The Lamka Post | March 27, 2008

Sualluih mohpaihna’n lampi zui
LAMKA, March 26

Children’s Brighter School, Mualkawi a Class B simlai numei naupang kum 6 lel a upa zan sun a sualluih ahih mohpaihna’n tuni sun dak 12:00 in Children’s Brighter School leh Covenant School a student teng in STC/BSF Gate leh Tedim Road, Lanva kikal lamzuihna nei uhi.
Hiai hun ah naupang neuchikchikte’n placards tuamtuam (‘Stop assaulting students, Stop spoiling the career of innocent student-Punish the Rapist, Why mentally abuse the Gen X, Down with physical exploitation of innocent girl(s) leh adangdang) tawi kawm in lampi zui in mi sualluihtu matkhiat hihen chi in kikou uhi.
Hiai thiltung toh kisai in CBS, Gangpimual School Committee leh Staff in mohpaihna thusuah bawl ua, huai ah naupangnu vangsiatna pen thuakpih leh poisa mahmah ahihdan uh taklang kawm in hiai bang a thilhihtu’ mohpaihna sangpen a mohpaih ahihdan uh puang ua, matkhiat a hehpihna bei gawt hileh adeihthu uh taklang uhi.

SSPP-LB in mohpaihna thusuah bawl; School khak ding in ngen
LAMKA, March 26
Saimsinpawlpi, Lamka Block in zan sun a meltheihlouh pasal khat in Children’s Brighter School, Mualkawi a Class B sinlai numei naupang a sualluih toh kisai tuni’n mohpaihna thusuah bawl uhi.
Thusuak in a taklatna ah, hichibang a ganhing bangmai a gamtatna naktak a mohpaih ahidan taklang kawm in a kisaipihte’n kintak a hichibang thilhihtu mankhia a, a kituahpih gawtna peding in ngen uhi. Hichibang gitlouhna mohpaihna leh tunung a hichibang thil om nawnlouh ding deihna leh nunei naupangnu leh a innkuante thuakpihna in Siamsinpawlpi Lamka Block in khopi sung a Government leh Private Siamsinna inn (institution) teng zingchiang sun dak 12:00 apan khaak ding in ngen uhi. Naupangte lungmuangtak a a omtheihna ding un ngaihtuahna chiimtak nei peuhmah in hichibang gitlouhna mulkimhuai mohpaihna a aw khat suah a pangkhawm chiat ding in Siamsinpawlpi Lamka Block in ngen kawm in hichibang thiltung district ading a a khatveina kia ahihnawnlouhman in gal et maimai lou ding uh ahihdan uh taklang uhi.

ZRA in sum ngentu mi 3 mankhia
LAMKA, March 26
Zomi Revolutionary Army in zan nitak dak 9:30 vel in Lailam lei kianga dukan bawl vaite apan sumlaksaktu mi 3 tuzing dak 6:30 in atenna in chiat ua pan in mankhia uhi.
Mat a omte bel Mr. T. Siema (30) s/o Khamkam of Lingsiphai, Mr. Kapmuanlal (34) s/o Ginzagen of Lingsiphai leh Mr. P. Jacob (31) s/o (L) Kapthang of Lingsiphai hi uhi. Amauten Mr. Anil apan Rs. 5000/- leh Mr. Dhirinder apan Rs. 400/- laksak ua, amaute tuni sunnung dak 12:30 in munkhat ah Lamka pansan Media-te ma ah ZRA Town Commander in lahkhiatna nei hi.

PT Sports Complex Fencing um kipan
LAMKA, March 26
New Lamka vengnuam a PT Sports Complex area Pucca Fencing a um suak vek sawm in nasep kipan a, Contractor in Simlam pang um zouta a, nasep kisan mahmah hi.

Priscilla Home ah Graduation-cum-Thanksgiving
LAMKA, March 26
Priscilla Home, New Lamka ah hongtung ding March 29, 2008 sunma dak 11:00 apan in ‘Graduation –cum- Thanksgiving Ceremony’ neih hiding hi. Hiai hun ah Mr. PL Thanga, IAS in Chief Guest hihna toh uap ding a, Timothy in short message gen ding a, Graduate te Commissioning leh thumsakna Pastor Elvis Nehlal in nei ding hi.

