Manipur Express | March 31, 2008

Pastor in Rising Day ni’n UKLF member 9 baptisma tangsak, UKLF in Hills District mun khat ah kum 8 a chinna uh thupitakin lawm

Lamka, March 29: Manipur singtangmi helpawlte laka khat United Kuki Liberation Front(UKLF) pawl in a kiphuhkhiak nung uh kum 8 chinna tuni in Manipur singtanggam mun khat ah thupitak in lawm ua, huai ah mipi 1,000 vel ding paikhawm in makai tuamtuam in thugen uh a, sial(mithun) khat gou in ankuang luina leng om hi.

UKLF General HQ-Khul, Camp Sidon mun ah “8th Years of United Kuki Liberation Front” kichi UKLF kiphuhhiak kum 8 chinna thupitak leh lawhchingtak in zang uh a, huai ah Manipur Hill Journalists Union a printed leh electronic media omte hunkhop leng vatel uhi. Khuallian ding a chial a om UKLF Commander-in-Chief S.S.Haokip in lemtanlouhna khenkhat aneih ziak in Home Secretary Anthony in khuallian hihna la in, puanlap a kaihpalh ban ah, cadre te apan in salute la hi. Chief Guest in UKLF Chief SS Haokip akipan “Rising Day 2008 Message” simkhia in thugen hi. C-in-C message in ataklat dan in, UKLF in re-unification a paipih kawmkawm in, Khul apan piangkhiate ading in kipumkhat hun lawta ahihdan taklang a, state piching khat bawlkhiakna ding in Govet of India tawh kihouna pat ahihdan gen in suangtu kibang Khul suante suahtakna ding in pankhawm ngai a, chikhat, nam khat leh gam khat neih mateng miteng in mawhpuakna nei chiat a, kuapeuh kituak dialdial a lungsim khat pu a kal suan poimawh ahi chi hi.

Self-styled Capt. Daniel in a genna ah UKLF in a tup pipen ahihleh Khul suante teng kigawmkhawm a, midangte khenuai apan suahtak ding chih hi a gen in, a biktak in namdang te’n numei tung ah hiamgamna tun in, bomb thang hong kamkhun in, tax leh fund chi tuamtuam phutluih in hong khonkhum uh ahi chi hi. Tua ziak in, kipumkhatna sangmah a poimawhzaw omlou ahihdan gen hi.

S/S Major Joshua, Defence Secretary in 2007 -08 progress report kichi pulak a, galvan thak 50 lei uh ahihdan gen in, kipumkhatna leh masawnna deihna ziak in Kuki National Army apan cadre 7 in galvan 15 tawh UKLF ah kipia uh ahihdan gen hi. Huai hunsung mah in cadre thak(fresh recruitment) mi 140 vel training piak hi uh chi’n gen hi. Major Joshua in agenbehna ah, kipumkhatna leh pankhawmna deihna ziak a UKLF bel ut peuhmahte adin kong zapi a hon ahihdan gen hi. Maj. Kennedy in agenna ah pawlpi apan nawhkhiak cadre 3te leng laklut thak hi uh chi’n gen hi.

Hiai program zat hun ah, Zou, Mayon, Aimol leh Kom apan Namlam lahna om a, Hausa tuamtuam 21 kiang ah zahtak etsakna in puansan(red blanket) silhsak uhi. Pastor in UKLF cadre mi 9 te baptisma tangsak hi.

MLA 2 in Lamka hongpha uh

Lamka, March-29: T.Manga Vaiphei, MLA(Henglep A/C) tuni’n Lamka tawn in Henglep bial zuan in zinkhia hi. Aman tuni’n PMGSY fund a kibawl Thingkeu-Henglep road en a,Kolhen khua leng pha ding hi.March 31,2008 in Damzawl Playground hong ding a,Henglep HQ mun ah KNT Memorial stone leng hong ding hi. Huailou in T.Hangkhanpau,MLA(Singngat A/C) in zan a Lamka hongpha tuni tan omlai a, March 31,2008 in Imphal ah kiknawn ding hi.

