Manipur Express | March 20, 2008

CM in Meirapaibi te mawhsa. Vaite thahna in Churachandpur naih deuhdeuh.

Lok Sabha leh Manipur Assembly in Non Manipuri te thahna naktak in mawhpaih
Imphal, March 19: Manipur a Non Manipuri (vaite) hinna tamtak lakmang ahihna in New Delhi a India innpi (Lok Sabha) leh Manipur Assembly session pailel su lungphawng mahmah in, naktak a mawhpaih uh ahihdan puang tuaktuak uhi. Tuabangkalah, Chief Minister in Meirapaibite nasepdan lungtun huai asaklouh dan gen khum in, dotna tuamtuam bawl hi. Hiai kithahna in Churachandpur naih deuhdeuh hilou hiam chi in mi tamtak in ngaihdan neilel uhi.

Lok Sabha Session pailel ah, tuni in Manipur a vaipau zang, non Manipuri te thahna thu genkhawpna om a, BJP makaih opposition pawl in UPA Government mawhsakthu puang in, UPA in hiai thiltung hoihtak in ngaihven lou ua, bil ngong mah bang vek uh ahi chi uhi. BJP pawl in thiltung mawh paih mahah kawm in, centre force leh state police force in nasep a kipat uh hunta ahihdan gen uhi. Samajwadi Party, JD(U), BJP, RJD, BJD, CPI, CPIM, BSP leh party tuamtuam makaite’n thiltung mawhpaih huai ahihdan taklang chiat uhi.

Home Minister, Mr. Shivraj Patil in agenna ah, Centre Government in State Government houpih khinta ahihdan gen in, Manipur ah non Manipuri te thahna a tawp kei ngeingei leh state ading in thil hoihlou tung thei ahihdan gen a, State Government in tualthat tute a zonkhiak a, a kituahpih action alak kin ngai ahi chi hi. Parliamentary Affairs Minister, Mr Priyaranjan Dasmunsi in agenna ah, UPA Government in thiltung naktak a mawhpaih ahihdan puang in, Prime Minister in thil omdan theita ahihdan gen a, Manipur Government in bangchi bang in pan ala hiam chih etkhiak hilel chi hi. Hiai tungtang ah Opposition te’ sousang lou ding in leng Dasmunsi in ngetna bawl hi. Home Minister, Mr. Shivraj Patil in Rajya Sabha Session hun leng va uap in, Question Hour ah dawnna va pia a, state in buaina a kham daih a, pan alak kin poimawh mah ahihdan va gen hi. Minister of State for Home Affairs, Mr. Sriprakash Jaiswal in leng state Government in pan alak pah poimawh ahihthu gen hi.

Manipur Assembly session pailel a, calling attention ah Non Manipuri te thahna thu Dr RB Koijam, O Joy leh Dr Ng Bijoy in pawlut ua, Chief Minister in dawnna pia in, hiai pen calling attention hilou a, soft discussion a koih zaw ding a ngetna abawl dungzui in, thu vangtang dan a gen in om hi. Dr Koijam in agenna ah, Manipur ah vaite’n a thuak bangbang in mundang a i sanggam, i ta leh tute’n thuak thei gige ahihna ah, state Government in state dang a om i state mipite a vengbit zouna diam chih dong kawm in, state Government in pan alak kul ahi chi hi. O Joy in police modernization tawh kisai dotna bawl in, Mayang Imphal a vaite 7 kaplup ahih hun in leng Police control room te’n phone la lou in om san maimah uh ahihthugen a, tuabaan ah, a kiim nai a om Police outpost te’n zingkal in si luang va delh pan uh ahihthugen hi. Hiai hun ah Ibohalbi leh RK Anand MLA te’n leng thugenna nei uhi.

