Lamka Thuthang :: Manipur Express | July 04, 2008

Hindustan Computer Ltd ah sepna mu

Lamka, July-3: Th. Lamminlian(22) s/o Th. Dongzapau of Simveng in Karaikudi(Tamil Nadu) a ACCETE akipan 4-yrs BE in Electrical & Electronics zou in overall in 72.2% marks mu a, aman 3rd yr a sinlai akipan in Hindustan Computer Limited(HCL) te’n amau laka sem dia a chial ziakun huai ah sem ding hi. Amah kha 4 sung Chennai(Madras) ah training masa ding a, huai sungin kha in Rs. 18,000 pe ding uh a, training zawha service a join hunchiang in aniampen in kha in Rs. 25,000 zel lawh ding hi. Amau batch ah Manipur apan mi 3 tel uh a, midang 2te’n zou nailou uhi.

KSO in Ni 3 sung a kipuang di’n theisak

Lamka, July 3: Kuki Students’ Organisation (KSO) Churachandpur General Secretary Seiboi Haokip in thusuah a bawl Press a kimu in ataklat dan in, June 29, 2008 zan in Mr. Thangminlun Lhungdim s/o Lhunkholal Lhungdim mulkimn abei in thah in om a, KSO/CCpur District in naktak a mawhpaih ahihdan puang hi. Mi damthei tawp leng kum 80 val dam zou vang mahmah ahihlai a, hibang a mulkimna bei a kithahna in Pathian thangpaihna sukha maimai ahihdan taklang hi. KSO thusuak in ataklatna ah Mr. Thangminlun Lhungdim bangziak a thah a om hiam, tual that tute’n a thah na ziak uh ni 3 sung a puankhiak ding uh leh Mr Thangminlun Lhungdim luang auto richshaw a Bijang Community Hall a va koihtu ki puang ding in ngen ua, KSO thilsuina ah Auto Rickshaw Owners’ Association in kithuahpih ding in leng ngetna bawl uhi.

State Malaria Officer in hongpha

Dr.Nimaichand Singh, Manipur State Malaria Officer makaih in official mi 3 te’n zan in Lamka hongpha ua, Dr.F.Thienkhogin, DMO makaih in Leisen Tampak ah Malaria Awareness campaign nei uhi. Tuni’n Benjamin MHW leh ASHA member te’n Maite khua leh akimvel ah DDT kapna leh damlou tuamtuam te sisan test ding in lakna va nei uhi. Tuabangkalah, CMO in Kawlhen khua (Henglep sub Division) phadia a sawl a staff 3 te zan nitak dak 8:30 in Lamka hongtung uhi.

RKS nuai ah Computer hongtung

Rogi Kalyan Samiti (RKS) nuai a Dr.T.Hatzaw, Medical Superintendent office/ District Hospital zat ding in Computer set leh Xerox machine khat July 1, 2008 in Dist.Hospital hongtung a, tu’n zanglel uhi. Huaiban ah July 9, 2008 sun dak 1 in Dr.T.Hatzaw, Medical Supt. District Hospital office chamber ah RKS executive committee meeting nei ding ua, thupoi mawh tuamtuam gen khawm ding uhi.

Youth Club campaign nei uh

NYK/CCpur staff te’n July 2-6, 2008 sung Tuibuong Block ah Block Level Youth Club campaign neilel uhi.

Khua 2 in grading report pia

NREGS 2007-2008 nasep ah CCpur Dist. a amasa pending in Saikot leh Sangaikot in village grading report DC kiang ah pelut ua, DRDA staff te’n na kisemte amun mahmah a ava etchet nung un, 2008-2009 fund piakding kithei pan ding hi’n kigen hi.

Accident mi 3 Dist.Hospital tun

Douthang (40) s/o Ngulzalam of Tuima , apaisa June 30, 2008 sun in gamlak ah sing-at ding singkhang dek, asingkhangdek uh tolh in aban taklam leh apangsuk taklam hetdulh kha hi.Paukhanmuan (18) s/o Dongzakham of New Lamka leh Lemba (18) s/o (late) Brajomohan of Tuibuong tuni nitaklam dak 2 vel in Red Cross Road leh Tedim Road kisuktuahna lak ah Scooter ataituak kiphukha ua, agimse lua omlou uhi. Accident mi 3 teng District Hospital ah admit in om uhi.

DLCC meeting omding

Sumant Singh, IAS DC/CCpur makaih in July 8, 2008 sun dak 12 in DC Office Conference Hall ah DLCC meeting om ding a, SDO/BDO/DLO te tel ding uhi. Huai hun ah Independence Day lawp dingdan tel in thu poimawh tuamtuam gen khawm ding uh hi’n thusuak kingah hi.

Saikot PHC ah Lab.Technician omlou

Saikot PHC a Microscopist &Lab.Technician na semkhawm Lalramzaua apaisa May 20,2008 in Moreh ah kisuana, Lab.Technician nasemthei kua mah omlou hi. Microscopist Chingngaihlian in June 19, 2008 in Saikot PHC ah hong join a, Laboratory Technician semthei kuamah staff omlouh ziak in nasep buaihuai ban mahmah hi’n gen uhi.

