The Lamka Post | March 19, 2008

KRA in Khuplam Hangsing’ phuba la, KRA (U) President leh mi 3 kaplum

Thingbaijam Dhamen

IMPHAL, March 18 2007 a New Delhi a KRA founder member leh C-in-C K Hangsing thahna-a kigolh mi 3 toh KRA (U) president Sepnawnni in KRA te’n kaplum uhi. Thah a omte ahihleh, KRA (U) president Seitinmang (36) s/o of Khunkhu village, Bungkholal Chongloi (48) s/o Pahen of New Lambulane, ex-candidate Kangpokpi A/C, Paochange Chongloi (50) s/o Laletpao of L Khengjang village hi ua, Senapati dist. sunga Saikul sub-div. a KRA in amaute a sapkhawm zoh in Imphal pansan thuthaksaimite mai ah ding sak a, a heutupa uh K Hangsing thahna a kigolh uh hidan in KRA in mi 3-te ngoh hi’n thusuak in taklang hi.

K Hangsing ahihleh, 2007 a New Delhi a a sanggampa’ quarter a aom lai a migilou lawi khat in a khetlup uh ahi hi. Hiai mi 3-te media-te’ mai a sawtlou KRA in a kilatsak zoh un Saikul gamlak ah gari in tonpih ua, a 3 un kaplum uhi. KRA founder member leh C-in-C K Hangsing thahna a kigolh uh hi’n KRA Home Secy L Jacob in amaute ngoh a, tualthahna tosawntu a pang KRA (U) president ahihdan leh a dangte K Hangsing thahna ding geltu a pang uh hidan in KRA Pub Secy Th Misao in tuni a thuthaksaite a houpihna ah gen hi.

Th Misao in agenzelna ah, a suikhiat dan uh pansan a amaute capital punishment piak ahihdan a gen banah, KRA (U) ahihleh kum masa December kha a Guwahati apat Manipur student-te pimangna toh kisai a news a hong kilang leng migilou leh mi’ sum laksak chingte maimai ahihdan uh leng Th Misao in gen a, KRA C-in-C thahna kisai a mohpotupen KRA (U) ahihdan leng gen hi’n thusuak in taklang hi.

Seppatni zan apat Vaite 14 thah in omta, District 4 ah curfew puan in om

IMPHAL, March 18: Manipur a dan leh thupiak in hoihlam sang a siatlam nawtzel in, zan a Chief Minister makaih a Cabinet meeting in dan leh hupiak dinmun a genkhawm nung uh, nitak dak 6.30 vel in, meltheihlouh galvan tawite’n Mayang Imphal Police station huamsung, Heyen Hangool ah, Manipur pawlam mi sumdawng a nekzong mi 7 mulkimna bei in ana kaplup uhi.

Tuabangkal ah, tuni’n leng mun tuamtuam thum, Tekhel, Keibi Leisangthong leh Kangla Makha ah meltheihlouh galvan tawite mah in, Manipur mi hilou mi 7 kaplum nawn uhi. Thutut kingah dan in, mi 7 kaplup ahih banuah mi 2 naktak in liam ua, gim mahmah in JN Hospital leh RIMS hospital a etkawl in om uhi.

Takhel ah meltheihlouh galvan tawite’n mi 4 amat nung un kap ua, himahleh vangphat huaitak in khat suakta hi. Keibi ah leng meltheihlouh galvan tawite’n mini truck, Tata 407 in mi 13 vel pua ua, amau lak a khat kaplum uhi.

Zan nitak a mi 7 kaplup a omte lak ah, tuni sunnung tan in mi 3-te ahihna uh theihchet in omta a, amaute bel, Naryan of Bihar, Rajao of Bihar leh Bikram of Tripura hi uhi. Siluang dang teng leh tuni a kaplupte theihkhiakna ding in RIMS morgue ah om lel uhi.

Hiai bang thu ziak in Imphal East, Imphal West, Thoubal leh Bishnupur district-te ah nitaklam dak 6 apat zinglam dak 5 sung thuthak omma 144 CrPC, curfew puan a om in CM makaih in GOC 57 Mt. Divn., DGP, Manipur banah AR leh CRPF top official te’n security meeting leng nei ngal uhi.

