LENGTONG PAUNO LEH ZOGAM, ZOMI

LENGTONG PAUNO pen kaki thuahkhak ngeilianloh hang in agen mi 2 leh 3 sang a atam zaw in MI citak,thukhual,kuhkal,hanciam leh muhkholhna ( vision ) anei mahmah khat hi ci ciat uh hi. A lakhum mahmah ah zong MI gina ahih lam kithei khia pahmah hi. Kum 30 ki’m bang lakhum toto laimawk cihpen ni khat ni teh PAHTAWINA SILPAAK ( NOBLE PRIZE ) piakhuai sa mahmah ingh. Neihman lamman sang in HAMCIAM natawh kalsuan ahih na thupi salua ka hih man in ZAHTA’KNA kapia hi. Ih ZOGAM ah amah bang MI haksa kha ding hi. Kua in kum 30 dongdong laphuak,lasa,lakhum in minthang paisuak ngei hiam? Koigam koimun ah za ngei khollo hing. A laphuk atuam asa atuam cih bang pian tamzaw lel hi.

LENGTONG PAUNO pen kaki saktheihpih leh kaki angtan sakpih mahmah MI khat ahihi. Banghanghiam? cihleh mihing ta acih cihmawhna dahna, lungkham sinkham pautauhna cihte leh gentheih liangvaihna athuak kha ngeilo kuamah ki omlo hi. A Ma’n gentheih la te ongsak ciang in A Mah bek in athuak hi tuanlo in a thuakkhawm ih hi aa,ei te’ aitang in A Ma’n LA in ong sakhia na hizaw hi. LAISIANGTHO in adah te tawh na dahkhawm unla anuam te nanuampih un acih leh Khanglui te’n ne’kkhop lim a, puakkhop zang hi acih mahbang un ei te’ aiawh in athuak nate LA tawh ongsu’t khiat ciang in, Aw keibek athuak hisam kei veng e maw ci-in ih puak vangik ong zang tuamsak mahmah hi.

JUDAH gam khuaneu BETHLEHEM khua ah mihing khempeuh ading BETHLEHEM vontawi JESUS ong piankhiat mahbang in, ZOGAM khuaneu TUITHANG khua ah ZOMI khempeuh ading LENGTONG vontawi PAUNO ong piangkhia lo hi leh tu ni-in hih bang lai te ihgelh ihsim ih kikum theikei ding hi. A Mah in ihthuak haksatna khempeuh ong nuamtuam sak aa, ih vangik khempeuh ongpuak pih banah ihgam ihlei ihminam leh ihpau ihlai te mahmah tungah it theihna leh thupi saktheihna lungsim te ong khangsak phamahmah hi. A LA mal te ngaingai leng a vekpi phial in LAKAM PAUNAK te leh khangluii kamthuk zawdeuhdeuh te na tamzat aa, khiatna neisawn KAMMAL te nahi ahih man in TULSUAH / Luii suah thei ngei lo hi.

Tu hun khangthak momno te’ tungah khangluii ta’ngzat kammal hoihnono te ahi LAKAM PAUNAK cih te zangin LA tawh khaici ongvawh aa, Zopau pauthei khempeuh in a telkim loh uh hang in, Zolai sim thei atam zaw te’n telthei uh ahih man in leitung mun tuamtuam a om Zomi te’n LENGTONG PAUNO’ LA te leh PAUNAK LAKAM aki tamzat ei Zo la dangdang te zong ih ngaihngaih nak leh bel mi’ gam mi’ lei a om ih hih hang ih tu ih ta te mahmah zong ZOLAI ZOPAU ki theisak zotham ding in lamen mahmah lai hing. Tua hi peuh leh ihgam ihlei leh ihminam ngeina te it in thupi ong sathei tuam ding uh aa, ZOGAM giabang ong zuun nuam in ZOGAM ong PAAL sak nuam ding uh hi. IH ZOGAM hen kol su’t ding in ei te sang in khangsawn momno te thumuam in pattah sawm le hang amau hun sauvei nei zawlai uh hi.Ei hun in bel deihbang in ong piangzoman mawk tam cih nop khat in omsa ingh. A hi zong in HANCIAM na mah ong thupi pen zel ding hi.

