Manipur Express | April 8, 2008

Zomi Council, PTC leh YPA Jiribam in buaipih, Mr Lienkhothang Tonsing IES accident in si

Lamka, April 4: Mr Lienkhothang Tonsing (34) IES s/o T Tuankhopau of Nehru Marg tuni zinglam dak 10:30 vel ding in Jiribam Police station apan Km 14 vel a gamla (Manipur leitang / Tamenglong District) National Highway 53 a Lhangnom khua apan gamla lou Leisang khaw kiang ah gari tuahsia in si hi.

Jiribam Zomi Council Secretary Mr L Khaidoukhup Ngaihte apan thusuak kingah dan in, tu zingkal dak 10:30 vel ding in Railway Department a Executive Engineer semlel L Tonsing leh a lawmte New Road Construction (railway track) enkhe dia kuan lampi tou mahmah khat ah taitou uh a, Railway te’ truck AS-01-AC/8955 hongtai suk in, amau leng lampi kiang ah side ana pia uh ahihdan gen hi. Railway line bawltu Truck pei 10 nei a break fail a, huchi’n Railway te gari Tata Sumo MZ-04/1599 (Dipper truck) a tuang L Tonsing leh a lawmte gawikha suk gawp hi’n gen thusuak in gen a, Sumo gari leng lak ding om nawnlou khop in lampi khang ah kilep khia a, a truck leng accident in Sumo delhkhum kha zaw mah hi’n kigen a, L Tonsing seppih te Assam mi 2 leng sikha hidanin gen uhi.

Tu nitaklam in a luang uh Jiribam PHC ah post mortem bawl in om a, Silchar ah sunna neih pih ahih zawh in zingchiang (April 8) zinglam dak 3 vel in Lamka zuan in hon paw ding ua, April 8 zinglam dak 11 vel a Lamka hongtun zawh lam et ahi. Hiai thiltung tawh kisai in Jiribam Police Station in case khat chiamteh hi. Zomi Council, Jiribam, Paite Tribe Council leh Young Paite Association in thiltung naktak in buaipih uh a, YPA Jiribam Block in Silchar tan gari in vakha uhi.

Aman Class I to 10 – Children’s Training High School, Lamka ah March 1991 in zou a, Class 12 – MES Abasaheb Garware College, Pune ah zounawn in, June 1997 in BE (Civil) – Sardar Vallabbhai Regional College of Engineering and Technology (tua NIT), Surat, Gujarat ah 1st Class with Distinction in zou hi.

August 1998 in Powergrid Corporation of India Limited (PGCIL) ah “Engineer” post ah sempan a, Nagpur ah posting in huai apan in 1999 in Indian Engineering Service (IES) tungtawn in Indian Railways ah “Indian Railway Service of Engineer (IRSE)” kichi mu hi. Dimapur ah 2002 in Assistant Divisional Engineer (ADEN) in zom pan a, 2005 in Executive Engineer hihna len in, a sihdong Executive Engineer/ Construction/ Imphal len kawm in, Silchar, Assam office in pansan hi. Jiribam to Imphal new Railway Line Project kibawl ah EE hihna lenkawm in nasep enkai lel hi. Mr L Tonsing in a zi Rebecca leh a tate nih nusia hi. Thiltung tawh kisai a mun a muh hikei mahleh, muanhuai mahmah khenkhat apan kiza dan in, L Tonsing te’ tuahsiatna mun ahihleh lampi lian mahmah in zalentakin gari nih leng kipel thei ding ahihdan gen uhi.

