Mipite kipat hunta | Editorial, Lamka Post

Manipur singtangmite bitna ding ngaihtuahna in Manipur Hill Areas Committee in Manipur Hills Areas Autonomous District Council Bill, 2008 kichi Manipur Innpi ah March 12, 2008 in ana pawlut a, ‘technical error’ om chih ziak in Speaker in Select Committee bawlkhiak a, amau a diklou leh bawltuak omte enkai ding in thutanna bawl hi. Huai ni mah in Speaker in hiai Bill toh kisai enkai ding Select Committee a Chairman di’n TD Minister D.D. Thaisii guang hi. March 19, 2008 in Innpi ah puaklut hinawn a, himahleh, hiai hun ah leng bangmah piang tuanlou phetlou in, in April 3, 2008 chiang a Innpi a genkhawm ding in Speaker in thutanna ana bawl nawn zel hi. Speaker thupukna ziak a lungkimlou in singtangmi MLA tamtak in leng Innpi ana pawtkhiak san ngeita uhi.

MHADC Bill, 2008 in singtangmite’ kivaipuakna a sikden ziak a ‘clause’ khenkhat khengthak ding leh, hiai toh kisai Act kibawl himhim Constitutional Article 371 (C) leh Indian president in 1972-a thusuah a bawl dungzui a bawl ding in leh Manipur singtanggam a ADC Act koih nawn ding in Movement for Tribal People’s Rights Manipur (MTPRM) in March 17 in state government ana noh hi. Singtangmite bitna ding ngaihtuah hichiat himahleh, MTPRM in a nasep ding dan leh a gahsuah dingte enkai loupi a hiai Bill bawlkhiak ahihna thu ah HAC mohsa hi. Huai banah, hiai Bill apat thaimang ding leh khen lamdang dia a deihte uh MTPRM in nei seuhsouh a, huaite ahihleh, membership neihtheihna dia autonomous district a kum 15 sang a tawmzawlou [clause (I)] chih in singtangmite ‘right’ a laksak banah ST assembly constituency-te paidan a bohsiat ziak a hiai clause khenkhiak pah ding. Section 20 in Autonomy dan (principle) a bohsiat ziak a nulmang ding. Section 25 nuai a District Council thupukna state government in phiat thei chih leng thil hitheilou ahihziak a nulmang pah ding. Section 24 nuai a District Council thuneihna leh nasep kigente leng schedule 29 toh a kikelkit ziak a constitution schedule 11 nuai a executive power leng kichiantak a taklat ding. District Council financial assistance ding leng Grant in Aid/state fund chauh hitheilou ding. Principle Act section 28 nuai a phaizang a Panchayat te’n Central Consolidated Fund a muh dungzui ua District Council te’n leng Central Fund a muhtheih ding. Principle Act article 29 dungzui a state budget, UT leh ADC a thuneizawte’ thu lak ding kichi in leng District Council zalenna a bohsiat ziak a hiai laimal article 29 apat thaimang ding. Huai banah, Hill Areas District Council Bill, 2008 a singtangmite nelhsiahthei ding ‘clause’ khenkhatte nulmang ahihkeileh thiltung bangbang state government leh HAC in moh a puak ding hidan in MTPRM in vauna ana bawl khinta hi.

MHAADC Bill, 2008 thubuai toh kisai in, All Tribal Students’ Union Manipur leng hahpan mahmah a, a makaihna in March 31, 2008 sunma dak 11 apat sunnung dak 2 tan Imphal a Kuki Inn ah Public Consultation Meeting neih in om ana hi. Hiai meeting ah, mimal leh pawl tuamtuam tamtak paikhawm in ngaihdan tuamtuam genkhawm ua, India Danbupi in singtangmite ‘right’ a piakte Manipur Innpi in zumna tellou a heikawi sawm hidan a mipi paikhawmte’n ngaihdan a neih dungzui un ATSUM President Dr. John Pulamte leh General Secretary Thomas Taishya in thusuah a bawlna uah, MHAADC Bill, 2008 toh kisai a Selection Committee in March 19, 2008 a Innpi a report a luikhiakpen pomlou ahihdan uh taklang uhi. Huai banah, hiai Bill April 3, 2008 a luikhiak ahihnawn chiang a thudik kitheihmohbawl ahihzel leh ATSUM in Mass Tribal Movement pan ding ahihdan leh phaijang leh singtang kisailouh ding tanpha poisakna neilou ding ahihdan uh leng taklang uhi.

Manipur singtangmite bitna dia ADC hoihtak neih i deih chiat ua, pawlpi leh mimal phatuamngaite’n ahihtheih teng uh suah in pan ana la uhi. Himahleh, Manipur Innpi in MHAADC Bill, 2008 nihvei a nawlkhin khitnung in April 3, 2008 a puaklut ahihnawn in TD Minister D.D. Thaisii in zukkik dia thusun a bawl dungzui in kithutuaktak in bangmah gen-le-sak leng omlou in zukkik in om mawk hi. March 12, 2008 apat April 3, 2008 kikal a bang thu teng ana kivei man ziak a hiai Bill zukkik a om hihiam chih sut tham ching mahmah khat suak hi. Singtangmite bitna dia MDC election neih a poimoh dan i thei chiat ua, himahleh, Manipur singtangmite lak a leng eimite dinmun toh Naga-te dinmun kibanglou ahihdan theih poimoh petmah hi. Naga-te a di’n bel nawmvalh a om ding lauhhuailou a, himahleh, ei a di’n bel thauvui-thautang sang in lauhhuaizaw hi. Huaiziakin, MDC election neih ahihtheihna dia Innpi a i palaite uh i tawsawn a mipite mahmah in pan i lak uh poimohta hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s