Chief Minister in agenna ah, sihna tuak te Ex Gratia piak hiding ahihdan gen in, Law and order sukkhauh ahihthu puang nawn hi. CM in state sung a om Meirapaibi te nasepdan mawhsakthu puang in, mi khat khawng security te’n akaplup khak chiang un, Dharna tu ngal ua, JAC kichi bawlkhia in, naktak in tangkoupih ua, bangziak a tutung a mihing hiaizah asihna tung ah Meirapaibi te daidide thei mawk uhiam chih dotna bawl hi,

Tuabangkal ah, zan nitak dak 7:30 in Sugnu Bazar a Siik zuakna dawr bawl a om Kabir (35) of West Bengal, Kumbi Police station huamsung a om Sagang Phumbi Khong Chingya Leikai mun ah sisa in muhkhiak in om hi. Hiai mun ahihleh, Kumbi Police station apan Km 12 lel a gamla ahi hi. Non Manipuri te thahna tawh kisai mi khenkhat in ngaihdan a genna uah, Churachandpur district a pehkhak ding lau mahmah ua, tualthahna in CCpur naih hiaihiai ta hilou hiam chih ngaihdan nei tamtak om uhi.

LOCAL NEWS:

Gorkha Rifles ah thil buaihuai tak tung
Lamka, March-19: Police apan kizadan in tuni zingsang dak 6:50 vel in Khuainuai post a om 7/8 Gorkha Rifles-te patrolling pailai amau leh amau kikapkha uh hi’n kigen hi. Huai thiltung ah Havilder Min Bahadur Thapa(No.5753041 M) aban bul thautang in kapliam kha a, Havilder mah Gana Bahadur Gurung kaplup khak in om hi. Gurung pen Leimakhong a 183-Military Hospital ah etkol ding in puak himahleh damzoulou in si a, March 20, 2008 in RIMS ah postmortem bawl hiding hi. Huai thil tung tawh kisai in Police te’n FIR register uh chihthu om hi.

DC makaih in NREGS meeting om
Lamka, March-19: Sumant Singh,IAS, Deputy Commissioner/CCpur makaihna in tuni sunnung dak 2.00 in DC office ah NREGS tawh kisai in meeting om a, huai ah SDO/BDO teng leh DRDA staff tamtak tel uhi. Huai meeting ah maban hun a NREGS nasepdan ding telin thu tuamtuam genkhawm uhi.

Sahang in Bawng keilum sek
Lamka, March-19: Thanlon Sub-division sunga Songtal gamsung ah tuma deuh akipan tunai tan in sahang(tiger) in bawng keilum sek a, tutan in bawng bangzah hiamtak keilumta chih hi. Abawng keihlupte a tangpi in a neulam deihte hi’n kigen hi.

Bank account hong din theisak
Lamka, March-19: Director of Health Services thusuak dungzui in CMO/CCpur administrative control nuai a om Class III & IV employee tutan a bank account hong nailou tengin akinthei pen a bank account hong chiat ding in Dr S. Gouzalam, Chief Medical Officer/CCpur in theisak hi.

EBC Singngat Div. saina in Seminar
Lamka, March-19: EBC Singngat Division saina in March 25-28,2008 sung in Suangdoh khua a EBC biakinn ah “Ordained Pastor&Church elder Seminar-cum-Churches response to the stigmatized HIV/AIDS” om ding hi. Huai ah Rev.L.Khamkholun,General Secretary EBC; Dr.V.C.Pau, DAO/CCpur leh Rev.T.Lalzagin, District Superintendent/Singngat Division te’n thupi tuamtuam nei in sinsak ding uhi.

Bus pute buaizaak dek man
Tu nitaklam dak 4:25 vel ding in New Bazar bus parking ah Imphal-Lamka bus Service MN 05/0336 in ama a khawllai bus khat a phutkhak ziak in, bus nunglam glass teng kitam a, huai thu ah bus pute buaizaak dek man uh hi’n thutut kingah hi.

Gangte veng MPC makai thak tel uh
Mizo People Council, Gangte Veng Unit makai thak ding telna om a, huai ah 2008-‘09 sung vaipaw ding in Ngullien, SL Mawia, Lalsonlien leh Liensangthang te President, Secretary, Treasurer leh Finance Secy ding in telching ua, Upa Pauzalun in kichiamna neisak hi.