LENGTONG PAUNO pen ngek omlo in taak om hi. A dang ka theih khak amah bang a khuak pil/lungci’m na a nei ( artist ) a kawlpau in ( anuh pingia shin ) te ngek om duaiduai uh hi. Na dang mahmah septheih nawn ding in ngaihsun khalo uh hi. LENGTONG PAUNO pen nasep teng lo in tuah bangbang puak kul te pua, dom kul te dom tuabang kawmkawm mah in LA a na phuak toto hi mawk hi. ET_TEH ta’k cing mahmah mihing khat in mu ing. Tua khit teh LENGTONG PAUNO’ hang in ZOGAM leh ZOMI te zong hampha satuam mahmah ing. Banghanghiam? cihleh Leitung gam tuamtuam te’n zong bel Gam leh Nam it na LA ki neitek sam naven IH ZOGAM IH ZOMI nam zah aa, itna ngaihna laphuah angah ding gamdang om in umkei mai veng aw!!! A om khaphial zong in Ei a zah in tam in, zong ngaih zungzung ding in bel um zo tuankei lai ingh.

Banghang a hibang ci ngam ka hiam? cih leh ZOMI MUSIC tumsiam ( ZOGAM MUSICIAN ) pa khat in LENGTONG PAUNO agen na khat ah A MAH pen a minthang paisuak den ding a lamdang ZOMI’ laphuak /lasak siampa khat hi ( THE LEGENDARY OF ZOMI’ CLASSIC SONG COMPOSER ) ci ngiat hi. Tua bang acih theih na hang pen a lamal zat te leh a la aw ( TUNE ) luanzia, a saang a niam ( TONE OCTIVE ASSENDING AND DESENDING, HIGH & LOW ). a la aw khiat dan cih te leh a SONIC SOLFA ( NOTE ) te mahmah kihual kiim ( HARMONIOUS ) ngiat hi ci hi. Tua a ci MUSICIAN pa pen AUDIO ENGENEERING sang ah AW paizia lamsang sin in kum 2 DIPLOMA graduated mi khat ahih man in a cih bangbang ke’n um ngampah hing. A dang acih lai khat ah LENGTONG LA te a MUSIC te mahmah zong nengkhat beek genban nading omlo a vek in lamdang tak in kihual / kituak kiim mahmah hi ( EVERY MUSIC / PIECE IS CLASIFIED UNIQUE COMPOSITION ) cih beh lai ban ah ZOGAM LEH ZOMI te’ a ding mahmah a, a tuam vilvel a PASIAN’ ong piak hi ding hi cih beh tosawn lai hi. Lungdam ee leh , zomto lai ni ee ma te!!!!!

====================

a. LENGTONG PAUNO LEH PASIAN/TOPA

SIAN aw lumbang ongsung in,lailungdam dingin ongsiam in,sengual tawh tanbang kim in kei ongsiam aw.( mi te’ tungah a gualzo dingin ngenlo aa, mi te tawh a kikim ding ciang bek in na ngen hi ). Ka mazap ding hanlung ciam in lailung ka gelgel a,SIAN hawm sunni hai bang nangak ingh.Hauhna neihsa sum leh paai TOPA kiangpan hi aa, zonzawhna tha leh ngal nongpia a, mavan daupaina matutna leh gualzawhna te zong TOPA nangmah kiangpan bek ongngak ing ee!!!kongthumna hongngai in TOPA KAWLGAM vai onghawm in, nuntak suahtak zaitha tawldamna ngai ung ee TOPA aw!!!

SIAN in ongsiam hen tangbang dam in simleitung khankumsawt guabang hing in,lungtuak in nunnuam maciang suanthei ding in SIAN in lumbang nasung ve aw!!! ( ZOMI,ZOTA zinei pasalnei kitenna abawl khempeuh MOPAWI ladawng khat tatawh ong UAP denkeei na hi mawk veh ee ). Nang bang silpaak na pia zo aa? ke’n bel pia zonailo in maw, piak loh aphamawh a kangaihsut,ka lungdam lua ahih ciang aa,,,Tung sunni so na viveng mah ta leh TOPA aw nongpiak sa thupha te khat khit khat simkikleng nim na dildial,nim na dildial ee!!!( simkik = PASIAN’ piaksa,a sansa, a ngahsa, a omsa thupha 1 khit 1 simkikkik, a omnai lo,angah,a sannai loh leh a kipia nailo te kisimkik theilo in zong kisimkhol theilo ahih man in, TOPA’ kiangpan thupha kasang aa, ka ngahsa thupha te kasim phatphat tak ciang in kagim/katawl adam pah hi cih agennop na ).

