi. DC in agendan in, NREGS tungtawn in mautaam thuakte’n phat tuam na tamtak ngah ding uh ahihdan gen hi.

Hiai hun ah, Thanlon, Tipaimukh leh Vangai range ah kial thuakte’n bangchi leh antang kining chingtak a muthei ding uhiam chih ngaihdan kikum khawm uh hi’n leng kigen hi. DC CCpur Sumant Singh IAS in, singtang bial ah NREGS tungtawn a sum hong pai 50% te antang leina ding a zat hiding in gen a, tua ban ah, mipite’n 50% bang deposit hita leh, APL antang Rs 8 valzek in muhtheih ding a, BPL Rs 6 leh AAY Rs 3 val zek in muhtheih ding ahihdan gen hi. Maban ah ZEPADA, CDSU leh District Administration in mautaam douna ding ah nakseem in pangkhawp sawm uh hidan in leng thusuak in gen hi.

Dr.P.Nengzadou in CMO incharge len ding.
District Health Society/Churachandpur saina in March 13-16,2008 sung Thanlon Primary Health Centre ah Health Camp/Mela om ding hi. Huai ah Dr. S.Gouzalam Vaiphei ahawh ding ziak in, amah omlouh sung in Dr.P.Nengzadou District TB officer in CMO incharge ana len khawm ding hi’n thusuak om hi.

DI &AI te’n School enkhia uh
Tuni zinglam apat in Mr.Kaikhanlian DI leh Mr.Kapneihthang AI/Churachandpur te’n Sangaikot TD Block sung a Vajang LP School, Mongbung JB School leh Tuining Jr.High School te etkhiakna vanei uhi.

Hospital Ambulance zat theihlouh
District Hospital a Ambulance kizang lel pe’n kha 1/2 paisa in kisia a, zat theih louh in tuni tan om nilouh hi. Dr.T.Hatzaw Medical Superintentdent in Ambulance siatna tungtang ah pawisakthu gen in, Ambulance akibawl zawh ma mipi leh damlou te’n theisiam ding in ngetna nei hi.

STC/BSF te’n thau kap ding
STC/BSF Mualkoi mun a traning te’n March 16-31, 2008 sung zingkal dak 5 akipan nitak nungtan in thau kapna nei ding uhi. Huai ah Grenade, 51mm Mortar leh thau kap ding ua, a kim leh kiang nai a khua a om mipi te kuamah vapai lou ding in John Chineer DC/Training, STC/BSF in theihsakna bawl hi.

ZEO in exam te en khia
Tuni zinglam in Joseph Lalrothang ZEO/Churachandpur leh H Thangdam Retd ZEO in Rayburn High School a Class X examination pailel et khiak na va nei hi. Tu ni tan in exam siangthou mahmah a,chiindan hoihlou kuamah matkhiak om nailou hi.

KKL Gen Hqtrs President kichiam
Kuki Khanglai Lompi General Headquarters (2008-11) sung vaipaw ding kitelna tuni in KKL Complex IB Road ah neih in om a, huai ah President ding in tuhtu om lou in, Khailet Haokip telching ua, Holkholhun Haokip President, Kuki Inpi Manipur in kichiamsakna nei hi. Mr Khailet Haokip ahihleh, tuhtu omlou in telching in om a, term lui te in leng President hihna sawtkhawp ana pawkha ta hi.

SUUNNA
H.Ginkhanthang (63) s/o (late) Vumkham of Dorcas Veng, New Lamka tuni zinglam dak 9 in RIMS Imphal ah Cancer in si a ,March 13, 2008 in YPA hanmual ah kivui ding hi.

