NA ITNA UAH ITNA HEL UN (2 Peter 1:5-7)

-Pastor Dr. Hs.Chinsuanthang

Thumasa: Laisiangthou ah, mi kuapeuh itna nei peuhmah Pathian asuak ahi ua, Pathian a theilai uh chih i mu hi(I John 4:7-8). Mi’n Pathian ka it chi henla a unau hawleh amah mi zuauhat ahi. A unau a muh gige bawn a it keileh amuh ngeilouh Pathian bangchidan in a it thei dia? a chi hi(I John 4:20-21). Mi kuapeuhin Pathian a itleh a unau leng a it ding ahizaw chi hi. Huaiziakin kuapeuh in Pathian a itleh a unau leng a it ding chih Pathian thupiak ahihmanin “ Unaute itna ah itna helding ding” chih genkhom lehang i chi uhi.

1. GINNA A HOIHNA HELDIA THUPIAK: Jesu Christ i gintak ziak ua omdan hoih midangte hon muhpih leh theihpih dinga om ding ahi. Huai tuh ginna ziaka hoihna ahi. I zudawn, i guktak, i zuaugen hat, i mi muhdah hat, i mi gensiat-hat leh i lungsim hoihloute topsan ding ahi. Huchiin Jesu Christ i gintak ziakin i omdan kikhek leh hoih mite’n a muding ua, lamdang sa in Pathian a phat ding uhi. Jesu Christ min lamdang ahihmah bangin midangte’n Jesu ziaka kikhek mite lamdang asa zel uhi (Isai 6:9).

2. HOIHNA A THEIHNA HELDIA THUPIAK: Leitung zaw tomchik lel adinga i khualzinna uh ahi a, denchiangin Van-gam ah Pathian tawh omkhawm dingte i hihdan khong i theihchian ua, thilhoih i hih mengmeng ding uh ahi. I mihinpihte haksatna, gimthuakna, gentheihna leh adangdangte theihsiamna lungtang nei in migitna, chitna, nunnemna leh itna tawh atung ua hoihna hihlang dingin Pathian in ahon deih hi. Aziakbel eite leng sa a damlai i hihman un huchibang haksatna thuak-thei i hi uhi.( Hebrute 13:3). Huaiziakin Jesu Christ i gintak ziak ua hoihna i neih uh pansan a theihsiamna tawh neithuah dinga thupiak i hi uhi. Midangte dinmun leh haksatnate theihsiampih ding ahi.

3. THEIHNA A KIDEKNA HELDIA THUPIAK: Jesu Christ sunga hotdamna nei a, khalam mitvakna leh muhtheihna neite’n theihsiamna a nei uhi. Pathian in mikhial ahon ngaihdam a a hehpihna ziaka hotdama om hilou banga mitunga gawtna, siamlouh tansakna, mawhpaih a sitak ahi chi a kidektheihna neilou hial a i mihinpihte tunga omding hilou ahi. Huaiziakin Pathian itna leh hehpihna ziaka i khelhnate uh ngaihdam a hihdan i theihna uh bang in midangte tungah leng itna tawh kidekthei dingin Pathian in ahon deih hi.

4. KIDEKNA A KUHKAL DIA THUPIAK: I mihinpihte tunga huhamlou, gilou tellou a itna, ngaihdamna leh chitna khatvei kialeng hilouin kuhkal taka i damsung uh nei gige di’n Pathian in ahon deih hi. Unaute’n i tungua thil ahihkhelh ua leleng kuhkaltaka 7 vei mun 70 bang ngaidam dingin Peter kiang ah Toupa Jesu’n a hilh hi. Khatvei ka ngaihdam sa chi hiam leh ka damsung ka ngaidam ngeikei ding chipeuha tangteel sihtan banga i om ding uh hilou hi. Kuhkal taka ngaidam toupek zel zawdingin Toupa’n eite ahon deih hi. I hehna leh thangpaihna uah leng kidek a kuhkaltaka kidek paisuak dingin Pathian in ahon deih hi.