Numei kisualna ah 2 liam
LAMKA, March 26
Tuni sun dak 12:00 vel in Tedim Road in atawt khak Torbung Bangla ah numei kisel buai ziak in buaina piang in kisual ua, huai ah Mrs. Rani (26) d/o Ibocha Singh of Torbung Bangla leh Mrs. Chaubi (24) w/o Inao Singh of Torbung Bangla a lu uh liam tuak in tu’n Dist. Hospital Lamka ah etkol in om uhi. A kigen dan in pasal khat in a zi sa a, a sapna lam ah numei hon kisel buai a kisualna tanpha piang hi’n thutut kingah hi.

Medical team kuan khia
LAMKA, March 26
Churachandpur Dist a Singtang lam a Malaria dalna thoukang kap ding team tuamtuam tuni’n Lamka apan kuan khia uhi. Huaite bel Leijangphai Tuilaphai area, Tipaimukh Parbung area, leh Bukpi area a ding hi uhi. Huai toh kisai in thoukang kap (Spray men) team te mipiten kithuahpih ding in ngen uhi.

Scale-IV in kaisang
LAMKA, March 26
State Bank of India (SBI)/Churachandpur Branch a Manager LB. Pradhan zan in Scale-III apan Scale-IV in kaisang hi. Huai lou in Imphal SBI main Branch apan Timmy Gangte leng SBI/Churachandpur Branch ah Dy. Manager/Accountant ding in tuma zek apan hong pai in nasep pan hi.

Free Text Book ding Block ah pekhia
LAMKA, March 26
ZEO/CCpur nuai a School tuamtuam a Class- 1- VIII naupangte zat ding Free Text book tuni apan Block tuamtuamte kiang ah pe khia ua, tunung zek chiang in Block ten amau nuai a School te kiang ah hawm sawn ding uhi.

Manipur CM ah memorandum pia
LAMKA, March 26
Zan sun a Gangpimual leh tangnuam kikal a Childrens’ Brighter School akai Class-B sinlai numei naupang kum 6 lel a upa meltheihlouh pasal khat in raped toh kisai in tuni’n Churachandpur Dist Students’ Union (CDSU) in Manipur Chief Minister a ding Memorandum DC/CCpur tung tawn in pia uhi.
Kum chinglou naupang pawng sualtu Govt in dakkal 24 sung amat khiak kei leh helna chikhat pat ding in vau uhi. Zomi Students’ Federation (ZSF) inleng tuni mah in Manipur Chief Minister a ding memorandum DC/CCpur tung tawn in pia ua, ZSF in nasatak a mohpaih in Govt. in zangnadopna a kinlam apiak ding, mi raped tu Govt. in kintak a a matkhiak a gawtna khauhtak pe ding in Govt. noh ua, hiaite sukbuchin ahihkeileh ZSF om maimai lou ding ahihdan taklang uhi.

Operator ding omlou
LAMKA, March 26
Rural Health Mission nuai ah Churachandpur a ding a Ambulance gari 2 a sung a Oxygen, X-Ray leh Ultrasound toh kithuah tuma zek a Chief Medical Officer makaih a Imphal a va lak uh a sung a van zat tuamtuam operation ding om louh ziak a kizang thei lou in gen uh a, gari pen a khe a niamluat ziak a singtang a leng kal zou lou ding hi’n thutut kingah hi.

Excursion team hong tung
LAMKA, March 26
27 Sector Assam Rifle sponsored na a Lamka area a School tuamtuam 12 apan Students’ 24 leh Teacher 3 te excursion a Kolkata a zinte tunitak dak 5:00 in Lamka hong tung uhi. Tuibuang a 27 Sector Assam Rifle Hq ah vai dawnna nei uhi.

BSF Civic Action Programme
IMPHAL, March 26
88Bn BSF ten Yairipok ah, March 27, 2008 zinglam dak 11 chiangin Civic action programme khat sai ding uhi. Hiai mun ah BSF ten abawlsak uh Welfare Centre khat leng Yairipok area a numeite a dingin, BSF ten piakkhiakna nei ding ua, tuaban ah vanzat Puankhui khawl (khe asik) 10 leh Colour TV set khat leng pe ding uhi.

