Manipur Express | April 26, 2008

Lamka a theitui kizuak tamtak mihing damtheihna dia lauhuai hidin patauh huai:Cold drink tamtak akibawl hun leh ahun beini ding tellou kizuak

Lamka, April 25: Lamka khawpi a dawr, dukan leh hotel tuamtuam a Cold drinks kizuakte mipi vantang adin damtheihhuai mah hiding hiam chi’n tuni’n Manipur Express, The Sangai Express leh Nisin Thuhiltu Press team in study bawl uh a, huai ah muhkhiak poimawh hunkhop nei uhi.

Khawpi sung leh pua a dukan/dawr leh hotel khenkhat a kizuak theitui (cold drinks) tuamtuam, Frooti, Maaza, Sprite, Coca cola leh Pepsi-te Press team in a etkhiakna uah a hunbeisa (expired) tamtak om hiding a ginlelh huai hunkhop mu uhi. Dukan khat apan Frooti I litre a etna uah, akibawl ni leh ahun beini(manufacturing date & date of expiry) kinuaimang sa in om hi. Sprite khenkhat lah expiry date leh manufacturing date kigelhna himhim omlou a, atuamna bawm ah bel “best before two and a half months from manufacture” chih kigelh zawmah a, abawlna mun uh kigelh muh ding omlou in Registration office chauh kigelh hi.

Maaza 1.2 litre diakdiak te ah manufacturing date bangmah kigelhlou in, company khutsuak hi taktak mah hiam chih tanpha theih haksa a, chik kum a kibawl a, bang hun leh ni tan dawn theih ding hiam chih tuangkei mah leh, “best before four months from manufacture” chih kigelh thepthup zel hi. Maaza 1.2 litre te atamzaw ah manufacturing date kigelh lou a, khenkhat ah bel manufacturing date pe’n koi hiam ah seal (rubber) a kitah thawh tawm bang in om a, khenkhat ahihleh, seal kitahnate khut a kinuaimang mah bang hi.

Frooti khat ah MF/07 kichi a, 2007 kum a bawl ahi chih kichian a, chik kha a bawl hihiam chih theih hikei mahleh, bawlkhiak ahihnung ‘kha 2 leh a kim tan a dawn ding’ chih ahih ziak in, 2008 April kha beidek ahih man in, ahun bei mahmahta hilou hiam chih Press te muhdan ahi hi. Maaza kitunna lehkha ah, ‘For Mfg Location, Mfg Date, Batch No & MRP: See Neck,’ chih kigelh mahleh a plastic bottle ngawng ah akibawl kum, Batch No leh aman muh ding khat leng omlou hi.

Press te’n mun tuamtuam apan thu a kaihkhawm dan un khawlum/nipi hong kipat tawh kiton in Lamka khaw ah Cold drinks- te paihat mahmah a, dukan a ki-stock te bei zungzung hi’n kigen hi. Tua thamlou in khawpi tuamtuam a kizuak khong zouloute Lamka khawpi azuak dingin ki-lalut(importt) hihiam chih theih haksa khop in om a, huai cold drink-te mihing gawl leh gilsung a lut ding in chemical zang a kibawl theitui ahihman in company manufacturing date pe’n alou theilou in muhtheih dia a kigelh ding hi a, March 2008 in in Lamka zang ah manufacturing date tellou a tamzaw hidanin kigen mahleh tu in bel dawr leh dukan khenkhat ah stock thak hongtung hihtuak a, ahihziak in dawr tamtak ah manufacturing date kigelhlou tamtak mipite ading in zuak hi veve lai hi. Cold drinks dawn ziak in China leh mun tuamtuam ah mi tamtak in sihlawh uhi. Bangteng hileh Lamka khawpi sung ah consumer forum hihhat poimawh petmah a, District Administration in leng hibang mihing damtheihna leh hinna adia poimawh thilte ah sum muhna ding lel ngaihtuah a poisakna bei a sum zongte a etkai poimawh lua chih tamtak apan thutut kingah hi.

DC in khua 16 ah showcause notice piaLamka,

April-25: Zan leh tuni’n Upper Lamka a YPA Hall ah NREGS tawh kisai Social Audit & Training om tuni’n zou uhi. Sumant Singh, IAS, DC/CCpur in NREGS nasepna ah mipite’n a sepding zah uh hausate’n a sepsaklouh ziak un khua 16 ah showcause notice pia a, April 28 tan in DC ah dawnna pekawm in amau taksa mahmah vakilang ding in theisak hi. DC in na hoihtak a asepkei lai ua leh fund teng pekik vek dia theisak in police ah leng FIR(case) bawl hidin leng vauhilh hi. DC in showcause notice a piak khuate :

Tipaimukh & Vangai Range ah Tinsuong, Senvon, Tipaimukh, Parbung, Damdiai leh Tallan khua. Henglep Block ah Hengkom, Chongchin, Tuilumjang, Santing L, Phaitabang, Maumual, Nungsai leh Aina khua. Singngat Block ah Kangkap leh Tuima khua hi uhi.