HEADLINES:
Meghalaya ah Minister ding in MLA 7 kichiam
Nagaland Governor in Neiphiu Rio Chief Minister ding in kichiam sak
Kohima, March 12: Nagaland Peoples Front Leader, Mr Neiphiu Rio in tuni in Governor, Mr K. Sankarnarayanan mai ah kichiamna la hi. Thusuak kingah dan in, Darbar Hall, Raj Bhawan, Kohima ah tuni in Neiphiu Rio in Chief Minister ding in kichiamna la a, Minister ding in MLA 11 in leng kichiamna la ngal uhi. NPF makaih Democratic Alliance of Nagaland (DAN) Ministry thak ah Nagaland Peoples’ Front apan in Minister 9, NCP 1, BJP 1 leh Independent apan in mi 1 in kichiamna nei uhi. NPF President Shurhozelie, BJP leader, M.C.Konyak leh Independent MLA Dr. M.K.Ao te’n Cabinet Minister hihna tang ua, Assembly seat khat result puan hinailou hi. Meghalaya CM DD Lapang in leng Minister ding in MLA 7 lathak a, tuni in kichiamna neisak ngal hi.

Nagaland state sung ah Centre Government in kha 2 paisa apan President Rule akoih uleng tuni apan lakkhiak siang in om ta a, Prime Minister Manmohan Singh makaih Union Cabinet meeting in leng tu zingkal in lemsakna pia uhi. Nagaland ah January 3 2008 in President rule koih in ana om hi.

Tuni a Cabinet Minister dia kichiamna late ahihleh, Shurhozelie (NPF), P Longon (NPF), G Kaito (NPF), Doshehe Y Sema (NPF), M C Konyak (BJP), T R Zeliang (NPF), Imchen Ingkong (NPF), Kuozholuzo (NPF), Nyeiwang Konyak (NPF), Dr Chunben Murri (NCP) leh Dr Ngyangshr Ao te hi ua, kichiamna program zawh ahih tawh kiton in Neiphiu Rio in DAN MLA telching thak mi 13 te Parliamentary Secretary ding in laklutna nei ngal a, CM tenna Inn ah kichiamna neisak hi. Secretary te lak ah NPF apan 8, BJP leh NCP apan khat tuak hi’n kigen hi.

Zunheboto District a Suruhoto Assembly Constituency election ah vote 3 vei hial khiak ahih nung in, tuni in vote simna neih in om a, Independent candidate Shetoyi Sumi in Congress candidate Khudovi vote 800 valzek in zou hi. Mr. Sumi in DAN Government gupna apiak tawh kiton in DAN in MLA 35 gupna ngah lel hi. Nagaland Assembly seat 60 om lak ah Congress party in seat 23 lel tang zou hi.
Thudang khat ah, tuni in Meghalaya state Assembly election a lawhchinna ngah MLA te lak ah mi 7 in Minister ding in kichiamna la uhi. Kichiamna la te lak ah Independent MLA 3 telkha hi. Congress mi luun Mukul Sangma in Deputy Chief Minister hihna mah tang nawn a, Congress minister lui – M M Danggo, R C Laloo leh Prestone Tynsong te leng Cabinet ah laklut in om uhi. Chief Minister DD Lapang in ni 10 sung ngei in hatpen ahihna Assembly ah lakkhe ding hi.

IMPHAL NEWS:

Helpawl leh Security kikap tuah, 3 si
Imphal, March 12: Tu zingkal dak 4:50 vel ding in Ukhrul District sung a Chassad Police Station huamsung a om Kamjong-Imphal Road a Khakai junction ah Ist AR leh helpawlte kikaptuah ua, huai ah helpawl 3 kaplup in om a, Chassad police station ah siluang 3 te koih in om lel hi.

Class X exam ah mi 2 nawhkhia
Imphal, March 12: Board of Secondary Education Manipur saina nuai a Pawl X exam pailel ah tuni in chindan hoihlouh ziak in student 2 matkhiak in om hi. Thusuak kingah dan in, Motbung centre apan Flying squad te’n Roll no 11003 mankhia ua, Chandel Private centre apan in Roll no 18233 mankhia uhi.