BSF te’n Civic Action Prog zang uh

Lamka, March-29: Tuni sun dak 12 in 140-Bn BSF a CO Virender Singh in numeite ading in Torbung Bangla ah Civic Action Programme nuai ah puankhui khawl(sewing machine) 8, puanphanna khawl(knitting machine) 1 leh colour TV 1 pia hi. Huai ban ah tuni nitaklam dak 3:30 in 140-Bn BSF te mah in Sangga Muan inn a Vocational Training Centre adin puankhui khawl 8, puanphanna khawl 1, colour TV 1 leh Computer set 1 pia uhi.

Inntung a blanket phoulai kia

Lamka, March-29: UPC tuailai te’n tuni’n Khuga Dam ah Blanket sawp in kilawh uh a,amau laka tel Phungrosang(20) s/o Lalthlira of Salem Veng tuni sun dak 12.00 velin Blanket sawpsate Saipum khua ah inntung a phoulai kia in alu naktak in tatliam kha hi.Amah Imphal a Shija Hospital ah kintaka puaktung himahleh damzou lou in si hi.Tuni nitak in aluang Lamka hongtung a, March 30,2008 in Lamka hanmual ah kivui hiding hi.

CDCTA makai ding teelna nei uh

Lamka, March-29: CCpur District Council Teachers’Association(CDCTA) pawlin tuni zinglam dak 11 apan in Synod Hall ah kum 2008-2011 sunga vaipaw ding tel i uhi.Huai ah President dingin Tualkhanlal,Vice President din Lalneikhup,Secretary dingin D.Letkholal,Asst.Secy dingin S.K.Thanga Vaiphei,Finance Secy din Jangkhosei Touthang leh Treasurer dingin Lalhmangaihzuala telching uhi

Priscilla Home ah Graduation

Lamka, March-29: New Lamka a Priscilla Home ah tuni’n Graduation day-cum-Thanks giving programme zang uhi.Huai ah Chief Guest in P.L.Thanga, IAS, Chairman/MANIREDA pang a,graduate thak mi 5 te Pastor Elvis Nehlal in thumsak hi.Huai ah Pastor B.Thangngaihmung, L.B Sona ,Chairman/ Zomi Council leh Evan.Timothy Tuolar te’n thupi tuamtuam zang in sinsak uhi.

NCYCF te’n damdoi hunbeisa hal uh

Lamka, March-29: Northern CCpur Youth Clubs Federation te’n March 24-27,2008 sung Tuibuong Bazar ah Green Operation nei uh a,huai ah Pharmacy 12 apan in damdoi hunbeisa Rs.1.5 lakhs vel man ding leh van tuamtuam ahunbeisa tamtak kaikhawm uhi.Tuni sunnung dak 2 in Tuibuong Bazar ah mipi muh in thil a kaihkhop te uh mei in haltum uhi.Damdoi te kum 2003-2008 kikal a hunbeisa ngen Pharmacy tuamtuam apan akaihkhop uh hi’n kigen hi.

SAHARA te’n Media-te kimuh pih

Lamka, March-29: SAHARA te’n tuni’n Media te kimuhpih uh a, April 1,2008 akipan in Ngathal Playground ah SAHARA leh Ngathal Y/C saina in “5th Sawmpau Memorial Football Tournament-cum-Community Awareness on HIV/AIDS” kipan ding chih puang uhi.Football ah knock out system zat hiding a,Philantrophic organisation team 7 leh NGO team 7 telding uhi.Opening ceremony ah Live Band Show om dinga, huai atelding in SAHARA Delhi te hong paiding uhi. Winner te’n Rs.20,000 +Trophy+Certificate ngah ding uh a,Runners te’n Rs.10,000 +Trophy+Certificate la ding uhi.Huailou in Best Player,Top Scorer leh Man of the Match telkhiak hiding hi.Huaiban ah April 4,2008 zinglam in Hornbill Studio mun ah Campaigning Teamte makaih in HIV/AIDS live talk show om ding hi.Lamka sunga HIV/AIDS tawh kisai NGO tuamtuam te’n harm reduction nasep naktak a nei uh ahihdan leh tuni tan in numei leh pasal kum 14 nuailam mi 152 te’n HIV/AIDS natna nei uh ahihdan leng taklang uhi.