Lungtup tung in khatvei ciang khawlkhawm kik dinhin SIAN in ong siamhen aw… SIANMANG laukawm in sem lehang, ( PASIAN’ deihna tawh kituak in gamta leng ) TOPA’ kiangpan huhna / thupha te lamen kawm sa in LA naphuak a, PASIAN muan na leh zahtakna tawh na kalsuan toto ahih man in IH BIAK PASIAN in zong tu’ni tuhun in ZOGAM,ZOLEI leh ZOMI nam te’ lak ah A MAH lamto takpi pahmawk hi.

b. LENGTONG PAUNO LEH ZOGAM

ZOGAM Mualdawn vangkhua, vangkhua zuanni…ngilh ni om lo…Mimbang kapianna vangkhua ZOGAM etlawn sa’ng,niimdildial mual leh guam ngeisok ( paak ) san silsial,mualdawn ZOheisa ( paak ) te paal-lun ee…Aw katen na vangkhua mualdawn ZO lenmui ka’i, nunnanuam lunta vangkhua kangai tuanlo. Tuan a, PU,PA mimbang pianna ih ZOLEI gamnuam,tumbang guaii te phamtaleh zong khangsawn te pianpiang ding a,ami zatam sambang in hongzaal ding a,GAM le MI khang in piangna ZOGAM ETLAWM ding.( GAM thu leh MInam thu ih cih pen ei ngaklah zawhthu a, vai akuang pahlatlat hisamlo aa, akhang akhang a, akizom toto ding thu ahih man in keikhang in lah piangzo ngapke’n cia ci a, ih lungkiat ih thadah ih hanciam noploh khak ding ngaihsut masakhuai mahmah thukhat suak ding hi ).

Etlawm sa’ng e ih ZOLEIGAM nimdildial ee, dumdillial ee,Nam cih zata ngabang lenna ZU’N loleng pankaai ding bang ee!!! Gia bang ZU’N ni seino lawmgual te aw, SIANMANG laukawm in sem lehang ih ZOGAM hong paal-lun ding hi. Tua ni ( ni khat ni ) ciang in lungdeih teng liibang ( tuilii ) cing ding a,samgi bang kikhen om nawn lo ding, a khangto GAM hongsuak ding tua ni ciang in, lungtup teng tui bang tun in ZOGAM HONG PAAL ding hi. ZOGAM ah ka piang a ZOGAM huihkhi kadiik hi, ZOGAM ankuang kau’m a ZOGAM siktui kadawn hi. Ka lamkiatna ZOGAMlei ka khanna ZO an leh tui ZOGAM leitangh a khangkhia PAUNO ka hi.

Ciktui phulna KHANAN ZOLEI ah, cih bang dan in GAM hoih GAM nuam GAM pha te tawh GENTEHNA pia in na napahtawi aa, a pian na PU,PA’ ZOGAM/LEI a it a ngaihna leh NU’NG ( mailam hun ) ciang in ong khangto a,a nopci’t huaizia leh a etlawm sakhuai ziadan ding te mamuhkholh theihna lungsim mitkha ( vision ) tawh ih GAM in thupha a ngah na ding in vantung PASIAN’ kiangah a na ngenngen na hihi. ( Tua hi a tu’ma kumsawt simpek lam a kipan in Ih ZOGAM pahtawitawi in phatphat mai ahih man in, ih ZOGAM in zong A Mah tu’ni tuhun a kipan in minthanna leh pahtawina LUKHU pia-in khusak a, ih ZOGAM ah ahi aa, leitungbup tuama om ZOMI akua matek ahi zong in khangno khangham, piteek/puteek,numei naupang, U neu U lian ci lo in LENGTONG PAUNO a theikha ngeilo leh azakha ngeilo tawm mahmah ta ding in ka um hi ).

