UZO Education Policy leh Sangnaupangte

~ Kamlianlal Zou, JNU Delhi

Bang chih a jong ana um kha ngailou tutung UZO HQ in Education Policy ahing bawl khiat te uh ingaisun chieng in kipahpih huai kasa ma ma hi. Ahin ei ipu Zou jal in mi masate ihih na utoh sil bawlkhe masa, aphut khe masa, silhoi mu doh masa chihte hun sotlai apat in ina bawl khin ta uhi. A sulnua jui ding leh puoh pha ding i umlou chieng un silhoi pen jong ahoilou pen ahing suoh kia jel hi. Tambang education policy British ten India a vaihawm khum lai apan in ana um ngaita a, India in Zalenna amu jou in jong ana um tou kia lai a, ei a toh aki khiat na ahileh mi a Education Bill pass ahi khit chiang in ki suh piching sawm tei tei a, ei a pen a su piching ding koima ki umlou jel hi.

Zomi/Chin/Kuki group lah a jong bang chih lai apat in laisim na lam ah ina ke ngiam jing uhi. UZO Education policy ahing ging khiat leh Delhi ka tun kum Freshers’ Meet ki man a Freshers’ introduction ana ki bawl in sil tampi hing gel doh sah hi. Introduce ki bawl dan nop joulou leh hoilou kachi na hilou in mi 80 val Freshers’ paikhom chia iki letsah pih lai un, college admission leh laisim dia pai mi 10 jong ana kipha jou sih a, bang jieh adiei chih ngaisutna lianpi tuni tan in ka nei nalai hi. Tam mai hilou in kumteng in Delhi ah Freshers’ mi 50-70 kikal lah ipha jing ua ahin college admission dia pai mi 5-7 kikal lah vel ihi gige uhi. Laisim a um leh nasem a um ratio en ding hilei 10:1 vel hi ding in ka ging ta a, midang/namdang te laisim a tamdan te ingaisun chieng in ilungsim ana sah ma ma hi.

Innlam sum leh pai ahatsat seng jieh in laisiam tah tah aban zom joulou leh state pulam pawt doh jou lou in a um ta ua, malam a namsung a jah thei leh kisuanpih thei ding mi bang jah hiam te class XII ah ana khol phot ta uhi. Innlam ah khenkhat te class XII a joh uleh private teacher asem lawi, neilou pumpum a sum met la jen a Manipur Government nuoi a sepna lei sawm loi ki dim khin ta hi. Delhi leh city dang a pai sun sun te lah asim beh ding hilou in private company a muh bang bang sem( MBBS) ding ngen in ipai ua, maban ah educated chih gentah lou in literacy rate jong hing ngiam ma ma ding a, inam ading in kiet ngiam na lienpen hing suah ding hi.

Hahsa leh genthei a gamdang a college kai joulou a i um lai un jong kinepna dang hing um veve nalai hi. Delhi a college kaina ding in mikhat ah hakhat in Rs 5000-7000 vel poimoh a, ahin Jawaharlal Nehru University (JNU) ah admission mu thei te a ding in nu leh pa buaipih lou in University in scholarship apieh teng in lai hoitah a sim thei ahi hi.

Gentehna ding in University in ha teng in under graduate leh post graduate Rs 2000 + scholarship tuam tuam pia a, tuale M.Phil/Ph.D bawl ut te a ding in jong scholarship tampi innlam subuai lou a hin thei na ding om nalai hi. Sum sen nalam ah Hostel fee haguh ( 6 months) a ding in Rs 325 hi a, mess fee ( breakfast+ buh leh meh tutah) hakhat Rs 1300 val hi ngailou hi. Government scholarship toh noptah a India a university hoipen a laisim na hi mai ding hi. Foreign language lam abawl ut te a ding bang in BA/MA na joh leh company in Rs 40,000 nuai hing pelou ding uhi. Eijong a khangtou lou dia tung pasian laitan kihi tuan lou hi. Mailam hun a inam khankhuo ding tu hun a sangpang pang ten pan ilah dan ua kinga ahi. Mi sim moh ding i utlou uleh UZO Education Policy Behieng apat Delhi tan a jui tung a Education Revolution pat hun ahi ta hi.

Source: Zokuomthawn | February 2010 – Vol. No. VIII, Issue No. XVII

Advertisements

About Zou Sangnaupang Pawlpi Delhi

Zou Students' Association Delhi Branch
This entry was posted in Articles and tagged . Bookmark the permalink.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s