Manipur Express | April 9, 2008

R Khumi tung ah case registered in om, Rs 22 lakh val hih thelthang a ngoh in om

Lamka, April-8: ICDS nuai a Program Officer lenlel Mrs R Khumi leh mi bangzah hiam in dikloutak in sum tamtak lakhia chihthu ah CCpur Police station ah case khat registered in om a, Police in suizui lel chihthu kiza hi.

Thu kizadan in, R Khumi leh alawmte’n CCpur District sung a Anganwandi Centre leh building tuamtuam bawlna ding in SBI/CCpur Branch apan February 25, 2008 in Cheque No 227933 tungtawn in Rs 1,66,197 lakhia ua, March 7 in Cheque No. 227934 zang in Rs 3,32,388 draw khe nawn ua, March 17 in Cheque no 227937 zang in Rs 6,66,468 draw uh hi’n kigen hi. March 17 mah in Cheque no 227938 in Rs 6,50,596 in L Haokip min in kidraw khe nawn a,. March 26 in Cheque No 227940 tungtawn in Rs 4,50,549 P Haokip min in draw hi’n kigen hi. Hiai sum te ahihleh DRDA/CCpur tungtawm a sanction vek hi a, April 7, 2008 nitaklam in R.Biren Singh, EE/DRDA, CCpur in Police Station ah thil omdan theisak chih hi. SBI/CCpur Branch tungtawn a sum kidraw kheteng kigawm Rs 22,66,198 pha zou a, bangchizat hihiam chih bel bangmah taklat omlou hi. Mrs R Khumi leh mi bangzahhiam tung a case registered ahih dungzui in Rs 22 lakh val hihthelthang a ngawh a om uh hi’n thutut kingah hi.

Joint Womens’ Organisation makaih in mipi 30,000 val in lampi zui:
DC/CCpur tungtawn in Chief Minister ah memorandum pia uh

Lamka, April -8: Lamka khawpi ah kum bangzah hiam paita akipan numei naupang tung a hiamgamna nasa lua a, huai deihlouhna ziak leh tunung a huchibang thil a tun nawnlouh deih latsakna in tuni in Zomi Mothers’ Association, Hmar Womens’ Association, Kuki Womens’ Association leh MPC/Womens’ wing makaihna in Lamka khawpi ah mipi tamtak in lamlian zui in DC/Ccpur office tan pai uh a, DC/CCpur khut ah Chief Minister ading memorandum pia uhi.

Tuni zinglam dak 10:30 vel in Lamka public Ground ah numei naupang ban ah, student 30,000 val ding kikhawm in huai apan IB Road, Tedim Road- DC office tan pai uh a, Security te’n anung leh ma uah veng uhi. DC/CCpur Sumant Singh,IAS in agenna ah District sung ah numei-naupang tung a hiamgamna nasalua lamdang sa mahmah kawm in, poisa petmah ahihdan gen hi. Memorandum ah numei pawlpite’n thil hoih pipi a gelh ziak un kipahpih mahmah ahihdan leng gen a, a hitheitan a etkaipih ding ahihdan mipi lak ah gen hi. Tuma a sualluih a om Goihzemching (6) ngei leng panpihna om thei liaiteng ah kithuahpihna pe ding ahihdan DC in gen hi.

Numei pawl tuamtuam kigawm Joint Womens’Organisartion(JWO) in Manipur Government kiang ah sualluih a om numeite Rs 1 lakh chiat piakding, tuaban ah sihna leh manna atuah ua leh a innkuante kiang ah Rs 5 lakh chiat piak ding in ngen ua, tuaban ah, kum 21 a phakma tan uh Government in panpihna in khateng a Rs 2,000 apiak ding uh, counseling leh medical treatment himhim a damsung ua athawn a hihsak ding, DC tungtawn a panpihna piak ding, Family Maintenance case himhim Chief Judicial Magistrate in zalentak a a sai ding chih tel in poin tuamtuam ngen uhi. Hiai lehkha ah, Heshi Haokip, President/KWU; JL Sawmi President/HWA; Mamawi, President/ MPC Womens’ Wing leh Dimzangai, President/ ZMA in suaikai uhi.