A Ma leitung nuntakna PASIAN in a la’k nungzawh ciang nangawn in, Ih ZOGAM leh leitungbup ah ZOMI a kici khat ( 1 ) a om laiteng LENGTONG PAUNO cih min amangthang thei ngei ding hi nawnlo hi. Ni dang ciang PASIAN in amah bang MI ong piathei lai mah ding aa, a hi zong in tua mi te pen, anih ( 2 ) na leh athum ( 3 ) na ding te hi ta ding uh hi. Hih bang a, GAM leh NAM a ding a ong HANCIAM na te TOPA in akhan kumkhuasawt in ong phungvuh sakden ta hen!!!!!

c. LENGTONG PAUNO LEH ZOMI

ZOGAM LEITANG a khangkhia ZOMI ka hi hi….zumpih kei ning,misang a niamzaw ding PASIAN’ hongbawl hi tuanlo,ZOmi bang nungta gamta kampau ning, ZOMI ka hi hongbawl PASIAN’ minphat ingh. Tu hun ciangin a diakdiak in KAWLGAM sung a om ZOMI tam pitak phialmah ahau a nuamsazaw gamdang ih-hi’ ci tun ziahziah na pen ZOMI ih hih hang bekmah hi mai takpi mawk hi. Ihhauh ihpil ihsiam man a atungkha zongbel omtham na ve! bang cilam,bang cihang in tung hi taleng ZOMI ka hi ongbawl PASIAN’ minphat ingh ihcih aku’l mah na hi mawk, Ihgim ihtawl ahi teitazong in.

ZOMI bang in kapiang ZOMI bang ka nungta ZOMI bang in kasi ding hi. ZOMI te ihsih ihnat ciangin a kikhoi, kiuap ki hehnem ki tutpih ki khawlpih, khualam bang deuhdeuh ah gamvak ding,lokuan ding cih te Inn omlian in si kigal pahmah hi hang. Misi ki-it deuh in ni 3 pan ni 7 dong bang kikoih ekh in ki cimtak hetlo lai hihang.Puan hoihpen te tawh kituam in kuang gina tak in ki bawl sak hihang.

ZOMI bang a ih sihkhak loh ding aa, gulsih thamsih tangsih peuh ih tuah khak ding, ihsih ihnat kuama theih khak mel-loh, kuama awlmawh khak mel-loh leh kuama khoi noploh peuh a ih omkhak ding, ih luanghawm nangawn meitawh haltum mangpeuh a ih omkhak ding dahhuai mahmah takpi hi. EI ZOMI te pen midang tetawh ih ki batlohna tampi te’ lakah ih nuntak lai sangin ihsih khit ciang a ki thupi bawl mahmah te ih hihi. ZOMI bang a ihsih zawh nading thupi mahmah takpi hi.

Na mi ISREAL te na ompih bangin, ko ZOMI te zong na THUPHA ongpia in. KAWLGAM VAIGAM ka om zong kanu kapa ZOMI hi, kawl an sen an kanek hang kasi kasa ZOMI hi ZOLAI ZOPAU theilo in kawlpau vaipau kasiamzong kawlmi vaimi hi tuanlo ZOMI ka hi. Kawlgam vaigam omkha leng PASIAN’ hongpiak tu leh ta ZOMI hih na theisak ning ZOLAI ZOPAU sinsak ning ahizong amasa pen ZOMI mah deih ingh. ZOMI te’n silhding nekding om napi zong zangthei lo ZOMI te hailua sa ing ZOMI ka hi.

d. LENGTONG PAUNO LEH NAM DANG MITE

Namdang te’n ong nuaisiah mah zongleh ZOMI te hong lamto in TOPA aw! Mi namdang te teizaw,sumzon paaizon zong siamzaw, kizep kipuah zong siamzaw,anhuan mehhuan zong siamzaw, kamsiatna tawh namdang pasal leh zi nei kha zenleng maw!!!. mailam ah zomto lai-ni…