Tualthatte mat a gawtna piak hiding – CM
IMPHAL, March 18: Tuni sunma dak 11.30 in Manipur Chief Minister O. Ibobi Singh in kintak in ama office ah press-te samkhawm in thil omdan taklatna leh govt. in pan a lakdan pulakna nei hi. Hiai hun ah, Cabinet Minister, Phungzathang Tonsing, N. Biren, K. Ranjit, T.N. Haokip, Md. Alaudin Khan, L. Jeyantakumar, Y. Erabot leh Chief Secretary leng kihel uhi.

CM in agenna ah, Manipur a dan leh thupiak dinmun sorkal in naktak a ngaikhawk ahihdan leh a hunhun a etkaina neizel ahihdan gen hi. Hichibang kal a, zan nitak a thiltung vangsiathuaitak ahihdan leh govt. in naktak a mohpaih ahihdan gen hi. Hichibang a Manipur pawlam mi nektawm zong a sumdawngte, ‘na gam uah kik un’ chih ziak a thahna pen, Manipur mi pawlam a laizil leh omte tung ah tung leh kua a hia thuakzou ding chih leng gen hi. Aban agenna ah, tualthatte theihkhiak leh mat hipah ding in gen hi. Kuahiam helpawl toh kizawpna nei, overground, sympathizer hitaleh, helpawlte kibukna ding pete leng zonkhiak a, amau tung a gawtna piak hiding in leng gen hi.

Dan leh thupiak hoihlouh toh kisai in district chih a SP-te leng a thu zaksak ahihban ah, pilvangtak a om dia theihsak hidan in CM in gen hi. Thiltung toh kisai a State tuamtuam a Chief Secretary leh DGP-te kiang a leng Manipur govt. in ‘crash message’ thon ding leh thil omdan Ministry of Home Affairs a leng tun ding ahihdan CM in gen hi.

Greater Imphal area sunga Police check post 42 hon thak ding toh kisai agenna ah, tua MPTS training lel 6th IRB te’n April kal masa a a zoukhe ding leh amaute zat pah hiding in gen hi. Police-te vanzat ding Gypsy 100 leh Royal Enfield 150 leng leikhiak hita a, bullet proof gari khat a Rs 28 lakh man 50 leikhiak hipah ding in leng gen hi.

Babupara a Minister leh MLA quarter a helpawl matkhiak toh kisai dotna CM in a dawnna ah, hiai tungtang suizuina pailel hidan in leng dawng hi. Minister leh MLA helpawl toh kizom leh bukna pia a om leh tuabangte apat security lakkhiak pah hiding in leng gen hi.

Zan leh tuni a thiltung a misite amau gam a puak ngai a om leh, tuabangte govt. in saisak ding in leng CM in gen hi. Hichibang kal ah, Imphal khopi sung leh a sehvel ah, security naktak a hihkhauh in om hi. Tuni sunnung dak 5.30 vel in CM in RIMS morgue a kikoih zan leh tuni a thiltung a misiluang omte enkhia hi.

KLA in member 3 tawpsak
LAMKA, March 18 : Kuki Liberation Army a Information & Publicity a Secretary Malsawm Kuki in thusuah a bawl kimu in a taklat dan in Mr. Lunkhongam @ Jimmy @ Hitler Kuki pawlpi a dia semlai pawlpi’n haksatna a tuah ziak a pawlpi taisan a pawl dang a zop ziak in KLA apat tawpsak hi a, amah tung a thu kibang teng hihsiang ding in leng theisak hi. Huailou in Mr. Lunpao Touthang @ Smith Kuki in tulel a KLO/KLA toh kizopna neilou ahihdan taklang in pawlpi min a sum a don a tawpsan kei a leh capital punishment piak hiding ahihdan taklang hi. Huai banah Mr. Seilenthang Khongsai @ Iron Kuki bel H/Q Finance a gin-omtak a sem hi a, buaina khenkhat ziak a pawlpi a a sepna khawlsan dia ngetna a bawl dungjui a khawlsak ahihdan taklang hi.

HSLC Exam tuni’n zou
LAMKA, March 18: Board of Secondary Education, Manipur (BSEM) nuai a High School Leaving Certificate (HSLC) Examination 2008 apaisa March 3, 2008 a neihpat pen tuni’n zouta uhi. Lamka a Private Centre a zat Rayburn High School pansan in District apan candidate 1583 pha mahleh mi 3 in exam-lou uhi. Lamka a Private Centre pansan a exam siangthou mahmah a tukum in leng chiindan hoihlou leh mi’ taang a exam ziak a nohkhiat omlou hi.