JWO thusuak in ataklatdan in May 18th 2006 in Mr Jamson in Tuilakzang ah naupang kum 14 sualluih a, November 26th 2006 in Mr Lalzawmliana in Panglian JB School a Class A simlel khat sual a, November 21st 2007 in Khamminthang in Class II simlel numei khat sual a, March 25 2008 in Lamminthang in Class B simlel khat sualnawn in, March 31 2008 in Nehlian Haokip in kum 18 a upa khat sualluih in hiai ni mah in pasal khat in School naupang numei khat mah sualluih sawm in lawhsam chi’n taklang uhi. Tulel in mipi lak ah puankhiak louh numei naupang kum 10
nuailam tung ah rape case 16 kiselgu om lai ahihdan leng JWO te’n taklang uhi. Tuaban ah 2007 kum in numei naupang tung ah hiamgamna case tuamtuam 27 om a, 2008 in 5 omta ahihdan leng gen uhi.

LOCAL NEWS:

DC in BDO/PO teng theihsakna pia

DC/CCpur in BDO/Program Officer teng kiang ah theihsakna bawl in, BDO/PO teng in amau’ block leh village level a a sukbu chin ding un point 5 pia hi. DC thusuak in ataklatna ah, sanctioned zah dungzui a NREGS nasepna a paiding ahihdan taklang in, Tipaimukh, Vangai leh Thanlon te ni 100 sung, Henglep leh Singngat te ni 65 ban ah, Lamka, Tuibuong, Samulamlan, Saikot leh Sangaikot Block te ni 50 chiat na a sepding uh, a sum leng sanction khit a om ta ahihdan taklang hi.

Nasemtu mi khat tung ah Rs 81.40 piak chetchet ding, sum neek hem kichi phallouh himhim ahihdan DC in taklang a, Tuaban ah thu poimawh tuamtuam genkhawm ding om ziak in April 10 2008 (Nigani) sunnung dak 12 a DC Office Conference Hall a meeting om ding ahihdan taklang in, huai hun ah BDO/Program Officer teng telkim chiat ding in zasak hi.

Ministry of Home Affairs te’n Lamka pha
Lamka, April-8: Ministry of Home Affairs,Government of India a Mr.Asgar Samoon, Director, Naxal Management leh N.C Zakhup te’n tuni zing dak 7 in Lamka hongpha uhi. Amau Manipur Police nuai a Modernisation Scheme apan kibawl Police Station leh Tuibuang a District Jail enkhia uh nitaklam in Imphal ah kiknawn uhi.

Helicopter zang in Tipaimukh Project survey ding
Lamka, April 8: Tipaimukh Hydro-electric Multipurpose Project Dam bawlna ding a thil omdan enkhe dingin Expert Apprisal Committee te’n April 11, 2008 zinglam dak 11.00 in Helicopter zang in Tipaimukh khua leh akimlak ah helicopter tung apan ariel survey bawl ding uh hi’n thusuak kingah hi. Amau hongzin ding ziaka Police duty dingte tuni in Lamka nusia in Tipaimukh zuan in zinkhia uhi.

ATSUM in Edn Minister kiang ah report
Lamka, April 8: Tipaimukh area ah teacher-te hoihtak a School kailou chih ziak in ATSUM in Education Minister L Jayeenta Kumar kiang ah report pia uh a, Minister in ZEO/CCpur in thil omdan report in theisak hi. Hiai thu tawh kisai in ZEO in Douliensung,DI of Schools/Tipaimukh kiang ah amun vapha a thil omdan enkhe ding in sawl hi.

Central pensioner- te amau mah hawh ngai
Lamka, April-8: Treasury office ah tulai in central pensioner-te’ paybill bawl lel ua, pensioner-te amau taksa mah in Treasury Officer kiang ah vakilat ngai hi. Amau taksa a vakilang loute paybill pass theilou ding uh hi’n kigen hi. Huailou in Govt.Dept.tuamtuam te’n Head of Dept apat post extension order omlouh ziak in paybill bawl theilou uh a, Dept 2 kia in post extension order a neih ziak un tuni’n Dept.2 te paybill pass a, lawh laktheih ding in Bank ah advice in thon uhi.