=======================

e. LENGTONG PAUNO LEH KHUAHUN 3 TE

KEI zuan nading a tangkhuakha’l heinapeuh leimui kaai zilzial, huihkhi honglang NGAIHgiim hong nam Taang kei sinlai hongkuai Ngaihno,tangkhuakhaal huihkhi landang ZO lawkta ( tawlawk = khuakha’l hun a ha’m thei vasa namkhat ie min ) tau ngeungeu, lungzuan lenmuikaai huihkhi zong langhiauhiau, mualdawn ZOHEISA te paallun ee…Nunnop phalbi daidam zankhuasawt in lungtuak Lia leh Taang vabang lengkhawm…

( Khuakhalhun )Tangkhuakha’l lenmui kaai huihkhi dam lang ee,lawkta hongtau ngeungeu,keisinlai hong phawngcia,Taangliang khattang lungzuang naubang kakah la, ZO lawkta tawh taukhawm, lungzuan zaideih awikhawm ee…

( tu’k hun )Sak leh khang pan lummeei hong kikaituah in,THANGVAN ong thumduldul, thulguahpi hong luang ee, Khuaphia kekkia in huihpinung khimkhuazing,ka tunnu’n sinlai ongphawng,la’kmai luankhi’n zel ee…

( Phalbi khuadam hun ) Phalbi daidam zankhuasawt solkha tangnuai, lungzuan zaila su’t in, taikhuaval lawh ing ee,maimitsing thei lo kasial gui ( vui ) cing sawn ee, keizuan meei bang thenglo,naubang kahlai ba’ng theimaw’ng ee…

Tu’k phalbi khuakhal hun kihei taleh kongsialna luankhi theulo, tuahsiat,tuahphat ni,nopni dahni in,ngilhtheihloh hongphawng den ka tu’n NU…*Thulguah luangnuai lummeikaai nuai ah*,khentheihloh maimit kisuan ee…miksi thovai lak khawlkhawm cimtuanlo,siingdang kuamah engtuanlo…Khen lo ding ngaihtawh tong ihciam sa te zong nihgel sinlai ah thamden ee,*thulguah luang* in zong hong theihpih buang in cia munmuang sawlbang hei ta ni.( hih bangdan in kum khat sung a om KHUAHUN 3 te zangkawm in a it a ngaih a phawk khempeuh te LA tawh na phuahkhawm hi ).

f. LENGTONG PAUNO LEH GANHING TE’ NUNTA’K ZIA

Vasa te’n zong nuamsa in lungdam la sa uh ci hi. ( a mawk ham uh hi ci lo hi ) lawkta te tau khawm,huiva te mau khawm, mimva te thum khawm uh na ci leuleu hi. ( Ei zong lungdeih sinthu kumkhawm leng ,khattang kia ih hih sang cihthu ) Ganhing te nuntak na lungngai leng munleh gamleh lei nei ciat uh aa,Vasa te’n zong BU nei uh aa, gamsa te’n zong KUA ( hole ) nei hi,a mau munciat ah suakta tak in ki-it kilem in nungta uh hi. ( Ei zong mun leh Gam neilo ih hi kei hi cih thu leh ki pumkhat zawh na’ng …Unity… ) Sakhi in zong atat na’ng kuam 9 khual hi a cih bang mailam enkawm leh thukhual in gamta ciat leng a, semkhawm nekhawm in mapang khawmleng cih thu te ongphawk sak hi.

g. LENGTONG PAUNO LEH NU’TE PA’TE,SANGGAM TE

NU’ le PA’ ( KA NU’ AW NEM…….KA ZUA NGAIH )Leitung hauhna sum leh paai,hatna tha leh ngal tawh leitheih zontheih hi lo, Mimbang ih piankhiat na ih leitung PASIAN a hi. ( ih nuntak lai teng simmawh theihloh ding thu ongphawk sak hi ). Sanggam te zong simmawh khatuan ke’n maw, ni dang teh kisik ding hi teh.( na ngaihsut theih hun ciang, cih mawh gentheih nathuak ni ciang ).

