Interview | Dr. David Vumlallian Zou

david-Vumlallian-300x277Zo suonte dinga kiletsahpi leh kineppi um tah, tangval fel leh kichuup, laigel taima, thu akip a kawi a sui chitchiet, thu a chetna amu masang mawh hamdoh khollou, sip kinken a um dan siem leh khangsawn, khangja te dinga ngaisutna toh research bawl tinten Pu Dr. David Vumlallian Zou  houlimpina Zokuomthawn Editor Tv. Hausienmuan in Noida a luona inn ah September 11, 2009 ni’n houlimpina va nei hi. A houlimna uh saupi hinanleh tomkim tah in tam anei ah hing kisuo hi.

UK ah bang tan vei na um ei?

Belfast ah 2004 in ka tung a, kum 4 ching lou deu ka va um hi.

PhD ah bang research topic toh kisai na va bawl ei?

Ka topic ahileh ei N.E. India a ‘Print Culture and Identity Politics’ toh kisai ahi. ‘Print Culture’ in missionary te tungtawn a literacy, literature leh khawl a laisut (printing press) chite kizopna a huap hi.

Bang chi dan a UK lutna ding scholarship na mu thei ahiai?

UK a ‘scholarship’ ka mudan tomkim tambang ahi. JNU a M.Phil dissertation ka zaw in, Queen’s University Belfast a sem oja khat in ka dissertation sim di’n ahing ngen hi. Ka laigelh amu tah in ama nuai a sem din ahing dei a, ken zong, ‘Sir, full scholarship ka mu thei leh, UK a PhD bawl ding ka ut hi’ chi’n ka gen hi. Aman’n sil ni bawl di’n ahing kohmu hi:

  • M.Phil chapter khat leh ni sun (publish) teitei ding.
  • Ph.D a dia ‘Research Proposal’ hoitah khat Queen’s University Belfast a ‘submit’ ding.

Ken zong India a ‘scholarly journal’ mun ni ah ka M.Phil chapter te ka thot pai a, vangphat huai tah in ahing pom sah uhi. JNU a MA leh M.Phil a First Class ka mu tuahtuah ban ah, ka publication leh PhD research proposal te Belfast a Professor ni leh thum in ahing lunglutpi mama uhi. Amau recommend na toh UK scholarship mun ni mun thum ah ka apply hi. Kinepna ka nei nonlou nua, kum khat zou vel in Queen’s University a Academic Planning Grant in ka scholarship application ahing pom sah ta hi.

Siamzilna sang (higher education) lam a na lochinna ziah khen khat nang gen thei diai?

Shillong a BA ka zaw in, lawi leh gualte bang in, kei zong JNU entrance exam di’n ka na tou ve sam hi. BA a English Major hinan leng, gintat lou pi’n History ah JNU admission ka mu lai zang hi. UPSC adi’a History pen kithang mama ahi ziah in, ken zong Civil Service lam mittuh deu in Delhi ka na zuan hi.

Awlawl in UPSC history syllabus leh JNU history syllabus kibatloudan ka’ng theikhia hi. JNU History pen ‘research-oriented’ ahia, ka tempeina lam hi’n ka thei hi. Grade hoi pipi ka mu a, ka Professor te’n zong ahing pahtat uhi.

Inn lam a nu-le-pa te’n pen MA zou a sepna khat neu leh lian leh sui pai di’n ahing dei uhi. Hinanleh lungsim kibatpi lawi-le-gual te’n ka lunglutna ‘academic career’ atawp tan peipi di’n ahing hanthon uhi. Mihing in i tempeina, i lunglutna leh i ‘talent’ thei khiat a, tuami hatna (‘calling’) atawp tan guntuh tah a zui di’a ei-le-ei kisuthalawp (motivate) zing poimo ka sa hi.

UK leh India a education peidan te a kibatlouna bang um in na thei ei?