IMPHAL NEWS:

Re-allocation of Works:

=Jarnail Singh IAS Chief Secretary & Secy: Cabinet as CS, Secy: Cabinet and Home
=PC Lawmkunga IAS, Principal Secy TD/Hills/Commerce & Indus/PHED as Principal Secy Forest & Envt. / TD / Hills / Commerce & Industry / PHED
=Rashmi IAS Commissioner/Election/Fin and CEO as Commissioner/Fin/Election/planning and CEO
=Vumlunmang Vualnam IAS Return from centre deputation as Secy Horti & Sc, Secretary Home.
=P.B.O Warjeeri IAS MT-78 Principal Secy Home/Forest&Env/planning/Horti Govt of Manipur transfer to Assam-Meghalaya Cadre, order by DOPT, GOM released.

Commando te’n helpawl 2 kaplum
Tu nitak dak 9:40 vel ding in Mayang Imphal, Police station huamsung a om Charoubung a IB Road ah Bishenpur Police Commando te’n helpawl a tel member nih kaplum ua, misite apan AK 47 khat leh 9 mm pistol ban ah atang bangzah hiam mukhia uh chih thu kiza hi. Misite a hihna uh theihchet hinailou hi.

Bus in mi khat phulum
Tu zingkal dak 11:20 vel ding in Bus no MN 01/1713 in lampi a cycle a tuanglai N Rajmani (50) s/o N Cheton Singh of Heiyang Mayai Leikai, Naoreibam Chureithong Leirak ah phulum a, hiai thu in Heiyang bial su sousang man mahmah hi’n kigen hi.

KYKL member dia gintak 1 mankhia
Imphal West Police Commando te’n tu zinglam dak 7:20 vel ding in Kanglei Yowal Kanna Lup member dia gintak Mr U Jakishore Singh @ Inaocha (27) s/o U Hemchandra Singh of Chajing Karam Awang leikai a tenna Inn ah mankhia ua, amah kipuanna apan contract work tamtak delhkhia uh ahihdan kilang chi uhi. Police thusuak in agendan in, Inaocha in KYKL member Raju Singh leh Boby Singh te tawh pangkhawm in, Government department tuamtuam ah demand neisek uh a, a dawn khiakte uh KYKL fund ah lut zel ahihdan kipuang chi uhi.

RIMS Colony ah nupi 1 thah in om
Police apan thusuak kingah dan in, zan nitak dak 7:30 vel ding in meltheihlouh pawlkhat RIMS Colony Quarter no 39 ah va lut ua, huai ah RIMS a attendant semlel Mrs Angoubi Kabui @ Gaidailiu (50) a lu ah khen uh a, amit leng lawtkhia hidanin gen ua, alupna tung ah sisa in kimukhia hi. Tuaban ah, a pasal M Jateshore (51) s/o (late) M Shyamkishore leng common room a sofa set tung ah a gawl tem a aatsa in muhkhiak in om a, damdawi inn ah etkol in om lel hi. Thusuak in agendan in, amau ahihleh, Uripok Baspati Leikai a teng hi ua, himahleh, RIMS a asep ziak un, RIMS quarter luah a om lel uh hi’n kigen hi. Thiltung tawh kisai thuchian kimzaw ngak hilel hi.

Security te’n vaite venbitna pia
Manipur phaizang bial a non Manipuri te thahna paizom zel tawh kisai in, tuni in Thoubal District a security post om, Wangbam a IRB post te’n a kiim a kiang ua om vaite venbitna pia ua, Kakching Police station leh Yairipok post a om Police te’n leng huai kiim a om Bihari te kaikhawm in, Rehabillitation kichi khat bawlkhiak sak in huai ah venbitna pelel uhi. Chief Minister Ibobi Singh leh MPCC Chief Gaikhangam te’n thiltung naktak in mawhpaih uhi.

CM in party teng telna meeting sapsawm
Manipur Chief Minister O Ibobi Singh in tuni a agendan in, Manipur state sung Dan leh thupiak etkolna tungtang ah SPF Government leh Congress party chauh hilou in, state sung a political party tuamtuam te telna in meeting khat sap lunggulh ahihdan gen in, tunung sawtlou ah sap pah hiding ahihdan gen hi. Tuaban ah, CM in gari a tai civilian te pilvang semding in ngetna nei a, kuaman tainted glass zang teitei lou ding in leng theihsakna bawl a, dakkal 24 sung security te duty ding ua, check post a om security te galvan tawi leng a hoihthei bangpen piak hiding in gen hi.