CHC Parbung ading van tamtak hongtung
Lamka, April-8: National Rural Health Mission nuai ah Parbung Community Health Centre ading van zat tuamtuam tung hi.Huaite bel Red Blanket 100, foot step 4, IV stand 10, Oxygen buuk 9, Ambu bag, Silicon set 1, bed side locker 30, kick bucket 5, Tailor scissor 2, wheeler chair 1, examination table 4, bedsheet 160, drawsheet 160, lukham 100, thousi leen 55, Generator 10 KV khat, Color TV 1, DVD Player 1, Weight machine adult 1, Oxygen trolley 2 leh medical gas 1 hi.

CDSU thusuah poisakthu puang
Lamka, April-8: CCpur District sung a PDS Authorised Representative (MLA Nominee) 4 in CDSU te’n Chief Minister kiang a MLA nominee- te tungtawn a antang hawmna sutzoplouh dia ngetna a bawl uh poisakthu puang in, PDS puahthak ahihna dia MLA te nasep khiakte mangngilhlouh poimawh ahihdan taklang uhi. Tulel a PDS Quota kidaih zoulou ahihdan taklang kawm in, antang tamsem hong paitheihna dia Student Union leh pawlpi tuamtuam tawh kithuzak a panlak poimawh a sakthu uh taklang uhi.

Ngasuonlei a site Mualsuang hongding
Lamka, April-8:Behiang leh Singngat kikal a Ngasuonlei tungah January 17, 2008 a Truck accident a si mi 20 te theihgige nang in amun ah April 12,2008 zinglam dak 11 in Mualsung kidawh honna om ding hi. Huai ah Chinzakhup, President/ United Zou Organisation(UZO) Gen HQ in hong ding hi Huai ah ex-gratia leng kihawm ding chihthu om hi.Truck accident asi mi 20 te kiang ah Rs.50,000 chiat hi ding a,aliam(major) mi 29 te kiang ah Rs.20,000 chiat leh aliam(minor) mi 8 te kiang ah Rs.5,000 chiat piak hiding uhi.

LMVSA in JAC gupthu puang
Lamka, April-8: Lamka to Moreh Vehicles Service Assn in tuni a thusuah abawlna uah, JAC Moreh Transporter in haksatna tuamtuam a tuahna ziak un Moreh line a Gari ataisak nawnlouh thu uah gupthu puang uhi. State Govt in ginatak in panla lou uh ahihdan taklang ua, phaizang leh singtangmi helpawlte apan sum demand tamlua mahmah ahihdan leng LMVSA in taklang uhi. JAC Moreh Transporter te nuakna tawh kisai LMVSA in gupthu puang uhi.

KIM Program kisuan
Kuki Innpi Manipur apan thusuak kingah dan in KIM General Assembly leh Kuki Chiefs Conference 2008 kithuah neihsawmna ah mi tamtak in kithuahpihna apiak ziak un kipahthu puang uh a,hileleng lemtan louhna khenkhat om ziakin hunchiam omlou a suan ahihdan gen uhi.

ZEO/CCpur office kiluh
Zan nitak in meltheihlouh pawl khat in ZEO/CCpur office leh H. Damzakam,DI of Schools/Thanlon office chabite kalsia in a sung ah lut ua, bangteng gumang uhiam chih bel theih hilou hi.

Transport in revenue tamtak mu
District Transport Office/CCpur in March 2008 khasung in Gari tax leh thil tuamtuam apan revenue in akigawm Rs 2,84,976 mukhia in Government ah pelut ngal uhi.

Medical team in Patpuimun zuan
Dr.Liankhozam MO/Patpuimun makaih in Medical team te’n tuni’n Patpuimun zuan in zinkhia ua, amau damlou tuamtuam te etna vanei ding uhi.

SUUNNA
Kapsuanmang (45) s/o (late) Thongkhanthang of Suangphuh,April 7,2008 nitak dak 7:40 in District Hospital ah TB natna in si hi.

IMPHAL:

Helpawlte’n Auto pute sum demand
Imphal, April 8: Manipur phaizang helpawlte’n Auto pute kiang ah sum a demand ziak un, zingchiang zinglam dak 9 apan nitaklam dak 4 tan Hapta Kangjeibung Palace Compound ah Auto Owners and Drivers Union te’n sit in protest nei ding ua, huai hun sung in Auto service om theilou himhim ding ahihdan thupuan nei uhi.

