Lamka khopi khan dan diklou

Editorial, The Lamka Post August 23, 2008

Khovel a khopi liante a tangpi in chi nih in, Metropolis leh Cosmopolis in khen theih hi. Metropolis ahihleh Greek pau, ‘meter’ (mother) leh ‘polis’ (city) apat kilakhia hi a, gam khat a vaihawmtute tutphah khopi genna in kizang a, himahleh, tuchiang in khopi lian khat peuhpeuh genna inleng kizang hi. Cosmopolis ahihleh Greek pau mah, ‘kosmos’ (world) leh ‘polis’ (city) apat kilakhia ahi a, khopi lian khat peuh genna in a kizangkei a, Nam chih tenkhawmna khopi genna in kizang hi.

Lamka khopi i et chiang in, khopi i chih utsek hang in, capital ahihlouh ziak kia hilou in, chingzou nailou deuh hi a theih in om hi. A diak in, Vaigam hiam ahihkeileh, mun dang a siam sinlai naupangte innlam hongpai chi a Lamka a hongtung chiang un, Lamka khopi chi a i gen thang zen uh ‘ap’ ahihkeileh ‘tul’ a sakdan uh genveu uhi. Bang chi’n i mohsathei dia? Lamka khopi sung a tengte’n khantouhna thupitaktak nei mahleh, a khopi ah khantouhna muh ding vang mahmah a, i lamlian uh khopi lamlian di’n deihthusam chingzoulou a, lamlian nawl ah hawktui luanna ginatak omlou a, lamlian nawl ah gari neiloute pai nang omlou in khe a paite toh gari a taite lamlian kituh ngai a, tuuk chiang ngial in hawktui toh leng kituh ngai nalai. Tulai ngial in lamlian dung tanvaktute leng zatna bei in ding ngeungou geuh uhi. Lamka khopi ah tuinek ding kiching omlouh thu pawlpi leh mimal khenkhat in awlmohna liantak toh ana tangkoupih zeuhzeuh ua, tuilawng leng kidaihlou ahingei ding a, tuilawng gu matkhiak om veu uhi. A diktak in, tuinek ding kia hilou in niteng poimoh a zat ding nangawn haksa mahmah ahihziak in tuinek ding kichinglou i chih in genkhazoulou lai hi. Meivak lam ahihleh tuma toh teh in hoih lota a, kipahhuai mahmah in mimal leh pawlpi tamtak inleng a kisaipihte tung ah kipahthu leng tamveitak genkhinta uhi. Himahleh, Lamka khua pen khopi chih hial theih nang in meivak inleng deihthu sam zoulou lai hi. Hiai teng, lamlian, tuinek leh meivak i chih khong a diktak a, gam khangtou nailou, khangtou dia kisadek kiangkiangte buaipihte ahi. A lehlam a i et chiang in, Lamka pen metropolis chingkei mahleh, cosmopolis nou khat ching mahmah hi a muhtheih in om leuleu hi. Lamka khosung ah, kituah leh kituahlouh pen thutuam, CHIKIM khosa khawm ahihman in cosmopolis nou khat chihtheih mah ahi.

Lamka a siatna lam i et chiang in, AIDS toh kisai leh khamtheih thil a a minthanna mahmah in leng panpih mahmah ahi ngei ding a, khopi taktak, cosmopolis toh a kilamdangna bangmah om nawnlou hi. Nitaklam a Tedim Road dung i vak chiang in dawr khenkhat kong ngial ah gari parking ding nangawn haksa thei mawkta hi. Himahleh, kipahhuai lua ahihlouhna bel dawr khenkhat, mi tangpi lut utlouhnate kong kia a huchi ahi hi. Lamka khopi a thil hoihlou leh chindan hoihlou omte gelh seng ding leng ahikei hi. Khua khat khopi lian suak dia kisa ahihman in, thil hoih leng a om dia, thil hoihlou leng a om di chi a i kikhamuan theih leh hoih veve. Himahleh, a hoihlou lam khang hatlua hilou hiam? Pathian in Sodom leh Gomorrah apat Lota leh a innkuante a pikhia a, Sodom leh Gomorrah a bawlhoih tuankei chi a, thudik kimkhat kia la in, kei ka hoih chi teng in Lamka nuse vek ding i hi duam? ‘Land of Presidents’ chih theih khop a vaihawmtu tamna gam a bang chidan a ngaih poimoh dingte ngai poimohtu ding kidaihlou ahia? Khotang pawlpi hattaktak tuamtuam Lamka phaizang neuchik a dimzen in om mahleh khotang bawlhoihna dia chihtaktak suah a panla ding om nawnlou bangta hi. Panla thei dinmun a ding pawlpi leh mimal inleng, kingengtuah mailou a, sorkar in hichibang khong dou dia kha loh a piakte khong kithuahpih leh nungthuap a panlak taktak hun mahmahta hilou hiam? Lamka khopi chi a deihthohtak a i minloh uh a hoihloulam kia a khopi suak ding hilou hiam?!!

Source: http://zogam.com/index.php?option=com_content&task=view&id=4151

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s