New laktom:

Chief Engineer in enkhia

# Manihar Singh, Chief Engineer/IFCD in tuni zinglam in Lamka hongpha a, Khuga Dam ah nasepna va enkhia in sunnung in Imphal ah kiknawn hi.

Huihpi’n tenna inn mutsia

#Tuni zingsang baihtak dak 4 vel in huihpi hat tak nung in Monglienphai a om Mr.Limsei tenna inn mutsiat sak dimdem hi’n thutut kingah hi.

Football result & fixture

#Tuibuong Peace Ground a Manmasi Football Tournament pailel ah tuni’n Kamdou Veng Y/C leh USC kimawl uh a,USC in goal 4-0 in zou uhi.2nd Round ah Saidan Y/ C leh Siinlung Football Club kimawl ua,Saidan YC in goal 1-0 in zou uhi.March 31 sunnung in TASK v/s SYC leh MYC v/s BYC kimawl ding uhi.

Central teamte hongzin ding

# Manipur ah in Mautaam kialpi ziakin district khenkhat ah kial tungta a, huai ziakin Govt of India apan Inter Ministerial team in thil omdan enkhe ding in April 2,2008 in Lamka hongpha in gua leh maupak leng enkhe ding uh chihthu om hi.

SUUNNA

Nianhat(73) w/o Khupzavel of Vengnuam,New Lamka tuni zingkal in zunkhum in si a,tuni mahin New Lamka hanmual ah kivui hi.

H.Nengkhankap(35) s/o H.Langgin of Pearsonmun tuni sunnung in Salom Hospice ah sungna in si a,March 30,2008 in Pearsonmun hanmual ah kivui ding hi.

IMPHAL NEWS:

CM in Ukhrul ah NREGS hong

Imphal, March-29: Chief Minister O. Ibobi in tuni’n Ukhrul district HQ a Town Hall ah Ukhrul district sung Block 6 ah NREGS nasep patna ding in hong hi. Aman a genna ah mijawng leh gentheite dinmun dopkangna ding in NREGS nasepna pat ahih zungzui in official-te’n leng diktat taka a sep uh ngai chi’n gen a, development nasepna ah singtanggam ngaih poimawh hizaw ding in gen hi. Tuni a NREGS launching ah Ukhrul district apan MLA Danny Shaiza, W. Keishing leh Dr Khasim Ruivah banah DC/Ukhrul leng tel a, Imphal akipan in Rural & Dev Minister Md Alauddin Khan, TD Minister DD Thaisii, Works Minister K. Ranjit leh Bijoy Koijam,MLA in CM vazui uhi.

Dakkal 24 sungin mi 4 kikaplum

Imphal, March-29: Imphal leh Thoubal district ah dakkal 24 sung in mi 4 kikaplum chihthu om hi. Tuni sunnung dak 1.00 velin Imphal West Commando te’n Thangal Bazar area ah operation bawlin helpawl hidia ginlelh mi 1 kaplum uh a, amah akipan in hand grande 1 mukhia uhi. Tuni nitaklam dak 3.30 in leng Imphal West Commando te’n Keishamthong Longjam Leirak ah mi 1 kaplum uh a, amin L. Utam Kumar(34) of Keishamthong Longjam Leirak hi a, a innkiang ua kaplup a om hi’n kigen hi. Huailouin Thoubal Commando te’n Charangpat Mayai Leikai ah helpawl hidia gintak 1 kaplum uh a, a taksa tung apan .32 pistol leh atang 3 mu uh a, mi 1 taikhia chihthu om hi.Imphal East a Keirao Makting ah zan nitak dak 9.30 in meltheihlouh te’n 1 kapliam uh a, Hospital tun nungin etkol manlouh in si chihthu om hi.

March 30 in office kai dingin theisak

Imphal, March-29: Finance department in Manipur a om government office leh financial institution teng Pathianni(March 30,2008) in office kaia nasem ding in theisak hi. Huai ni in Heads of department teng, Treasury Officer , Sub-Treasury Officer leh office staff teng leng office kai in bill pass chiat ding in state government in theisak in thupia hi.