Naga numei 2 sihthu ki pholhthak
Imphal, April 8: Thoubal District sung a Wangmataba Oinam Leirak a apaisa March 21, 2008 nitak dak 10:10 vel ding a kaplup a om Chandel Naga numei 2, Langhu Esther Anal (30) d/o PS Angno Charengsim of Chakpikarong, Chandel District leh alawmnu Pashel Smawy (27) d/o Ps Angshu of Angal Khunou, Chakpikarong te sihna thu ah tuni in Pallel Lamkhai a Nungroulok IRCORD mun ah meeting poimawh tak neih in om a, huai ah All Tribal Womens Organisation, All Tribes Women Association leh pawlpi tuamtuam apan palai tamtak tel uhi. Amau agenkhawm dan un, Governmen ah memorandum pekhinta ua, dakkal 48 sung ngei a tualthat tu zonkhiak ding chih himahleh, Government in tuni tan a ngaihsak louh ziak un mawhpaihthu gen ua, tuni apan ni 5 sung (April 13 2008) tan a Government in bangmah action alak tuan kei leh, Joint Chandel People Action Committee panlakna tawh kiphinna in zuingal ding ahihdan gen uhi. Chief Minister tawh Chandel District Civil Organisation in hiai tungtang ana genkhawm khinta ua, CM in tualthat te matkhiak pah ding in thuchiam ana nei mah leh tuni tan dai dide lai uhi. Hiai kilemna ah, Chandel Naga Peoples’ Organisation President, CNPO General Secretary, NSUC President, ANTA Presiden, ALT President leh ASR General Secretary te’n suaikai uh a, Government lam apan in Chief Minister O Ibobi Singh in suaikai ana kai hi.

Dr Samuel pianchampha lawmding
Homoeoathic Medical Associaion of India, Manipur Branch in Dr Samuel Hahnemann, Homoeopathy mukhetu pian champha a kum 253 na thupitak in lopsawm uhi. Thusuak kingah dan in, April 10 zinglam dak 9:20 in State Guest House Conference Hall, Imphal ah lopna neih hiding a, huai hun ah Ph Parijat Singh Health Minister in khuallian hihna tawh uap ding a, Dr M Nara Singh President HMAI, Manipur Brach in Functional President hihna lending hi’n kigen hi.

Minister 12 leh DGP lemlak hal
Imphal, April 8: Civil Dress a kithuam Police Commando dia muanmawh te’n March 29 nitaklam dak 3:30 vel in Imphal West District sung a om Keishamthong Laishram Leirak a akaplup uh, Longjam Utam Kumar (34) s/o L Shanti of Keishamthong longjam Leirak sihna tung ah tuni in JAC pawl sousang mahmah in nitaklam dak 1 in Keishamthong Leirak mun ah Manipur Council of Minister 12 te lem ban ah DGP Joykumar lem halsiatna nei uhi. Amau huai hun ah, banner lian pipi tak khia in, lemna leh muanna om hen, thudik selguuk hinawn kei hen, diktat tak a vaihawm hi hen chih te takkhia uhi. Kumar luang lak ahih louh ziak in, Police te’n April 5 2008 nitak dak 9 in Magistrate thupiak in haltum uhi. JAC thusuak in agenna ah, Kumar ahihleh. Modi Xerox supplier hi’n gen ua, nautang maimai ahihdan gen uhi.

Government in MLA nominee teng subei
Imphal, April 8: Chief Minister official Bungalow ah tu nitaklam dak 5 in CM O Ibobi makaih in MLA teng in meeting poimawhtak nei ua, huai ah Public Distribution tungtang genkhawmna nei uhi. Thusuak kingah dan in, CM makaih MLA meeting te’n PDS item antang leh Khawnvaktui hawmkhiakdan tungtang kikum khawm uh a, huai ah helpawlte’n demand abawlte uleng genkhak in om a, MLA Nominee/agent te’n haksatna thupitak tuak ahihman in, MLA nominee/agent kichi himhim om nawnlou ding in subei uhi. Thusuak in agenbehna ah, PDS himhim MLA teng in amau constituency chiat ki buaipih ta ding ua, helpawl tawh kisai ah leng MLA te mah in amawh paw ding uh hi’n kigen hi. Tuma deuh in helpawlte demand ziak in Imphal west a MLA nominee om teng in a permit / license teng uh IW/DC ah ana pelut chiat uhi.