Press Club bawlna dingin theihtawp suah in panla ding:
Power Minister leh MHJU Office Bearer-te kimu

Lamka, April-7: Manipur Hills Journalists’ Union(MHJU) office bearer-te’n tuni’n T. Phungzathang, Minister(Power/Horticulture & Soil Conservation/Science & Technology) kimuhpih uh a, huai ah tulai a electric meivak(power) tungtang, tuma a Assembly a O. Joy,MLA in power deptt a sum dikloutaka kizang chih a ngawhna thu, NREGS/PDS item tungtang leh District Council tawh kisai telin thu poimawh tuamtuam dakkal 4 val sung genkhawm uhi. MHJU pawlin Lamka a Press Club bawlkhiak a sawm tungtang uah leng Minister in theihtawp suahin panlakpih ding hi’n gen a, tu April 2008 beima ngei in ahithei zahzah panpihna pe ding ahihdan leng MHJU makaite theisak hi.

Electric meivak haksatna tungtang MHJU in Minister kianga thil omdan a tut uh Minister a dawnna ah electric meivak kidaihlouh ziakin load-shedding beithei nailou ding a, hileleng meivak paini dingte ah hoihtaka meivak paisak dingin deptt official-te theisak ahihdan gen hi. Adiakin CCpur district sunga electric meivak dinmun hoihzawksem theihna ding in Khengjang a 132/11-KV Sub-station ah 132/11-KV Sub-station khat bawl behlap din proposed hi a, huai banah Lamka khawpi adia meivak pe dingin khawpi sung mun khat ah 33/11 KV sub-station bawlkhiak hiding in leng gen hi. Street light leng Police Station akipan Saikot tan koih hiding a, tukum in Rengkai tan zawh kisawm chi’n gen hi. Tedim Road ah leng Police Station apan Khuga Project kikal leh Tipaimukh Road ah leng Pearsonmun tan street light thuah suak hiding chi’n gen hi.

Minister in a genzelna ah electric fee(power tariff) kaihkhawmna ah khawsung / tualsung mite kizang nasasem ding hi’n gen a, incentive tuma a 5% kipia leng 10% hihsak ding in proposal om ahihdan gen hi. Meter box tawnlou a Heater leh adangdang kithuahte tunung sawtlou in surprise check kibawl ding hi’n gen a, huchibang hihte leh permit beia meivak late himhim Electricity Act, 2003 pansan in police zangin action lak hiding a, huchibang matkhiaka omte kha 1 sung jail a khum banah Rs. 5,000 liau tawh thuahsak theih ahihdan uh gen hi.

Assembly a O. Joy in Power deptt a Rs. 17.2 crore diklou taka zat hi a ngawhna a bawl Minister in a hilhchetna ah liability clear-na dingin Finance Deptt in Nov 30, 2007 in Rs. 2241.29 lakhs sanctioned a, Chief engineer in Dec 20, 2007 in Division tuamtuam a hawmzakdan ding proposal a bawl dungzui in Secretariat a Power Deptt in Division tuamtuam a ding Dec 24, 2007 in bikhiahna order suah hi’n gen hi. Power Deptt a Division tuamtuam adia allocation bawlna ah techical thil ngai a, huai dungzuiin Chief Engineer in proposal a bawl dungzuia sanction leh allocation bawl hizaw a, nasep omlou a sum kizang hiam sum zat thelthang leng hilou hibang khop a Assembly a ngawhna om tungtang ah banghiam thildang kiphumgu omzaw dinga koihtheihna leng om ahihdan gen a, Works Deptt in ni 1 sunga Rs. 100 crore (Rs. 1,00,00 lakhs) zat ua leng bangmah gen omlou in tutung a Rs. 17.20 crore zat thelthang hilou napi in hizahta thom om pen lamdang suak huaipi suak hi’n gen hi.

Tutung a Manipur Hills Areas District Council Bill,2008 leng Manipur (Hill Areas) District Council Act,1971 omsan pansan a amendment paitoutou dana hih ahihlouh ziaka zat taklou suak ahihdan Power Minister in gen a, aman TD a puaklai in Manipur Hill Areas District Council (2nd amendment) Act,2006” ki-pass ah huai ah clause poimawh mahmah 2 kiguang(tunung in chiangzawsem in hong kitaklang ding) ahihdan leng gen hi. Tutung in District Council tungtang Bill pass hikei mahleh MDC election om theihlouhna ding ziak bangmah omlou hi’n gen a, amah mah in leng election poimawh ahihdan gen hi.