Hunchiam omlou a RIMS khak ding khawlsak

Imphal, March-29: RIMS a nasepna March 31, 2008 akipan in hunchiam omlou in khak hiding chihthu om mahleh tuni’n RIMS employee te’n General Body meeting nei uh a, huai ah April 2, 2008 akipan in Post Graduate student-te exam ding ziakin RIMS hunchiam omlou a khak a sawm uh bangtanhiam sung zukkik phot uh a, hileleng March 31 & April 1, 2008 in OPD kikhak ding a, staff & employee te dharna tu ding uh chihthu om hi.

Tuni in ASI adin Viva voce om ding

Imphal, March-29: Manipur Police department a Asst Sub-Inspector(ASI) lakna ding in Written Test zousate adin March 26-28, 2008 sung Kangla a Officers’ Mess ah Viva Voce om a, huai huna teltheilou candidate-te ading in March 30, 2008 zinglam dak 11.00 in Viva Voce om ding hi. Huai ah mahni district apan candidate-te hunlai a tel khalou candidate-te telthei ding uh a, education certificate/original document tawi ngai chihthu om hi.

Gari tax/fee pichiat dingin theisak

Imphal, March-29: District Transport Officer/Imphal West in Gari tax pe ding mipite adia lemtang gelna in March 30,2008(Pathianni) in zinglam dak 10.00 akipan in sunnung dak 2.00 kikal vehicle tax sunna ding in Cash Counter kihong ding chihthu puang a, gari neite leh akisaipih kuapeuh in huai hunsung in Gari tax & fee sung chiat dinga theisak kawmin ngetna thusuah bawl hi.

Director,RIMS in hilhchetna bawl

Imphal, March-29: Prof L. Fimate, Director,RIMS in tuni’n hilhchetna thusuah bawl in print leh electronic media khenkhat ah contract basis asem staff Nurse-te a service uh regularize-na ding in RIMS Director in sum tamtak khon chihthu zuau pumlum leh pansan omlou kingawhna hi’n puang hi. A kisuahdan in pasal naupang khat kianga sum piak hidan in kigen a, Director in a taklatdan in huai naupang leh aman kizopna neilou, kitanau leng hilou ahih banah huai naupang leng RIMS a contract ermployee hi a, phalna lalou in a absent ziakin a sepna apan tawpsak ahihdan leng taklang hi.

Director in a taklatdan in atung akipan in leng contract staff nurse-te’n kinepna phatuamlou a neihlouhna ding un Supreme Court of India Order dungzui in contract appointment himhim regularize theihlouh ahihdan theihsak hi a, RIMS a appointment tungtang ah nam(communal) thila nasep hi a ngawhna leng om mahleh appointment himhim reservation policy pansan a bawl hizaw hi a taklang in ngawhna dikloutak omte poisakthu puang hi.

ATSUM in Consultation meeting sam

Imphal, March-29: ATSUM Hq in Autonomous District Council issue tutan hih fellouh poisakthu puang kawm in Manipur a singtangmite kinepna vuaksuak a koih ahihdan taklang uhi. Manipur Assembly ah Feb 13 & Feb 19, 2008 in luikhiak himahleh pass hilouin April 3,2008 a ngaihtuah hinawn ding a, huai ah hiai issue ahun suan hiam, nial leh utlou kawmkawm in clause khenkhat khen lamdang kawma pass ahihleh ATSUM om maimai lou ding a, April 3,2008 in ngaihtuah fel ahih kei aleh singtangmite’ kiphinna khauhtak tuak ding a kimansa a om dingin state govt thutawp pia uhi. Hiai thu ah ATSUM in March 31, 2008 zinglam dak 11.00 in Imphal a Kuki Inn ah Consultation meeting sam a, huai ah mimal, group,NGO leh civil society pawl tuamuam vatel a ngaihdan pulak chiat ding in leng theisak uhi.