5. KUHKALNA A PATHIAN LIMSAK DIA THUPIAK: Nasep silbawlna khat peuh peuh a kuhkaltaka sem, hileleng Pathian limsakna tellou om theilai hi. Saptuam sungah leng lawh(pay) muh ziaka sem hamham himahleh Pathian limsak ziak leng hilou chih bang omthei hi. Saptuam sunga dinmun poimawh letkhak ziak leh dinmun hoih deihna ziak hiam khonga kuhkaltaka septheih tham dingin i ngaihtuah hi. Huaiziakin Pathian limsakna ziaka kuhkaltaka sepna in sepman (lukhawng) anei hi. Pathian limsak ziaka ahaksa leh nuamloute tanpha kuhkal taka topsan mailou a thuakmualsuah ding ahi. Pathian limsakna ziaka kuhkaltaka thuakna Jesu ah athawn ahi ngeikei hi.

6. PATHIAN LIMSAKNA A UNAUTE ITNA HEL DING: Pathian limsak kichi khem a biakinn khong ah leng vanlam a khutte liklik khem a mahni saptuampihte itlou chihbang atam hi. Saptuam sunga Pastor in a Pastor hihpihte itlou, dem a aminsiatna ding zong chihbang kitam hi. Huailouin saptuam upa leh upa kidem a kigense tuah chihbang atam hi. Huchimah bangin saptuam mipite lakah leng ahong hitou zel hi. I hinkhua, i omdan uleh i lungsimte khong uh Pathian, “ Itna-Pathian” ahihdan mite’n hon muhpih ding omlou hi. Huaiziakin Pathian limsak mi’n a saptuam pih (unau)te a deihsakin a it ngei ngei ding ahi. I Pathian limsakna uah unaute itna alou theilou a i hel(telsak) ding uh ahi.

7. UNAUTE ITNA A ITNA HEL DING: Mihingte’ ki-itna kia ah Pathian’ deihdan leh kipahna atungzou kei hi. Pathian deihdan leh alungtunna ki-itna bel Jesu Christ ziaka ki it-tuahna ahi. Pathian hon itna huai bel Jesu Christ tellou a ki- itna zaw bangmah ahihlouhdan i muthei uhi(I Cor. 13:1-3). Huaiziakin eite ki-itna bel Pathian in ahon itna, Jesu Christ mina ki-ittuahna ahih ngeingei ding ahi.

Jesu Christ mina khat leh khat i ki-it tuah ua, i kideihsak tuah a, aman hon deihna banga i om chiangun midangte’n Pathian itna ei a om a muchian ding ua Pathian aphat ding uhi. Thamlouin Jesu Christ neite i hihdan min ahon theita ding uhi(John 13:35). Huai ahihmanin, “ Na unaute uh itna ah itna hel un” chih thupiakin a gennop ahihleh i ki ittuahna uah Pathian in mikhialte a hon it ziaka ahon piak Jesu Christ itna helding chih ahizaw hi. Huaiziakin saptuam sunga Pastor-te, Upate leh saptuam michih Jesu Christ itna a ki- ittuah chiat leh kideihsak tuah chiat a i omding uh ahi. I gamsung ah hichitela sualna, gitlouhna leh diktatlouhna in ahon pumtuam bang dang ziak hilouin i ki ittuahlouh ziak uh ahizaw hi. I ki ittuahna uh beh-le-phung ki itna hiam, unau-sanggam ki itna maimai(mihingte ki-itna maimai) ahihlouha Pathian hon itna Jesu a ki- ittuahna hileh i buainate tengteng amang ding hi. Ahi bangbang a i thugente ngaihtuah chiat a mahni ading chiat in kilak lehang chi’n i kichial uhi. I gamsung a kialna ziaka unau tampi gentheihna thuakte Jesu Christ itna a it a, tuate awlmawh pen a neizaw dingin Pathian in ahon deih hi.

Manipur Express April 13, 2008

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s