Mautaam kial tungtang thu ah Minister in Parbung & Thanlon bial mipite Antang piak hile uleng a leina ding sum-le-pai anau dia haksa ahihmanin thil omdan tuni nitaklam in CM makaihna in CLP meeting ah genkhawm hiding in Minister gen a, huai meeting ah Thanlon leh Parbung bial banah Singngat & Henglep bial khua khenkhat haksatna tuakte panpihna dia DC/CCpur in proposal a piak leng govt in ahithei tana enzui in panla ding hi’n gen hi. Zan zinglam dak 10.30 in CM makaihna in Mautaam kial tungtang genkhawm hi a, huai ah Parbung leh Thanlon a FCS Godown omte repair a vuahtui luanma ngei a antang koih ding, Singngat leh Henglep ah leng Godown a om kei leh zatman piak ding godown dana zat ding zon ding chih hi’n gen hi.

NREGS nasepna ah Minister in Sumant Singh,IAS, DC/CCpur in mipite haksatna awlmawh petmah kawma pan nasataka a lak pahtak thug en a, NREGS nasepna ah ahithei tan in antang (rice component) lam ngai poimawh sem dial eng hasuan ahihdan gen hi. Minister in tulai Manbipur dinmun tawh kisai a genna ah centre a vaihawm Congress mah ahihman in Manipur a Law & Order dinmun lungtunhuai sakei mahleh govt dinglak a puksiat ding ahithei tana deihlou hi’n kilang a, law & order dinmun a hoih theih tuan kei lebel PR alou theilou ahih thil hithei ding himahleh centre in last option a koih dia a gintakthu MHJU makaite genpih hi.

Tui kia naupang 2 te vui hita

Apaisa April 2 2008sun dak 12:00 a Assam Regiment Centre, Shillong a Long Range Lui a kia Lalhruaitluang(6) s/o Hav.Ginzasum Naulak leh Laltlanhlupuia(8) s/o Hav. Lalremruata te luang zan in March 6 2008 in a luang uh ARC hanmual ah vui hita hi’n thutut kingah hi.

Director of Account lending

Department of Telecom, NE Circle a Jt CCA lenlel Dalzakam Valte in DoT nusia in, Postal ah kiheikhia a, Chief Post Master General Office, Shillong ah Director of Accounts len ding hidan in thusuak kingah hi.

Dr Khup Munsong hongtung ding

Muanhuaitak apan thutut kingah dan in, Eye Specialist Dr NC Khup Munsong a sepna apan April 14 2008 in a tenna Inn uh Bungmual hongtung ding a, kha khat sung om ding hi. Hiai hun ah mit lam buaite’n va ngaihven theih ding a, operation poimawh te leng bawlngal ding hi’n kigen hi. Dr Khup Munsong ahihleh, Madya Pradesh a Chhatarpur Christian Hospital a semlel ahi.

NIOS Practical exam om ding

National Institute of Open Schooling (NIOS) nuai a Secondary examination, Kangvai centre a exam ding te’n practical exam na April 9 2008 in a ki admit na centre chiat uah exam thei ding uh chih thusuak kingah hi.

G Tonsing Captain ah kaisang

Combine Defence Service nuai a Indian army lut Ginsonlal Tonsing @ G Tonsing (s/o T Gouzakham of Bungmual) in hun bangtan hiam 7 JAT Bn, UN Mission in Sudan a Lieutanant a letnung in tu in Captain in kaisang a, Mission tenure a zawh tawh kiton in, Sikkim ah posting ngal ding chih muanhuaitak apan thu kiza hi.

