Hihna(identity) kichian poimawh

Editorial, Manipur Express

Thupil ahi diam, ahihkeileh ahun leh thil omdan tawh kituak ahizaw diam ah, “Nga in atam a sihpih a, mihing in a tam ahinpih” kichi sek a, tulai dinmun etin thudik mah hi’n kilang hi. Leitung kivaipuakna ah leng mihing tamzaw leh changkangzawte (majority/dominant community) chih minvuah in om uh a, mihing tawmzaw leh tuantualzawte bel minority community chih minvuah hi uh a, tuni chiangin mihing tamzaw(majority communities) thunuai leh deihdan in kivaihawmna thil leng paizawta hi’n kilang a, mun tamtak ah minority te’n ut leh utlouh leng gen theilou hiam gen ngam dia a omlouhna mun uh tam petmah hi.

Kum bangzah hiam paisa in tribe leh community tuamtuam leng nam feeling(communal feeling kichi) himhim bangmah omlou in kituak taka khawsa leh tengkhawm in om thei uh a, banghiam buaina a om leleng nam thil chih omlou in athu(issue) dan in ngaihtuah leh hihveng(settled) in om sek hi. Tuni chiangin thil tamtak communal thil in paita a, English ah “might is right” chih bang deuh in ahat-hat, mihing tamtam dik leh vualzou hihna tangsek uhi. Huaiziak mahin nam tuantual leh mihing tawmzawte ading in mahni dikna hiam deihdan leng gen theilou a majority community-te
talkaihna nuaia om theihluat ahi maimah hi.

Manipur ah leng tu dinmun etin aminpu in Meitei-Pangal-Naga-Kuki chi’n kigen sek a, “nam tuamtuam kituak taka tengkhawm a khawsakhawm i hi” chi’n khenkhat in gen sek mahle uh mihing tamzawte deihdan Manipur mipite deihdan, mihing tamzawte thugen Manipur mipite thugen chihdan in pai veve a, mihing tawmzaw minority community-te’n bang deih a bang lunggulh uhiam chih angvanna himhim om ngeilou bang hi. Huaiziak mah ahi ngei ding a, singtangmite interest leh makhial chi a panla ATSUM leh pawl tuamtuam Manipur govt tung ah lungkim ngeilou in kiphin leh nuak in om sek uhi. Manipur gam a om sungteng govt in leng majority community-te mah mai-et in angvan gige ding ahihman in lungkimni om ngeilou ding hita hi.

Hichih naklaiin Manipur singtangmite lah khe khat a dingkhawm chih himhim om ngei tuanlou in Naga-Kuki-Zomi leh abongbong in kikhendalh vengvung a, khenkhat in tribe(nambing) khat leltak leng nampi(nation) bang khop in ngaisang uh a, Board Secondary Education Manipur(BSEM) in tribe dana recognition a bawlte uh adia MIL subject tuamtuam sinsak theihna dia phalna a piakte kipahpih in thupi taktak in lopna om mahleh huaite kikhenzakna hihkipna step poimawh hizaw a, kipumkhat leh kigawmkhawmna ding daltu(stumbling block) detdou tak suak phing ding hi’n kilang hi.

Tu’n leng Manipur singtangmite’n kivaipuakna tuam hilou in singtanggam khantouhna ding leh changkanna dingin India Constitution a 6th Scheduled nuaia District Council kivaipuakna omsak dingin phu in panla in buaipihpih mahle hang Manipur govt in singtanggam changkansak taktak sawm deklou ahihman in 6th Scheduled kichi van a gah bangkhop in state dang hiam mundang banglou takin Manipur ah leng gamlapi a om suak hi. Tu’n MDC election om ding thu kigen sek mahleh athu a gen sangin a takin baihlam liailou ding in kilang hi.

Manipur singtangmi adiakin Zomi hiam Kuki kichite adingin chimawh leh mangbanga om taktak hun ah Manipur state govt sangmah in kialtaina, puktokna leh kibukna, galtai theihna leh hong panpih taktak om sun Mizoram state hizaw sek hi. Manipur singtanggam ah lamlian lah hoih ngeilou ding, electricity lah sun-le-zan a a vak hun ding van a gah banglai, PDS item tuamtuam(chini, antang, khonvaktui) te leng ginataka muh chih omlou in kiphin touhtouh ngai ding, govt in a chimtak chianga tamlou hong tung ding, bangtan hiam nungin a ngei mah hizel ding in kilang hi. Huchi ahihleh Manipur singtanggam adiakin CCpur leh akinaihpih district khenkhatte Mizoram ah belhmai in mipite leng Zo suante ngen hihna ah Mizo ah belh/lut mai in hileh huchibang area-te 6th Scheduled a kivaipuak ding Mizoram govt in zadah hiam phallou a om dingin gintak huai tuanlou hi. Huchi hileh gam khangtou leh changkang chi a i gen-gen uh eite’n leng mupha leh i neih phakna ding naizaw leh kilawm hi.

Nidanga communist gam lianpi USSR leng tuni chianga Russia leh gam tuamtuam tamtak a kikhenzak thei ahihleh mipite kithutuak in pangkhawm thei lehang lampi haksalua hiam thil hithei hetlou hituan dingin gintak huailou hi. Hileleng hiai bel ngaihdan omthei khat ahi a, hihna(identity) kichian poimawhdan taklatna leng ahi hi.

http://www.zogam.com

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s