Pemton College bul ah bomb puak
Imphal, March 12: Wangoo Police station huamsung a om Hiyangtham mun a Kamakhya Pemton College bul ah zan nitak dak 8:10 vel ding in IED Bomb khat puakzaak a, mi 2 in sihlawh hi. Police thusuak in agendan in, Bomb puak a sihna tuak mi 2 te ahihleh, Heisnam Mechandra (25) s/o H Ibotombi of Samurou Makha Leikei leh Randon of Langthabal Mantrikhong Awang Leikai te hidanin gen uhi. Mr Mechandra ahihleh, a awm, amai leh a lu teng segawp a, a khe veilam leng kitan hi’n kigen a, alawmpa Randon ahihleh, a kawngbawm leh a maiteng se gawp hi’n gen uhi. Police te’n mi 2 te apan in Driving license, bomb gui leh thil tuamtuam mukhia ua, bomb phum sawm lai supuak kha hidingin muanmawh thugen uhi.

Phachayat makai ding telna nei
Imphal, March 12: Tuni nitaklam dak 2 in Wangoi SDO office ah Samurou Nagar Panchayat makai ding telna om a, huai ah Chairperson ding in M Sakhenbi Devei Councilor Ward no 3 telching ua, Vice Chairperson ding in Sarungbam Sanatom, Councilor ward no 2 telching uhi.

Airport thu ah Police leh mipi kinawk
Imphal, March 12: Imphal Tulihal Airport International standard leh night landing tanpha koih theihna dia puah ding chih himahleh, a kim nai a gam neite’n naktak a anan ziak un tuni tan in nasep paithei taktak lou in om hi. Tuni in Airport kekletna ding tawh kisai in, gamteh ding in official tamtak kuan uh a, himahleh, Changangei leh huai area a teng te’n ana nang in, gam tehsak lou ua, buaina thupitak piang ding dinmun ah om hi.

Imphal Police OC Khomdon Singh, Singjamei Police OC Mangi leh Lamphel Police OC Jatin te’n buaina mun delh ngal in, mipi leng tamtak kipunkhawm hi. Police te’n thagum in gam tehsak sawm thouthou uh a, mipi leh Police force te hun sawtkuam tak ki nang uhi. Airport keklet ding deihlou pawlte President in agenna ah, 1960 kum in Koirengei Airfield apan in Tuilihal ah lenna field, Airport suan in om a, Government in ngetna abawl dungzui in a kiim a gam neite’n 3 vei hial a gam uh hawmta uh ahihdan gen hi.

Thagum a gam ki keek sak kichi Dan tawh kituak lou ahihdan gen in, keek thouthou ding ahih le leng, mipite theihsiam sak a, Government in thagum a nawklou ding in ngen hi. State Government in mipite aw a ngaihkhiak zek poimawh ahihthu gen kawm in, tudan zel a paitouh zel leh, ki phinna sousang deuhdeuh ding ahihthu Press te mai ah JAC President in gen hi.

CM in Tourism week hawngkhia
Imphal, March 12: Manipur Tourism Department saina in tuni March 12 apan 16 tan daihding Manipur Tourism week kichi Imphal ah zatna om ding hi. Tu nitaklam dak 3:30 in Hatta Kangjeibung, Palace Compound, Imphal ah Chief Minister Okram Ibobi Singh in Chief Guest hihna tawh hawnkhiakna neiding chih hi a, himahleh, lem tanlouhna khenkhat ziak in nitaklam dak 5 phial in hawnkhiakna neih in om hi. Tourism Minister TN Haokip in Functional President hihna leen a, Agriculture Minister N Loken Singh in Guest of Honour tawh uap hi.

Manipur Assembly ah dotna leh dawnna om
Imphal, March 12: Manipur Assembly pailel ah tuni in dotna leh dawnna hun neih in om a, huai ah Opposition MLA hunkhawp in dotna bawl uhi. Singngat MLA T Hangkhanpau in dotna abawl Industries Minister in adawnna ah, IDBI Refinance scheme nuai a MANIDCO ah Churachandpur District apan in mi 83 in loan la in tuni tan in dinkik lou uh ahihdan gen hi. Tuaban ah, mi 83 te tung ah demand notice piak in om lel a, loanees mi 2 in court thutanna ngak lel uh hi’n Industry Minister in gen hi.