ZSP in Cabinet kekletna nei

John C Manlun General Secretary Zou Sangnaupang Pawlpi apan thusuak kingah dan in, zan in ZSP in Executive Meeting poimawh tak Zou Synod Hall ah neih ua, huai ah ZSP cabinet expansion bawl in, Secretary portfolio tuamtuam 7 lentu ding in mi 8 guang thak uh hi’n kigen hi.

Meitei Society kum 51 ching

Lamka, April 7: Meitei Society/Ccpur kum 51st chinna (Foundation day) zan April 6, 2008 zinglam dak 11 apat in Khuga Tampak Awang Laibung ah nei uhi. Huai ah N.Loken, Minister Social Welfare & Agriculture in Chief Guest hihna tawh uap hi. Funtional President in Y.Yumnam President Meitei Society/ Ccpur panga, Guest of Honour in L.Langambam President UCM, Khaipao Haokip President KIC, Manglemjao SP/CCpur leh Letboi Chief of Zenhang Lamka te pang uhi.

JSY sum lakthei ta

Naunei te panpihna sum (Janani Suraksha Yojona ) December 2007& January 2008 ading District Hospital ah kihawm khe ta a, akisaipih te’n ngaihven theih ding hi.

Lungnou khawi nang Inn tamtak bawl

Ginzamang Simte Deputy Director Sericulture/CCpur makaih in a staff member te tawh April 6,2008 nitaklam in Mualkot khua a Lungnou khoinang inn 5 kibawl thak lawpna nei uhi. Inn khat bawl nang in Rs1.5 sanction om awm a, CCpur District sung ah Field Operational Unit 82 nuai ah Lungnou khawi nang inn 328 bawl hidinga, huai lak ah inn 236 te Pucca Bricks abawl hi ding hi. Tulel in CCpur District Sericulture Co-operative Federation makai te’n inn 82 bawl ding uhi.CCpur District sung ah Lungnou khawinang inn 326 bawl nang in Rs.1.29 Crore Sericulture Department /CCpur in Japan Sericulture Project apan panpihna mu ding uhi.

Public Ground ah Mela omding

Manipur Government nuai a Arts & Craft Department te saina in April 12-21, 2008 sung Lamka Public Gound mun ah Mela neih in awm ding hi. Huai ah khutsiam silbawl tuam tuam te mipi ettheih ding in koih hiding hi’n thusuak kingah hi.

3 AR te’n sisan pia uh

Tuni in 3rd Assam Rifles te’n District Hospital a damlou Chinlianhnun (22) s/o (late) Lamzakam of Sahei road, sisan unit 2 athawn in pia uhi.

Pa in a tapa gamsa sa in kaplup kha

Muanhuaitak apan thu kiza dan in, April 5, 2008 nitak lam dak 6 vel in gamlak a gamsa taang a om Janglal (32) s/o Hemtil of Molnuom, Henglep Sub.Division apa’n satang lai theikhial kha in gamsa sakha in Thau (gun) in agil kapkha hi. Akigen dan in, Janglal leh apa sa beng dia a tuamtuak a kuan hi ua, a pata ua muntuam tuak a sa taang pang tuak a om apa’n akap gamsa sa a ava kapkhak hi’n kigen hi. Zan April 6, 2008 nitaklam dak 2 vel in District Hospital puaktung in om a, sisan unit 2 val akikhai nung in nitaklam 5:40 in dam zoulou in si hi. Hiai tuahsiatna a buai pih tuamtuam, Dr.T.Hatzaw Medical Suptd. District Hospital leh a staff te ban ah, Doctor leh Nurse duty te tung ah Khailet Haokip President KKL Gen.HQ in kipahthu gen hi.

Kiselbuai in vua uh
Chuchuon (30) s/o Helthang of Chiengkonpang, April 6, 2008 nitaklam dak 4 vel in Zukham lai HQ veng ah mi bangzah hiam te tawh kisel buai in vua ua, amai liam in tu’n District Hospital ah om hi.

