The Lamka Post | April 27, 2008

Singngat khua a Job Card neilou innkuan 124te’n DC kimuhpih

Lamka, April 26: NREGS nuai a Job Card tungtawn a nasepna toh kisai in tuni’n Singngat khua a job card neilou innkuan 124te’n tuni zinglam dak 9:30 in DC/CCpur a teenna inn, Headquarter veng ah kimuhpih in job card pe ding in ngen uhi. Hiai innkuan 124te palaite’n sum kithohkhawm a truck khat hire in tuni’n Lamka honghoh in DC/CCpur Sumant Singh, IAS a tenna inn ah kimuhpih uhi. Job Card neilou innkuante palaite’n agen dan uh amau leng Job Card bawlna ding in midangte lem kilak hun in lem kila thou ua, lehkha a poimoh teng leng pelut uhi. Himahleh Job card hawmkhiat ahihhun in amaute a suanlam tuamtuam bawl a reject a om hidan in gen uhi. Khenkhat bel a form a submit hun un ahun kikhelta chih paulam in reject in om hi.

Mr. Sumant Singh, IAS, District Programme Co-ordinator (NREGS)/CCpur in Job Card neilou Singngat khomite kiangah Job Card neilou teng list bukimtak a pelut ding in theisak a, huai pen ni 10 sung huai list hoihtak a BDO leh Village Authority toh etchet ahihzoh chiang a adik teng Job Card piak hiding ahihdan gen hi.
Huailou in Lamka TD Block nuai a om Khumujamba Meitei leikai a nupi pawl in 2007-08 kikal sung a NREGS tungtawn a ni 50 nasep ding lakah tuni tan a ni 13 kia nasem leh huai ni 13 ading kia thaman amuhpat ziak ua bawl mahle-uh VA toh a kihoulem theih ziak un a complaint uh tuni’n zukkik thak uhi.

Thingkangphai ah buhpawl kang tum
Lamka, April-26: Thingkangphai ah tuni sunma dak 11:00 vel in Lanva lui pang a niin kihal in a kiang a buhpawl peh in kang a, Fire brigade ten kintak a delh pah ziak un inn kang man lou in phelh mit thei uhi. Fire brigade tunglou hileh a kiang nai a innte leng kang tum vek ding hi’n thutut kingah hi.

Thanlon MLA in Press te kimuhpih
Lamka, April- 26: Thanlon MLA Mr. V. Hangkhanlian in tuni’n a bialvehna toh kisai in amah teenna inn Zenhang Lamka ah press te kimuhpih hi. Aman a vote a muh tamna pen Mualnuam ah inn 100 a ding in langva bundles 5 chiat pia a, inn 100 nuai lam Palkhuang ah inn 60 a ding a sum a tang in Solar lamp 1 chiat pe zaw ding hi.
Thanlon bial a Anganwadi centre kihong thak 48 te kha 2 lawh leng piak pekhia a, a zin sung in Hausa 23 te kiang ah puansan pia hi. Aman Mau tam kial toh kisai in PDS antang kithonte leh NREGS antang kipawlutte va enkhia in kial petmah uh chih a theih in nasatak a pan lak sawm in Delhi tan ah leng antang ngen a kuan sawm hi’n gen hi.

CCpur Local Council CPI phut khia
Lamka, April-26: Tuni sunnung dak 2:30 in Beaulahlane CCpur Dist CPI Office ah Churachandpur Local Council CPI phuh khiak a om in Imphal apan Comrad Iboyama, Secretary State Council, CPI in hongkhia hi.
Hiai hun ah Secretary ding in Mr. Kaithianmuan guan a om ngal hi’n thutut kingah hi.

KSO/CCpur in Press meet sam
Lamka, April-26: Kuki Students Organisation (KSO) Churachandpur in tuni sunnung dak 3:30 in Tuibuang a KIC Office ah Press meet sam ua, tua ah Churachandpur District a Mini Secretariat Rs. 40 Crore val bei a kibawl ding toh kisai Govt. in zuk kik chih tuni a Sangai Express in a suah toh kisai in lungkimlou in tuni sunma dak 11:00 apan Tuibuang a Govt Office tengteng khak sak uhi.
Amau Churachandpur district a Mini Secretariat Complex bawlna ding a Govt in Rs.40 Crore abawl pen a zukkik lamdang sa ua, thu neitute’n April 28, 2008 tan a zukkik kei ua leh helna tanpha pat hi ding in gen uhi.