PULF Finance Secretary ki surrender
Imphal, April 8: Peoples United Liberation Front a self Style Project Officer leh Finance Secretary Jia Ul Haq @ Masti Jid (26) s/o (late) Abdul Latif of Sora Karanti Village, (under Kakching PS) US made 9 mm pistol khat leh tang 5 tawh Kotlen a om 27th CRPF te khut ah kipekhia hi. Tuni mah in amah ki surrender kipahpihna in program khat om a, huai ah CRPF DIG Manipur and Nagaland GS Gill leng va kihel hi’n kigen hi. Jia Ul Haq in 2003 kum in PULF zom a, 2007 March kha a faction apawt hun apan in Umar Farooq faction zom in dinmun poimawhtak len hi.

EXPRESS DOTNA LEH DAWNNA – I

NREGS tawh kisai a Express Dotna leh dawnna kichi mi tamtak in dotna non bawl ziak un kipah huai mahmah a, dotna hong lut te lak ah expert team in dawnna abawl bangzah hiam i taklang phot ding hi.

Question No 01: Greetings! May I know (Yes/No) whether NREGS is implemented through program designed by NISD/Hyderabad. If so how about involvement of Self Help Groups and NGOs in the program. – Pauboi Kipgen, NCM

Answer: According to Clause (9), Section I of the Act, NGO may be authorized by the Central or State Government to implement any work taken up under the Scheme. However as of now, the Central/State Government has not authorized NGOs.

Question No 02: NREGS toh kisai a work kibawl te etsakna di’n plantation kibawl te ahong pichin chiang a kuate’n tang di? – Kapta leh Nenei.

Answer: Manipur Rural Employment Guarantee Scheme (MREGS) Guidelines Rule 10 “planning for shelf of work/Type of works” chih kigelhna nuai ah nasep theih ding point 9 kitaklang a, huailak ah plantation kichi a telkha kei hi.

Question No 03: Funding System a Singngat, Henglep etc te 2007 adia 100 days a dia delaying tactics NREGS a zat pen uh bang chi dan a hi di? Churachandpur in Rs 34 Crore tangkha ngal a, ahih louh leh a fund in daih zoulou adiam? – Lunpi

Answer: Delaying tactics na chih na ziak a kithei chian kei a, bangteng hileh, hiai tungtang ah Village authority leh Block Development Officer kiang ah kanchet a poimawh ding.

Question No 04: NREGS ah nasem ding mi hiai zah ngai, a hih keh, mi hiai zah ding kichi om hia? Omlou? Nong hilh thei diam? Aziak ahihleh, kou area V/A te’n mi tamlua chi a select a bawl ziak ua kon dot ahi. – Anonymous

Answer: MREGS Rule 8, Clause 1-5 dungzui in Job card a min kikhum tengteng in nna a sem teitei ding uh chih thu a om kei hi. Himahleh, sepding a tam le bel a vek ua sepsak theih ahi. Huchi kawmkawm in sepding a tamkei leh V/A in nasemtu ding zah bikhiah bawlthei mah ahi. Huchi kawmkawm in, inn kuan khat a job card a min kikhum teng in a sep vek ut thouthou ua leh, VLW/Village Authority tawn in format/plain paper in ngetna piaklut theih hi. Ahih ziak in, ngetna pelut teng sepna piakvek ding chihthu a om tuan kei.

Question No 05: NREGS tawh kisai in Innsung khat a mi 2 le 3 lem kilate dan a sum ki sanction hia? Ahih kei leh, Innsung khat apan mi 1 chauh maw? Tua lawh zah dia bikhiah Rs 81.40 lak ah Rs 80/- chauh ki pe pawl om a complaint theih adiam? – Anonymous

Answer: Job card a lem kila teng dan a lawh kibawl hizaw lou in, na sem a kuan zah dungzui a kibawl ahi zaw. Rs 81.40 lak a Rs 80/- piak a om chih thil hitheilou ahi a, corruption ahi. Kintak a DC/Program Officer kiang ah complaint letter khiak ngeingei ding ahi.