State level seminar om ding
IMPHAL, March 26
Indian Council of Social Science Research NE Regional Centre, Shillong te sensakna nuai a, Manipur College te saina in, hiai college ah March 28, 2008 in One day State level Seminar on ‘Magnitude of the problem of the Elderly persons in the Northeastern Region of India with special reference to Manipur’ chih om ding hi.

NSCN (IM) member 3 man
IMPHAL, March 26
Apaisa March 24, 2008 sunnung dak 1.30 vel dingin, Bishnupur Police Commando ten NHPC, Loktak Project Office complex lak operation a bawlna uah, NSCN (IM) thum 7.65 pistol khat leh atang 5 toh mankhawm uhi.
Police thusuak dan in mat a om NSCN (IM) te bel, S/S Section Officer –Information & Publicity, GPRN Ajianpou Kamei (33) s/o (L) Gaikhuipou Kamei of Tokpa Kabui village, S/S Regional Secretary GPRN Jenchui Kamei (33) s/o Thambou Kamei of Khoupum village leh S/S Section Officer Assistant GPRN Siannao Rongmei (34) s/o Gaipuikhan Rongmei of Khoupum tu lel a Tokpa Kabui village a om ahi.

HIV/AIDS toh kisai public hearing
IMPHAL, March 26: UNAIDS sensakna nuai leh Manipur Legislator’s Forum on HIV/AIDS (MLFA) leh Lifeline Foundation saina nuai ah, ‘One day District level Public hearing on HIV/AIDS’ March 27, 2008 zinglam dak 10 in Sanjenthong a State Guest House conference hall ah om ding hi.
Hiai hun ah Khuallian in, Assembly a Speaker leh Chairman MLFA Dr. S. Budhichandra Singh pang ding hi. President in Dr. I. Ibohanbi MLA & Secretary MLFA leh Guest of Honour dingin, Dr. H. Borajao MLA & Executive member MLFA leh Dr. Kh. Pramodkumar Project Director MACS pang ding uhi.

Ukhrul district apat Forest Beat Office lakhe di’n ngen
IMPHAL, March 26
Ukhrul district sunga pawl tuamtam 4, Raphei Katamnao Long, Zingsho Katamnao Long, Zingtun Tangkhul Katamnao Long leh Tangkhul Aze Katamnao Long ten tuni a Press statement a suahna uah, Tribals forest right toh kisai in thu tuamtuam taklang kawm in Ukhrul district sung a Forest beat office, Manipur govt. leh Forest department
in kintak a lakhe dingin theihsak uhi.
Hiai pawl 4 ten’ Forest beat office lakkhiak ahihkei leh ahoih sanga ahoihlou lam omthei zaw ding ahihdan leng taklang uhi. Pawl 4 ten thusuah a bawlna uah, Ukhrul district sunga gammangte a gammite’n hun sawtpek apat customary laws leh practices ban ah rules leh regulation nei a, a etkawl uh ahihziakin, bangchi dan mah a tax piak kullou chih ahi.
Ukhrul district a gammang te Reserved Forest Act nuai a omlou ahihman in, Forest beat office hon kul lou hi. Forest department in gammang product toh kisai a tax lak a sawm, singtang mite forest right kalh ahihdan leh govt. min a tax kaihkhawm pen guktakna leh suamhatna toh kibang hidan inleng thusuak in taklang hi.

District nih ah NREGS pat hinawn
IMPHAL, March 26
India a 2005 apat NREGS patkhiak ahih toh kiton in, phase masa adia India pumpi a district 200 telkhiakna ah, Manipur a Temenglong district telkha a, NREGS patkhiakna leh hamphatna ngah masapen district suak hi. Phase nihna adingin, Manipur a district nih CCpur leh Chandel ah NREGS patkhiak in om nawn hi.
Hichibang kal ah, zan tan a Manipur district 6 a NREGS patkhiak ahihnungin, tuni’n leng Chief Minister O.Ibobi Singh in Bishnupur district leh Imphal West ah NREGS hongkhe nawn hi. Ukhrul leh Senapati district a March 24 a patkhiakna neih ding chih himahleh, khosiat ziakin, Ukhrul district ah hithei lou a, himahleh zingchiang March 27, 2008 in patkhiakna om nawn ding hi.