Thanlon MLA V Hangkhanlian in dotna abawl PHED Minister in adawnna ah, Damdei, Sumtuk, Mualnuam, Aibulon, Songtal, Suangsang, Loibual leh Phunchongjang Water supply scheme bawltu (contractor) te’ taklatna nei a, huai dungzui in, Damdei ah Hmanglien, Sumtuk ah T Kaichinkhup, Mualnuam ah Kalanchung, Aibulon ah H Sanglawm, Songtal ah T Pumkhanchin, Suangsang ah Ngamkhomang, Loibual ah Hmanglien leh Phungchongjang ah T Lala hidan in TN Haokip PHED Minister in gen hi.

Minister in agenbehna ah, Sumtuk, Mualnuam, Aibulon, Songtal, Suangsang leh Loibual ah nna sep ding piak himahleh, sep hinailou a, sum leng bangmah piakkhiak hilou bok hi’n gen a, tuaban ah, Damdei ading in Rs 26,100 leh Phungchongjang ading in Rs 41,176 te hidanin Minister in gen hi. Tuaban ah, Dr I Ibohalbi MLA in dotna abawl Education Minister in adawnna ah, Manpur Government in part time lecturer te Government Higher Secondary School ah zanglel ahihdan gen in, tulel in Lecturer 357 zat in om chi hi. Tuaban ah amaute’ service hun behlap ding leh dinglouh tawh kisai ngaihtuah hilel chi hi.

NEROCA in suunthu puang
Imphal, March 12: North Eastern Re-organising Cultural Association (NEROCA) in tuni a thusuah abawlna uah, NEROCA Club, Sangakpham in Father Bianchi of Donbosco sihna naktak a suun uh ahihdan puang ua, Club adia dot tham ching heutu ahihdan taklang in, a kha muangtak a akhawltawl dam deihsakthu puang uhi.

EDITORIAL:

Tuni Thupi: Ui amah luak lama kik nawn bang in, huaimah bang in a haina sunzom mihai ahi” Paunakte 26:11

Singtang gam ah Medical team poimawh

Singtangmi chiatchiat te lak ah singtanglam chi tuam sam le, a biiktak in Churachandpur District sung a Tipaimukh, Thanlon, Singngat leh Henglep sub Division sung ah i mi i sa om te’n damtheihna kong ah haksatna thupitak ana tuak sek ua, amaute’ haksatna bang chi sukveng ding ahia chih survey bawl leng i om lam uh theih hilou hi.

Bangziak tak a singtang bial a om te’n medical leh health tawh kisai a buaina a na tuak zel uhiam chih ngaihsut a, a sukdamna (remedy) ding i ngaihtuah uh poimawh hi. Singtang bial ah, compounder/nurse te geentak louh, administration staff te tanpha mipi’n muang petmah in, damdawi bang neleng ahoih di chi peuh in va kan ua, huai in Doctor lam ah dang taakna liantak a nei uh chih lang sak hi. Bangziak a singtanglam nawlkhin a om kha sek adiam chih vel khawm leng ut huai i sa mahmah hi.

Manipur Government in Hill District teng Medical tawh kisai enkoltu ding in Chief Medical Officer koih hi. CMO in direction a bawl dungzui leh program abawl dandan in anuai a semte pai ua, CMO in mawhpuakna apiak siam ah kinga mahmah hi. Central Government in leng rural health kichi singtang gam a tengte adia damtheihna ngai poimawh mahmah in, National Rural Health Mission tanpha dinkhia in project hoihtak tawh singtanggam ah nna semsak hi. Zan zek in leng NHRM nuai apan Churachandpur a zat ding mobile gari nih piakthak in i om ua, hamphat huai mahmah hi. Gari sung ah instrument leh equipment buching tak om in, huai in sihsual tamtak hinna humbit manding in i gingta hi. State Government in hamphat huaitak in Sub Divisional Headquarters teng ah, Primary Health Centre koih in, mun tamtak ah Primary Health Sub Centre koih in, huai a sem ding in Doctor, Nurse leh Staff ki ningchingtak pia hi.