Question No 06: NREGS a Secretary lawh (allowance) a om diam? Bang zah khawng ahi dia? – Alal

Answer: NREGS ah Secretary a om lam theih ahi kei. Bangteng hileh, NREGS implement agency Village authority ahih ziak in Village Authority secretary bel NREGS Secretary chi khat himailou ding hia maw? MREGS Rule 16- Funding pattern nuai a I (d) ah hichi’n kigelh hi. Program Officer leh a supporting staff te’n allowance bel neithei ding ua, Central Government in apiak ding chih ahi.

Question No 07: Sir, Is NREGS entitle for the whole family member who have Job Card?- Paominlien

Answer: Not necessarily

Question No 08: Ka haosa te un tha 45 draw ta, a khaw te tha 9 man pepan, thajong kuon di katima na kuon lou diu atin hiche hidih hinam a ki kuonlouna a draw ho hi iti dan ham dih hinam lungset in nei hil in. – LT

Answer: Rights to Information Act tungtawn in Program Officer ah detail in a withdraw teng uh lakkhiak a hoihpen hi. Tuaban ah, thil omdan DC/Program Officer kiang ah written complaint bawl ding ahi.

(Dotna dang te zingchiah hon ki sunzom nawn ding hi- Joint Editor)

EDITORIAL:

Tuni Thupi: “TOUPA ka tantuan ahi, ka kha in a chi; huaiziakin amah lametna ka nei ding” Kahlate 3:24

Press tawh pangkhawm in i gam puahni
Ei sang a gam changkang zaw, thupi zaw, pilzaw leh maban gelthei zaw gamte ah i zinkhak leh Press leh Media te poimawhna theihsiam semsem in om a, amaute tungtawn a i gam leh society bawldik theih ahi chih muhtheih in kilang mun mahmah hi. Himahleh, India malsuah bial ah Press te’n haksatna ana tuak mun mahmah ua, bangchi bang a sukveng ding hiam chih leng theih zawh huailou bang hi.

Press te sim mawh a om na mun state leh area khempeuh khangtou ngeilou ahi chih a gen uh dik ding in gintak huai mahmah hi. Press te’n hoihtak a a rights uleh a duties uh a sep pichin chiang un, society sung a om pawl tuamtuamte ading in mouthpiece hoihtak hong hi a, Government in leng bildawh mahmah in, Press te tungtawn in i gam ah Development tamtak hong luanglut naksek hi. India malsuah bial ah bangzahta a Press te’n haksatna tuak uhiam chih i ngaihtuah chiang in, khasiat huai ton tam thei mahmah a, kuapeuh i profession chiat ah kisu buaikei ni chih uthuai ton tam thei mahmah hi.

India a electronic media minthang mahmah New Delhi Television (NDTV) neitu Prannoy Roy in agendan in, “New Delhi, Bangalore, Pune, Mumbai, Kolkata, Chennai leh Hyderabad te ah newspaper leh electronic media te hoihtak in paizom thei a, himahleh, Bihar leh India malsuah bial ah thawm zak ding om gige a, mipite a hong pilchiang un Press te zahna ahon pe mai ding uh” chi hi. North East Media Forum (NEMF) in leng Press te haksatna ngaikhawk mahmah in, zan in India Prime Minister Manmohan Singh bang kimuhpih hial uhi. NEMF in ahihleh, India malsuah bial a Pressmen te security piak ding, tuaban ah, amaute hinna humbit pih ding chih te ngen uhi.

Ahitak gen in, India khawpi tuamtuam ah bel Press a semte Private company piching mahmah te tawh kibang in lawh sang taktak pia ua, India malsuah bial ah bel lawh tawm chik tawh newspaper ki run zou hamham bang hi. Thukal zeh in gen zualta le hang, Manipur Hills Journalist Union nuai a om paper tuamtuam te’n haksatna genvual louh ana tuak in, electricity chauh ah leng haksa sa petmah uhi. Tuateng baak ah, helpawl tawh kal ah leng ki theihsiam louhna om mun mahmah a, tua te genlouh in a subscriber te apan fee mu ginalou in a chang chiang in khawlsiatna tuak zeuhzeuh zaw mah lai uhi. Communication a haksat mahmah ziakin, khawl sia bawl ding in neih leh neihlouh gen lou in, Guwahati ah mechanics te sap ngaisek in om hi. Press te bang hausa hita leh, Guwahati apan flight in leng sak ziahziah thei ding ua, himahleh, muh tawm ne tawm ngen ahih ziak un, khawl a siat chiang in ki chai vawt sek in om kha naak hi.