Tukum a MIL exam ni a subject tuamtuam a candidate exam zah bel Paite ah 474, Thadou/Kuki ah 438, Hmar ah 273, Zou ah 141, Vaiphei ah 73, Mizo ah 43, Manipuri ah 27, Nepali ah 06 leh Hindi ah 03 pha uhi.

Damdawi Inn a vanzat ding hongtung
LAMKA, March 18: Lamka Damdawi Inn a vanzat ding khenkhat tuni’n Imphal apat hongtung hi. Tuni a vanzat ding hongtungte bel Operation Threatre a ding Operation Table khat leh washing machine khat hi a, huailou in niin halsiangna (incinerator) hongtung pen leng Crane zang in suahkhia ua, tunung sawtlou in thuah hipahta ding hi.

Anntang hongtung
LAMKA, March 18: Thanlon leh Tipaimukh bial a ding anntang Quintal 2144.45 Imphal a FCI Godown hongtungta hi. Hiai anntangte bel NREGS nitha 40 man thawhkhawmte a kilei hi a, March 20 tan a FCI Godown apan puakkhiat ahihkeileh lapse thei ding ahihman in Department in FCI godown apan FCS Godown a koih ding dan buaipih lel uh hidan in DSO/CCpur apan in thutut kingah hi.

ASHA training ding
LAMKA, March 18: Tuilaphai Area a kho 26 a ASHA a ding hongtung ding March 19, 2008 chiang in Tuilaphai ah thousileen damdawi a diah dan (bed net impregnation) toh kisai kisinsakna neih hiding hi. Huai hun ah Mr. Raymond leh Mr. Thangkhanlian in sinsak ding uhi.

DC/CCpur in NREGS nnasep enkhia in thaman hawm
LAMKA, March 18: Mr. Sumant Singh, IAS, Dy. Commissioner/CCpur in tuni sunnung dak 1:00 in Saikot khua vapha in Saikot khomite’n NREGS tungtawn a a khua Mawltual kiimvel a pucca drainage a bawllel uh etkhiatna nei hi. Tuni a Saikot khua a Job Card nei innkuan 662 te’n nitha 25 a ngah uh toh kiton in ni 16 thaman hawmna nei ua, DC/CCpur in leng innkuan khenkhat kiangah nithaman piakkhiatna nei hi.

DC/CCpur in khomipite kiangah ah a nnasep uh hoih leh lungtunhuai sa mahmah ahihdan gen in Block teng a Model Village khat chiat bawl ding chih a Saikot khua leng Model Village a bawl dia telkhiat a om ahihdan gen hi. Hiai Model Village bel Block teng a nnasep hoihpen banah Document maintain hoihpen khuate Model Village a bawl hiding ahihdan gen in Model Village teng in ‘incentive’ dan in ni 5 thaman fund hongpai nawn hun a sep beh ding uh ahihdan gen in Social audit bawl dan hilhchetna nei hi.

Khualzin pilvan ngai
LAMKA, March 18: Imphal leh a sehvel ah zan leh tuni’n meltheihlouh galvantawite’n Vaite 14 kaplum ua tamkhop kapliam uhi. Hiai thiltungte ziak in tulai in khualzin (adiak in North-East polam) pilvan ngai mahmah hi. Tumalam in leng Assam ah ULFA helpawlte’n Vaite a gam ua pan nohkhiat sawm in tamtak that ua, huai hun in Vaite’n leng amau gam ah amau gamtawn a North-East mi khualzinte tung ah khut ana kha ua, ei singtangmi tamtak in leng thuakloh kha ngei uhi.

Career Guidance & Counseling
LAMKA, March 18: Lions Club of CCpur Greater saina in HSLC Examination- 2008 khinphette a ding biik in hongtung ding March kal tawpna sung in ‘Career Guidance & Counseling’ hiding hi. Hiai seminar ah mi 40 kia teltheih ding a Registration bel ‘first come first serve’ a bawl hiding hi. Lungtlutna neite’n hongtung ding March 24, 2008 tan in Lions Club of CCpur Greater a Secretary Prof. L.S. Gangte a office, CCpur College ah kimuhpih theih ding hi. Hiai Seminar ah Lions Club of Moirang apan in Resource Person hongkuan ding uhi.

Ngasuon Lui lei doh pan ding
LAMKA, March 18: Singngat leh Behiang kikal a Ngasuon Lui lei kidoh January 2008 a kichim a mi 19 si a, mi 40 val liam nung un Manipur Govt. in a thak a doh sawm in pan nasatak in la hi. Zan in Lei doh thak nang toh kisai in Foundation Laying Rev. T. Lalzagin DS Singngat in nei a, Pathian kiang ah latna nei hi. Contractor in nasep nang in JCB leh a poimoh nasem ding tamtak zan in giaklut uhi.