Na Zi na Ta te’ hang in amau te mudah kha peuhmah ke’n simlei mizalai ah NU’ leh PA leh Sanggam te tampi om lo,zontawm theih zong hi lo uh. ( na muhdah khak phial zenzen leh zong na Zi na Ta’ hang hisak kha lo ding hi teh ). Tua leh Tampi a om a aki zongtawm thei bang/kuate? Zi leh Ta……Tam lel ngawn ee ci a, adang banzon pahkeei ding cih na mawleh? hi deksuai mawk lo ee lawm!!! Na NU’ na PA’ na Sanggam te a it mah bang in na ZI na Ta zong pa’i tuan ke’n la na it na KHEN kei-in acihnop na hi zaw…ngaihsun phasin dih ve leh ahi mah diam?…( guptuam paihtuam neilo a, it na hawmkim dimdiam ding cih na hi zaw )

h. LENGTONG PAUNO LEH ZI,TA TE

ZI…PASIAN’ ongpiak letsawng ( silpaak ) suangmanpha,kanop kadah kuppih ding, ong HEHNEM in tha ongpia ding ( ong HEHSAK ding hi lo ) zongzong ing KANA’KGUH omlo in pumcing theikeng,amah pen ka thanem ciang a ong HANTHAWN ding kalawm ( ong HANSUAH lo ding ).

Angkawi ding TEM bang kong deih Lia paal zatam apaal zong in,sinlung tawpnung ( a vekpi ) kongpiak sa,nanglo lengdang paal ka A’M lo,lailung kageel tuan lo, zatam lai pan cibang kongtel hicia kangaih no aw ……maimit hem a et cim theih loh duangtham hongzen liapaal ngaihno nang hi cia….et ka cim thei lo, na maitai siusiau te,it na KIP tawh INNkuan khat asuak ding in, ( it na KIP lopi ih hih khak ding dahhuai ) Sian aw it na KIPKHOSAK ta in. Khen theihloh maimit kisuan ee*….( Kiang lungmawl hing ei angkawi, Zua lungmawl hing ei vontawi te aw, hong MAISAK hong MAISAK un,
Sian in guabang honghah ding a, lungtuak nunnuam ngabang ih leng ding ).* **

TA.te …Simlei lungkhamna sungpan sanggah lelliang kei TOPA’kiang pan thupha GAMH kasang a,a vakvai lel kei PASIAN’ hehnepna hang in PASAL TAKPI hitang cih kiphawk ing,phamsa TU’N leh ZUA mel kamu bang ei, ka lungdamna kavon deih kasinlai.Ka lungdam ni leh kalung noppen ni ka PIANTHAK ni tawh kibang sa ing…kavon deih kasinlai aw…lawm leh gual khawl thei veng leh pam ho thei,a zawng a hau a lian a neu deidan lo it na lungsim pua in TOPA’ a’ ding nungta in kata aw!!!!

Kavon deih aw SIAN siam zotaang bang dam in,na Tu’n leh Zua lungnopna it na thupuak te gen in, nakhan kumkhua sawthen la tung SIANMANG in lumbang ong sungden hen…kiil bang khang sinlung siangtho vabang pil in,lungtup tuibang tung in SIAN in giabang ong zuun hen, namai ah ongdal ong nawngkaai sak thei khem peuh thunget na tawh DO in kalsuan lecin TOPA’ thatawh na gualzo ding hi.

Na pianma pek pan TOPA’ tung kong ap sa uh hi kalung deih aw…na mailam ding zong thungen tawntung ung lungkialo in mainawt in kata aw…PASIAN leh mite’ mai ah maipha ngah in la, NU’ leh PA’ lungmuan na hita in, GAM leh NAM tawisang PASIAN’ GAM zaisak ding TOPAN’ nangtung thupha hongpia hen….

1. ( LENGTONG PAUNO bang in EI ZOMI NU’ leh PA’ a hikhin sa te’n ih TA te THUPHA ih ngetsak ngei nai hiam? Thupa ih pia nai hiam? Thupha ih piak sawm/ ih ngetsak sawm hiam? ei leh ei kidot huai sa ing ) a taneih ni a anuam dan pen a si sa a NU’ a PA’ meel mu zah in kipa’k a, a pianthak ni a alungdam bang in lungsim khamuan na ngah hi. ZOMI te suan le khak ih neih teh tua bang a a lungdam khamuang thei te ih hihi.