Rajya Sabha MP di’n Rishang telching
IMPHAL, March 26 NNN
Rajya Sabha a Manipur’ palai ding khat kitelna tuni zinglam dak 9 apat nitaklam dak 4 sung Assembly Secretariat Committee Room A ah neih in om a, huai ah Congress Rajya Sabha MP dia Rishang Keishing telching a om nawn hi’n thusuak in taklang hi.
Tuni a MP ding kitelna ah Manipur Legislative Assembly member 60 lak ah RK Anand chihlouhsiah in vote khia ua, vote kikhia 59 lak ah vote 2 si hi. Vote silou 57 lak ah Rajya Sabha MP dia telching nawn a om Rishang Keishing in vote 49 ngah in nuamtak in a langpa vote 8 chauh ngah National People’s Party (NPP) candidate BD Behring zoukhia hidan in thusuak in taklang hi. Manipur sorkar a Minister ana hingei BD Behring ahihleh Chandel district a Japhou Bazar apat hi a, independent MLA bangzah hiamte huhna toh NPP in a nominate hi’n thusuak in taklang hi.
Rishang Keishing ahihleh Ukhrul district a Chassad sub-division sung a Bungpa Khunou apat hi a, 1952 general election in outer Manipur parliamentary constituency apat Lok Sabha MP dia telching in ana om a, 1962 kum in leng ching nawn hi. Manipur MLA di’n Ukhrul district a Phungyar assembly constituency apat telching in ana om a Finance Minister, Education Minister, Tribal Welfare Minister, Transport Minister leh Forest Minister hihna ana len ngei hi.
Manipur assembly ah 1980 kum a telching a a om nawn in Deputy Chief Minister hihna len a, November 27, 1980 apat January 4, 1995 sung Chief Minister hihna a let ziak in Manipur a CM dinmun lensawtpen hitadihlai hi. Rishang in 2002 Assembly election pen Phungyar AC apat ana tuh mahleh Wungnaoshang Keising ana zoulou hi.
Manipur a Congress in 2002 kum a vaihawmna a lak nawn in Rajya Sabha MP di’n Rishang nominate ua, tu’n a term April 19 a a beima in telching in om nawnta hi. Tutung Rajya Sabha MP ding kitelna ah Congress ticket delh mi 17 om mahleh, AICC president Sonia Gandhi in a delhlou Rishang pia hidan in thusuak in taklang hi.

HR & LN in MZP mohpaih
AIZAWL, March 26 NNN
Mizo Zirlai Pawl in sum a nget uh non-Mizo sumdawngmi khat in a piak utlouh ziak a MZP in huai mipa vua uh hidan a ngohna om toh kisai Mizoram Human Rights and Law Network (HR & LN) in naktak a mohpaih kawm in non-Mizote right bohsiatna ahihdan taklang uhi.
HR & LN in hiai toh kisai a thusuah a bawlna uah, hiai bang a gamtatna pen Christian hindan toh kikalh leh Mizote sukminsiatna ahihdan a taklat banuah MZP gamtatdan pen Dan in a phallouh hi’n taklang uhi. Huai banah, nidang apat non-Mizote apat MZP in sum ana ngetsek lai ua sorkar in a khamna dia pan bangmah a laklouh ziak a hiai bang teng tung ahihman a sorkar in a moh a khuk ding hi’n HR & LN thusuak in taklang hi.
MZP kia hilou a pawl dang tuamtuamte’n leng non-Mizote lak a sum nget chiing uh ahihdan taklang kawm in HR & LN in Mizo leh non-Mizote a kibang a a bitna ding ua sorkar in Dan leh Thupiak tungding a, kintak a Dan bohsete gawtna pe di’n ngetna bawl uh hi’n thusuak in taklang hi.

