Orissa a gingtute kahna aw ging in honsam !

– Pastor T Thangzasiam“Biakinn bangzah a haltumta ua ? Mimal’ inn bangzah a kangtumta a? Mihing bangzah in a sihlawhta ua ? Khenkhat in 1000 val achi uh. Sorkar in bang panlakna anei a……?”. Hiai dotnate na lungsim in ngaihtuah thakmah in. Dotna mulkimhuai taktak ngenta ahi a, hiai Christian gingtute tungtang dotnate’n gingtute’ sisan a tunkhawm a, pitek leh putek, naupang hatlou leh chau taktakte beidotna khitui hiai dotna in a tunkhawm vek hi. Bangchibang lungsim tawh na ngaihtuah zel ale?

Akipat dan: Swami Laksmananada Sarawati kichi Hindu siampu minthang takmai leh anungzui midang lite: Kishor Pradhan, Amruta Nanda, Puranjan Dachha leh Makata Bakti Moie te ahihleh Aug 23,2008 zankim laiin meltheihlouh 20 vualte’n maituam in Ashram a kithoihlai vabeiin that uhi. Hiai in hon piansak tuh VHP/RSS leh Bajrangdal kichite’n Christian gingtute khutnung hidingin a ngawh ua, a bei ua, numei naupang leh pitek putek tanpha hehpihna tellou in hihbei vek dingin a soisa uhi. A inn leh lou uh biakinn leh Schoolte halsiat sak a om in huhamtak in state pumpi ah hong gamtang uhi.

Christiante thugin ah phuba lakna leh midang huatna, tualthahna himhim phallouh bikbek ahihlam hon theihpihlou ahiding uh maw ? Kum 1999 in Australia Missionary Graham Staine leh a tapa nihte Hindu extremist te’n a hing hallup ua, a thattute ngeileng imvual louhin matkhiak ahi uh. Bhubaneswar leh Cuttack ah lemna lamzui (Peace rally) uh a, huaihun ngeingei in athuakna pen ding bel kuadang hilou in Mrs Graham Staine (Glady Staine) in a pasal leh a tapa nih tunga khutkhate Pathian’ min a a ngaihdam dante khawvel in a theihpihta uhi.Huchipi’n leng bangziak a, banghang a tutung Hindu siampu leh a nugzui mi 4te’ sihna a Christian-te hon ngawhthei ahi ua ? Mi diktatlou in midangte leng diktatlou dingin gingta hikha mawh ken teh !

Missionary Field apanin: President, Restoration of India Mission Orissa report kasim khazek hi. Aug 24 in Baliguada, Kandhamal Dist a om Pastor Stephenson in; biakinn, School leh mimal tenna inn tamtak hihsiat in a omvekta a, Bible a Job bangmai in District tuamtuam akipan siatna thiltungte’n a hon deng zui zungzung hi. Missionary Laekha Pati a soisa ua, a lemtheihna zangin taisuah theihna hunlem amu hi, ataksa tung a bawkgawp vek a chi hi. Tu’n gamnuai ah gamsa bangmai in ka om vek uh a chih behlap hi. Achangin zanmial nuaiah guta bangmaiin aw ging takngial leng suah ngamlouin beidotna in a hontuam chipta a, a nithumna hongtun chiangin pitek kum-70 midingte amau tenna inn halkuang zawihzawih sunga kahna aw gingte, Akhen a inkuan hallupte uh ngaihtuah a kap hawmhawm a omte, akhen lauhna leh gilkialna kithuah ziaka mahni omna tanpha thei mumallou a chauhsiatnate’n a tuamchip gawpvekta hi. Christian hihman a piak uh a ngaihtak ziakin haksatna tuh Christ min in athuakzel ua, kum zabi-21 a tengte adingin hiaibang khop sahkhua ziaka thuak tuh thilmak leh lamdang tak ahi hi. Leitung maikaih a India in akisak theihpih secular-democratic country gamlianpen a thiltung dingin a kimeh keikhop mai a, himahleh a taktak in atung maimah hi.

Thumpih apoimawh uh: State pumhuap incident ahih manin statistical data diktak tu leh tu a theihtheih ahi kei hi. Apumpi ah inn (mimal) – 2,450 a suksiat sak ua, biakinn- 600 vel a suksiat sakta uhi. Abiktakin, Kandhamal district ngial ah biakinn dinglai muhding a om nawnkei chih ahi a, mihing 25 sang a tawmlou thah in aomta ua, sihdan mulkim huaitaktak a thah ahi zel uhi, tu in mihing 4000 veldingte gamnuai ah bitna zongin a kibu ua, Christian khua khenkhatte hihsiat keuhkeuh ahi uhi. Sorkar in Relief camp mun 6 a bawlsak ah mihing 10,000 zel ganhing bang maiin a om lel uhi. Manipur a Christiante tuh gingtu ihihna uh kum-100 chingding ahita; himahleh, Christ ziak a thuakna khatmah leng gending i neikei uh. Ka cross puak giklua chi a zingkal thumna a khitui tawh kapkapte’n zong hibang a huaisia tuak ihikei a, i tate drug ngawlvei khong peuh Cross hisak maite ihi uhi. Himahleh, Orissa a i unau Christ ziak a thuak lellelte na ngaihtuah kha ngei hiam ? Amaute kumkhat lela upa gingtute bang, khakhat lel a upa gingtute bang, kalkhat leh nikhat kia a upa gingtu tanpha a omkha mawhkei ding uh. Van khawpi kialou lam-et ding bangmah neilou in, Christ min in a thuak lellel uhi. Amaute kahna aw ging in honsam hilou lellel hi. Tuni a gingtu saptuam pawl tuamtuamte amaute ading a thumding in ka honchial hi..

Source: http://zogam.com/index.php?option=com_content&task=view&id=4330&ac=0&Itemid=2

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Uncategorized. Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s