2. ( Ei ZOMI te’ lak ah ZI leh TA te’ tung a ong MAISAK ong MAISAK un ci a, MAWHMAINA 2 vei angen LENGTONG PAUNO leh adang khat kua a hi zentam????? thei nuam sam ing ei!!! INN sung nupi / numei / ih ZI peuh ih zawh ciang PASAL tan na ih sa kha thei mawkmawk hi. Tua bang kizawh na peuh ah mat ( mark ) ki ngah lo hi. Bek tham lo in zumhuai mahmah lel hi.

A piangthak taktak leh a ki-it taktak te khat leh khat kizawhthawh bawl lo uh hi. Ih ZI Ih PASAL ih zawh hang in nang akhat na ngah ciai kipa’k huai angtan huai mahmah ei haw ou! gualzawhna silpaak,letsawng, ( gift,present ) ci-in kua ma ta in ongpia ngei ding hi beek lo hi ).Khat leh khat ih ki thum ding LENGTONG PAUNO in lampi onglak khin hi. HIh pen vantung PASIAN a bia ZOMI te’ paizia leh ih ngei na ding in HOIH kasa mahmah hi. zomto lai ni…

=========

I. LENGTONG PAUNO LEH KHANGNO TE ( LIA & TAANG )

A masa in LSTho sungah KHANGNO ta’ ding thuhoih pawlkhat en leng; khangno te aw na khangno na uh nuamsa unla na ut bang un gamta un! A HI ZONG IN ( BUT ), na gamtat na uh tawh kituak in PASIAN in thu ongkhen ding lamtak PHAWK gige un. Ka tano aw numei PAKTAT ( suzuak ) te’ tungah natha bei sak ke’n, amau in gulgunei tawh ki bang uh a,ong LIAKTUM mang ding uh hi.

LENGTONG PAUNO in khangno te ong thu VAIKHAK na ah; Hong it ding nadeih bang nang zong it masa in,nangtung hongbawl ding nadeih bang midang tung zong bawl in,LSTho in honghilh NAVAWH bang na AT ding ci, ahoih leh asia NAVAWH bang na AT ding….TU leh TA naneih ciang,hong it ding nadeih bang mah,na PI na PU – NU leh PA te it-in zahtak bawl in,MO naneih ciang in zong hong it ding nadeih bang mah,na TEEK na PI – NU leh PA it-in kem in.

Khual nazin ciang in zong zintun na’ng nadeih bang mah, khualzin gamvak zin leh leeng te it na tawh tungsak in, van nazuak ciang in zong alei ding kiseh zel in, nangtung hongbawl ding nadeih bang in bawl in….
( KHANGNO TUAILAI LIA LEH TAANG TE’N NGAIHSUN DIH UN…na khangno’ na tu’a bang denlo ding hi,mailam SAUPI enkawm in GAMTA KAMPAU un nang GE’L bang PIANGKHIN KHOLLO ding hi…KHANGNO TUAILAI LIA LEH TAANG TE’N NGAIHSUN DIH UN…NUNGAK TANGVAL dending ki sasa mawk ke’n,mailam SAUPI enkawm in GAMTA KAMPAU un khat vei ciang mi’ NU mi’ PA ding hi teh…KHANGNO TUAILAI LIA LEH TAANG TE’N NGAIHSUN DIH UN… Khualzin gamvak ngeikeining cikha mawk ke’n,mailam SAUPI enkawm in GAMTA KAMPAU un,na mailam BANGPIANGDING KITHEI LOPI….KHANGNO TUAILAI LIA LEH TAANG TE’N NGAIHSUN DIH UN hihbang GAMTATNA in PASIAN’ DEIHNA HI…na INN sung suan leh kha’k THUPHA ngah mi hiding a, leitung ah NUAMSA in NAKHAN SAU ding hi.

1. IT NA tawh zin leh leeng do in na ci hi…( Ih vaidawnna a kipan ih hopihna, an leh tui ih piak na leh ih mangphakhak na dongtak in IT NA ih HEL ding THUPI in KISAM mahmah hi…KINEIH KHEMNA tawh HELKHAWM lo ding hi hang….LEENGLA khat ih hi a, ZIN khat ih hi zong in,Khualzin gamvak a,zintungthei ciangciang khat in bel,KINEIHKHEM leh A TAKPI kikhen telthei mahmah tasam hi.