Pastor 1 sihna sui thak di’n ngen
AIZAWL, March 26 NNN
Pastor Rev. Chanchinmawia, Mizoram People’s Forum a President hihna a letlai October 1, 2007 a a sihna toh kisai in tuni’n Mizoram Assembly session ah opposition party ten a thak a state dang apat agency suizuina neihsak ding ngetna pelut uh hi’n thusuak in taklang hi.
Party tuamtuam apat opposition MLA tamtakte’n state govt. kiang a ngetna a piaklut uh toh kisai in Home Minister Tawnluia in, state govt. in hiai thu sui dia a seh Special Investigation Team in ADM (J) kiang a December 6, 2007 a final report ana pekhinta ahihdan gen kawm in a thak a suizuina pat nawn ding toh kisai a bel govt. hilou in, court in thu neizaw ahihman a lungkimlouhna neite’n govt. hilou a court a tut zawk ding ahihdan hasuan hi’n thusuak in taklang hi.

AMWJU in a strike khawlsak
IMPHAL, March 26 NNN
Manipur phaizang bial a journalist te’n cease work strike March 21 a apat uh Nilaini a All Manipur Working Journalsits’ Union (AMWJU) in general body meeting a neihna ua thupukna a lak dungzui un mipite khualna in Nilaini in kiphinna khawlsan ua, nasep pan ngal uhi. Huai banah, Umar Farooq pawl simlouh a PULF tung a ‘ban’ a bawl leng AMWJU in lakhia hi’n thusuak in taklang hi.
Journalist te’n awnnalam neilou ahihthu a gen kawm in, AMWJU president’ tung a Umar Farooq pawl in ngohna a bawl leng March 28 tan a hilhchetna a bawl kei ua leh amau pawl toh kisai himhim news a suah nawnlou ding hi’n journalist union in Umar Farooq pawl tung ah vauna bawl hi. PULF home secretary kichi khat in AMWJU president tung a ngohna a bawl a mohsakthu taklang kawm in state a journalist-te vaulau a a om ziak ua ‘press pick-up programs’ himhim ngaihsak nawnlou phot ding ahihthu uh leng AMWJU in gen hi.
People’s United Liberation Front (PULF) in press-te nasepna a sukbuai ziak un kal masa March 20 in AMWJU in March 21 a kipat ni 6 sung cease work strike puang a, state a AIR leh DDK chihlouh Imphal a newspaper-te kal khat phial bang nasemlou a aom ziak un Manipur sung a news service lamte buai mahmah uhi.

Editorial

Numei-naupangte bitna di’n mohpaihna thu hunlou

Thupi: Gilou nasep kintaka gawtna a kibawl louh jiakin, huaijiakin mite tapate lungtang gilou hih dingin huaiah koih kipin a om hi. Eklijiasti-8:11

