Khuga Dam kichimsia sa in mipi patau: Hausa pa’n IFCD ni 5 sung hun pia

M. Semuol leh Bohlui khua kikal ah Khuga Dam Rightside Canal kichimsia

Lamka, July 7: Lamka Police station apan sim-suah kilometre 9 vela gamla banah Khuga Dam apan mallam(Lamka lam) km 4 vel a gamla Bohlui leh M Semuol khua kikal a Khuga Dam Rightside Canal kibawl chimsia a,huai Canal kichimsia a tuiluang ging a thupi luat mahmah ziak in M Semuol khaw mite’n Khuga Dam kichimsia sa in zan khawvak in ihmu lou uh hi’n kigen hi.

Manipur Express staff te’n tuni in hibang thu a zak un Canal kichipsiatna mun va enkhia in lemla uh a, huaizawh in akiangnai a M Semuol khua pha in , mi poimawh tuamtuam tawh houlimna va nei uhi. M Semuol Hausa Yamthang in agenna ah zan nitak dak 10 leh 11 kikal vel ding in thawmging thupi mahmah akhaw kiang uah om a, amau leng patau zak uh ahihdan gen hi. Khaw mite lak a khat in a gendan in Canal a chipsiat phet in thawmging nasa petmah a, amau leng “Khuga Dam kichim hita e” chi in dipkaw hialin om uh a, zan khawvak in hak mai uh ahihdan gen hi.

Thusuak kingahdan in Khuga Rightside Canal in atotkhak M Semuol leh Bohlui kikal zan nitak a kichim ziakin a khang ah tui luangkhesuk in a ging thupi mahmah a, ngakul feet 800 kimkot(feet square) alian tumsia a, ngakul sung teng buannawi in dim a, huai apan tuilet in a khang a Misao Lhahvom, Bohlui, M Semoul leh Saipum-te tuilou om teng tumsuk chih ahi. Canal chim in a hihsiat buhtuhna tuilou pari bangzah phazou ding hiam chih sutkhiak haksa mahmah hi’n khawmite’n gen uhi. Canal kichipna mun a om (culvert) ahihleh huai area a suahlam leh tumlam a tuilou omte tui supply na dia bawl hi a, Canal kichipna ziak ahihleh theih hilou a, khaw mite gendan in sik tellou abawl ahihziak hiding in gingta uhi.

Ngakul neitu Ngamkhopao in a gendan in tuma zek in nga Rs 3800 man a ngakul ah khum thak ahihdan gen in, a gam leh leitang ban ah a ngateng tawh bang zah man (value) mangthang ding hiam chih tu-le-tu a ngaihtuah khe bun nailou ahihdan gen hi. Tuni mah a thiltung ahih ziak in, louneite kuakua hiam chih suikhiak haksa lai a, Canal kichimsia in lou bangzahta suse ban hiam chih leng theih but haksa lai chi hi.

M Semuol Hausa Pu Yamthang in agenna ah tuni in Irrigation and Flood Control Department(IFCD) official khenkhat in huai mun vapha uh ahihdan gen hi. Thiltung tawh kisai in Pu Yamthang in agenna ah, IFCD te adia nipi kal khat(one week) sung a hih buchin ding un point 3 pia ahihdan Manipur Express staff te theisak hi. Pu Yamthang in a genzelna ah, IFCD in nganou tui taihmang teng a sumtang(in cash) a a piakding uh, ngakul a buannawi kivuk dim teng a khuatkhiak ding uh leh thumna ah IFCD in tuateng a sukbu chin ma Canal kichim a bawllouh ding, hiai teng a sukbu chin kei ua leh Village Authority in maban ah panla ding ahihdan gen hi. Khuga Canal chim mit a mu khat in agenna ah tuma lam mah in Canal khat vei chimkhin ahihdan gen a, tu in Right sidecanal in a zuih taklam pang chim bang hita leh inn 10 val tui in tuum ding ahihdan gen hi. Pathian in amaute vengbit tadih ahihdan leng Manipur Express staff-te zasak uhi. Canal kichim ahihleh Right canal a veilam pang ahi hi.

Tuabangkalah zanhal July 5 (Kiginni) sunnung dak 12 vel ding in IFCD Minister N Biren Singh in Khuga Dam nasepna enkhe kawm in Dam a Leftside Canal leh Rightside ah tui khahkhia hi. Hiai hun ah kilometre 20 tan a sau tuikhahna ‘trial run’ nei ua, trial run pe’n tu in a final result om ahih ziak in, Khuga Dam leftside leh rightside canal ah tui khah ngam huai nawnlou suak hidanin tamtak in gen hi. Manipur Express staff te’n mi tuamtuam ngaihdan a lakkhawmna uah hibang thiltung pe’n i gam adia ‘thil mulkimhuai mahmah’ ahihdan gen ua, Canal kichim maimai mi tamtak in Khuga Dam kichimsia bang a a ngaihtuah ua, huai in thil tamtak a suksiat leh maban ah ngaihtuah ding thil tamtak om ahi chi uhi. Prime Minister Dr Manmohan Singh in hun lem masapen in hiai Dam hongkhe ding chih hilai hi.

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s