Inn kang 3372 pan pihna pe ding
Lamka, April- 26: Churachandpur District sung nam kal buaina a inn kang panpihna mukha nailou inn 3372 panpihna sum cheque a piak ding dan toh kisai in DC/CCpur in tuni’n theihsakna bawl hi.
Hiai sumte bel May 2-9, 2008 sung zinglam dak 10 apan sunnung dak 2 tan in Lamka Police Station ah a kisaipihte’n lak ngai ding hi. A hawmkhiak dan ding bel, Henglep Sub-Division a om inkuan 1149 ten May 2 & 3; CCpur Sub-Division a om inkuan 1176 te’n May 5 & 6; Singngat Sub-Division nuai a om inkuan 506 te’n May 7; Thanlon Sub-Division sung a om inkuan 459 te’n May 8; Tipaimukh Sub-Division a om inkuan 82 te’n May 9 in lak theih ding hi.
Thusuak in a taklat dan in, hiai cheque bel a kisaipih SDO in dikna ahi chi a a chetsate hiding a, a teenna khua Village Authourity Chairman theihpihna toh piakkhiak hilai ding hi. Inkuan khat in Rs. 10,000/- chiat ngah ding uh hi’n leng thutut kingah hi.

Antang Truck 4 dim hong tung
Lamka, April- 26: Thanlon Assembly Constituency sung a BPL/AAY a zuak ding antang Truck dim 4 MLA representative in tuni tak lam dak 3:00 in Lamka puaktun a om in Hq. veng a FCS Godown koih hilel hi.

Gospel Audio-Visual Album hong ding
Lamka, April-26: Lucy Lhinghoihkim Kom d/o Mr & Mrs. L.Akhup Kom in “Hallelujah Vol.II” Gospel Audio- Visual Album abawl honna zingchiang sun dak 1:30 in Synod Hall IB Road ah hong ding uhi.
Huai hun ah D.P. Haokip IRS Commissioner of Income Tax(Appeals) Chief Guest apang in CD Cassette hong ding a, Rev. Asong Leivon Executive Secretary KRBCA in Pathian min in lan ding hi.

EC Sample copy lak theih ding
Lamka, April-26: District Youth Affairs Sports Office Churachandpur saina in Lamka Public Ground ah May 7, 2008 apan District Level Suboroto Mukherjee Football Tournament 2008 neih sawm uhi. Huai ah School naupang kum 14 leh 17 kikal mite tel theih ding a, High School & Jr. High School apan School naupang lunglutte’n ZEO Churachandpur Office ah Eligibility Certificate (EC) Sample copy lak theih ding hi.

ITI studentte Excursion pai ding
Lamka, April 26: Industrial Training Institute (ITI) Saikot a Scheme I & Scheme II a training lelte Guwahati tan Excursion/Study tour pai ding uhi. Hiai Excursion a tel-ut trainee teng in hongtung ding May 3, 2008 tan in Institute ah min piaklut theih ding hi.

Pu Jukholh nei ding
Lamka, April 26: Chief of Zomi Colony Upa Chinkham in zingchiang in a Pu Ginsuanhau of Lailam veng inn ah pu-pa ngeina dan in Pu Jukholhna programme nei ding hi.

CM in SSPP Magazine hong ding
Lamka, April 26: Manipur Chief Minister Pu O. Ibobi Singh in hong tung ding April 30, 2008 sunma dak 10:30 in YPA Hall, New Lamka ah SSPP Annual Magazine, 2008 (Volume 44) Diamond Special issue leh Jubilee DVD Cassettes hongkhe ding hi.
Hiai hun zatna Power Minister Pu Phungzathang Tonsing leh mipoimoh tamtak in leng uap dilng uhi.

VIII World Veterinary Day zat in om
CM in Manipur State Veterinary Council building thak hongkhia
IMPHAL, April 26: Khovel pumpi in VIII World Veterinary Day a zat toh kiton in, Manipur state Veterinary Council saina in Imphal Sanjenthong a Council office complex ah leng hiai hun zat in om hi. Hiai hun zatna ah Khuallian in Chief Minister O. Ibobi Singh pang a, aman Manipur State Veterinary Council building thak honkhiakna leng nei ngal hi. President in Veterinary & AH Minister DD Thaisii leh Guest of Honour in Salam Joy, MLA pang uhi.

