Tamu ZO Organization (TZO) Pan Huhna Ngetna

By: Zam Suan Khai

It leh muon Zo tate, Ih bieh Pasien min leh TZO min tawh leitung muntuomtuom a om Zo tate khatciet ang nouhset masa ing.

Apat na in, tenna khangna khuo leh tui te kibang lo i hi zieh in kei ma leh kei ma ang kimeihset (introduce) vang. Khat leh khat ki theihlou pi ki hou dan zong nop sin ihzaw……Kei pen Tamu khuo a teeng Pa Go Cin Hang leh Nu Nian Cing te tapa li na Zam Suan Khai hi ing. Basic Education teng Tamu khuo B.E.H.S leh Nazareth Seminary, Anisakhan, Maymyo ah ka na sin a, matriculation kazaw cieng in Kawlgam Vocational Education khat a hi University of Forestry, Yezin, Pyinmana ah pilna sin nate kazomtou aa Bachelor Degree tawh ka graduate zaw a pat tudong Forest Department, Ministry of Forestry ah na kasem hi. Tulai tah Pasien thupha tawh Germany gam, George August University ah August, 2006 a pat Master’s study bawl in ka om hi.

Abeisa February pan April habei dong Kawlgam ah ka Thesis ding Research Data Collection bawl in ka na pei hi. Kawlgam ka omsung Pasien in hunlemtaang ei pie a tenna leh khangna ka khuo a hi Tamu ah nipi 2 sung it leh ngaih pienna Nu leh Pa leh U leh Nau teng leh ka Zi ka Ta tawh hunnuom te ka neitheih ban ah TZO makai teng leh Pastor Kam Khen Dal (Chief Editor, Pu Zo News) mama tawh holimnate kana neih theih hi. TZO makai teng tawh thukikupnate zong kana neih theih aa, tu a ih thulu ahi “TZO pan huna ngetna” tawh kisai in leitung gam tuomtuom a om Zo tate khatciet tung ah a theihsah leh a zasahsawn ding in mawpuohna (tavuon) ei guon uh hi.

Ih Thulu a hi “TZO (Tamu Zo Organization), Tamu Zo Nopna leh Dana Kipawlna pan huna ngetna” vai kikum kia vai.

1. TZO pen 1979 kum in ang kiphuankhie a, ngimna leh sepnate pen Tamu khuo a teeng i Zo minam sung ah Nopna leh Dana te ah kipawl tawn na a na himasa hi. I Zo minam sung aa meigong, taga, leh khuolzin gamvah kawm a dana leh hamsietna tuoh te leh khuo sung ma ma a Beh leh Phung tawm te’n dana a tuoh cieng un hamsatna tampi tah nathuoh uh hi.Ahihang’n TZO angpiengkhiet zaw tua i gen hamsatnate ang beipai suoh ahi hi.(tua hunlai in Tamu khuo ah khamtung leh zangduang khuo tuomtuom pan sumsui a om i Zo minampii khuolzin gamvah tam mama dan hi)

2. Hun leh nite ang beibei in TZO zong a makai te leh memberte thupina leh kithumannate hang in ang piicing semsem a, sepna te ah Tamu khuo a teeng Zo minamte i Nopna leh Dana vaite beh ang hinawnlo in Zo minambup aa ding nasep golpi tampi tah a semzou ang suoh ta hi. Gentena in zum leh maangkot ki tut ding buoinate (luong leh baan thute na ngawn) TZO in i Zo ngaina ma tawh
phyaesin pieh zou hi. Tua ban ah i Zo minam vai tawh kisai in hangsan tah in a na ding zou uh aa, i Zo minam tung a hamkhiel, muakhielte a ki pan TZO te kung ah a mawhnate uh pulahsah in thumna neisah zou uh hi.

3. Hun tawh kizui’n, TZO tenzong ngaihsutna leh khuomuna a hoih tampi a neihuh a tun Zo zumpi khat neihzou na ding in ang kipan ta uh a hih ziehin a koimapou in i panpii cietding in zong ka um hi. Kawlgam kiuhdante zong ang ki kheelkheel a, Democracy hun bang angtung tahtah leh i minam ciet ma leh i party ciet ma tawh a kiding ding angsuoh ta hi. Azieh in Democracy pen a tamzaw thu
tawh kiuhna a hizieh hi. Socialist hunlai dan aa muang om hithiet te ang pieng nawn lo ding hi. Tua zieh in Zo tate bilteengna zangduang teng ah Tamu khuo ma i khuopi angsuoh ding a, Zo minam kipawlnate zong Tamu ma i Phung leh Zungpi ang suoh ding hi. Tam thute i ngaihsut ciang in zangduang Zo minamte tamten na pen Tamu Khuo in Zo Zumpi a neih zou ding pen a phamaw khat leh a kisam mama khat ang suoh ta hi.

Tuazieh in i Zo minam sung kipawlna a hi TZO te i deihna leh ngimnate mimal khatciet in ihi theihnaza ciet tawh i panpiiciet ding uh deihna leh muangna tawh ang zasah hi ingh. USA te President a hi ngai, John F Kennedy in “My fellow Americans: ask not what your country can do for you – ask what you can do for your country”, “ka gam in bang ei bawlpieh theih diei naci sang in ka gam a ding bang kabawlpieh theih diei na ci in” a ci bang in eiten zong “Zo minam kipawlna khat pou pou in kei a ding bang ei bawlpieh theih diei i ci sang in Zo minam kipawlna a ding bang ka bawlpieh theih diei” i ci theih ding hoih sa ingh. Eima minam kipawlna te eima’n i thupisah aa i puo sih leh minamdang ten ei puo pieh lou ding cizong theihciet ding in thupi sa ingh. Tu a za hisah phot vai in kikum toutou lai vai.

Lungdam:

Zam Suan Khai
M.Sc (Tropical and International Forestry)
Georg August University, Goettingen
Germany

Home address:
Rosenbachweg 2/110
37075, Goettingen
Germany

Phone:
+4917664086242 (Mobile)
+4905512713850 (Home)

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s