Headmaster Conference om ding
LAMKA, March 18: DI of School Churachandpur saina in Headmaster Conference March 24, 2008 sunma dak 10:30 in YPA Hall, Upper Lamka ah neih sawm uhi. Huai hun ah Government School tuamtuam a Headmaster teng tel ding uhi.

SSA Team in school tuamtuam enkhia
LAMKA, March 18: Manipur University (MU) apan SSA team in zan apan Lamka hong pha ua, ZEO/CCpur nuai a SSA toh kisai a school tuamtuam enkhia uhi. Zan in Khawmoi LP School, Bethel LP School, Janglenphai EGS, Tuinom JB School, Pangjol EGS, Torbung LP School leh Bijang JB School pha ua, tuni’n Sabual EGS, Zoumun EGS, Phaibem EGS, Geljang JB School leh Thingkangphai JB School pha uhi.

BSF Civic Action Programme
LAMKA, March 18: 140Bn. BSF saina in Kwakta ah zingchiang sunma dak 11:00 vel in BSF Civic Action Programme neih sawm ua, huai hun ah van tuamtuam tamtak man bei in hawm sawm uhi.

ADC Bill, 2008 ngaihtuah ding in Assembly sitting
IMPHAL, March 18: Manipur Autonomous District Council Bill, 2008 zat ahihtheihna ding in, Assembly ah March 19, 2008 hiai thu genkhawmna om ding hi.

Hiai bill toh kisai HAC in hoihtak a velchetna a neih nung in, TD & Hills Minister DD Thaisii in Assembly a genkhawm ding in pokhia hi. March 12, 2008 in hiai thu genkhawm dia puakkhiak himahleh, ‘Technical flows & error’ om chih ziak in, genkhawmna omlou in Speaker in, Select Committee ah pekhia hi. Hiai thu a lungkimlou in, huai ni in Innpi apat singtangmi MLA 15-te leng pawtkhia uhi.

Hichibangkal ah, zan in HAC member-te’n Manipur Governor kiang ah ADC Bill, 2008 Innpi a genkhawmna omlou a, Select Committee a piakkhiak chih thil hitheilou ahihdan tun uhi. Select Committee dia guan a omte lak ah TD Minister DD Thaisii leng Chairman dia guan in om hi. Hiai committee a member dia guankhak HAC Chairman Thangminlien leng zan in member ahihna apat kitawp hi.

PREPAK member 1 man
IMPHAL, March 18: Imphal West Police Commando te’n tuni zinglam dak 7.35 in Singjamei Supermarket gei ah, PREPAK (Shanti group) a tel, Chandam Sunildro @ Ibomcha Singh (33) s/o Ch. Yaima Singh of Lairikyengbam Leikai, Bajaj Scooter MNF 393 toh mankhawm uhi.

Police thusuak dan in, aman tukum February kal masa a hiai pawl zom hi’n leh PREPAK (Shanti group) a Sidha kichi nuai a Finance section, Imphal West a nasem leh dawr bawlte kiang a party sum ding kaikhawmtu a kizang ahi.

CCpur Employment Exchange a minkhum 54263 om
IMPHAL, March 18: Lamphelpat a Employment Exchange office thusuak dan in, Manipur a sepna zong a district tuamtuam a employment exchange a minkhum February 2008 tan in, akigawm in 6,05,313 om hi. Huai lak ah pasal 436159 leh numei 169154 hi uhi. District tuamtuam a employment exchange a minkhum omdan bel, Imphal West ah 208099, Imphal East 85489, Thoubal 88319, Bishnupur 55210, CCpur 54263, Ukhrul 24047, Senapati 44252, Tamenglong 17739, Chandel 20710 ahi.

Huailou in, Special Employment Exchange for Physically Handicapped Person 2166 ban ah, UEI & GB Canchipur a minkhum 5028 om hi.

Data Dissemination Workshop
IMPHAL, March 18: Ministry of Home Affairs nuai a Directorate of Census Operation, Manipur saina in March 20, 2008 zinglam dak 11 in State Guest House, Sanjenthong a Conference Hall ah, ‘Data Dissemination workshop’ om ding hi.

