TULAI PASIEN PAWLPITE TAA SAP

Rev. G.K. Samte

Pasien Guot Pasien Naseemtu: Thuhunlui hun lai hihenlen tu Thuhuntha hun hitaleh Pasien in Ama na seem ding mi a guot a, a sawldoh jeel hi. Ama guot lou leh sawl loupi a, a thugeen leh a naseemte Pasien in athei khah pi sih hi.(Matt.7:21-23). Pasien in a mite lamkaitu ding, kumpi ding, siampu ding, guolnei ding leh athu geen ding mi a guot dimdiam hi.

Ami, Israelte Izip a Kumpi Faro khut neiya sal taangte hunkhe dingin Pasien in Mosi a guot a, a sawl doh ta hi.Siampi naa seemdingin Levi phung sunga mite a guot hi. Pasien guot a Pasian na seemte koima amau kithalawpna leh kipieh thaw vaang a Ana seem ding a Pasien in a guot aum sih hi. Mangpa Jesu thu gen: “Nou nang teel sih ua, keiman ka hing teel nahi zaw uhi, tuajiah in kuan doh a, va gaa ding leh na gaa uh um jing leng ding a ka hing guot leh sawl na hi uhi” chi hi(Johan15:16).

Pasien sawl a thu geente bou in Pasien thu a geen uhi (Johan 3:34). Pasien sawl mikhat aum a, amin khu Johan ahi (Johan1:6). Pasien guat leh sawl khah bih beh loupi a Pasien thugeen leh na seem tampi aum hi. Jesun jong Guolnei dih loute apat kikeem ching ding in a mite ahil tuh leng hi. (Mak.13:5, 6). Sawltah Paul inzong Pasien sawl hi khalou thugeen tu tampite dai kai na ding in, hichin Galatiate kung ah alai hahna ah ageen hi, “Keima hing geenlou hantanhoi tuom mi dang koi zong hing geen a um leh hamse thuoh in um ta hen” achi hi. (Gal 1: 9 ).

Tulai in jong Pasien pawlpite lah ah, Pasien guotlou leh sawllou a, Pasien thugeen a tam mama tahi. Johan in a laihahna sungah guolnei hieu tampi vannei ah a hing piang ta achi hi (I Jn. 4:1). Pasien in a thugeen ding leh a na seem dinga a guotte leh a sawlte, a silbawl theina, sil lamdang leh chiemte nate in ajui sah hi (Mak.16:20). Tulai a Pasien pawlpite tahsap lianpen khat ahileh lamkaipa, thugeenpa, pastorpa, evangelistpa, missionarypa Pasien guot leh Pasien sawl ahinai, chi a dot ua, a kan chian ding uh khu ahi (I Johan 4:1).

Sawltah Paul in jong pawlpite a laihah na bulpat na chin ah Pasien sawl leh guot a thu geen leh na seem ahi na tambang in ama leh ama aki geen chian jel hi. “Keima Paul, mihing a hing kipan hilou, mihing guot tawm jong hilou, Jesu Krist leh shina pat a kai thou pa Pa Pasien in sawl tah ding in ei guot hi” achi hi. (Galatia 1:1) Tuabang ma in thu geen tute hi in, Pasien naseem khat poupou khat in Pasien guot leh sawl a hiina Pasien pawlpite masang a kiteltah a, a geen thei ding ahi. 2. Hagao Siangthou. Tulai Pasien pawlpite tahsap lian mama khat ahi kia leh Pasien Hagao siangthou ahi. Pasien thugeen minthang Samuel Shoemaker ki chi pa in athu getna khat ah hichiin agen hi, “Tulai Pasien pawlpite lah a kipat Pasien Hagao Siangthou kiladoh taleh Pasien pawlpi pen a pei ngai bangbang, ahat ngai-ngai in peithou, hat thou va” achi hi. Tambang thu get in geen anei hi. Chi peen, pawlpi tamtah Pasien Hagao panglou in alam pei uh china ahi. Laisiangthou in hinna pia khu Pasien Hagau ahia, mihing silbawltheina khu phatuam votlou hi achi hi (Johan 6:63). Pasien Hagao panglou pawlpi pen hinna neilou pawlpi ahia; Bible in Shina pi a hingmin pua achi pawlpi asuah hi (Rev.3:1).

Pentikost ni’n Pasien Hagao Siangthou hing tual kum in Pasien Pawlpi ahing phutdoh hi. Mangpa Jesun van a ka ding kuon in a pawlpi khansahna ding in hagao silpiahte a pie hi. Tuate khu- kimkhat apostle hiding in, kimkhat evangelist hiding in, kimkhat pastor hi ding in, tualeh kimkhat te thuhiltu hi ding in (Ephesate 4:12). Pasien hagao silpiah tang tu teng in, a sep ding bang chiet ua a sep chieng un Khrist pawlpi a khang tou hi. Pasien hagao neilou ta pouma in Pasien hagao a kipat silpiah khu a nga thei sih uhi (1Korinth 2:14). Pasien nasem ding ten Hagao sil bawltheina a poimaw daan uh Mangpa Jesun (Luke 24:49) sung ah agen hi. Tualeh Hagao Siengthou na ngaa chieng un silbawltheina nanei ding ua, Jerusalem ah, Judia gam ah, Samaria gam leh leimong top todong in ka thu theipi tute na hi ding uhi. (Nasepte 1: 6) ah. Sawltahpa Peter in Kornelia innsung a thu aget laitah in athu get ngaai tute tung ah Pasien Hagao Siangthou ahing tung a, haam laamdangte in ahing haam ta uhi. (Nasepte 10:44-47) Pasien naa peen Hagao naa ahia, Hagao Siangthou in mite asilbawl theina toh thuam in Pasien naa a seem sah hi.

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s