Transfer/posting
1. S. Kunjabihari Singh,AE/Design-II under WTD as i/c EE/Purchase.
2. O. Mangi Singh,EA to SE/EC-III as i/c EE/MRTD.
3. Th. Tomalchand Singh,EA to SE/EC-I as i/c EE/Tamenglong Division.
4. L. Nimaichand Singh,AE/Planning Sub-Divn-II as i/c EE/Chandel Division.
5. S. Premananda Singh,i/c EE/Tamenglong Division as i/c EE/Inspectorate Division.
6. Th. Manglemba Singh,i/c EE/Inspectorate Division as i/c EE/Kangpokpi Division.
7. T. Giridhari Singh,SO Grade-I/Chandel Division as i/c EA to SE/EC-III.
8. L. Dorndro Singh, SO Grade-I/SE/EC-i as i/c EA to SE/EC-U.
9. S. Iboyaima Singh, SO Grade-I/IED-II as i/c EA/Planning II under Generation Division.
10. Ch. Shyamjai Singh, SO Grade-I/CCpur Divn as i/c AE/Nambol Sub-Division.

EDTORIAL:

Tuni Thupi: “Pathian aw, ka naupan chik akipan nang non hilh a; tutan in na thil lamdang hihte ka theisak gige hi.” Sam 71:17

Manipur a District Council dinmun

Manipur chihlouh North-east biala District Council omte khempeuh India Constitution nuaia 6th Scheduled provision pansan a kivaipuak hi a, naichik en lehang Mizoram state a District Council omte leng India Constitution a 6th Scheduled provision a kivaipuak chiat hi uhi. Alamdang mahmah bel Manipur a District Council kibawlkhiak tunglai in state dangte tawh kibanglou takin India Constitution a 6th Scheduled nuaia om hilou in bawltom tawh kibang India Constitution a kibulphuh kivaipuakna ahihlouh ziakin tuni tan in buaipih toutou hihang.

RK Ranbir makaihna MPP govt hun ah Hill Areas Committee(HAC) te’n District Council kivaipuakna 6th Scheduled nuaia koih ahih masiah MDC election omlou ding chi’n thupukna bawl uh a, 6th Scheduled nuaia leng koih hituanlou in MDC election leng kum phial omlou vengveng ngut hi. Tuma deuh apan MDC election ding husa hong kigen nawn a, hileleng 6th Scheduled a kivaipuakna om tuanlou District Council minpu lel mah kivaipuakna nuai ah election om ding hiphing zel hi. Hileleng Constituency lepthak ngailai dinmun ah om a, tukum sungin election a omzou taktak diam chih hizel hi.

Manipur Assembly hi’n Cabinet hileleng Manipur singtanggam kivaipuakna 6th Scheduled nuaia koih ding gen vuallouh in thasial uhi. Huaiziak mahin phaijang biala kisuah Newspaper khat in houh “state khat sunga state dang om” hisak hial hi. Singtanggam kivaipuakna 6th Scheduled nuaia koihna ding in 6th Scheduled provision pen Manipur tawh kituak dingin kivaipuakna dan(Acts) khenkhat bawl poimawh (with certain amendments) hisak uh a, hinapi in tuni tanin leng huai certain amendments a chih uh bang hihiam chih himhim thusun leh puankhiak omtuanlou a, huaipen 6th Scheduled koih ding dalna hiam zekaisakna vanzat hoihpi in zangthei den uhi.

Tunung in Manipur singtanggam ah MDC election a om hial leleng 6th Scheduled a kivaipuakna hituanlou District Council a minpu maimai mah hilai ding a, MDC telching thaka omte’n theihtawp suahin panla le uleng 6th Scheduled a kivaipuakna a phutkhiak zawh uh deihhuai hinapi in gintak haksa ding bang hi. Hileleng April 3, 2008 in Manipur Assembly ah Hill Areas Autonoomous District Council Bill,2008 genkhawm nawn ding uh a, huai zawhin Manipur singtanggam a District Council election om hun ding leh Consttuency lepthakna ding tawh kisai thil omdan hong kichianzaw deuh ding hi.

Manipur phaijang bial mipi tamtak in singtanggam district-te adia kivaihawmna 6th Scheduled nuaia koih ahihding huphulh uhi. Hileleng 6th Scheduled in state kipumkhatna bangmah khoih buaipha deklou ahihdan Mizoram a district tuamtuam a 6th Scheduled omte apan kichian hi. 6th Scheduled dal theiteng in dal zawmah, huchih sunga MDC term hunkhop bei manzel. Kum hizah zouzai sung MDC om hileh mi tamtak MDC hikhin ding a, a lawh uleh sum muhte tungtawn un innkuan tamkhop khawsakna azia om zawdeuh ding hi. Huailouin singtanggam ading scheme tuamtuam om sek a, huaite sepkhiakna ding in sum-le-pai(fund) leng tamtak hong lut khin ding hi.