N.Biren Singh in Khuga dam enkhia
Tuni sun in N.Biren Singh Minister IFCD/YAS in Lamka hongpha a, Khuga Dam en khia in, nitaklam in Imphal ah kiksuk nawn hi.

Ngasuonlei a site Mualsuang hongding
Behiang leh Singngat kikal a Ngasuonlei tungah January 17, 2008 Truck accident a si mi 20 te theihgige nang in amun mah ah April 12,2008 zinglam dak 11 in Mualsung kidawh honkhiak na om ding hi. Huai ah Chinzakhup President United Zou Organisation General Headquarters in honkhiakna nei ding hi’n kigen hi.

ZMA makaih rally om ding
Lamka, April 5: Zomi Mothers’ Association makaih in zingchiang April 8 2008 zinglam dak 9 in Joint Women Organisation te’n numei naupang tung a hiamgamna mawhpaihna in rally thupitak nei ding uhi. Thusuak kingah dan in, Lamka Public Ground apan DC/CCpur office tan lamlian zuih hiding a, hiai hun a telchiat ding in Joint Women Organisation in mipite chialna bawl uhi. Tuabang kalah, Ccpur a om Rickshaw puller Association in leng gupthu puang in, rally ah kihel ding ua, khawpi sung ah hiai program om sung kuaman service theilou ding ahihdan leng thupuan nei ngal uhi.

Singngat mipi’n theihpih lou
Lamka, April 7: NREGS nasepna tawh kisai a Singngat a Social Audit leh awarness campaign apaisa April 3 2008 in nei uh chih thu om mah leh, mipi tamtak in theikha lou uh ahihthu Press a hongtun pawl om ua, tua ban ah, Job card neilou inn 100 val om lai a tuabang thil tung ahihleh thil lamdang tak hiding chi uhi.

KNO in NREGS buaipih lou ding
Lamka, April 7: Kuki National Organisation nuai a Information and Publicity Under Secretary T Stephen Kuki in thusuah abawl Press a kimu in ataklatdan in, Centre Government in singtangmite khualna ziak leh, tagah meithai kemtu ding neiloute khualna ziak in NREGS scheme hoihtak pankhia ua, kuaman subuai lou ding in ngetna leh theihsakna bawl uhi. KNO thusuak in ataklatna ah, KNO nuai a om Armed wing tengteng in mi’n khaw-ul a alawh khiaksa uh demand bangmah bawl lou ding in theihsakna bawl ua, tua dungzui mah in, KNO in bangmah buaipihlou ding a, himahleh, khaw hausa, Village Authority leh NREGS Committee in dikloutak a na asep ua le bel KNO in panla ding ahihdan taklang uhi.

ZYA in Video Parlour te ngen
Lamka, April 7: Zomi Youth Association General Headquarters in tuni a thusuah abawl na uah, tulai a khawtang siatna mulkimhuai gawp ahihdan gen ua, khawpi sung a Video parlour om te’n leng Blue film suah himhim tawpsan ding in ngen ua tua kawm kal ah, nule pa te’n mahni tate chiat enkai ding in ngen uhi. Video Parlour ah naupang kumching lou Blue film en matkhiak ahih leh nulepa te’n bangmah gentheilou ding uh ahihdan leng ZYA thusuak in gen hi.

KSO in DC phatkawm in Contractor te vau
Lamka, April 7: Kuki Students Organisation Sangaikot Block thusuak kingah dan in, DC/CCpur Sumant Singh IAS in KSO (SB) ngetna limsak in, ZEO/CEO leh medical department nuai a semte Sangai Block a thil om dan enkhe dia a sawlziak in DC phat thamching asakdan uh taklang uhi. KSO (SB) thusuak in agenbehna ah, CCpur-Sugnu lampi Contractor in nasem zom ding in theisak ua, zawh hundia hunchiam sung a zousiang ding in zasak hi. Tuaban ah, TD Block office leng Sangai Block mah a April kal 3 na tan a koih ahih kei leh kiphinna panding uh ahihdan KSO (SB) in taklang ua, Sangai Block nuai a sem employee peuhmah in chihtakna suah chiat ding in leng ngetna leh theihsakna bawl uhi.