State dang a semte’n lawh, insurance, allowance leh adangdang te hoihtak tak in mu ua, himahleh, Manipur leh a sehvel a na sem te’n lawh bang muh neilou in, haksatna anatuak sek uhi. Thagim dan endi chi le hang, Lamka zang a paper kisuah te neu national paper te tawh teh in neuchik himahleh, staff kidaih louh ziak in gimtak leh kho ul pawt zen in nitak dak 12 tan bang beisek uh a, huai kawmkal ah a khenchiang in pawl tuamtuam apan vauna ana ngah sek zawmah uhi. Society bawl hoihna ding leh gam leh nam adia sepna poimawh mahmahte lak a khat ahihleh, Press hi a, huai ziak in, ki ngeksak na thu hilou in, Press te contribution (nasep) leng theihpihna (recognize) piak hun mahmah ta in kilang hi.

Mipite’n Press te dinmun ahon theih siam chiang un, i lak ah thugelh leng hangsanta in gelhtheih hita ding a, corruption case leh investigation tungtang leng hangsan tak in mipite theih in kisuah khe ngam ta ding hi. Himahleh, i gam a mial mahmah lai ziak in, India malsuah gam a Pressmen te’n a duty te uh hangsan in paipih ngam lou ua, mimal a thuakkhak ding lauhna ziak in hangsanna kichi mangta hi’n kilang hi. Assam Daily ‘Asomiya Pratidin’ a semtu khat Mohammad Muslimuddinngei leng April 1 2008 in Nagaon district mun khat ah mulkimhuaitak in thah in ana om a, huai lou in leng Journalist tamtak kithat kheta ding in gintak huai mahmah hi. Journalist te a tawh kisai mah in, crime dairy piching lua nei hikei mah le hang, 1987 apan tuni tan in Journalist 20 val bang thah in om ta ua, Manipur ah leng tuabang mah in Press te’n haksatna ana tuak in, tuma deuh in People’s United Liberation Front (PULF) te’n Imphal a om Press leh media teng avau ziak un newspaper leng khawlsak in an aom hi. Huaiziak in Press te ading in nisa khawvak susk ngei lou ding hiam chih dotna poimawh tak ahi hi.

I gam in khantouhna ma mawh taktak ahi chih leh, khantouhna duh in I gam a dangtak mahmah I chih leh, Press te kithuahpihna piak a, amaute tungtawn a I gam puah ding dan I ngaihtuah uh hun mahmah ta hi’n kilang hi. NDTV in a suan mahmah uh Senior Reporter Barkha Dutt bang I et leh thautang lenlai in Jammu and Kashmir ah valut a, thauvui thautang nuai ah news reporting bawl thouthou hi. Mi’n ahinna risk ngam a na a sep ua leh, North East a Press om te’n leng breaking news buaipih in a zu aham thuak in nasem ut law mahmaha, huaiziak in Press te free hand piak a, amaute I zat siam ki sam mahmah ta hi’n kilang hi. Press te I zat siam naak leh khantouhna in hon zuiding a, thu tamtak I theih beh ding a civil society tuamtuam te tawh pangkhawm in I gam I tunding kik zou mahmah ding chih I mit in I gal muthei ta hi. Bangteng hileh, I buaina te uh a hoihlam deihna ziak ngen ahih man in kipah huai veve a, Press te leh Civil society ban ah pawl tuamtuam te kithuzaak a I gam I puah taktak uh ngaita hilou hiam chi ut dan I hi.

NREGS tungtawna hamphatna om theite
(Facilities available through NREGS)

Script by : Chinkhanlian Guite
Programme Executive
All India Radio, CCpur

Kum 2005 in Phualpi solkal(India govt) in National Rural Employment Guarantee Act. (NRGEA) ahon pan a, hiai Act nuai ah NREGS kichi India pumpi huap in hong kibawlkhia hi. Hiai dungzui in state chih in amau state chiat a ding in State Employment Guarantee Scheme hon phuan uhi. Huaiziak in Manipur State Employment Guarantee Scheme chih ahi. Hiai pen NREGS ahi a amin state a kikhek lamdang lel ahi.