UK siamzilna in ‘creative learning’ a pibawl a, ei India ah ‘rote learning’ (by-heart) a ki pibawl hi. Sap gam a sangnaupang te’n Question dotdan ding zil ua, ei gam ah a Answer dih gen ding ki pibawl hi. Sapkangte pen siamna zangtu (user) leh bawltu (producer) ahi ua, ei India te pen ‘producer’ sang in ‘user’ maimai kihi zaw hi. UK university te’n teaching sang in research pibawl zaw ua, ei India ah research sang in teaching ki uang bawl zaw hi. UK a university te’n ‘Publish or Perish!’ achi mai uhi. Kum 6-7 dan in UK in Research Assessment Exercise (RAE) a bawl zel a, university in ‘referred’ publication anei dung zui in Solkar in funding a pie hi. Ninanleh ei India ah lecturer a pension tan a ‘peer reviewed’ research publication nei lou zong um thei hi. UK university te lochinna thuguh khat ahileh a zalenna (autonomy) uh ahi. Ei Indian university te pen solkar in ‘autonomy’ a pe ut sih a, AIIMS leh IIT chite nasan zong solkar in a subuai zing hi.

Manipur education reform di’n bang poimo in na mu ei?

Taking Oath as ZSP Delhi Prez - 2001Taking Oath as ZSP Delhi Prez – 2001

A kisam tampi umte lah ah, Teacher Training poimo pen in ka thei hi. DIET leh B.Ed training institute Manipur a um sunsun te puaphat ngai di’n ka gingta hi. Adiah in tulai tah a HRD Minister Pu Kapil Sibal in CBSE class X leh XII a exam a subei bang a ei Manipur in zong Grading System i zui thei pai na di’a private leh solkar oja-te training bawl ding kisam in ka thei hi. Pu Kapil Sibal in tami exam reform in ‘rote learning’ apat ‘creative learning’ apiansah di’n kinepna anei hi.

ZSP Study Forum a ahatsemna di’n bang poimo nasa ei?

Study Forum ah khat vei ka kihal kha pan a, ka gintat sang in piching zaw ka sa hi. Tulai tah in Central Service exam focus a kibawl ahia, a loching mama in ka thei a, hichi zawleh chi genbe ding ka thei tuan sih hi.

ZSP Library Collection pen maban ah ‘fund raising’ bawl a, kehlet thei di’n ka gingta hi. Competition laibu ban ah, English fiction leh non-fiction hoi khenkhat kikoibe thei hileh simtute’n General Awareness ban ah English ham lam nasatah in akhanletpi ding uhi. Grammar bu apat English zilte sang ma in zong novel apat zilte English siam bai zaw uhi. Aban ah, Reference bu leh Encyclopaedia zong maban ah tup di’n hoi ka sa.

ZSP te dinmun bang chi’n na mu ei? Maban bang chi panlah leh hoi na sa ei?

Nidang in Delhi ah ZSP in bangkim na sai a, tu’a ZYO mopuahnate zong ana sem hi. ‘Role definition’ kichian um lou ziah in Delhi ah buaina leh kitheisiam louna neuhneuh ana um kha hi. Tu’n Delhi a ZSP in silzousia sai lou a, a ‘core competence’ maimai focus leh hatdi’n ka gingta hi. Student Association ahiziah in Study Forum, Library Collection, News bulletin sut chite pahtat huai ka sa mama hi. Maban a uang zaw sem a bawl di’n ka hanthawn hi! Tam teng ban ah Debating Society & Reading Club zong bawl ding a lunggul huai hi. Tum tahtah lei, seminar leh magazine zong kum khat a khat vei beh kibawl zou sam lou ding e?

Educational Background

  • Class X        St. Paul’s Institute, CCpur
  • Class XII        Lamka College, CCpur
  • BA (Eng. Hons.)    St. Anthony’s College, Shillong
  • MA (History)        Centre for Historical Studies, JNU, New Delhi
  • M.Phil (History)    Centre for Historical Studies, JNU, New Delhi
  • PhD (Geography)    Queen’s University Belfast, UK
Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Interview and tagged , . Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s