IMPHAL NEWS:

Thabal Chong lai mi 1 si sawn
Imphal, April 7: Zan nitak dak 11 vel ding in Sugnu Police station apan Km 15 vel a gamla Chairen Makha Leikai ah Thabal Chonglai meltheihlouh pawl khat in Naoremdon (35) s/o N Tomba of Chairen Makha Leikai va kaplum uhi. Thusuak kingah dan in, Naoremdon taksa ah thautang nih lut hidan in gen ua, tuni in Lilong PHC ah postmortem bawl ahih zawh in a sungkuante kiang ah piakkhiak in om uhi.

Police constable PET ah lawhching
Imphal, April 7: Manipur Police nuai a semding Constable lakna dia Physical Efficiency Test Kiginni in neih nawn hi a, huai ah eilam mi ahun khawp lawhching uhi. Amaute ahihleh,

Chest No 106: CCP Martyn Shaulianthang
Chest No 546: CCP Songbiaklian Naulak
Chest No 413: CDL M Jaffer Thangboi Haokip
Chest No 294: SPT Lungoulal Khongsai
Chest No 385: SPT Helkholam Vaiphei

EDITORIAL:

Tuni Thupi: “Bil doh unla, ka aw ja un: ngaikhia unla, ka thugen ja un.” Isai 28: 23

Bangziak a Accident tam hiam?

Eimite tawm chik ihi chih kuapeuh hon theihdan hi thou mah leh, tamsimta houh i de aw bang chih theih simsimta in hong om hi. Kum 20 leng pai nailou in i khang uh naktak in kikheng a, khangthakte hun hongtungta mah bang in, khang ki leh bulh petmah ding bangta hi.

Nidang hun in Lamka zang ah si dak khat vei a gin leh Lamka mipi su patau thei vek mah bang in, a ging leng ngaih khol diak bang hi. Himahleh, tuni chiang in, veng tamtak ah kikhenta in, vengteng phial in sidak nei bang hial in om ta hi. Misi dak kichi in leng mi lungsim phawng zou nawnlou bang in om hi. Hiai om zia bel Lamka zang ah mihing I tam mahmah ta chihna hilel hi.

Lamka khawpi pansan newspaper i neih sunsunte i et chiang in zingkal teng in
Accident chih thu i za gige uhi. Bangziak a accident om thei? chih leh adangdang kikup tham chingta hi. Zingsang teng a news a accident thu i simkhak a ahihleh, mihing iki behlap mahmah chih na ahi mai a, himahleh, i tamna pen zangsiam lou i hi diam chih kal om maithei hi.

Lamka context in gengen lai ta le hang, i economic niam sim bangmah leh, gari neih lam ah ki el souhsouh mah bang hial in, nidang a tuilou zuak zek a YAMAHA leite pawl bat vek in om simta hi. I ngaihtuah chiang in, District Transport ah kumteng in gari thak bangzah a kibehlap dia chih te suitham ching hi. Kumlui in Activa two wheeller registration bawl tam petmah a, tualou in gari neu nounou ban ah, four wheeler leng kibehlap mahmah a, gari neih a kidem mah i bang uhi. Tuaban ah, Lamka zang a taidia kilawmlou khop a gari /Car hoih nei a dim in om ta a, Bike leh gari tuamtuam nei pumdim in, gari kichi ki cheina (fashion) petmah hongsuakta hi.