Khua 6 ah NREGS nasepna enkhia

DRDA staff a NREGS Program officer Joyce , Asst.Program officer Letzamang leh staff mibangzah hiam te’n tuni’n Samulamlan Block a khua om Saiton Khunou, Saiton Kullen, Sagang, Moirangmantak, Khousabung leh Bunglon khua te ah NREGS 2007-2008 na kisem te etkhiakna vanei uhi.

TAYC in guta khat man

Tuibuong Area Youth Club (TAYC) in van tuamtuam gu Lulun Gangte s/o (late) Suonglam of Tuibuong mankhia uh a, amah apan in Hero Cycle 1, Kuangpi leh steel kuang 3 mukhia ua, tuni apan ni 3 sung ngei a TAYC khut apan van neitute’n va laktheih ding hi’n TAYC in thupuan nei hi. Tuabang van neite’n TAYC President Mobile no 9856361194 ah contact theih ding hi.

DC in Commissioner ah ngen

Sumant Singh, Deputy Commissioner/Churachandpur in tuni in HSLC leh HSSLC compartmental Examination Centre tawh kisai in Commissioner Education (S) kiang ah ngetna lehkha pelut hi. DC/CCpur in ahihleh, Education (S) Commissioner kiang ah Churachandpur ahihleh HSLC leh HSSLC examination centre siangthouna mun ahihdan theisak a, kum tamtak regular examination centre dan in kizang sek a, himahleh, Compartmental exam centre dan in kizang ngeilou ahi chi hi. Teddim road ah bandh leh kiphinna tuamtuam atam mahmah ziak in compartmental candidate te ding in leng buaina thupitak tungthei ahihdan taklang kawm in, Imphal mun ah giahna leh neekna ding mun lemchang lou ahih ziak in Churachandpur ah leng Compartmental examination centre khat honkhiak poimawh asakdan zasak in, CDSU in hiai tungtang ah Press Hand out a suah uleng a copy thuahtel ngal hi.

CDPTWTSCA in thusuah bawl

Churachandpur District Primary Teachers’ Written Test Successful Candidates Association in tuni a thusuah abawlna uah, Newspaper khenkhat in Primary teacher Interview om dan a agelh pen uleh BSEM in December 2006 kum a Primary Teacher Recruitment a sai un kizopkhakna bangmah neilou ahi chi uhi. SPF Government kiang ah viva-voce saiding in tam veitak nget himah le uh ngaihsak ahih louh ziak un AMWTSCAPT panlakna tawh All Manipur ah General Strike om khinta a, tu in National Highway teng blockades bawl ding in AMWTSCAPT mansa in om ta ahi chi uhi.

Ni 7 nung in ATSUM in kiphinna panding

Imphal, July 3: All Tribal Students Union, Manipur a Information and Publicity Jospeh R Hmar apan thusuak kimu dan in, May 18, 2008 in Manipur Government in ATSUM tung ah thuchiam bangzah hiam nei a, himahleh tuni tan a sepsuah aneih louh ziak un ni 7 nung (July 10) apan kiphinna pannawnta ding uh ahihdan puang uhi. ATSUM thusuak in ataklatna ah, July 10 zinglam dak 6 in National Highway 39 leh 54 te economic blockade pan ngal ding ua, singtang bial a ZEO office teng khak hiding a, School leh college te bel sukbuai hilou ding chi uhi. Imphal a om Directorate of Edn (S/hills section) leh Tribal Development Directorate leng khaksak hiding chi uhi. ATSUM tawh kihouna a Government palai L Jayenta Kumar Edn Minister, TN Haokip PHED Minister leh Vety/Hills/TD Minister DD Thaisii te ATSUM in boycott ahihdan puang uhi.

Train cancelled a hunkhop om

Lamka, July-3: M/s JK Xerox, UBI Gr floor, Tedim Road apan kizadan in train cancelled ziakin ticket la kuapeuh in sum lakkik theih ding chih hi. Huaite bel Gauhati-Bangalore –July 8, 2008 tan; Chennai –July 11 tan; Trivandrum –July 9 tan leh Ernakulam –July 11 tan hi’n gen uhi.

Theihgigena suangphuh honna

Lamka, July-3: (late) G. Kamkhawthawng leh azi(late) Mrs Khawlzam theihgigena Suangphuh honna July 4,2008(Sintawpni) zinglam dak 11.00 in Lamka hanmual ah om ding a, huaizawh sunnung dak 1.00 in a tenna inn uh Nehru Marg ah om ding hi. Huai hun uap chiat ding in Pumzamung Guite leh a innkuante’n anu leh pa ngaihnatpih khempeuh chial uhi.

Source: http://zogam.com/index.php?option=com_content&task=view&id=3568

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s