Kikawm tuahna lampi a siatluat ziak hia chih theihlouh in Doctor leh Nurse tamtak in asepna mun ua a om sang un, Lamka khawpi a om mah tel zaw bang in, a posting na mun uh gaal et thawh pawl om chi uhi. Singtanglam ah theih khollouh in natna hii leng om phutphut nuam a, a biiktak in, sungkhawh, hitang, khawsikpi, malaria, TB leh adang dang om hi. Nidang hun in, huut hauh ziak bang in a si bang i om ua, hun hongpaitou zel in, huut i chih bang natna in leng i sim nawn kei uhi. Kikawmtuahna lampi hoihlouh ziak in, singtang lam ah mi bangzah in hinna ana taan ta dia chih theih hilou hi. Sungkhawh leh khawsik ziak lel in leng lamkal ah bangzah i taan ta ua chih suituak mahmah hi. Kikawmtuahna lamlian ahoih louh chiang in, gari leng lut theilou a, khaw mite’n gari tunna tan khe in pua ua, huai sung in damlou nu/pa bangzah in anatna a kibehlap man dia chih ngaihsut huai mahmah hi.

Damdawi inn a sem chowkidar/grade IV te tanpha singtanglam ah dot tham ching ahih a, damdawi zuak te leng hichi tuk a muang uh ahihleh, Government leh thunei tuamtuam te’n singtanglam te’ damtheihna a etkai zek uh ngai hi. State health Department nuai ah Department tuamtuam in kikhen neen sawn a, TB leh Malaria Department chauh lel in leng a khoih theih uh tam mahmah hi. Hithei hileh, Department head te’n anuai ua semte kha khat in khat vei beek singtang bial veh ding in sawlkhe theile uh, mi tamtak ading in life saving drugs pia uh ahih kei ding maw i chi hi. Tulel in NGO Medicins Sans Frontier (MSF) pawl in Singngat line leh Tipaimukh line ah nasep pi bawl mah mah in, damloute etna leh damdawi a thawn in hawmsek ua, singtang khua apan damlou tamtak a gari un Lamka hon pawtung zel uhi. Tuabang a nasep om lou hileh, mi bangzah in sihna a tuah lawh ding ua, mi bangzah a buai baan ding ua chih ngaihtuah tham ching hi.

Deputy Commissioner/Minister/MLA ahih kei leh, District Level Officer te’n singtang bial a veh chiang chauh ua, Government nasem ahih lam uh theih a om chih bang naktak in zum huai a, mi khenkhat in ‘kou zaw pension lawh ahi ka laak uh’ peuh chi in, nasem lou in lawh la la mai uhi. Medical Department chauh hilou in, State Government nuai a Department om teng in employee a sang a sim nei vek ahihna ah, a posting na mun uah va om chiat le uh, khawsung kivaipuakna, saptuam leh khawtang vasu gamlum zou mahmah ding ua, damlouh hitang tuahni in leng singtang khua te ah mite khamuang tak in va koih thei ding uhi. Head of Department te’n i chipih, sapihte itna tawh hiai lam thu a etkai uh deih huai petmah hi.

Tu’n leng, District Health Society / Churachandpur te saina in March 13-16, 2008 sung Thanlon PHC mun ah Health Camp / Mela om ding hi. Huai hun ah, Doctor 8 leh Nurse te ban ah Official nih in zui ding uh chih khawng singtang lam te’n a zaak chiang un kipak law mahmah ding ua, a damzeen pi bang leng ki china sak utphial in a kha uh muang mahmah ding hi. Hiai bang a program bawlkhetute phat huai mahmah a, maban ah leng a tam thei lamlam tour program neithei zel le uh chih deih huai hi.

http://www.manipurexpress.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s