Thudang khat ah District Council pen 6th scheduled hi’n hikei leleng a phattuamna dang khat bel gam-le-lei humbit leh kepbitna lam ah phatuam petmah zel hi. MDC omlouh hun ah DC in Chairman thuneihna(power) len sek a, huchi hun ah singtanggam khuallou leh singtangmi limsakna neilou DC bang leng omtham hi. Huchibang mite hun ah gam lianpipi singtangmite khut apan potkhe sek hi. Huaiziakin 6th Scheduled kivaipuakna om kei leleng gam humbitna dia MDC a om uh bangtanhiam phatuam veve sek hi. Huchi ahihman in 6th Scheduled ngakna ziakin MDC election khawlsak lailai lehang leitung bei tanpha leng piakthawh i ngak aleh mu nailou maithei hihang. Huaisang in election a om phot a, MDC thakte’n movement bawl tanpha ngap khop a pan alak uh poimawh ding in kilang hi.

Huailouin nidang i chidiam hun paisa a MDC om lai in zu-le-sa tawh kibual hunkhop om thei uhi. Hileleng tulai hun adingin MDC i chih bang leng ngaihtuahna neithei, thil omdan genthei leh mipi adia kingakna tak hithei ngaita hi. Huaiziakin MDC ding in leng zu-le-sa hiam numei tawh kibual thei phet ding MDC khong zatna ding om nawnlou a, gen-le-sak a poimawhna hun a gen thei, buaipihthei leh panla thei ding mi i gam in poimawhta hi.
————————————————-
Sunday message:
L E M N A
– Zatuan

Hiaia lemna kichi ahihleh Pathian Saptuam (Nas 20:28; l Kor 15:9) te a ding kia hilou in, khawvel a pawl tuamtuam, Organisation, Association leh gam tuamtuam in leng a poimawh vek hi. Abiktakin Christiante adingin a poimawh diak hi. Aziak bel ei honsampa ahihkeileh i Pathian lemna lal ahih ziakin. “Amin lamdang ….…. LEMNA LAL a chisin ngal ua(Isai 9:6). l Korinth 14:33 ah “Pathian zaw buaina Pathian ahikei a, LEMNA Pathian ahi”.Rome 15:33 ah , “LEMNA Pathian na vekua kiang ah om hen” a chi hi.

Eite lemna Pathian’ Saptuam a omte ihi. Ahihhang in saptuam sungah mimal leh a pawlbang in leng buaina a omthei hi. Saptuam masate leng zeksum thu leh pawl kikhenna thu ah anak buai mahmah uh a, hotdam hitheilou ding tan in akisel uhi (Nas. 15:1). Himahleh kihawlkhiak leh kibang hiam chihna zen i mu kei hi.

Unaute kala buaina a omleh pawlam mite ma a tunlou in Saptuamte ma a tun zaw dingin hilh in i om (IKor. 6: ) pawlam mite buaipih dia om khak ding thil zum huai ahih manin. Huchi ahih ziakin Saptuam in leng buaina om leh gal-et mai loua hihveng pahpah i tup ding uh ahi.l Kor. 6:5 ah, “Na zumna ding un ka gen hi, unaute lakah thupukna bawlthei (able to judge) mipil khat bek omlou maw?”

Nasepte :15:2,6 ah “Sawltakte leh Upate huaithu ngaihtuah dingin Jerusalem ah a kikhawm uh. Paul leh Barnaba tuh alak ua kuate hiam tawh huai thubuai tungtang ah Jerusalem a hawh dingin asep uhi.Tuni’n thubuai tut-theihna atam maithei, khawvel vaihawmten zaw diktak leh hoihtak a thu a khen ua leh adikte kiang ah muh ding leh tan ding a om leh ape ding uh, ahihhangin Pathian thu ah huchibang ahi kholkei hi. l Korin. 6:7 ah “Bang dia dikloupi a hihna thuak zaw lou oi? Bangdia kizangsakzaw lou oi? (Why do you not rather accept wrong? Why do you not rather let yourself be cheated?) l Korinth 6:8 “Hilou noumau ngei in leng na unaute uh tung ah na hihdik kei ua, na jangsakzaw nak uhi.”