Tukum in World Veterinary Day thupi di’n ‘Diversity of Veterinary Profession’ chih zat hi a, hiai hun zatna a Khuallian Chief Minister O. Ibobi Singh in agenna ah, khovel leh mun teng a niteng a nek dia poimoh sa toh kisai himhim kiningchingtak a puaksuah ding chih Veterinary Department mohpuak ahihdan gen hi. Manipur economy dinmun hoihna dia hichibang sa leh gante hoihtak a etkawl leh vulh poimoh ahihdan leng gen hi. Department nuai a sem veterinary doctor leh field attendant te’n mahni ommun chiat a mahni mohpuakna chiat hoihtak a semsuah ding leh research bawl kawm zel ding in leng CM in hasuan hi. Govt. in mipi a ding khualna a nasep tuamtuam a neih siamsinna, damtheihna leh muanna omtheihna dia pan a lakte mipi lam in leng a tamtheipen a kithuahpih ding in CM in ngetna leng bawl hi.

CM in aban agenbehna ah, Manipur a district tuamtuam a Veterinary office leh hospital a semtu leh infrastructure kisam omte govt. in bukimsakna dia panlak sawm ahihdan genkawm in, a kisaipihte’n a kinlam a panla ding in leng theisak hi. Nikum a Bird Flu hiileng dalna dia Veterinary Department in naktak a pan a lakna tung uah leng CM in pahtakhuai a sak thu gen hi. State Veterinary Council a taksap omte hukdimna dia a kisaipihte toh genkhawm a sepsuah vek hidi’n leng gen hi. State Veterinary Council in hun hongpai zel ding a Veterinary Department toh kithuzak a nasem khawm dia a lamet thu leng gen hi.

Veterinary & AH minister DD.Thaisii in agenna ah, department puahthakna dia a kul leh poimoh infrastructure-te govt. lei ding dan govt. theihsak ahihdan gen hi. Hiai toh kisai a department nuai a omte’n kithuahpihna pe ding in leng ngetna bawl hi. State sung a sa leh gante lak a hiileng leh natna om thei gige ahihman in, department a semtu officer leh staff-te pilvangtak leh bilvak huaitak a om ding in leng ngen hi.
Tuni a Chief Minister in Manipur State Veterinary Council building thak a honkhiak letdan ahihleh, feet 300 x 120 ahihban ah, Conference Hall mi 100 taktheihna ding feet 80 x 22 a lian leng om hi. Hiai building sawng 2 nei ahihban ah, office room tuamtuam leh guest room chihte leng om hi.

Occupancy Day Observation
IMPHAL, April 26: Manipur a pawl tuamtuam 10 kigawmte saina in, 2nd Occupancy Day zatna April 27, 2008 zinglam dak 9.30 akipan in Gandhi Memorial Hall, Imphal ah om ding hi. Hiai hun ah Khuallian in R.K. Anand, MLA, President di’n Th. Lokeshwor Singh, MLA banah, Special Guest of Honour in Thangkholun Haokip, MLA, Guest of Honour in O. Landhoni Devi, MLA leh L. Mangisana Chief Advisor, National and International Awardee pang ding uhi.
Hiai hun zatna ah, thugenna tuamtuam leng om ding a, tua ah Dr. M. Kriti Padmashri in ‘Kangla War in Manipur 1891’, Rose Mangshi Haokip in ‘Kuki War in Manipur 1891’ leh Kanglachunglulu in ‘Naga movement in Manipur 1891’ chih toh kisai in thugenna hun zang ding uhi.

Kakching ah SBI branch
IMPHAL, April 26: Thoubal district sung Kakching ah SBI branch thak khat honkhiak in om hi. Thutut kingah dan in hiai SBI branch thak bel official a honkhiakna om naikei mahleh, nasep panta uh hidan in leng kigen hi. Hiai SBI branch thak a Manager ding in SBI/CCpur branch a Deputy Manager hihna ana len ngei, T. Lianminthang hidan in leng thutut kingah hi.

