VAN-GAM AH THIL LAMDANG 3

Pastor Dr. Hs. Chinsuanthang

Thumasa: Sadhu Sunder Singh in Van-gam i tunchiang ua Van-gam ah thil lamdang 3 a om ding chi’n agen hi. Laisiangthou sunga thu sui a hoihtaka i etchet chiangin huchibang awa omthei ding mah ding ahihdan chetna tampi omthei hi. Hiai tawh kisai i News uh zangin houlimkhawm lehang i chi uhi.

1.THILLAMDANG 1-NA:

Saptuam sungah mite theihphaklouh leh khawsakna dan aleng niamchik a khawsa ban ah thilpiak leh thawhlom leng pezoulou himahleh Christ a pianthakna nei a om hi. Mi khenkhat piangthak lah hingal, hileleng a sepna Office ah a mipolhte leh a seppihte ziakin a pianthakna midangin a muhtheih dia kilang khezoulou pawl bang a om hi. Mi khenkhat lah piangthak himahle uleng a nute apate leh a inn kuanpihte pianthaklouh ziaka ahihna diktak kilangkhe zoulou in innsunga support tu ding mi neihlouh ziaka puksia chih bang a omthei hi. Mi khenkhat piangthak himahle uh a guka mi muhpihlouh khelhna khata kisuipuk kha in huaiziak a kisuanlahna leh mahni kimawhsakna tawh kidim in a hinkhua a piangthak ahihna muh ding omlou chih bang a om theizel hi. Huchibang mi kuamah in Van-gam kaidia a gintaklouh uh pawlkhat Van-gam a kimu ding chi’n Sunder Singh in gen hi. Tuabang mah leng Toupa Jesu’n gen hi, “Kizuakte leh angkawmte’n Van-gam ahon lutsan ding uh” chi hi(Mt. 21:31.b).

2.THILLAMDANG 2-NA:

Saptuam pawlpi sung a tallang mahmah leh pawlam mite tanpha in leng a theihphak uh ban ah mipite’n leng a muan uh a om hi. Thugen a siam ban uah uah thumna a a thusamte bang uh Pathian in zapha kholdiak leh kilawm a thumsiam mi leng a om hi. Mi khenkhatte siamna lam ah Officer liantak bang, khenkhatte Bible Degree hoihpipi nei bang, thilpiak lama kuamah phakzawh ding hilou bang, Saptuam sung ah a om theilua hi. Huchibang mite Van-gam a kailou dingin kuamah in gingta kei mahle uh denchianga van-gam i lut chiang un huchibang mite gintak khenkhatte Van-gam ah kimuzoulou ding, huaihun chiang in “lamdang na e” chih chih a om ding chi’n Sunder Singh in gen hi. Hiai thu mahleng Toupa Jesu’n a genkhin hi(Mathai 7:21-23). Toupa Jesu in a genna ah amah mina thil lamdang pipi leng hih a a mina dawi leng hawlkhia, a mina Pulpit tung a thu gengen napi a Van-gam lutlou ding uh ahihdan leh Jesu’n amaute thei ngeilou –huai bel Christ tawh henna kizomlou ahihdan uh gen hi. Dinmun sangpi len a, Saptuam heutu leh makai khat a pang hinapi in Van-gam a kimulou pawlkhat om ding hi, lamdang mahmah sak theih thil hiding hi.

3.THILLAMDANG 3-NA:

Hotdam tate Van-gam i tun chiang un i khut i khe i taksa pumpi leh i melte uh Nivak bang in Pathian’ thupina in hihlamdang a om ding hang a huaihun chiangin mahni leh mahni kivelchiat ding hang a, lamdang kisa law mahmah ding; huai tuh Van-gam i tunchiang ua a lamdang mahmah ding a thumna ahiding chi’n Sunder Singh in gen hi(Mathai 17:2). Eite’n i Toupa Jesu Christ mel thupi leh lamdang bangbang Van-gam ah i tang(nei) chiat ding uh a, lamdang petmah ding hi.

THUKHITNA:

Hiai atung ate bangin Van-gam ah thil lamdang 3 a omding chiin Sunder Singh in gen a, huai mah Jesu Christ in leng ana genkhin hi. Van-gam sese chitchiat lou ah leng mihingte i lungsim, i lunglutna, mite tunga i thilhihdan, mi i chihdan, i kampau leh i genkhiakdan apanin khami diktakte’n piangthak leh piangthaklou athei thei uhi(I Cor 2:15). Pathian’ Khasiangthou in bangkim thei a muchian dingin Pathian in mite pilna leh theihna a pia hi(I Cor. 1:30). Pathian thugen mi khenkhat a thugen uh hing leh si a om a, huai tungtawin inleng thugentu dinmun a theih theih hi. Huaiziakin kingaihtuah chiat ni, denchiangin Van-gam ah a kimulou pawl ah i telkhak leh poi mahmah ding hi. Eite’n Jesu Christ thei mahmah lehang leng aman ei hong theih tuankei lebel lungkham huaipi suak ding hi. Manipur Chief Minister Ibobi Singh, aneu alianin i thei uh a, himahleh aman nang ahon theikei maithei bang in Jesu na thei ahi maithei, aman nang hon theilou thei hi(Mathai 7:21-23). Dawite’n leng Jesu Christ thei ua, lau in liing zawzen eive ua ? Hehpihna hun tomchik a omlai in kingaihtuah in.

Source: Manipur Express
Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s