Eimite lom pai chih mahtak, education thil ah leng hiai line hoih khat in hon chih leh huai zui noinoi te i hi ua, sepna ah leng hiai kan om lou a chih ua leh huai mah bawh zuazua te ihi nawn hi. Lamka ah mobile hong hoih panpan a, handset sang tamtak man ngen tawi in kidemna in i zang nawn ua, neih leh neihlouh, standard in abat leh batlouh gen hinawn lou in, mobile i nei sauhsauh nawn uhi. Huaiziak in, i ki elna te i ngaihtuah chiang in changkang vai adiam chih tanpha ngaihsut tham ching mawk hi.

Khuga Dam et theih dia bawl zawh ahih in, Dam lampi ah bangzah in i hinna uh i sumang ua? Bangzah in liam leh baina i tuak ua chih te mahni kivelna ding in hoih mahmah hi. Government in i lampi neih sunsun te hon puah zek leh, gari hat tai ding sap ah pongmawk in mipi tam leh tamlouh leng enlou a full speed a ki khawh pah chonchon chih khawng haivai mahmah hi. I zawnman hia, i mawlman theizou khang, gari speed nasan theilou a, ui hai tai a tai chih pe’n ngong na khat hi a, tua ban ah, ei adia le lauhuai, midangte adia le lauhuai ahi chih lungtang neihlouh pen ganhing tawh i ki naihna khat amai diam chih theih in om hi.

Veng khenkhat alah, Works Department apan phalna (approve) leng om hilouna pi speed braker tung teltul mawk. Mi khat leh nih in speed braker ziak in sihna tuak ta leh, kua’n amawh pawta ding. Huaiziak in, veng tuamtuam te’n leng speed braker a bawl dek chiang un, PWD ah ngetna leh phalna alak ding uh a mangngilh louh teitei ding uh ahi. Tuaban ah, Transport department in leng baihlam tak in gari peuhmah registration piak pah pah louh a, driving test tanpha aneihsak uh kipha mawhta hilou hiam chi ut i hi.

State dang ah mi tamtak kikapkhia zaw i hi ta ngeidia, accident ziak a sihna tuak tamtak i om ta uhi. Accident i chih chiang in, en mi i va sukkhak/hetkhak sese hiam hi tuanlou in mite’n leng hon sukha thei uh ahi chih i theih ding ahi. State dang a accident a sihna leh liamna tuakte tawh kisai bang ah leng i theih ding ua poimawh tamtak om ding in i gingta hi. 2006 kum in Shillong leh Guwahati kikal ah bus khat in tuahsiat tuak a, huai ah eilam mi nupi khat leng kihel kha hi. Huai hun ah leng i mel leh puam mite’n hon thei lumlet/by heart law mahmah ahih ziak un, a case pe’n suitheih louh ding khawp in ki hepmang sawm uhi. Himahleh, Shillong YPA te ban ah Dan siam eilam mi khat le nih te ziak in, hiai case pe’n pholhkhiak in om thouthou a, March 13 2008 in hiai tungtang ah Final judgement puankhiak hita hi. Mipi lam in leng accident i tuah chiang in Dan theih louh a poidan i theikhe pan phing uhi. Motor Accident Claim Tribunal bang hi a, Interim Relief bang hi a, ahih kei leh theihtuak tamtak om ding hi.

Vaigam te ah mi iva phutkhak / suk khak ngeingei leh mite’n Dan dungzui in Police ah hon tut pah in a kilawm lou tanpha liaulawh tamtak i om uhi. Huaiziak in Dan theih pen ana val lou lua ahi chih i theih ngeingei ding uh ahi. Ei lampite bel neupeet mah in a ki zuut man na sunloute phok petmah a, gari taite ading in lauhuai thei mahmah a, tua ban ah, gari in suang a gawi pelhkhakte bang in leng mihing denglum zou mahmah ding a, bomb tawh teng khawm mah kibang hi. I lak ah helmet khuk ding order hong om khong leh kilawm hi. Lampi kawchiik tak a mii tampi omna mun ah gari hattak a taipen mi haite om dan hi a, ut hunhun a lampi kaan chih leng pilna ana hituan hetlou hi.

http://www.manipurexpress.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s