Police- te’n misi leh gari vala uhLamka

April-25: Zan zingkal in Santing khua ah DI gari (No. MN-02 9081) accident ziaka misi 1 om tungtang ah police ten Santing vapha uh a, accident asi Paulianmuon (33) s/o(late) Nguldou of Santing siluang hongpuak ban uah gari leng vala uh a, tuni zing dak 5:00 in Lamka hongtun uhi.

Misi luang Dist. Hospital a Morgue ah post mortem bawlzawh in a innkuante pia uh a, gari pen police station ah koih uhi. Thu kizadan in gari tailai khamsese lou in Paulianmuon gari tailai khawlsak ding a kham selou in tomkhe kha a, huaiziaka si hidan in gen uhi.

Central team in Tipaimukh zuan Lamka,

April-25: Ministry of Heath & Family Welfare, Govt of India nuaia National Institute of Communicable Diseases akipan official 3 leh Manipur state official 2 Tipaimukh area pha ding in hongzin uh a, Lamka akipan in Dr.F.Thienkhogin, Dist Malaria Officer leh Dr.Tualkhankham, Sr Med Officer in zui uh a, tuni mahin Tipaimukh area zuan in zinkhia uhi.

UZO Special Assembly-cum-Election

Lamka, April-25: Zouveng a Zouhall Hall ah tuni zinglam dak 11 apan in UZO Special Assembly 53veina leh ZWC election kithuah zang uhi. Huai ah kum 2008-09 sunga UZO Gen. Hq. President, Secretary leh ZWC member ding tel uhi. President din T. Hangkhanpau,MLA leh Gen. Secy dingin Liensuonkap tel ching uhi. Huaiban ah ZWC member ding in S. Nengkhenthang, L. Khamliankhup,M. Sabastian Lunsuanpau, James Khamchinsuan, T. Khamminlun, S. Zamgenthang, M. Zamkhosuan, H. Liankhanmang, T. Khupzagin, S. Lianminthang leh T. Tunmang telching uhi. Telching thak a omte T. Gougin, Pro-term Speaker UZO in gin-omna thu chiamsak a, Office Bearer dangte tunung in guang fel ding uh chihthu om hi.

V. Vungzapum hong kisuanLamka,

April-25: Upa V. Vungzapum @ Pumboih in Nagaland a State Bank of India, Chumukedima Branch ah kum 2 val Assistant Manager semlai SBI/CCpur Branch a sem ding in order suak a, huai join ding in tuni in a innkuan un Chumukedima(Nagaland) akipan a tenna mun uh Zenhang Lamka hongtung uhi.

Pingpei ziak in mi 1 in liamlawhLamka,

April-25: Lokesana (30) s/o (late) Mani of Kumbi tulel in Lamka College campus a Water Reservior bawl a om tuni sun dak 12:00 vel in pingpei kipei in hihkha dek a, a taina ah kipuk in a muk leh a tal tatliam a, tu’n District Hospital a etkol in om hi.

Maruti Van pei(tyre) khat kiguLamka,

April-25: L. Chinthang of Tedim Road in a tenna inn compound sung ua Maruti Van(No. MN 02/5432) akoih uh zan nitak in meltheihlouh pawlkhat in a malam pei(tyre) khat tolkhia in gumang uh a, tyre a lakkhiakna mun uh suang a dousa in taisan zawmah uhi. Inn-neite’n nitak teng in a gate-pi uh khak gige uh a, gutate koilai akipan hiam ahihkeileh bangchidan a lut-thei uhiam chih theilou uh hi’n gen uhi.

Police verification zawhkin ngai

Lamka, April-25: National Health Rural Mission(NHRM) nuai a contactual staff kuapeuh in akintheilam in police verification a bawl uh poimawh hi’n thutut kingah hi. S

SUUNNA Sieklalmuan (45) s/o (late) Upa. Khaigou of Hill Town, tuni zinglam dak 11 in Dist. Hospital ah Sungna in si a tuni mah in kivui hi.

IMPHAL NEWS:

Helpawl dia gintak nih kaplum

Tuni zinglam dak 3:30 vel in 21st AR te’n Kakching Police station huamsung a om Wabagari Khasungpat Bufallo farm ah meltheihlouh helpawl dia gintak mi 2 kaplum uhi. Kaplup a om te ahihleh, Elangbam Kanta (30) s/o (late) T Iphabi of Khyanglam Mayai Leikai leh K Premjit @ Bhai (30) s/o (late) Koman of Khyanglam Mayai Leikaite kaplum ua, amaute bang pawl hi uhiam chih theih hilou hi’n kigen hi.