March 13, 2006 a kipan in hiai scheme Tamenglong District a zat patna ding in hiai guidelines hong kibawlkhia hi. A tunglai in India gamsung District 200 kia a sepkhiak ding a kibawl himahleh tu’n India gam pumpi huapa zat dia keklet ahih tawh kiton in hiai scheme zat vek ahi.

A thiltupte :
i)Innkuan khempeuh nek-le-tak tasamlou a koih tupna leh meikuang paisuak ding venna.
ii)Kumkhat sungin innkuan khat ni 100 sanga tawmzawlou kilawhna piak ngeingei ding
iii)Kilawhna tungtawn in tangpi kikoptheih vante (community assets) lam bawlkhiak.

Sum piakdan ding:
i) Job card neisa nasemtu teng kiang ah kal teng ahihkei leh kalnih dan a thaman piak ding.
ii) Numei leh pasal nitha kibang a piak hiding.
iii) Khut nasep khengkhe thei, khawl, ahihkei leh Contractor-te zat phallouh him him ahi.
iv) Village Authority leh hausate’n sepdia a sehsa(approved work)te kia septheih ahi.

Zodawna tengte silh leh ten kisam, nek-le- tak liangvai a meikuang paisuak thei ding tampi i omlai un Phualpi solkal in NREGS kichi hon pankhe zenzen a, a hamphat huai petmah hi. Hun paisate ah leng hiaibang deuh scheme tamtak MNP, NREP, RLEGP, IRDP chih khawng ajawng bikte kankuahna ding om thamta mahleh hiai Scheme bang bang a hamphat-huai Scheme ana omnai kei hi. A hamphat huaina leh ham-phatna omthei te a ban in i ensuk ding.

1. Tulai in phaijang ah laisiam sepding neilou tampi vakthap in a om ua, tua mai hilou in ei zodawn a tengte nasan tamtak khut nasep peihlou chi napi in phaijang ah nitha kiman louchik chik in i kilawh uhi. Huchih lai in NREGS in eimah innluma septheih ding nasep haksa silou, leh nitha kiman mahmah hon pia hi.

2.Kumkhat sung a ni 365 om lak ah ni 100 sung kilawhtheihna hon pia a, atomlam a gen in ni 100 sung solkal in hon pumvak ahi mai hi. Hiai kan a hamphat-huai koi ah i mu nawn tuan dia ?

3.Kilawhna tawh kisai in numei leh pasal khentuam omlou in nitha kibang sipsip a piak ahi.

4.Kilawhna munte lah mi mitmei veng selou, mahni khawsunga hausate lemchihna mun a sep himai. I septe lah mahni khawsung a zat theih ding ngen hizawmah. Inntek tak leh tlawmngai tak a septheih ahihman in lungdam huai hi. Atomlam in gen lehang mahni nasem a sum lawh theihna lampi omsun ahi.

5.Na sepna mun a kihih liamkha a om zenzen leh a thawn a ki-etkol theih ahi. Huai mai hilou lai; nasepna mun a khukbai khelbai khop a tuahsiatna hiam sihna tanpha tuak a omkhak leh zong jangna dopna Rs. 25,000/- piaktheih ahi. Nasepna mun a naupang tonpih a kisukkhak leh leng a thawn a etkol theih ahi.

6.Nasepna a nupi nau pomlai mi 5/6 bang a om leh naudon ding khat goih theih ahi. Tua nau don pen leng nasemte lawhzah mah piak hiding hi.

7.Mibanglou deuhte leng amau septheihkhom bawlsak a kilawhsak theih ahi.

Hiai teng ban ah zong hamphatna tampi gen ding a om. Ahihhang in a semtute leh zangtute hahkatna leh gin-omna ah a kinga lian mahmah. Sepding zonse ngailou, i sepzawh chianga leng sepman i omna mun a hong kipe lai, i sepsuah teng lah eikhua chiat ading ahih ban ah; kum khat a ni 100 thaman cheng 8000/= bang muh theih na lai.

Hiai a hampha i kisak keileh bangchik chianga ei ading tuam hong om ding hiam. kisa ni, semni in i sepman leng mubok nihang.

http://www.manipurexpess.com http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s