Hiai workshop a technical session a Chairman ding in, College Development Council Director lui, MU leh NER Vision 2020 a steering committee member Prof. N. Mohendro Singh pang ding hi. Y. Mangi Singh, Statistical Investigator III, Census Operation, Manipur in Workshop makaih ding hi.

Hiai workshop ah, resource person in, MU Economics department apat E. Bijoy kumar in ‘Houses & Household Amenities in Manipur’, Geographer Dr. M. Manimohon Meetei in ‘Migration in Manipur 2001 Census’ leh RIMS a Bio-Statistics Dr. R.K. Narendra Singh in ‘Disability in Manipur 2001 Census’ chih toh kisai in thugenna hun zang ding uhi.

Mit etna athawn in om ding
IMPHAL, March 18: Manipur govt. nuai a Central Mobile Opthalmic Unit leh District Blindness Control kithuah in, March 25, 2008 chiang in Swombung Primary Health Centre ah a thawn a mit etna nei ding uhi. Hiai hun ah, Senior Opthalmic Surgeon Dr. Kh. Kaminibabu Singh in mit etna makaih ding hi. Hichibang mit etna a operation ngai a om leh a nizing March 26, 2008 in operation bawl hiding a, damdawi leh mitbulh leng piak hiding uhi.

Panchayati Raj Diwas
IMPHAL, March 18: Manipur govt. nuai a Under Secretary (RD & PR) in zan a thusuah a bawlna ah, hongtung ding April 24, 2008 pen Manipur govt. in Panchayati Raj Diwas dan a puang hi’n taklang hi.

Brand Ambassador of HIV/AIDS
IMPHAL, March 18: Manipur State Aids Control Society (MACS) saina in, ‘Brand Ambassador of HIV/AIDS in Manipur’ chih puankhiakna March 19, 2008 zinglam dak 10 in MACS Conference Hall ah om ding hi.
Hiai hun ah Khuallian in, Health & FW Minister Ph. Parijat Singh leh President in Secretary of Manipur Legislators Forum on HIV/AIDS, Dr. I. Ibohanbi Singh MLA pang ding uhi.

Polo Tournament om ding
IMPHAL, March 18: NCC Directorate, North East Region, Shillong saina in, Imphal a Pologround ah, April 1-3, 2008 sung ‘DG NCC Polo Tournament’ om ding hi.

Parbung thu April in pelut ding
IMPHAL, March 18: January 16, 2006 a Parbung leh Lungthulien a numei tamtak phaijang helpawl UNLF/KCP te’n a sualluih thu uh suizui ding a, Manipur govt. in March 23, 2006 a, a seh ‘Justice Rajkhowa Commission of Inquiry’ in Manipur govt. a inquiry report April, 2008 sung a pelut ding hidan in tuni’n Commission Secretary thusuak om hi.

State level conference
IMPHAL, March 18: All Manipur State Employees Council pawl in, tuni’n Imphal Hotel a Conference Hall ah, State level conference zang uhi. Hiai hun ah Khuallian in Deputy Chairman State Planning Board Elangbam Kunjeshwor Singh pang a, President in Prof. N. Mohendro Singh President AMSEC ban ah, Guest of Honour in Council a Advisor ngen, C. Upendra, Kh. Hitler, Th. Nabachandra leh Ph. Nabakumar pang uhi.

Tuni Thupi: Thiltup chiteng ah lah hun leh vaihawmna a om ngala; mihing haksatna lah a tungah a thupi ngala: A hongom ding lah a thei ngal keia; bangchiin a om dia chih amah kuan a hilh thei dia leh? Eklijiasti-8:6,7

Editorial

Music a nekzonna

Music (la & tumging) i chih bangchik a kua patkhiak hiam chih theihzoh vual ding hilou a, himahleh, mihingte’n kipahna, dahna leh lunglen khitkhiakna dia ina neih uh ahi. Khovel kil 4 a nam tuamtuamte, a ngou, a vom hi’n a eng hitaleh, music ngainalou a omlouh banah music neilou kuamah omlou hi. Pau-le-ham bangchituk in tuam mahleh music toh kisai a hong hih chiang in music note, do, re, me…. pen kibang vek mawk hi. ‘International language’ chih hial a a om dungzui in kuapeuh in music kingaina chiat a, a la thu theih hetlouh khong leng a music leh a kaih ziak in ngaihngaih theih mawk hi. Huai ziak in music siamtakte ahihleh, a lasak uh khat lel a kithan ziak in leng hauhsakna leh minthanna in zui hi.