Vaigam khong kia a thiltung thei hidan a i koihte tu’n eilak ah leng uang mahmahta a, zan a numei naupang khat tung a thiltung pen pawngsualna toh kisai in a masapen hilou a, apaisa May 18, 2006 in Tuilakjang khua ah Jamson in numei naupang kum 14 mi khat ana pawngsual a, numei pen in nau a pai zawkmah banah kha khat nung in leng a thiltuah ziak in a chang in khophawlou in kongkaw zel a, June 2 tan in leng bangmah nelou in om a, a chang in kihing ek ek sek a a khut khawng van ek ek sek hi. A thiltuah ziak a numei naupang’ lungsim paisual in lauhna ngen in dim a, a nute’n May 19, 2006 in Lamka hon zotpih sawm mahle uh bus sung ah lau in kipekpek a a tawp in kongkaw a, bus apan kumkhiatpih thak ua a zing May 20, 2006 in bel Lamka honzotpih thei khong uhi.
Apaisa November 26, 2006 in leng Lalzawmliana @ Zawma s/o Parzika in Panglian JB School a Class A simlel numei naupang kum 7 mi ana pawngsual hi. November 21, 2007 in leng Rengkai Bible Hill ah Khamminthang Leivang (25) s/o Kaizagin in numei naupang kum 11 a upa, Class III simlel khat a sanggampa mitmuh in ana pawngsual hi.
I khotang a hiai bang thiltung mulkimhuaitakte a tun nawnlouhna dia mipite leh pawlpi tuamtuam te’n pan ginatak ina laklouh ziak un zan mahmah in leng kum chinglou chih dia leng chinglou kholdiak, numei naupang kum 6 mi, Children Brighter School, Mualkawi a Class B simlel khat pawngsual in om nawn hi. Hiai thiltung toh kisai simkha leh theikhate peuhmah lungsim naktak in phawng a, numei naupang in a nu kiang a school kaitawp chiang a pi pahpahta dia a nget dan leh a kahkahna a aw bang heugawp a pauzoulou ahihdante i sim zawkmah chiang in, a mi theingeikei mahle i lungsim tawng hon dawt in na mahmah a, kithuakpih mahmah hi.
Eilawi in guta hiam i mat chiang un leng mi bangzah hiam ahihkeileh pawlpi khat hiam in thuhilhna hoihtak nei kichi in i khah zel uhi. Guta ana hithei chiang in kua thuhilhna ziak in guktakna a tawpsan taktak dia? A guk nawn chiang a pilvangzawsem dia thuhilhna toh kibang hi. A guktak ziak in a sungte liausak ekek lengle a guktak hat pen in thuakkha tuanlou ding a, ana thuak gige a sungkuante thuakna behlapsakna maimai hiding ihi. Tutung a thiltung toh kisai in, pawlpi khat hiam in migilou pen hon mankhe takpi leh leng ‘thuhilhna hoihtak’ piak nung a khah zel ding ihi diam? Ahihkeileh, a dangte dandeuh a, Inndongta kihouna tungtawn a a migilou pen zalenna piak a, a sungte gawt ek zel ding ihi duam?
Eilak a leng siatna uanglawta a, i Pu-Pa tawndan dungzui a Inndongta tungtawn a kilemnate’n hon gakzou nawnlou ahihman in, i Pu-Pa tawndan pen paih ding chihna bel hilou in, sorkar leh Police bang leng nei ihih sam chiang un, amaute thuneihna zangta leng hoih ding hi. Buaina banghiam thu a om chiang in Inndongta tungtawn a kihouna pen bel pai thou henla, himahleh, huai kawmkawm in Police lam ah leng a case pai leh hoih ding hi. Inndongta tungtawn a kilemna a om a leh leng migilou in a gitlouh man a kituahpih bang gawtna bel a muh veve ding ahi. Huchi ahihlouh chiang in sum tamtak kiliausak a kilemna neih ahih tangpi ziak in, zan a editorial a i gen bangdeuh in, mi hausate’n liau ding sum nei lel ahihching un, numeite ban pawngsual in Inndongta in sum a liausak zahzah pe ziahziah mawk leh thil hithei khat suak hi. Inndongta kilemna a omna dia sum liausak pen bel zangnadopna dan khat leng ahihman in hoihlou tuanlou a, himahleh, hiai kilemna ziak a migilou pen zalenna piak kichi tulai hun a dia thil hoihpen hinawnlou hi.
Numei pawngsual ngam khat zalentak a khahzan a om ahihlam thei gegu nu-le-pate’n i tate i pawtsak ngam dia hia? Zan a thiltung bangbang kuan ei tung ah a tungkei ding a chi ngam dia? Migilou pen suangkulh a khumlou a, en i tate suangkulh (innsung) a khumbichilh zaw ding ihi duam? Hiai numei naupang tung a thiltung pen in i lung uh a phawng mahmah tan a beisak zel ding ihi duam? Tutung a thiltung toh kisai a newspaper khong a ‘mohpaihna’ thu suah leh lamlian zuih kichite’n maban a i tate bitna ding bangmah semkhelou ding ahihman in, mipi, pawlpi tuamtuamte banah Police in a thu kia a mohpaihlou a, a taktak a migilou pen matkhiak a Dan dungzui a gawtna khauhtheitawp piak hoih ding hi.

lamkapost@yahoo.comThis e-mail address is being protected from spam bots, you need JavaScript enabled to view it

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s