MUTSU in MU campus ah general strike nei ding
IMPHAL, April 26: Manipur University pen Central University dinmun a dopsang ahihna toh kisai a nasep tuamtuam enkai dia University Grant Commission (UGC) team hong hoh ding toh kituak in, Manipur University Students’ Union (MUTSU) in MU campus ah April 28, 2008 in General Strike nei ding uhi.

Hiai toh kisai a MUTSU President Gonmei Gaisingam in tuni a thusuah a bawlna ah, MU a tribal community-te niamtak a koih ahihziak in, UGC team in Manipur University hong phak ding uh MUTSU in poimoh salou ahihdan uh taklang hi. Thusuak dan in, UGC in amau ‘rules and guidelines’ khauhtak zang kichi mahleh, MU a singtangmite bel kum 25 sang a tamzaw tham a right uh ngahsaklouh in omta uhi.

MU a administration roster system mumaltak omlou ahihna ah, UGC in hiai a theih nung a bang kisiamtan nang nei uh hiam chih leng MUTSU in dotna bawl hi. UGC dawn dia dotna dang MUTSU in a bawlte bel, section khat ‘marginalised leh manipulate’ nadia bang ding a ‘rules and guidelines’ zat kul hiam? MU a thuneitu UGC guidelines leh rules zuiloute tung a bang action lak omta hiam? Central University hiloute roster system criteria bang hi hiam ? chihte ahi.
MUTSU thusuak dan in, MU a Teaching Staff 167 om lak ah singtangmi 3 lel pha a, Non-teaching staff 322 om lak ah leng singtang mi 38 lel om hi. Hichibang ahihman in, Manipur University a singtangmite’n State leh Central govt. apat thuchiam ngakzou nawnlou uh hidan in taklang uhi. Huai ziak a MUTSU in April 25, 2008 a Emergency General Body meeting a neihna uah, April 28, 2008 a MU campus a General Strike neih ding in lemsa uhi. Hiai ni in, MU a Class leh administrative nasepte khak hivek ding a, strike bohsia leh UGC team tung a thil deihhuailou a tun leh MUTSU in mohpawlou ding ahihdan uh leng a thusuah uah taklang uhi.

Bazar sung a vantam leiten a pawkhe ding goih ngai
IMPHAL, April 26: Dan leh thupiak hoihlouh ziak in, Imphal khopi sung a gari tengteng leh Rickshaw tanpha zan a pat bazaar sung lutsak ahihnawnlouh ziak in, mi tamtak in van puakkhiak toh kisai in haksatna tuak uhi. Mahni poimoh van lei dia kuante’n, van tuamtuam zuakna bazar sung munpi deuhdeuh Paona Bazar, Thangal bazar, MG Avenue, Dharmasa leh AlluGuli apat van lei mahle uh, a van leite uh gari koihna mun leh parking tan puakkhiakna ding in, coolie a goih uh kul hi. A lehlam ah, nidang a bazar sung a sep ding ngak a om tamtakte’n zan apat niteng a van puakman in sum muhlohta uhi.

Cabinet Secy makaih Central team kikta
IMPHAL, April 26: Zan a Union Cabinet Secretary KM Chandrasekhar makaih central team Manipur hong vehte tuni sunnung in Delhi zuan in kiknawn uhi. Tuni’n Central team in Old Secretariat Conference Hall ah, Manipur a dan leh thupiak toh kisai etthakna leh maban a panlak ding dan tamtak genkhawm ua, tuabanah, core developmental issue tamtak leng genkhawm uhi.

Thutut kingah dan in, Development issue toh kisai in, Ministry of Rural Development nuai a Manipur a sepsuah pat a omta NREGS scheme toh kisai in Chief Secretary in hiai scheme in masawnzel ahihdan leh nasepte report piak theih dia thil omdan kaihkhawm pahpah a om ahihdan gen hi. Hiai nasepna toh kisai in kikawmtuahna lampite poimohngaih masak a om ahihdan leng Chief Secretary in gen hi.