Delhi apan VVIP 15 Manipur hongtung

Imphal, April 25: Union Government apan Central palai VVIP official tamtak tuni nitaklam dak 5:30 in ni 2 sung om ding in state capital Imphal hong tung uhi. Central palai hongzinte ahihleh, K M Chandra Shekhar, Cabinet Secretary, Madhya Gupta Home Secretary, Ms Rita Sharma Secretary (RD), Ms Gina Rirat Rao Secretary, DoNER, Dr Subhash Panion Secretary (Planning commission) Dr Renuka Vishawathan Secretary (Co-ordinator and PG) leh official khenkhat kigawm mi 15 hidan un kigen hi. Amau’ Airport apan Raj Bhawan zuan ngal ua, Governor tawh kihouna aneih zawh un, Chief Minister O Ibobi Singh tawh houlimna neinawn uh hi’n kigen hi. State Government in leng amaute state Guest dan in puang a, Law and order, Railway, Petrol and Natural Gas, Food and Public Distribution ban ah thu poimawh tuamtuam state Government official te tawh houlim ding uh hi’n kigen hi.

Kaplup mi 3 te theihkhiak hita

Imphal, April 25: Police Commando te’n zan nitaklam dak 5:40 vel ding in Lamphel Police station huamsung a om Langol Games Village ah helpawl dia gintak mi 3 a kaplupte min uh theihkhiak hita hi. Police thusuak in agendan in kaplup a om te ahihleh, Md Azad Khan (30) s/o Md Abdul Rahman of Yairipok Chanampat, Md Hussein (25) of Yairipok Chanampat leh Md Karing Khan (30) s/o Sanayaima of Yairipok Chanampat te hidanin kigen hi. Hiai sihna tawh kisai in Joint Action Committee dinkhiak in om a, amau tuni in Chief Minister kimuhpih ding in a bungalow zuan mah le uh Police te’n lutsak utlou in kinawktuahna piang a, Police te’n a kap uh teargas leh rubber bullet in Haria Bibi (30) of Ningthounai Mathak a tal ah kapkha in Shija Hospital ah puaklut in om hi. Police te’n JAC makai tamlou te lutsak in amau’ Chief Minister kiang ah memorandum pia uhi.

Bomb puahziak in traffic buai

Imphal, April 25: Imphal Police station huamsung a om Babupara ah zan in bomb puak a, tuaban ah Polo Ground bul ah IED Kg 5 vel puak manlou a lakkhiak ahih ziak in tuni apan gari parking na leh taidan tawh kisai bawlthak vek in om hi. Thusuak kingah dan in, nidang hun in Secretariat kong mai teng ah private gari khawlthei zel mah leh tuni apan kham bikbek in om a, Babupara ah leng Private gari himhim park thei nawnlou ding hi’n kigen hi. Paona Bazar (Road) ah private gari pei nihnei apan a tunglam, Rickshaw leng tel in lutsak hinawn lou ding in thusuak kingah in gen hi.

KRA member dia muanmawh kaplum

Imphal, April 25: Tu nitaklam dak 3:10 vel ding in Khurai Sajon Leikai ah Imphal East Police Commando te’n KRA dia muanmawh pasal khat kaplum ua, a taksa apan .36 hand grenade khat leng musuah uh hidan in thusuak kingah hi. Misi luang chet ding in RIMS morgue ah koih in om lel hi.

EDITORIAL:

Tuni Thupi: Unaute aw, thu kia in it kei nihang, lei kia in leng itsam kei ni; thilhih leh chih taktak in hizaw hen.” -1 Johan 3:18

Lamka ah etzui tuak thil tamtak om Mundangte mah bangin Lamka khawpi ah leng nekzonna ding a sum zondan chi tamtak om a, hileleng mipi in a lei uh thil(consumable item) tamtak mundang tawh kibang hetlou in sum muhna ding ahih phot leh mihing hinna adia siatna tun thei leh lauhuai hileleng poisakna himhim tellou a zuak a sum zong bangzah hiam om hi. Tuma deuh apan in guktakdan chituam deuh hong kipan in dukan/sumbuk khenkhat hoihtaka chabi a kikalh leng hihse hetlou a van tampipi gukhia thei bang om a, guta hiamgam leh huhamtak a om banah khamtheih hih kawma poisakna neilou tamtak leng om hi. Huaite akigen minthang No. 4(Heroin powder) leh damdoi tang khamtheih sum muhna ding a zuak teiteite thilhih ahong kipan himai hi.

