Nopni-dahni a tawndan

Editorial, The Lamka Post July 25, 2008

Nopni leh dahni a tanau-laina banah innsak-innkhang kikaikhawm a inntekte dahna dahpih leh kipahna kipahpihte ei singtangmite ihi uhi. Hiai bang chiindan pen khovel a nam teng in leng nei chiat ua, himahleh ei ki-uap tuk a ki-uap bel tam lawmlawm ding un gintakhuailou hi. I lak ua lusunna tuak a om chiang in tanau-laina leh innsak-innkhang in i kidelhhuan banah lusunna tuakte toh kitheihna neikhahetloute tanpha in i gal ua, tuailai phatuamngai taktakte’n han i toh banuah nitak chiang in i lengkhawm zel uhi. Hiai bang chiindan i neih uh hoih mahmah ahihman in i mansuahlouhna ding ua tua sang a kepbit ahih zawk semna dia panlak chiat poimoh hi. I ki-uap dan uh hoih in kepbit poimoh mahleh a lehlam ah i paidan uh khenkhat a hun toh kituak dia
heilamdang zek ngai pawl omta bang hi.

Khopi khat hita ihihna uah, mahni inn a tenglou, mi innluah a teng kitam mahmah hi. Innluah a tengte banah mahni inn mahmah a tengte leng, i plot hawm uh a neu deuhdeuh ziak in tamtakte’n huang liantak leh kichingtak neilou hi. Hichibangte innsung a lusunna a tun chiang in mun awng omlou ahihna ah lamlian bang khaktan in omsek hi. Tu’n leng lusunna ziak a lampi khaktan in mipi a di’n nawngkaina tun thou mahleh a hidandan in paitheilai a, himahleh tunung sawtlou chik in bel a mihing mahmah banah gari leng hong tam deuhdeuh ding ahihna ah mipi a dia genvuallouh nawngkaina nasatak hon tun ding hi. Nopni in leng i innten-louten un hon zillou ahihna ah tamtakte’n lampi bang khaktan zen in i nopni un mipi a dia nawngkaina nasatak i tun uhi. Nopni-dahni a mi’n hoihtak a a hon uap lai ua inntekte’n i tung ua hoihna leh phatuamngaihna hon suahte nawngkaitak a i koih pen a khonung in newspaper khong ah kipahthu gen hial mahle siam kituhna lam a inntekte vuallel deuh suak ding hilou hiam chih ngaihdan omthei hi. Mipi a dia nawngkaina beisakna di’n veng teng phial in community hall ah hun zang leng bang a chi dia? Nopni sang a dahni ngaipoimohzawte i hihna uah, Lusunna hun community hall a zat ding chih i pomsiam uh gintak haksa mahmah a, i pomsiam hun uh leng tunai a a hong tunpah ding gintakhuailou hi. Huai ziak in nopni hun i zatnate uh mahni innmun a huang kichingtak neiloute bang in community hall a zangthei leng mipi a di’n nawngkaina kiam mahmah ding in gintakhuai a, huai banah, inntekte a di’n leng tha-le-zung banah sum senna leng kiam tuan mahmah ding hi.

Huai banah, misi a om chiang in i veng/khua ua khotang pawlpite’n dan a bawl dungzui un sun dak 12 tan a site a sihni mah ua vui chih bang, ahihkeileh, sun dak 12 nung a site a sihni zingching a vui ding chih dan deuh in bikhiahsa in om hi. Etsakna di’n, sun dak 11:30 a tuahsiat ziak a lusunna tuakte a ding bang i ngaihtuahsak chiang in, dakkal 1 leh 2 paisa a hing-le-dam a a iit mahmah uh ompen vuikhiak ding chih haksa petmah ding hi. Veng/khua khenkhat ah, dan bawltu khotang pawlpite’n siluang pen a sihni mah a vuilouh dia thupuk theihna inntekte khut ah koih mahle uh, hiai bang thupukna in khotang pawlpite’n ‘official’ a a uapna uh mansuahsak ding ahihna ziak leh dan omsa om ahihna ah kuamah khotang a a phengphi hih utlou in i kithuman chiat sek uhi. Kithuman chiat zel mahle phatuamngai pawlpite’n i phattuamngaihna etthak poimoh bang hi. Dahte dahpih kichi mahlehang hiai bang dinmun ah dahte dahna behlapsak kisuaklou ding hiam? I pawlpi dinkhiakna san pen kalh suaklou ding hiam? Huai ziak in sivui hun toh kisai in lusunna tuak inntekte deih dan mah in pai vilvel leng bang a chi dia? Phatuamngai kichi ihih vanglak a leh phatuamngaihna kha ‘diktak’ toh pang leng hantou ding leh lengkhawm ding i kimulah hial ding ua hia? I kimuhlah sim ua leh leng phatuamngaihna kha ‘diktak’ hong pawtzaw ding a, i tawndan kepbitna dia kalbi lianpi hong suakzaw ding in gintakhuai hi. Huchilou a, sivui ding i kimuh zohkei hial ua leh lah i tawndan uh i kembit zoukei uh chihna hilel ding a, i kepbit zohlouh ding hum a tua phatuamngai lem kineih khemkhem ihi uh chihna hiding hi.

Source: http://zogam.com/index.php?option=com_content&task=view&id=3933

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s