IAY nuai a inn 2700 bawlzoh hita a, tuate ban ah helpawlte ziak a inn-le-lou taisan khua 21-te resettlement bawlna dia inn 1500 leng Chandel district a dia guan tel hidan in leng kigen hi. PMGSY toh kisai in State in Engineer 11 leng State level quality monitor bawltu di’n guang a, himahleh, nasepna helpawlte ziak in zekai hi. Kum 2 vel paisa apat Manipur a PMGSY pat ahihnung, lampi 181 lak ah DPR 90 bawl lak ah 50% bang sepsuah hita hi. DPR dangte leng bawl hita hi’n kigen hi.
Department of Road Transport and Highways toh kisai in, NH 39 in a totkhak Maram-Imphal (80 kms) kal BRO in enkolta hi. NH 150 Imphal – Aizawl lampi, CCpur – Tipaimukh section 262 kms ahi. Hiai lampi bel, helpawlte ziak a kum 10 phial bang zatlouh a ana om mahleh kumlui December vel apat helpawlte apat hahsiang a omta ahi. CCpur apat Thanlon kal 151 kms leng BRO in enkawl hi.

Naga te’n hiamgamna chimtak
DIMAPUR, April 26 NNN: Dimapur leh Kohima district sung a helpawl nih kal a kikaptuahna a om mun simtak ziak in district vaihawmtute’n panlak ding dan ngaihtuah san uh hi’n thusuak in taklang hi.
Sintawpni in Dimapur DC’ conference hall ah joint meeting neih in om a, huai ah district vaihawmtute leh NGO tuamtuamte’n lemna leh muanna a om theihna ding gelna in Dimapur District Co-ordination Group phuhkhia in minautang omna lak a kikaptuah khamna bawl ngal uhi. Galvan tawi helpawlte’n minautang lak bukna dia zang kawm a kikaptuah a ching uh lungdawnhuai a sak thu genkawm in DC/Dimapur, Maongwati Aier in minautang omna lak a kikaptuah ding kham hi’n thusuak in taklang hi.

Kohima ah ahihleh, District Level Ceasefire Monitoring Group (DLCMG) in galvan tawi helpawlte kiang ah tu-le-tu a minautang lak apat kihemkhe ngal ding in theihsakna bawl uhi. Hiai bang theihsakna a bawl uh ngeingaihlou a om leh amaute nohkhiakna dia ‘joint operation’ neih a om ding ahihdan leng puang uh hi’n thusuak in taklang hi.
DC/Kohima leh DLCMG Chairman Sachopra Vero in a genna uah, amau district sung a helpawl galvan tawi, kua pawl hi’n bang pawl hitaleh, minautang lak a zalentak a a om ding uh khauhtak a ven hiding ahihdan gen uh hi’n thusuak in taklang hi.
Hiai kimuhkhawmna a paikhawmte’n Kohima Superintendent of Police Renchamo Kikon kiang ah Kohima khopi leh a sehvel a galvilna hoihtak a bawl ding in ngen ua, huai banah, civil society leh NGO te’n leng mipite kiang a helpawl a tel himhim a inn ua bukna pelou dia ngetna a bawl uh hoih a sak thu uh leng genkhawm uh hi’n thusuak in taklang hi.

NSCN-IM khutkhial
DIMAPUR, April 26 NNN: CN-IM in Sintawpni a Dimapur a IRB constable Hanji Konyak,10 NAP (IR) a kaplup khak uh toh kisai a tuni a thusuah a bawlna uah, kitheihkhelh ziak a ‘khutkhial’ kha ahihdan uh gen kawm in poi a sak thu uh leh si suun sungkuante a thuakpih thu puang uh hi’n thusuak in taklang hi.

Tuabangkal ah, Dimapur kiang a Shakhuvi leh Chumukedima kikal ah Ukhrul mi NSCN-IM cadre “Sgt. Major” Zaimi Hongray’ luang muatsegawp muhkhiak in om hi. Tuni a Shakhuvi tuailai pawlkhat in luidung a siluang a muh uh Zaimi Hongray ahihleh ni 10 paisa apat a omna theihlouh a mang ahihdan thusuak in taklang hi.

Siluang puan a ana tuam Shakhuvi khomipite tung ah NSCN-IM in tuni’n kipahthu gen ngal a, huai banah, Chumukedima tuailaite’n leng Angami puandum in siluang ana tuam uhi. NSCN-IM in kipahthu a gen banuah, hiai siluang zahna lianpi toh hoihtak a ana etkai ziak un Shakhuvi khua a village Chairman Vikuto leh Chumukedima youth President Ihouvotsolie kiang ah Dimapur a Tangkhul te’n leng kipahthu gen uh hi’n thusuak in taklang hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s