Assembly in ADC Bill thu HAC ah pekhia
Tuni in Assembly session sap in om a, himahleh, Non Manipuri thahna thu in house a suk buai mahmah ziak in, proceeding deihbang in paithei lou hi’n kigen hi. Hiai hun ah, Agenda pipen Hill Area Autonomous District Council Bill 2008 luikhiakna TD Minister DD Thaisii in nei a, hiai tungtawn hun bangtan hiam genkhawm in om hi. Assembly in last sitting a Selection committee kiang ah hiai bill pekhia ua, selection committee in tuni in luikhiakna nei mah le uh member te lak ah khenkhat in hiai Bill bukimlou chih ziak in etthak ding in gen ua, Hill Area committee khut ah piakkhiak in om a, April 3 2008 in genkhawm nawn hiding hi. MPP makai O Joy Singh in agenna ah, hiai bill ah a diklou banghiam om a, a dikloupi genkhawm sang in, HAC khut ah lut phot henla, amau a hon draft zawh chiang in, house ah genkhawm nawn hihen chi a, Dr Radhabinod Koijam NCP President in agenna ah, 1971 Act leh 2000 Act kichi bawlkhiak a omta ahihdan gen in, 1971 pe’n Act sisa bangtuk a ngaih ahih ziak in, hiai bill in om zia neilou ahi chi hi. 1971 Act pe’n 2006 in amendment bawlkhit a om ta ahihdan gen hi. NPP President V Hangkhanlian leh Parijat Singh in bel, hiai Bill te’ Official Gazett bangmah omlou ahi chi in pang uhi. Hiai tungtang tuma deuh a genkhawm ahihlai in, V Hangkhanlian makaih in HAC MLA 16 teng in Innpi pawtsan mah le uh, Singtangmi MLA 3 in house pawtsan lou uh hi’n kigen hi. Speaker in tu nitaklam dak 1:20 apan April 3, zinglam dak 11 tan session khakna nei hi.

Misite theihkhiak hita
Apaisa March 17 niak a Mayang Imphal a thah a om mi 7 te lak a mi nih kithei loute hihna theihkhiak hita a, amau ahihleh, Alom Sheikh (30) s/o Sahabul of West Bengal,tulel a Hapta telapati a om leh Sarabjit Rai (28) s/o Thakur Rai of Bihar te hidanin gen uhi. Tuaban ah, Keibi mun a misi 2 kitheiloute leng theih khiak hita a, W Pandit (25) s/o (late) Jugindro Pandit of Bihar leh Nagendro Rai (25) of Bihar te hi’n kigen a, amau Khoyathong a om lel hi’n Police te’n gen uhi.

Thudang khat kiza dan in, tuni zingkal dak 6 in Hapta Minuthong ah Najit Ali (35) s/o (late) Isak Ali of Khela khong sisa in muhkhiak in om a, amah ahihleh, Golapati Mayai Leikai a om lel hi’n gen uhi. Amithu kichi a lawmpa tawh pawt, a kheba ah thautang kapna ma om hi’n gen uhi.

PLA in hilhchetna bawl
RPF armed wing Peoples Liberation Army nuai a Publicity Assistant Secretary Ms Lily Leima in thusuah abawlna ah, IANS News tungtawn a Imphal West SP L Kailun IPS in tulai a vaite thah a om na tawh kisai PLA/RPF te khutnung dan a agenpen thuzuau ahihdan taklang a, Police Officer khat thugen ding in haihuai mahmah a, thuchian kankhe masalou a hiai bang ngawhna a bawl pen amah leh amah kitaw leem ahi chi uhi. PLA in hiai thiltung theihpihlou a, kizopna leng neibok lou ahihdan gen ua, tualthat tute’n tawpsan a, Non Manipuri te a thahna ziak uh kipuang khe dingin theihsakna bawl uhi.

http://www.manipurexpress.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s