Singtangmite bitna di’n MDC election

Tripura a singtangmite nawmvalh a a om dan deuh ua Manipur a singtagmite leng i theihlouh kal ua nawmvalh a om thei dinmun i hihdan uh leh a kikhel nung a phatuamloupi a minautang poi khoihlou lak a sisan kisuahna pumpelh theihna ding a sorkar in singtangmite bitna dia Dan kichiantak a bawl poimoh ahihdan i na gen khinta uhi. Huai dia Autonomous District Council election neih teitei poimoh ahihdan i na gen hi. Bangziak a singtangmite bitna dia MDC election neih poimoh ahia?

Kum 20 phial paita in 6th Schedule i na ngen ua, 6th Schedule hoih leh hoihlouh thu lam hizawlou in, thuneihna i neih sunsun uh 6th Schedule ngetna ziak in i na nawlkhin uhi. Manipur sorkar in a sa ua ling tang mah bang a a ngaih District Council pen amau a tha uh seng hetlou a ei mahmah in i nawlkhin pen phazesa in kipak mahmah uhi. Ngetna a lohchinma MDC election neihlouh dia thupukna i na lak ziak un, tunitan 6th Schedule i ngah nailouh dungzui un MDC election neihlouh in om nilouh hi. I gam leh leitang hon haza gige Manipur sorkar a ding in bel vualzohna thuah nih, 6th Schedule lah ngahlou, thuneihna i neih sunsun uh Dictrict Council leng nei nawnlou i hi uhi.

Kum 20 sung phial District Council neilou toh kibang a i om ziak un singtangmite’n naktak in kisuploh hi. Phaizang mite’n Naga bial nawk zoulou deuh ahihna uah, ei bial ah hong kisungkhawm ua, CEO leh Revenue Officer thuneihna toh inn-le-lou hong neithei mawk uhi. District Council tunding nawnpah ahihkeileh phaizang mite’n ei sang a sum hauzaw ahihna uah, i gam teng hong leikhe thei mawk ding uhi. District Council nei hileng bel, Land Holding i chih Council khut ah om ding a, Council phalnalou in, state govt. leh central govt. tel in, singtangmi hilou peuhmah in i gam uah inn-le-lou hong nei theilou ding uhi. District Council member i lai nangawn ua member te apan a guk a ngalsaute’n mun-le-mual a leikhiak theih ua leh, MDC i neihlouh sung un bangzah a mangthangta dia le, pai inla land record office ah va en mah dih.

Singtangmite bitna di’n District Council hoihtak, thuneihna sangtak leng i deih chiat uhi. Huai ngiatna ziak mah in MDC election bang i na neikei ua, himahleh, Manipur a singtangmi teng sang mah in leng ei Zo suante’n i suploh zaw uhi. Naga lamte a di’n bel Council kiang a thuneihna sangzaw piak ahihkeileh MDC election neih nai tuanlouh khawklou ding hi. Nagate toh ei dinmun kibanglou ahihna ah, en bel huai chitheilou i hi. A ziak bel, i gensa mah bang in, phaizang mite Naga bial lutlou ahihman un amau a di’n bel a gam uh a mansuah ding uh lauhhuailou hi. A ut tantan uh sorkar dek mahle uh, a gam uh amau a ahih sung teng pang thei ding uhi. Ei a ding in bel, kum 20 sung dang khong 6th Schedule lah ngah tuanlou, District Council lah nei tuanlou in om lehang ‘tunnu Zogam’ i chih uah zin-le- leng kisuak ding hi. I gam leh leitang humbitna dia thuneihna neu khat bek i neihkei ua leh i gam uh mansuah thei takpi dinmun in kiding hi.

District Council kiang a thuneihna sangzaw piak ding ngiatna ziak a MDC election i neihlouh zel ua leh bel, apaisa kum 20 sung phial apat bangmah zil khelou hiding i hi uhi. District Council nanung pen in thuneihna a tawi toh kibang chet tua sutzop ding hileh leng MDC election bel neih veve ding ahi. Thuneihna sangzaw bel Council ding kawmkawm in leng nget theih a, 6th Schedule, 8th Schedule, Union Territory, State leh Independence tanpha i nget ut a leh leng District Council neikawm a nget theihlouh hilou ahi. I bitna ding un sorkar apat nget ut tamtak i nei uh ahihmaithei, himahleh, a gam leh leitang pen kuamah suhsak vuallouh a ei a ahihphot poimoh hi. UT ngenkhe leng i gam leitang leng bit dia, thuneihna sangtak leng nei ding i hi chih pen dik mahmah a, himahleh, 6th Schedule tungtang a i theih chiatsa mah bang un, a hun kivei sung in mi’n hon nawmvalh man ding uhi. Huai ziak in, a poimoh masa ahihleh, i gam leh leitang tung a thuneihna i neih masak ding ahi.

Tutung a District Council tunding theihna hun hoih i khahsuah ua leh bel, hun hoih i muh nawn chiang ua ‘sial lut khit nung a sial dai kai’ toh kibang ding i hi uhi. Huai ziakin, MDC election pen neih ahihnak leh, nei in nei phot peuhmah in i gam leh leitang pen hong bit phot peuhmah leh, huai nung in bel Council kiang a thuneihna sangzaw piak ding chih tel in, nget ut i neih ua leh leng Council pen siksan a nei in sorkar i phu ding ua, en MDC 20 i neihlai ua Senapati in MDC 40 a neih toh kisai bang leng Council mahmah in hon ngaihven thei ding hi.

Editorial… [The Lamka Post April 2, 2008]

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s