AHUN TAKIN PATHIAN’ KIANG AH KIKMENG IN (Isai 55:6-7)

-Pastor Dr. Hs. Chinsuanthang

THUMASA: I ut-hun hun a pianthak theih hidingin mi tampite’n i ngaihtuah sek uhi. Huchidan hilouin Khasiangthou in ei a thu agen lai leh ahon zol hunlai a om hi. Huchih hunlai in mi’n Khasiangthou nasep leh ahon chialna a ngeingaih kei ualeh anungin ahon sualsual nawnkei ding hi. Huchibang hung chiangin kuama’n hotdamna sang thei dingin kisikna a neithei nawn kei uhi.

MUHBAIH THEIHLAI IN TOUPA KIANGA KIK : Tuhun hehpihna hun ahi a, Khasiangthou in mite lungtangah kisik theihna ding leh Jesu Christ san theihna dingin mi a panpih laitak ahi. Na lungtanga siamlouh kitanna, khial kisikna leh hotdamna na lunggulh gukna Khasiangthou’ nasep ahi. Huailai takin na gitlouhnate tawpsan inla Jesu kiang zuanin ngaihdam ngen lechin aman ahon ngaidam ding hi. Mikhial kisika Pathian kianga ngaihdam ngen a Jesu Christ Toupa dinga bel kuamah ngaihdam louh Pathian in a neikei hi. Ka khelhnate tamlua Pathian in ahon ngaidam utkei ding na chi ahi maithei, Pathian in khelhna kisik kuapeuh ngaihdam utlouh leh ngaihdam zawhlouh a neikei hi. Himahleh Khasiangthou in na lungtanga mikhial na hih ahon kiphawksakna leh Jesu Christ sang dinga ahon chialna na nial aleh huai tuh Pathian in ahon ngaidam ngeingei kei ding hi. Aziakbel na lungtanga Khasiangthou in na hihna ahon theihsak nialkalh na hihmanin Khasiangthou gensiatna leh deihlouhna ahi a, ngaihdam theih na hikei ding hi.

A KIKHEL NUNGA KISIK PHATUAMLOU : Jesu nungzui Juda Iskariot in Jesu a matsaka a khawnunga akisikna amah a dingin bangmah phatuamlou hi. Huaibang in khelhna leng kisik hun a om a, hotdamna san hun leng a om hi. A kikhelnung a kisikna in bangmah phattuamna anei nawn kei hi. Tuhun Pathian in nang mikhial kisika amah kiang zuan dinga ahon saphun ahi. Na khelhnate leng Khasiangthou in ahon theisak a na lungsim tak takin siamlouh na kitan hilou hia ? Kuamah hon theihpihlouh in a guktak in lauhthonna bang, lungmuan louhna leh khamuanlouhna na nei hilou hia ? Na khelhnate na manglam bangin mangin na mu a, na hong khanlawh in na lungtang ah lauhthonna tawh na kidim hilou maw ? Na khelhnate na ngaihtuah chingin na ihmu theikei a na ihmut theihna ding leh na ankam limna ding in zu bang na dawn a, huaite’n lungmuanna leh khamuanna chikmah chiangin ahon pethei kei ding hi. Khasiangthou in na lungtanga thu a gen ziak leh ahon kiphok sak ziakin hiai bang kuamah hon theihpih louh haksatna a gukin na neia huai na niala na lungtang na sukkhauh semsem a Toupa kianga kikna, kisikna leh ngaihdam ngetna na neih utkeileh na tuahsiatni a hongtun chiangin Toupa’n a hon nuihsan ding a, na lungtanga lauhna thupitak ahong tun chiangin Toupa’n ahon chiamnuih sam ding hi, chih na theih poimawh hi (Paunakte 1:26-29)

THUKHITNA: Na khelhnate kisik a, ngaihdam ngen a, Toupa kianga kik dingin Toupa’n a honsam hi. Toupa’n na lungtang a thu a gen laitak ahi a, a hon sap laitak leng ahi. Toupa’n nang muhbaih theih dia a hon saplai ahi chih thei inla, kisik in akiang zuan meng in. Himahleh na khelhnate kisik utlou a hihzom touzel a Toupa’n a hon sapna na nial leh a khawnung in na kisik ding a, thanuam takin a khawnungin Toupa zong mahlechin leng na muh ding in Toupa’n hun a honpe nawn kei ding hi(Paunakte 1:28). Migentheite’ muh ding negu-tagute, Pathian sanga sum deihta zawte, sisan suaha gamtangte, zuaugen hatte, piangthakloupi nasemte, gutate leh khawvel buaia buai a hotdamna limsakloute tengteng in khelhna kisik a topsan ding in Toupa’n hon sapna ngeingaihlou leh nialkalh a na om touhzel aleh alou theilou in na tuahsiatni a hongtung ding a, huihpi banga na launa, pingpei banga na beidotna leh lungkhamna ahong tung ngeingei ding a, huai hun chiangin Toupa Pathian in nang leng ahon nuihsan ding chih thei inla, kuamah panpihtu na nei kei ding hi. Kingaihtuah inla Toupa kiang ah (hehpihna ziak a hun tomchik ahon ngaklai in) kik meng in……

Source: http://zogam.com/index.php?option=com_content&task=view&id=4166&ac=0&Itemid=2

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s