2. Kum 1998 ki’mpawl in Khitui gospel Sia, Evan. Do Khup in zong hih atung a LENGTONG PAUNO’ la na INN kuan suan leh khak THUPHA ngah mi hiding a,leitung ah NUAMSA in NAKHAN SAU ding hi a cih tawh kibang pian in HAUHNA leh KHANSAUNA thusim cih laibu HOIH mahmah khat ong bawl khia hi. ( tua pen PASIAN, NU’ leh PA’ leh PILNA ongpia aa, na cinloh na te ah ong puahpha na Sang SIA ( school teachers ) te zong ZAHTAK lecin na NAHLAWHPE’K ( daupai / mazang ) ding hi ong cihbeh to lai hi ).

3. Na khangnolai in pilna zonding HANCIAM in tua lo thu dang te ngaihsun khake’n, na PIL ding hong deihma’n sum leh paai nei lopi in SANG ah ongkha na ZUA PA, nausuah sihnak thuak a ang NUNKHUM ( numei te’ NAWI ) tawh ongkhoi ongkem ongvak na TU’N NU na hih zawhzah in silhsak tengsak in, a sih teh nakap kei zong in ong nuntakpih lai in LUNGDAM/LUNGKI’M sak in,nasep ding a LIANPEN tua hi. ( Khangnote’n ih sep pelmawh ding ih MAWHPUAK thu manpha te ong phawksak kikkik hi ).

j. LENGTONG PAUNO lN ZOMI KHEMPEUH TUNGAH HANTHOTNA ONGPIA

ZOMI aw khanglo in la THO to in, na khedap bulh in la, na LUKHU zong khu in, na KAWNGGAK ga’k in la ki sakhia in Hun hong NAI zo ta.

Hun te paipai ni leh kha beibei, khuahun omdan te zong ki heihei, kazak ngeiloh thu tampi, kamuh ngeiloh na tampi, pian ki lamdang khan ki lamdang ta, mawk om mawk tut mawk vak nawnke’n.

Naki’m leh napam khuadak dih ve, nanung lam namai lam en dih ve, mi’ omdan te khualungngai leng, ngaihsutsut ngaihsutsut hun ta, luplup ih mutmut ding hun nawn kei, sepding bawlding tampi om ee.

SAKKIK;;;;;; THO IN LA NA KHEDAP BULH IN, NA KAWNGGAK NA LUKHU KHU IN, A TAWNTUNG KIGING SA’N OM IN HUN HONGNAI ZO TAA.

Gam leh nam ading pumkhat suak in, semkhawm bawlkhawm ma ihpang khawm aa, ki thutuah na TOPA’N deih a, kilemna mun ah TOPA om,TOPA ei te lam ah hongpang ding, kua’n ih lang ongpang zoding hiam???

Tanglai ih PU/PA te’n banggen hiam?, khua 1 kituak khua 9 in zolo, Sakhi in zong a tat na’ng, kuam 9 khual hi acih bang, diamdiam in mailam SAUPI khual ni, KHANGSAWN MOMNO te lam sialsak ni,

Ganhing te’ nuntak na lungngai leng, mun leh gam leh lei neiciat uh a, Vasa te’n zong Bu nei a, gamsa te’n zong Kua nei hi, a mau munciat ah suak ta tak in, ki-it ki lem in nungta uh hi.

Tuan PU/PA satsa luahsa gam hi, migam milei a te’ng ka hi kei, kamun kagam kei a hi,
kami kasa te hin na, it ding kemding cingding humding in, hih in KA MAWHPUAK LIAN BEL a hi.

SAKKIK;;;;; MAKAI VAIHAWM TE ZAHTA’K IN KHAT LEH KHAT SAWL NA KIMANG NI,

SEPDING NE’K DING A OM TE ZONG SEMKHAWM NE KHAWM NI.

***** Ni dang in LIA & TAANG te’ LENGTONG bektawh a kibat hang in, Tu hun ciang in IH ZOGAM,ZOMI LEH ZOLEI IE LENGTONG hi ta hi.*****

IH ZOGAM KHUAVAK ongpuak LENGTONG MUSIC BAND TE LEH LENGTONG PAUNO’ TUNG MAHMAH AH ZONG LUNGDAM NA IH KO PHAPHA HI. ( zomto lai ni ei )

===============

Source: Zomi International Network

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s