Singtangmite adia mehlim pente laka khat sa(meat) hi a, himahleh mi hunkhop in sa zuakna mun a kizuakte lei sangin a meltheih uh zazuaksawnte akipan in kg. 1 ah Rs. 5/10 in tamzaw leleng lei-utzaw uhi. Huai leng thildang bangmah ziak hilouin sazuak khenkhat in sapul(damlou a si), a damlou leh kumzon khong zuak pawl om a, khenkhat in lah bawnglu koihkawm in lawisa zuak uh chih kigen sek hi.Sazuak tengteng in huchidan in ahih uh chihna hilouin poisakna neilou a sum kia mitsuan khenkhatte hihdan taklang i hizaw hi. Huchi mah bangin nektheih zuakna hotel khenkhat ah nektheih a zuak uh khenkhat mihing adia nek taknawnlou, a luipipi zuak uh a, huaite nek ziaka sungkhawh, santen leh sunglam natna tuamtuam vei tamkhop om din kilang hi.

Tuni a i gen ut uh huaite tawh kizoiton summet bawlna chikhat –hileleng diktakna tasamte ziaka mihing damtheihna leh hinna adia thilpoi sautak tunthei “Cold drinks” tungtang hizaw hi. Tulai in khawlum hun taktak kipan ding in om a, dangtak ziakin Hotel kia hilou in dukan khenkhat a cold drinks tuamtuam-Frooti, Sprite, Maaza, Coca cola, Pepsi leh adangdang kizuakte khong zungzung uhi. Tukum ngial in houh khua lah lum baih, tuinek leng haksa petmah ahihziakin rickshaw a tui pua a zuakte tanpha sum muhoih petmah suak uhi. Huaiziakin tui man tanpha pung hial chih ahi.

Hibang nek-le-dawn ding bawlkhia Company-te’n dan dungzui in Cold drinks a bawlte uah abuk(bottle) pua hiam a sitna sinte ah a bawlkhiakni uh, a hun beini ding ahih kei aleh a bawlkhiakni ua pan kha bangzah tan zat tak hihiam chih taklang teitei sek uhi. Aziakbel hibang cold drink i ngaihnat mahmahte uh bawlna ah damdoi(chemical) chituamtuam helkhawm sek uhi. Huchibang damdoi(chemical)te nek-le-dawn hun bikhiah ahih beinung in poison suak thei a, mihing damtheihna leh hinna adin thil lauhuaipi suak maimah pawl om theilua h.

Media team khat in Lamka khawpi sung a joint investigation a bawlkhawmna ua a thil muhkhiakte uh khenkhat chimul thousak thei hi’n kilang hi. Amau dukan khenkhat akipan in cold drink chituamtuam lei hial in a etchetna uah huchibang cold drink buk tamtak ah a kibawlni/hun(manufactured date) leh a hun beiding kinulmang mawk hi. Hibang chindan thilte pilvang taka ngaihtuah detdet ahih aleh thil lauhuaipi suak hi. Huchi ahihleh a kibawlni apan kha 2/4/6 chihte bangchi kitheih ding hiam? Ahun beisa hiam zuaktak nawnlou leh mihing damtheihna adia lauhuai ahih nunga leng sum muhna dia kizuak teitei thil tamtak om chihna hi.

Tuma lam in Vaite numei khat Mrs VK Jena,IAS, DC/CCpur a hong om lai in khatvei dukan khat ah biscuit valei hi. Aman van kizuakte enkawm in a deihpen pe ding in hilh a, huaitakin dukan neitu in huai pen ahun beisa ahi chikawm in adang pia hi. Hileleng DC in amah DC ahihziakin a hunbei leisak utlou in midangte’ lei ding a zuak poisalou ahihna ah ngaisiam tuanlou in a dukan khaksak a, a thilhih uh a tawpsan kei ua leh dukan hong thei nawnlou ding in vauhilh hi. Hileleng huai dukan neite’n DC nu kianga ngaihdam ngen pah in huchibang thilte zuak nawnlou ding in kichiam uh a, huchi’n DC in tuban huchibang hih nawnlou dinga vau in ngaidam a, huchi’n dukang leng ngeina bangin hong nawn pah uhi.

Hileleng hibang thilte ginataka etzui ahih tuanlouh ziakin summet bawl tamtak in phaze sa uh a, huailai a DC in a vauhilh dukan neitu mah in huai hunlaia a chindan mah sunzom nawn hi’n kilang hi. Dukan tamtak ah tehna diklou kizang a, Kg. 1 agik van i leite leng gram 700/800 khong lel hisek hi, Havai(dal) bang houh dukan lianzaw apan Kg. 1 Rs. 50 in lei uh a, hileleng gram 800/900 khong a sehkhen sawn in Rs. 50 maha zuak dukan tamtak om hi. Khawpi sunga cement zuakna leh bazaar a nga zuakna munte ah a hiding zah sanga tawmzaw a zuak tamtak om hi. Hiaite etzui kin ahih kei leh ei-leh-ei kikhemlum leh kine lum sekte i hi uh chihna himai hi.

http://www.manipurexpress.com
http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s