DIKLOUPI A HIHNA THUAK: l Kumpite 3:16

Kumpi Solomon a damlai in numei 2 naungak hing a kituh ua, “Kei a ahi” a chihtuak ziakun Solomon in naungek pen tumtan ding a thupuan a bawltak in anu diktak pen in “amah pia un, aman tangzaw maihen” a chih phet in huai buaina(case) a vengpah mai hi. Hiai ah kizuakna numei khat pen in a sunga piang naungek tungthu ah a dikna thu a gen nawnlouhba ah a etton huai petmah hi. Kingaihniamna omlouhna ah buaina om leleng lemna a om theikei hi.

TOUPA JESU’N BANG A GEN A ?

Matthai 5:5 Thunuai lutte a hampha uh,leigou luah ding ahi ngal ua..
Matthai 5:7 Zahngai theite a hampha uh, zah ngaihna muding ahi ngal ua..
Matthai 5:9 Lemna bawlte a hampha uh, Pathian’ tate chih ding ahi ngal ua..
Matthai 5:22 Kuapeuh a unau tunga heh tuh vaihawmna ma adin lauhthong huaitak
in a om ding .
Matthai 5: 39 Ken zaw ka hon chi hi. Migilou nang kei un, na biang taklam beng tuh
a lehlam leng dawh in.
Matthai 5: 40 Kuapeuh in na lak ua thusia bawl in na puan-ak lak a tup leh na puanza
leng lasak in.
Matthai 5:41 Mel khat(1) pai dia hon phut kiang ah mel 2(nih) paisak in.

Tulai Christian-te bang i chi ua? I biang i bengsak ding uam? I puanza genlouh i puan-ak leng i pe ngam diam? Or Mel ½ leng i paisak nuam ding ahiam?

Matthai 5: 14 Khawvel vak na hi uh
Matthai 5:16 Na vak uh mi’ mitmuh ding in vak hen.
Rome 12:21 Gitlouh zawh in om kenla, hoihna in gilou zouzaw in. Atunga i gen kizuaknu in bel hoihna in gilou a zouzaw hi.

PATHIAN IN A MITE KILEM DINGIN AHON DEIH:
Sam 34:14 Lemna zong inla, a delh in delh in.
Ephesa 6:15 Lemna tanchinhoih(Gospel of Peace) vanzat na khe ua bun in ding un.
Rome 13:12 Sun a om bangin kilawmtak in i om ding uh. Kisual leh kihaza a omlou
in.
l Korinth 7:15 Pathian in lemna ah a honsam ngal a.
l Peter 3:11 Gilou nung ngatsan in…kituahna zong in.
l Peter 4:14 Na lak uah Christ a om peuhmahte lak ah lemna om hen

Tuni’n i ginnate bangchituk in hat in mualsuan theihna khop hial ginna nei mahlehang saptuam sung ah lemna omlou in kihuatnate, kinakna, kihazatna, hehna, kilanna, om tuamna leh gintuamnate i lak ua a om lailai leh sawltak Paul in a gen bangin bang chi’n Pathian gam i tangthei ding ua?(Gal 5:19)

Huaiziakin Pathian’ mite lak ah i laisiangthou in hon deihna bangin kilemna a poimawh petmah hi.

Ephesa 4:31 Khaatna bang,thangpaihna bang, hehna bang, hanna bang, gensiatna teng tawh tawpsan in omta hen, gitlouhna teng tawh.

http://www.manipurexpress.com

http://www.zogam.om

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

One Response to Manipur Express | March 31, 2008

  1. slomi says:

    UKLF te baptisma tang sah Pastor pa mu ut huai na e maw, bang a gual a zawl ata diai mah ?som a khat pe lou2 chu…*************hi ven.
    nal sa mong2 ing…

    Like

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s