Eimite’n leng music i ngaina mahmah ua, lasak siam hihetlou napi a sa awkawk pawl, lunglutlou ding mah bang hial a sa thei hetlou leh la a sak lam zakhak a leng omlou hinapi a a ngaihkhiak lam lunglut mahmah pawl, tumging chikhat mah leng tum theilou hinapi a music ngaina mahmah adim-aha in i om uhi. Huchi chimahlehang, Vaite khong toh teh in bel a milip a lasiam ngen mah i bang uhi. Huai pen bangdang ziak hilou in, naupang neuchik ihih ua pat Sunday School a lasak kizil pan ngal, tuailai i lut chiang ua lapawl a tel in zan teng phial a la i zil touhlai ziak uh hingei ding in gintakhuai hi. Huai ziak mah in eilak ah lasiam leh music siam kitam mahmah a, tumging khoihtheilou i chihte nangawn leng guitar a D Key bek mek thei ngen ihi uhi.

Himahleh, eilak ah la leh music siam tamtak om hinapi in a hauhsakloh a omlam kitheilou hi. Nidang in eilak a lasasiam numei khat in, ‘moulopna hiam ahihkeileh, program khat ah a hon chial ua, program a hun a pat chih lah om ngeilou, mipite ngakna dia la a hon mawk saksak sak nilouh uh chu…. hehhuai himai!’ a chi hi. A dik mahmah a, la a sak khit chiang ua leng kuaman ngaihsak khak a leng neilou in ina om uhi. Tuchiang in ahihleh, i pilzaw deuhta ua, himahleh, hauhsakna ding gentaklouh, nekzonna ding tham ching nai tuanlou hi. Music i gen chiang in Mizoram genkhaklouh theihlouh dinmun in a dingta ua, amau a siamna uh leh music a ngaihnat ban uah a leitu ding mihing a tam in a tamzou himhim ua, nekzonna kia hilou in hauhsakloh uhi.

Eilak i ki-et chiang in, bangchituk a siam in album bawl mahle hang, inn tengteng in khat chiat ana lei ua leh nekzonna ching hamham ding a, hauhsakna tham ching tuanlou ding hi. A mihing mahmah kitawm lua ahihna ah, thil dang tuamtuam a hon daltu om thou mahleh, Lamka zang kia a zuak dia ngim a, mahni pau chiat a lasak in bangtanmah hon tunlou ding hi. Himahleh, hiai bang dinmun a panlakna ding khat ahihleh Lamka kia a zuak dia album i bawlsek pen uh sang a market lianzaw ngim poimoh chihna hilel hi. A mihing mahmah i tawmluat uh vangtahna khat himahleh Vaite tam in a tamzou khop ua, amau tamna zat phattuamsak leng hoih ding hi. Huai dia i hamphatna mahmah uh khat ahihleh, music lam ah, a diak in India ah a liandeuh a gen in ‘western music’ a naupang mahmah lai a, hiai hun pen hun lemchang a ana lathei pawl om leng kihihkhiallou ding hi.

India a khangthakte lak ah rock music lam ah khanlohna thak a hong om a, rock band tamtak a kiphuan ua, siam mahmah pawl omthou mahleh, a siam leng hituanlou a India a dia bel minthang veve pawl leng om hi. Tua India a rock band omte lak ah leng Nagate, Mizote bang ana telkhinta ua, India a rock band minthangpen, Parikrama-te lead guitarist bang leng NE mi hichetkei mahleh, Sonam Dorji, Darjeeling mi ana hi a, eilam toh kaihnaih teitei sawm hile hang a zi leng Mizo-te ana hizomah hi. Eipawl lah eimi la sangmah a leng Sap la ngainazaw leh siamzaw ngen ihi ua, chihtakna toh India’ music industry luh leng sawtlou sung in India a rock music scene bel nuamtak in i luahzou ding uhi.

Lunglutna neuchik leng neihlouhna pen nekzonna dia zat kichi gawtna toh kibang khat ahih dungzui in nekzonna dia mahni lunglutna mah zat kichi khovel a Pathian vualzawlna thupi mahmahte lak a khat ahi a, huai ziak in, music (la & tumging) lam a lunglutna leh siamna neite a ding in bel Lamka zang a lasak a nekzon sang in, a sangzaw tum leng nekzonna kia hilou in hauhsakna leh minthanna banah gam-le-nam a dia pahtawina puaktu hihtheihna hun lemchang ahi.

lamkapost@yahoo.com

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s